೩. ನಗ್ಗವಗ್ಗೋ

೧-೨. ನಗ್ಗಾದಿಸಿಕ್ಖಾಪದವಣ್ಣನಾ

ಇದನ್ತಿ ಇದಂ ಉದಕಸಾಟಿಕಚೀವರಂ.

ದುತಿಯಂ ಉತ್ತಾನತ್ಥಮೇವ.

ನಗ್ಗಾದಿಸಿಕ್ಖಾಪದವಣ್ಣನಾ ನಿಟ್ಠಿತಾ.

೩. ಚೀವರಸಿಬ್ಬನಸಿಕ್ಖಾಪದವಣ್ಣನಾ

ವಿಸಿಬ್ಬೇತ್ವಾತಿ ವಿಜಟೇತ್ವಾ. ಧುರಂ ನಿಕ್ಖಿತ್ತಮತ್ತೇತಿ ಧುರೇ ನಿಕ್ಖಿತ್ತಮತ್ತೇ, ಧುರಂ ನಿಕ್ಖಿಪಿತ್ವಾ ಸಚೇಪಿ ಪಚ್ಛಾ ಸಿಬ್ಬತಿ, ಆಪತ್ತಿಯೇವಾತಿ ಅತ್ಥೋ.

ಚೀವರಸಿಬ್ಬನಸಿಕ್ಖಾಪದವಣ್ಣನಾ ನಿಟ್ಠಿತಾ.

೪. ಸಙ್ಘಾಟಿಚಾರಸಿಕ್ಖಾಪದವಣ್ಣನಾ

‘‘ಇದಂ ಮೇ ಚೀವರಂ ಮಹಗ್ಘಂ ಈದಿಸೇ ಚೋರಭಯೇ ನ ಸಕ್ಕಾ ಧಾರೇತುನ್ತಿ ಏವರೂಪಾಸು ಆಪದಾಸೂ’’ತಿ ಏತ್ಥ ಪಾಠೋ. ಸೋ ಪನ ಕಾಕಪದಸಞ್ಜನಿತಮೋಹೇಹಿ ಲೇಖಕೇಹಿ ಉಪರಿಸಿಕ್ಖಾಪದೇ ಲಿಖಿತೋ. ಕಿಞ್ಚಾಪಿ ತತ್ಥ ಲಿಖಿತೋ, ಏತ್ಥೇವ ಪನ ದಟ್ಠಬ್ಬೋ.

ಸಙ್ಘಾಟಿಚಾರಸಿಕ್ಖಾಪದವಣ್ಣನಾ ನಿಟ್ಠಿತಾ.

೫. ಚೀವರಸಙ್ಕಮನೀಯಸಿಕ್ಖಾಪದವಣ್ಣನಾ

ಆಪದಾಸು ವಾ ಧಾರೇತೀತಿ ಸಚೇ ಅಪಾರುತಂ ವಾ ಅನಿವತ್ಥಂ ವಾ ಚೋರಾ ಹರನ್ತಿ, ಏವರೂಪಾಸೂ ಆಪದಾಸು ಧಾರೇತಿ, ಅನಾಪತ್ತಿ.

ಚೀವರಸಙ್ಕಮನೀಯಸಿಕ್ಖಾಪದವಣ್ಣನಾ ನಿಟ್ಠಿತಾ.

೬. ಗಣಚೀವರಸಿಕ್ಖಾಪದವಣ್ಣನಾ

ಅಞ್ಞಸ್ಮಿಂ ಪರಿಕ್ಖಾರೇತಿ ಯತ್ಥ ಕತ್ಥಚಿ ಥಾಲಕಾದೀನಂ ವಾ ಸಪ್ಪಿತೇಲಾದೀನಂ ವಾ ಅಞ್ಞತರಸ್ಮಿಂ. ‘‘ಸಮಗ್ಘಕಾಲೇ ದಸ್ಸಥಾ’’ತಿ ಏವಂ ಆನಿಸಂಸಂ ದಸ್ಸೇತ್ವಾ ನಿವಾರೇನ್ತಿಯಾತಿ ‘‘ಕಿತ್ತಕಂ ಅಗ್ಘನಕಂ ದಾತುಕಾಮತ್ಥಾ’’ತಿ ಪುಚ್ಛಿತ್ವಾ (ಪಾಚಿ. ಅಟ್ಠ. ೯೦೯) ‘‘ಏತ್ತಕಂ ನಾಮಾ’’ತಿ ವುತ್ತೇ ‘‘ಆಗಮೇಥ ತಾವ, ಇದಾನಿ ವತ್ಥಂ ಮಹಗ್ಘಂ, ಕತಿಪಾಹೇನ ಕಪ್ಪಾಸೇ ಆಹಟೇ ಸಮಗ್ಘಂ ಭವಿಸ್ಸತಿ, ತಸ್ಮಿಂ ಕಾಲೇ ದಸ್ಸಥಾ’’ತಿ ಏವಂ ಆನಿಸಂಸಂ ದಸ್ಸೇತ್ವಾ ನಿವಾರೇನ್ತಿಯಾ.

ಗಣಚೀವರಸಿಕ್ಖಾಪದವಣ್ಣನಾ ನಿಟ್ಠಿತಾ.

೭-೧೦. ಪಟಿಬಾಹನಾದಿಸಿಕ್ಖಾಪದವಣ್ಣನಾ

ಆನಿಸಂಸಂ ದಸ್ಸೇತ್ವಾ ಪಟಿಬಾಹನ್ತಿಯಾತಿ ‘‘ಏಕಿಸ್ಸಾ ಏಕಂ ಸಾಟಕಂ ನಪ್ಪಹೋತಿ, ಆಗಮೇಥ ತಾವ, ಕತಿಪಾಹೇನ ಉಪ್ಪಜ್ಜಿಸ್ಸತಿ, ತತೋ ಭಾಜೇಸ್ಸಾಮಾ’’ತಿ (ಪಾಚಿ. ಅಟ್ಠ. ೯೧೫) ಏವಂ ಆನಿಸಂಸಂ ದಸ್ಸೇತ್ವಾ ಪಟಿಬಾಹನ್ತಿಯಾ ಅನಾಪತ್ತಿ.

ಅಟ್ಠಮನವಮಾನಿ ಉತ್ತಾನತ್ಥಾನೇವ.

ಸೇಸನ್ತಿ ‘‘ಧಮ್ಮಿಕೇ ವೇಮತಿಕಾಯಾ’’ತಿಆದಿಕಂ ಅವಸೇಸಂ. ತತ್ಥ ಆನಿಸಂಸಂ ದಸ್ಸೇತ್ವಾ ಪಟಿಬಾಹನ್ತಿಯಾತಿ ‘‘ಭಿಕ್ಖುನಿಸಙ್ಘೋ ಜಿಣ್ಣಚೀವರೋ, ಕಥಿನಾನಿಸಂಸಮೂಲಕೋ ಮಹಾಲಾಭೋ’’ತಿ (ಪಾಚಿ. ಅಟ್ಠ. ೯೩೧) ಏವರೂಪಂ ಆನಿಸಂಸಂ ದಸ್ಸೇತ್ವಾ ಪಟಿಬಾಹನ್ತಿಯಾ ಅನಾಪತ್ತಿ.

ಪಟಿಬಾಹನಾದಿಸಿಕ್ಖಾಪದವಣ್ಣನಾ ನಿಟ್ಠಿತಾ.

ನಗ್ಗವಗ್ಗೋ ತತಿಯೋ.