೧. ಲಸುಣವಗ್ಗೋ

೧. ಲಸುಣಸಿಕ್ಖಾಪದವಣ್ಣನಾ

‘‘ಲಸುಣ’’ನ್ತಿ ಕಿಞ್ಚಾಪಿ ಅವಿಸೇಸೇನ ವುತ್ತಂ, ತಥಾಪಿ ಮಗಧೇಸು ಜಾತಂ ಲಸುಣಮೇವ ಇಧಾಧಿಪ್ಪೇತಂ, ತಮ್ಪಿ ಭಣ್ಡಿಕಲಸುಣಮೇವಾತಿ ಆಹ ಮಗಧರಟ್ಠೇ ಜಾತ’’ನ್ತಿಆದಿ.

ಭಣ್ಡಿಕಲಸುಣನ್ತಿ ಪೋಟ್ಟಲಿಕಲಸುಣಮೇವ, ಸಮ್ಪುಣ್ಣಮಿಞ್ಜಾನಮೇತಂ ಅಧಿವಚನಂ. ತೇನಾಹ ‘‘ನ ಏಕದ್ವಿತಿಮಿಞ್ಜಕ’’ನ್ತಿ. ಅಜ್ಝೋಹಾರೇ ಅಜ್ಝೋಹಾರೇತಿ (ಪಾಚಿ. ಅಟ್ಠ. ೭೯೫) ಏತ್ಥ ಸಚೇ ದ್ವೇ ತಯೋ ಭಣ್ಡಿಕೇ ಏಕತೋಯೇವ ಸಙ್ಖಾದಿತ್ವಾ ಅಜ್ಝೋಹರತಿ, ಏಕಂ ಪಾಚಿತ್ತಿಯಂ. ಭಞ್ಜಿತ್ವಾ ಏಕೇಕಮಿಞ್ಜಕಂ ಖಾದನ್ತಿಯಾ ಪನ ಪಯೋಗಗಣನಾಯ ಪಾಚಿತ್ತಿಯಾನಿ.

ಪಲಣ್ಡುಕಾದೀನಂ ವಣ್ಣೇನ ವಾ ಮಿಞ್ಜಾಯ ವಾ ನಾನಾತ್ತಂ ವೇದಿತಬ್ಬಂ – ವಣ್ಣೇನ ತಾವ ಪಲಣ್ಡುಕೋ ನಾಮ ಪಣ್ಡುವಣ್ಣೋ ಹೋತಿ, ಭಞ್ಜನಕೋ ಲೋಹಿತವಣ್ಣೋ, ಹರಿತಕೋ ಹರಿತಪಣ್ಣವಣ್ಣೋ. ಮಿಞ್ಜಾಯ ಪನ ಪಲಣ್ಡುಕಸ್ಸ ಏಕಾ ಮಿಞ್ಜಾ ಹೋತಿ, ಭಞ್ಜನಕಸ್ಸ ದ್ವೇ, ಹರಿತಕಸ್ಸ ತಿಸ್ಸೋ. ಚಾಪಲಸುಣೋ ಅಮಿಞ್ಜಕೋ. ಅಙ್ಕುರಮತ್ತಮೇವ ಹಿ ತಸ್ಸ ಹೋತಿ. ಮಹಾಪಚ್ಚರಿಯಾದೀಸು ಪನ ‘‘ಪಲಣ್ಡುಕಸ್ಸ ತೀಣಿ ಮಿಞ್ಜಾನಿ, ಭಞ್ಜನಕಸ್ಸ ದ್ವೇ, ಹರಿತಕಸ್ಸ ಏಕ’’ನ್ತಿ (ಪಾಚಿ. ಅಟ್ಠ. ೭೯೭) ವುತ್ತಂ. ಏತೇ ಪಲಣ್ಡುಕಾದಯೋ ಸಭಾವೇನೇವ ವಟ್ಟನ್ತಿ. ಸೂಪಸಮ್ಪಾಕಾದೀಸು ಪನ ಮಾಗಧಕಮ್ಪಿ ವಟ್ಟತಿ. ತಞ್ಹಿ ಪಚ್ಚಮಾನೇಸು ಮುಗ್ಗಸೂಪಾದೀಸು ವಾ ಮಚ್ಛಮಂಸವಿಕತಿಯಾ ವಾ ತೇಲೇ ವಾ ಬದರಸಾಳವಾದೀಸು ವಾ ಅಮ್ಬಿಲಸಾಕಾದೀಸು ವಾ ಉತ್ತರಿಭಙ್ಗೇಸು ವಾ ಯತ್ಥ ಕತ್ಥಚಿ ಅನ್ತಮಸೋ ಯಾಗುಭತ್ತೇಪಿ ಪಕ್ಖಿತ್ತಂ ವಟ್ಟತಿ. ಬದರಸಾಳವಂ (ಸಾರತ್ಥ. ಟೀ. ಪಾಚಿತ್ತಿಯ ೩.೭೯೩-೭೯೭) ನಾಮ ಬದರಫಲಾನಿ ಸುಕ್ಖಾಪೇತ್ವಾ ಚುಣ್ಣೇತ್ವಾ ಕತ್ತಬ್ಬಾ ಖಾದನೀಯವಿಕತಿ.

ಲಸುಣಸಿಕ್ಖಾಪದವಣ್ಣನಾ ನಿಟ್ಠಿತಾ.

೨. ಸಮ್ಬಾಧಲೋಮಸಿಕ್ಖಾಪದವಣ್ಣನಾ

‘‘ಪಟಿಚ್ಛನ್ನೋಕಾಸೇ’’ತಿ ಏತಸ್ಸ ವಿಭಾಗದಸ್ಸನತ್ಥಂ ‘‘ಉಪಕಚ್ಛಕೇಸು ಚ ಮುತ್ತಕರಣೇ ಚಾತಿ ಅತ್ಥೋ’’ತಿ ವುತ್ತಂ.

ಆಬಾಧಪಚ್ಚಯಾತಿ ಕಣ್ಡುಕಚ್ಛುಆದಿಆಬಾಧಪಚ್ಚಯಾ ಸಂಹರಾಪೇನ್ತಿಯಾ ಅನಾಪತ್ತಿ. ‘‘ಭಿಕ್ಖುಸ್ಸ ಏತ್ಥ ಚ ಲಸುಣೇ ಚ ದುಕ್ಕಟ’’ನ್ತಿ (ವಜಿರ. ಟೀ. ಪಾಚಿತ್ತಿಯ ೮೦೦) ಪೋರಾಣಾ.

ಸಮ್ಬಾಧಲೋಮಸಿಕ್ಖಾಪದವಣ್ಣನಾ ನಿಟ್ಠಿತಾ.

೩. ತಲಘಾತಕಸಿಕ್ಖಾಪದವಣ್ಣನಾ

ತಲಘಾತಕೇತಿ ಮತ್ಥಕೇ ಪಹಾರದಾನೇ, ತಞ್ಚ ಖೋ ತಲಂ ‘‘ಮುತ್ತಕರಣೇ ಪಹಾರಂ ದೇತೀ’’ತಿ (ಪಾಚಿ. ೮೦೪) ಪದಭಾಜನಿಯಂವುತ್ತತ್ತಾ ‘‘ಮುತ್ತಕರಣಸ್ಸಾ’’ತಿ ವಿಞ್ಞಾಯತೀತಿ ಆಹ ‘‘ಮುತ್ತಕರಣಸ್ಸ ತಲಘಾತನೇ’’ತಿ. ಪುರಿಮನಯೇನೇವ ಸಾಣತ್ತಿಕನ್ತಿ ಅತ್ತನೋ ಅತ್ಥಾಯ ಅಞ್ಞಂ ಆಣಾಪೇನ್ತಿಯಾ ಸಾಣತ್ತಿಕಂ.

ತಲಘಾತಕಸಿಕ್ಖಾಪದವಣ್ಣನಾ ನಿಟ್ಠಿತಾ.

೪. ಜತುಮಟ್ಠಕಸಿಕ್ಖಾಪದವಣ್ಣನಾ

ವತ್ಥುವಸೇನೇತಂ ವುತ್ತನ್ತಿ ‘‘ಜತುಮಟ್ಠಕೇ’’ತಿ ಏತಂ ನಿದಾನವಸೇನ ಉಪ್ಪನ್ನಸ್ಸ ವತ್ಥುನೋ ವಸೇನೇವ ವುತ್ತಂ. ಯಂ ಕಿಞ್ಚಿ ಪನ ದಣ್ಡಕಂ ಪವೇಸೇನ್ತಿಯಾ ಆಪತ್ತಿಯೇವ. ತೇನಾಹ ‘‘ಕಾಮರಾಗೇನ ಪನಾ’’ತಿಆದಿ.

ಜತುಮಟ್ಠಕಸಿಕ್ಖಾಪದವಣ್ಣನಾ ನಿಟ್ಠಿತಾ.

೫. ಉದಕಸುದ್ಧಿಕಸಿಕ್ಖಾಪದವಣ್ಣನಾ

ಆದಾತಬ್ಬನ್ತಿ ಪವೇಸೇತಬ್ಬಂ. ಅಗ್ಗಪಬ್ಬನ್ತಿ ಕೇಸಗ್ಗಮತ್ತಮ್ಪಿ ಅಗ್ಗಪಬ್ಬಂ. ತತಿಯಂ ಪಬ್ಬಂ ಪವೇಸೇತೀತಿ ಕೇಸಗ್ಗಮತ್ತಮ್ಪಿ ತತಿಯಂ ಪಬ್ಬಂ ಪವೇಸೇತಿ. ವುತ್ತಞ್ಹೇತಂ ಸಮನ್ತಪಾಸಾದಿಕಾಯಂ (ಪಾಚಿ. ಅಟ್ಠ. ೮೧೨) ‘‘ಗಮ್ಭೀರತೋ ದ್ವಿನ್ನಂ ಪಬ್ಬಾನಂ ಉಪರಿ ಕೇಸಗ್ಗಮತ್ತಮ್ಪಿ ಪವೇಸೇನ್ತಿಯಾ ಪಾಚಿತ್ತಿಯ’’ನ್ತಿ.

ಅತಿಗಮ್ಭೀರಂ ಉದಕಸುದ್ಧಿಕಂ ಆದಿಯನವತ್ಥುಸ್ಮಿನ್ತಿ ಅತಿಅನ್ತೋ ಪವೇಸೇತ್ವಾ ಉದಕಧೋವನಕರಣವತ್ಥುಸ್ಮಿಂ. ಉದಕಸುದ್ಧಿಪಚ್ಚಯೇನ (ಸಾರತ್ಥ. ಟೀ. ಪಾಚಿತ್ತಿಯ ೩.೮೧೨) ಪನ ಸತಿಪಿ ಫಸ್ಸಸ್ಸಾದಿಯನೇ ಯಥಾವುತ್ತಪರಿಚ್ಛೇದೇ ಅನಾಪತ್ತಿ.

ಉದಕಸುದ್ಧಿಕಸಿಕ್ಖಾಪದವಣ್ಣನಾ ನಿಟ್ಠಿತಾ.

೬. ಉಪತಿಟ್ಠನಸಿಕ್ಖಾಪದವಣ್ಣನಾ

ತಕ್ಕಾದೀಸು ವಾ ಅಞ್ಞತರೇನಾತಿ ತಕ್ಕದಧಿಮತ್ಥುರಸಖೀರಾದೀಸು ಅಞ್ಞತರೇನ. ಯಾಯ ಕಾಯಚಿ ಬೀಜನಿಯಾತಿ ಅನ್ತಮಸೋ ಚೀವರಕಣ್ಣಂ ಉಪಾದಾಯ ಯಾಯ ಕಾಯಚಿ ಬೀಜನಿಯಾ.

ಇಮಂ ಪಿವಥಾತಿ ಇಮಂ ಪಾನೀಯಂ ವಾ ಸೂಪಾದಿಂ ವಾ ಪಿವಥ. ಇಮಿನಾ ಬೀಜಥಾತಿ ಇಮಿನಾ ತಾಲವಣ್ಟೇನ ಬೀಜಥ. ದಾಪೇನ್ತಿಯಾತಿ ಅಞ್ಞೇನ ಉಭಯಮ್ಪಿ ದಾಪೇನ್ತಿಯಾ.

ಉಪತಿಟ್ಠನಸಿಕ್ಖಾಪದವಣ್ಣನಾ ನಿಟ್ಠಿತಾ.

೭. ಆಮಕಧಞ್ಞಸಿಕ್ಖಾಪದವಣ್ಣನಾ

ತಸ್ಮಾತಿ ಯಸ್ಮಾ ವಿಞ್ಞತ್ತಿ ಚೇವ ಭೋಜನಞ್ಚ ಪಮಾಣಂ, ತಸ್ಮಾ. ನ ಕೇವಲಞ್ಚೇತ್ಥ ಪಟಿಗ್ಗಹಣೇಯೇವ ದುಕ್ಕಟಂ ಹೋತಿ, ಪಟಿಗ್ಗಣ್ಹಿತ್ವಾ ಪನ ಅರಞ್ಞತೋ ಆಹರಣೇಪಿ ಸುಕ್ಖಾಪನೇಪಿ ವದ್ದಲಿದಿವಸೇ ಭಜ್ಜನತ್ಥಾಯ ಉದ್ಧನಸಜ್ಜನೇಪಿ ಕಪಲ್ಲಸಜ್ಜನೇಪಿ ದಬ್ಬಿಸಜ್ಜನೇಪಿ ದಾರೂನಿ ಆದಾಯ ಅಗ್ಗಿಕರಣೇಪಿ ಕಪಲ್ಲಮ್ಹಿ ಧಞ್ಞಪಕ್ಖಿಪನೇಪಿ ದಬ್ಬಿಯಾ ಸಙ್ಘಟ್ಟನೇಸುಪಿ ಕೋಟ್ಟನತ್ಥಂ ಉದುಕ್ಖಲಮುಸಲಾದಿಸಜ್ಜನೇಸುಪಿ ಕೋಟ್ಟನಪಪ್ಫೋಟನಧೋವನಾದೀಸುಪಿ ಯಾವ ಮುಖೇ ಠಪೇತ್ವಾ ಅಜ್ಝೋಹರಣತ್ಥಂ ದನ್ತೇಹಿ ಸಙ್ಖಾದತಿ, ತಾವ ಸಬ್ಬಪ್ಪಯೋಗೇಸು ದುಕ್ಕಟಾನೀತಿ ಆಹ ‘‘ಪಟಿಗ್ಗಹಣತೋ ಪಟ್ಠಾಯ ಯಾವ ದನ್ತೇಹಿ ಸಂಖಾದನಂ, ತಾವ ಪುಬ್ಬಪ್ಪಯೋಗೇಸು ದುಕ್ಕಟಾನೀ’’ತಿ.

ಆಮಕಧಞ್ಞಸಿಕ್ಖಾಪದವಣ್ಣನಾ ನಿಟ್ಠಿತಾ.

೮. ಪಠಮಉಚ್ಚಾರಛಡ್ಡನಸಿಕ್ಖಾಪದವಣ್ಣನಾ

ತಿರೋಕುಟ್ಟೇತಿ ಘರಕುಟ್ಟಸ್ಸ ಪರಭಾಗೇ. ತಿರೋಪಾಕಾರೇತಿ ಪರಿಕ್ಖೇಪಪಾಕಾರಸ್ಸ ತಿರೋಭಾಗೇ, ತೇ ಚ ಖೋ ಕುಟ್ಟಪಾಕಾರಾ ಇಟ್ಠಕಸಿಲದಾರೂನಂ ವಸೇನ ತಿಪ್ಪಕಾರಾತಿ ಆಹ ‘‘ಯಸ್ಸ ಕಸ್ಸಚಿ ಕುಟ್ಟಸ್ಸ ವಾ ಪಾಕಾರಸ್ಸ ವಾ ಪರತೋ’’ತಿ. ಸಬ್ಬಾನಿಪೇತಾನಿ ಏಕತೋ ಛಡ್ಡೇನ್ತಿಯಾತಿ ಏತಾನಿ ಚತ್ತಾರಿಪಿ ವತ್ಥೂನಿ ಏಕತೋ ಛಡ್ಡೇನ್ತಿಯಾ. ಪಾಟೇಕ್ಕಂ ಪನ ಛಡ್ಡೇನ್ತಿಯಾ ವತ್ಥುಗಣನಾಯ ಆಪತ್ತಿಯೋ. ಆಣತ್ತಿಯಮ್ಪಿ ಏಸೇವ ನಯೋ.

ಭಿಕ್ಖುಸ್ಸ ದುಕ್ಕಟನ್ತಿ ಭಿಕ್ಖುಸ್ಸ ಸಬ್ಬತ್ಥ ದುಕ್ಕಟಂ.

ಪಠಮಉಚ್ಚಾರಛಡ್ಡನಸಿಕ್ಖಾಪದವಣ್ಣನಾ ನಿಟ್ಠಿತಾ.

೯. ದುತಿಯಉಚ್ಚಾರಛಡ್ಡನಸಿಕ್ಖಾಪದವಣ್ಣನಾ

ಭಿಕ್ಖುನಿಯಾಪೀತಿ ಪಿ-ಸದ್ದೇನ ಭಿಕ್ಖುಂ ಸಮುಚ್ಚಿನೋತಿ. ಅನಿಕ್ಖಿತ್ತಬೀಜೇಸು (ಪಾಚಿ. ಅಟ್ಠ. ೮೩೦) ಪನ ಖೇತ್ತೇಸು ಕೋಣಾದೀಸು ವಾ ಅಸಞ್ಜಾತರೋಪಿಮೇಸು ಖೇತ್ತಮರಿಯಾದಾದೀಸು ವಾ ಛಡ್ಡೇತುಂ ವಟ್ಟತಿ. ಮನುಸ್ಸಾನಂ ಕಚವರಛಡ್ಡನಟ್ಠಾನೇಪಿ ವಟ್ಟತಿಯೇವ. ಛಡ್ಡಿತಖೇತ್ತೇತಿ ಮನುಸ್ಸೇಸು ಸಸ್ಸಂ ಉದ್ಧರಿತ್ವಾ ಗತೇಸು ಛಡ್ಡಿತಖೇತ್ತಂ ನಾಮ ಹೋತಿ, ತತ್ಥ ವಟ್ಟತಿ. ಯತ್ಥ ಪನ ‘‘ಲಾಯಿತಮ್ಪಿ ಪುಬ್ಬಣ್ಣಾದಿ ಪುನ ಉಟ್ಠಹಿಸ್ಸತೀ’’ತಿ ರಕ್ಖನ್ತಿ, ತತ್ಥ ಯಥಾವತ್ಥುಕಮೇವ. ಸಾಮಿಕೇ ಅಪಲೋಕೇತ್ವಾತಿ ಏತ್ಥ ಖೇತ್ತಪಾಲಕಾ, ಆರಾಮಾದಿಗೋಪಕಾ ಚ ಸಾಮಿಕಾವ. ಇಮಿನಾ ಚ ಸಙ್ಘಸನ್ತಕೇ ಭಿಕ್ಖುಸ್ಸ ಛಡ್ಡೇತುಂ ವಟ್ಟತಿ ಸಙ್ಘಪರಿಯಾಪನ್ನತ್ತಾ, ನ ಭಿಕ್ಖುನೀನಂ. ಭಿಕ್ಖುನೀನಂ ಪನ ಅತ್ತನೋ ಸನ್ತಕೇ ಭಿಕ್ಖುಸನ್ತಕೇ ವುತ್ತನಯೇನೇವ ವಟ್ಟತೀತಿ ದಸ್ಸೇತಿ, ಏವಂ ಸನ್ತೇಪಿ ಸಾರುಪ್ಪವಸೇನ ಕಾತಬ್ಬಂ.

ದುತಿಯಉಚ್ಚಾರಛಡ್ಡನಸಿಕ್ಖಾಪದವಣ್ಣನಾ ನಿಟ್ಠಿತಾ.

೧೦. ನಚ್ಚಗೀತಸಿಕ್ಖಾಪದವಣ್ಣನಾ

ನಚ್ಚನ್ತಿ ನಟಾದಯೋ ವಾ ನಚ್ಚನ್ತು, ಸೋಣ್ಡಾ ವಾ ಅನ್ತಮಸೋ ಮೋರಸುವಮಕ್ಕಟಾದಯೋಪಿ, ಸಬ್ಬಮೇತಂ ನಚ್ಚಮೇವ. ತೇನಾಹ ‘‘ನಚ್ಚನ್ತಿ ಅನ್ತಮಸೋ ಮೋರನಚ್ಚಮ್ಪೀ’’ತಿ. ಗೀತನ್ತಿ ನಟಾದೀನಂ ವಾ ಗೀತಂ ಹೋತು, ಅರಿಯಾನಂ ಪರಿನಿಬ್ಬಾನಕಾಲೇ ರತನತ್ತಯಗುಣೂಪಸಂಹಿತಂ ಸಾಧುಕೀಳಿತಗೀತಂ ವಾ, ಅನ್ತಮಸೋ ‘‘ದನ್ತಗೀತಮ್ಪಿ ಗಾಯಿಸ್ಸಾಮಾ’’ತಿ ಪುಬ್ಬಭಾಗೇ ಓಕೂಜನ್ತಾ ಕರೋನ್ತಿ, ಸಬ್ಬಮೇತಂ ಗೀತಮೇವ. ತೇನಾಹ ‘‘ಗೀತನ್ತಿ ಅನ್ತಮಸೋ ಧಮ್ಮಭಾಣಕಗೀತಮ್ಪೀ’’ತಿ. ತತ್ಥ ಧಮ್ಮಭಾಣಕಗೀತಂ ನಾಮ ಅಸಞ್ಞತಭಿಕ್ಖೂನಂ ತಂ ತಂ ವತ್ತಂ ಭಿನ್ದಿತ್ವಾ ಅತಿದೀಘಂ ಕತ್ವಾ ಗೀತಸ್ಸರೇನ ಧಮ್ಮಭಣನಂ, ತಮ್ಪಿ ನೇವ ಭಿಕ್ಖುನೋ, ನ ಭಿಕ್ಖುನೀನಂ ವಟ್ಟತಿ. ತಥಾ ಹಿ ವುತ್ತಂ ಪರಮತ್ಥಜೋತಿಕಾಯ ಖುದ್ದಕಟ್ಠಕಥಾಯ (ಖು. ಪಾ. ಅಟ್ಠ. ೨.ಪಚ್ಛಿಮಪಞ್ಚಸಿಕ್ಖಾಪದವಣ್ಣನಾ) ‘‘ಧಮ್ಮೂಪಸಂಹಿತಂ ಗೀತಂ ವಟ್ಟತಿ, ಗೀತೂಪಸಂಹಿತೋ ಪನ ಧಮ್ಮೋ ನ ವಟ್ಟತೀ’’ತಿ. ತಸ್ಮಾ ಧಮ್ಮಂ ಭಣನ್ತೇನ ಜಾತಕವತ್ತಾದಿಂ ತಂ ತಂ ವತ್ತಂ ಅವಿನಾಸೇತ್ವಾ ಚತುರಸ್ಸೇನ (ಚೂಳವ. ಅಟ್ಠ. ೨೪೯) ವತ್ತೇನ ಪರಿಮಣ್ಡಲಾನಿ ಪದಬ್ಯಞ್ಜನಾನಿ ದಸ್ಸೇತಬ್ಬಾನಿ. ವಾದಿತನ್ತಿ ತನ್ತಿಬದ್ಧಾದಿವಾದನೀಯಭಣ್ಡವಾದಿತಂ ವಾ ಹೋತು, ಕುಟಭೇರಿವಾದಿತಂ ವಾ ಅನ್ತಮಸೋ ಉದಕಭೇರಿವಾದಿತಮ್ಪಿ, ಸಬ್ಬಮೇವೇತಂ ವಾದಿತಮೇವ. ತೇನಾಹ ‘‘ವಾದಿತನ್ತಿ ಅನ್ತಮಸೋ ಉದಕಭೇರಿವಾದಿತ’’ನ್ತಿ. ಯಂ ಪನ ನಿಟ್ಠುಭನ್ತೀ ವಾ ಸಾಸಙ್ಕೇ ವಾ ಠಿತಾ ಅಚ್ಛರಿಕಂ ವಾ ಫೋಟೇತಿ, ಪಾಣಿಂ ವಾ ಪಹರತಿ, ತತ್ಥ ಅನಾಪತ್ತಿ. ದಸ್ಸನೇನ ಚೇತ್ಥ ಸವನಮ್ಪಿ ಸಙ್ಗಹಿತಂ ವಿರೂಪೇಕಸೇಸನಯೇನ. ಆಲೋಚನಸಭಾವತಾಯ ವಾ ಪಞ್ಚನ್ನಂ ವಿಞ್ಞಾಣಾನಂ ಸವನಕಿರಿಯಾಯಪಿ ದಸ್ಸನಸಙ್ಖೇಪಸಬ್ಭಾವತೋ ‘‘ದಸ್ಸನಾಯ’’ಇಚ್ಚೇವ ವುತ್ತನ್ತಿ ಆಹ ‘‘ಏತೇಸು ಯಂ ಕಿಞ್ಚಿ ದಸ್ಸನಾಯ ಗಚ್ಛನ್ತಿಯಾ’’ತಿ. ಯತ್ಥ ಠಿತಾತಿ ಏವಂ ಗನ್ತ್ವಾ ಯಸ್ಮಿಂ ಪದೇಸೇ ಠಿತಾ.

ನನು ಚ ಸಯಂನಚ್ಚನಾದೀಸು ಪಾಚಿತ್ತಿಯಂ ಪಾಳಿಯಂ ನ ವುತ್ತಂ, ಅಥ ಕಥಂ ಗಹೇತಬ್ಬನ್ತಿ ಆಹ ‘‘ಸಬ್ಬಅಟ್ಠಕಥಾಸು ವುತ್ತ’’ನ್ತಿ, ಇಮಿನಾ ಪಾಳಿಯಂ ಅವುತ್ತೇಪಿ ಅಟ್ಠಕಥಾಪಮಾಣೇನ ಗಹೇತಬ್ಬನ್ತಿ ದಸ್ಸೇತಿ. ಸಮುಟ್ಠಾನಾದೀನಿ ಏಳಕಲೋಮಸದಿಸಾನೀತಿ ಪನ ಮಾತಿಕಾಗತಪಾಚಿತ್ತಿಯಸ್ಸೇವ ವಸೇನ ವುತ್ತಂ, ಸಬ್ಬೇಸಂ ವಸೇನ ಪನ ಛಸಮುಟ್ಠಾನನ್ತಿ ಗಹೇತಬ್ಬಂ. ‘‘ಆರಾಮೇ ಠತ್ವಾ’’ತಿ ಇದಂ ನಿದಸ್ಸನಮತ್ತಂ ಸೇಸಇರಿಯಾಪಥೇಹಿ ಯುತ್ತಾಯ ಪಸ್ಸನ್ತಿಯಾ ಅನಾಪತ್ತಿಯಾ ಇಚ್ಛಿತಬ್ಬತ್ತಾ. ಇತರಥಾ ಹಿ ನಿಸಿನ್ನಾಪಿ ಪಸ್ಸಿತುಂ ನ ಲಭೇಯ್ಯ. ‘‘ಪಸ್ಸಿಸ್ಸಾಮೀ’’ತಿ ವಿಹಾರತೋ ವಿಹಾರಂ ಗಚ್ಛನ್ತಿಯಾ ಆಪತ್ತಿಯೇವ. ಆಸನಸಾಲಾಯ ನಿಸಿನ್ನಾ ಪಸ್ಸತಿ, ಅನಾಪತ್ತಿ, ‘‘ಪಸ್ಸಿಸ್ಸಾಮೀ’’ತಿ ಉಟ್ಠಹಿತ್ವಾ ಗಚ್ಛನ್ತಿಯಾ ಆಪತ್ತಿ. ವೀಥಿಯಂ ಠತ್ವಾ ಗೀವಂ ಪರಿವತ್ತೇತ್ವಾ ಪಸ್ಸನ್ತಿಯಾಪಿ ಆಪತ್ತಿಯೇವ. ಭಿಕ್ಖುಸ್ಸಾಪಿ ಏಸೇವ ನಯೋ, ಆಪತ್ತಿಭೇದೋವ ನಾನಂ.

ನಚ್ಚಗೀತಸಿಕ್ಖಾಪದವಣ್ಣನಾ ನಿಟ್ಠಿತಾ.

ಲಸುಣವಗ್ಗೋ ಪಠಮೋ.