೭. ಗಬ್ಭಿನೀವಗ್ಗೋ

೧-೨. ಗಬ್ಭಿನೀಆದಿಸಿಕ್ಖಾಪದವಣ್ಣನಾ

ಪಠಮಂ ಉತ್ತಾನತ್ಥಮೇವ.

ಥನೇ ಭವಂ ಥಞ್ಞಂ, ಖೀರಂ. ಯಂ ಪಾಯೇತೀತಿ ಯಂ ದಾರಕಂ ಪಾಯೇತಿ.

ಗಬ್ಭಿನೀಆದಿಸಿಕ್ಖಾಪದವಣ್ಣನಾ ನಿಟ್ಠಿತಾ.

೩. ಪಠಮಸಿಕ್ಖಮಾನಸಿಕ್ಖಾಪದವಣ್ಣನಾ

ಪದಭಾಜನೇ ವುತ್ತನಯೇನಾತಿ ‘‘ಪಾಣಾತಿಪಾತಾ ವೇರಮಣಿಂ ದ್ವೇ ವಸ್ಸಾನಿ ಅವೀತಿಕ್ಕಮ್ಮ ಸಮಾದಾನಂ ಸಮಾದಿಯಾಮಿ…ಪೇ… ವಿಕಾಲಭೋಜನಾ ವೇರಮಣಿಂ ದ್ವೇ ವಸ್ಸಾನಿ ಅವೀತಿಕ್ಕಮ್ಮ ಸಮಾದಾನಂ ಸಮಾದಿಯಾಮೀ’’ತಿ (ಪಾಚಿ. ೧೦೭೯) ಪದಭಾಜನಸಮೀಪೇ ಅಟ್ಠುಪ್ಪತ್ತಿಯಂ ವುತ್ತನಯೇನ. ಇಮಾ ಪನ ಛ ಸಿಕ್ಖಾಯೋ ಸಟ್ಠಿವಸ್ಸಾಯಪಿ ಪಬ್ಬಜಿತಾಯ ದಾತಬ್ಬಾಯೇವ, ನ ಏತಾಸು ಅಸಿಕ್ಖಿತಾ ಉಪಸಮ್ಪಾದೇತಬ್ಬಾ.

ಪಠಮಸಿಕ್ಖಮಾನಸಿಕ್ಖಾಪದವಣ್ಣನಾ ನಿಟ್ಠಿತಾ.

೪-೫. ದುತಿಯಸಿಕ್ಖಮಾನಾದಿಸಿಕ್ಖಾಪದವಣ್ಣನಾ

ಪದಭಾಜನೇ ವುತ್ತಾ ಉಪಸಮ್ಪದಾಸಮ್ಮುತಿ ನ ದಿನ್ನಾ ಹೋತೀತಿ ಪದಭಾಜನಸಮೀಪೇ ಅಟ್ಠುಪ್ಪತ್ತಿಯಂ ವುತ್ತಾ ಉಪಸಮ್ಪದಾಸಮ್ಮುತಿ ಞತ್ತಿದುತಿಯಾಯ ಕಮ್ಮವಾಚಾಯ ನ ದಿನ್ನಾ ಹೋತಿ.

ಪಞ್ಚಮಂ ಉತ್ತಾನತ್ಥಮೇವ.

ದುತಿಯಸಿಕ್ಖಮಾನಾದಿಸಿಕ್ಖಾಪದವಣ್ಣನಾ ನಿಟ್ಠಿತಾ.

೬-೧೦. ದುತಿಯಗಿಹಿಗತಾದಿಸಿಕ್ಖಾಪದವಣ್ಣನಾ

ದಸವಸ್ಸಾಯ ಗಿಹಿಗತಾಯ ಸಿಕ್ಖಾಸಮ್ಮುತಿಂ ದತ್ವಾ ಪರಿಪುಣ್ಣದ್ವಾದಸವಸ್ಸಂ ಉಪಸಮ್ಪಾದೇತುಂ ವಟ್ಟತಿ.

ಸತ್ತಮಅಟ್ಠಮನವಮದಸಮಾನಿ ಉತ್ತಾನತ್ಥಾನೇವ.

ದುತಿಯಗಿಹಿಗತಾದಿಸಿಕ್ಖಾಪದವಣ್ಣನಾ ನಿಟ್ಠಿತಾ.

ಗಬ್ಭಿನೀವಗ್ಗೋ ಸತ್ತಮೋ.