೫. ಉಬ್ಭಜಾಣುಮಣ್ಡಲಸಿಕ್ಖಾಪದವಣ್ಣನಾ

ಉಬ್ಭಕಪ್ಪರನ್ತಿ ದುತಿಯಮಹಾಸನ್ಧಿತೋ ಉದ್ಧಂ. ಇತೋ ಚಿತೋ ಚ ಸಞ್ಚರಣನ್ತಿ ಹತ್ಥಸ್ಸ ವಾ ಕಾಯಸ್ಸ ವಾ ತಿರಿಯಂ ಇತೋ ಚಿತೋ ಚ ಸಞ್ಚರಣಂ.

ಏಕತೋಅವಸ್ಸುತೇತಿ (ಪಾಚಿ. ಅಟ್ಠ. ೬೬೨) ಭಿಕ್ಖುನಿಯಾ ಅವಸ್ಸವೇ, ಭಿಕ್ಖುನಿಯಾ ಕಾಯಸಂಸಗ್ಗರಾಗೇನ ಅವಸ್ಸುತಭಾವೇ ಸತೀತಿ ಅತ್ಥೋ. ಭಿಕ್ಖುನಿಯಾ ವಸೇನೇವ ಚ ಏಕತೋಅವಸ್ಸುತಭಾವೋ ಗಹೇತಬ್ಬೋ. ವುತ್ತಞ್ಹೇತಂ ಸಮನ್ತಪಾಸಾದಿಕಾಯಂ (ಪಾಚಿ. ಅಟ್ಠ. ೬೬೨) –

‘‘ಏಕತೋಅವಸ್ಸುತೇತಿ ಏತ್ಥ ಕಿಞ್ಚಾಪಿ ‘ಏಕತೋ’ತಿ ಅವಿಸೇಸೇನ ವುತ್ತಂ, ತಥಾಪಿ ಭಿಕ್ಖುನಿಯಾ ಏವ ಅವಸ್ಸುತೇ ಸತಿ ಅಯಂ ಆಪತ್ತಿಭೇದೋ ವುತ್ತೋತಿ ವೇದಿತಬ್ಬೋ’’ತಿ.

ಪುರಿಸಸ್ಸ ಕಾಯನ್ತಿ ಪುರಿಸಸ್ಸ ಯಂ ಕಞ್ಚಿ ಕಾಯಂ. ಉಭತೋಅವಸ್ಸುತೇಪೀತಿ ಭಿಕ್ಖುನಿಯಾ ಚೇವ ಪುರಿಸಸ್ಸ ಚ ಕಾಯಸಂಸಗ್ಗರಾಗೇನ ಅವಸ್ಸುತಭಾವೇ ಸತಿಪಿ. ಕಾಯೇನಾತಿ ಯಥಾಪರಿಚ್ಛಿನ್ನೇನ ಅತ್ತನೋ ಕಾಯೇನ. ಕಾಯಪ್ಪಟಿಬದ್ಧನ್ತಿ ಪುರಿಸಸ್ಸ ಕಾಯಪ್ಪಟಿಬದ್ಧಂ. ಅವಸೇಸಕಾಯೇನ ವಾತಿ ಯಥಾಪರಿಚ್ಛಿನ್ನಕಾಯತೋ ಅವಸೇಸೇನ ಕಾಯೇನ, ಉಬ್ಭಕ್ಖಕಅಧೋಜಾಣುಮಣ್ಡಲಅಧೋಕಪ್ಪರಸಙ್ಖಾತೇನ ಕಾಯೇನಾತಿ ವುತ್ತಂ ಹೋತಿ. ತಸ್ಸ ಕಾಯನ್ತಿ ಅವಸ್ಸುತಸ್ಸ ತಸ್ಸ ಪುರಿಸಸ್ಸ ಯಂ ಕಞ್ಚಿ ಕಾಯಂ. ಯಥಾ ಚೇತ್ಥ ಸಯಂ ಆಮಸನ್ತಿಯಾ ಥುಲ್ಲಚ್ಚಯಂ, ಏವಂ ತಸ್ಸ ಆಮಸನಂ ಸಾದಿಯನ್ತಿಯಾಪೀತಿ ದಟ್ಠಬ್ಬಂ. ಪುರಿಸಸ್ಸ ಕಾಯಸಂಸಗ್ಗರಾಗೋ ನತ್ಥೀತಿ ಪುರಿಸಸ್ಸ ಮೇಥುನರಾಗೋ, ಗೇಹಸಿತಪೇಮಂ, ಸುದ್ಧಚಿತ್ತಂ ವಾ. ಅವಸೇಸೇತಿ ಪಾರಾಜಿಕಖೇತ್ತತೋ ಅವಸೇಸೇ. ಕಾಯಪ್ಪಟಿಬದ್ಧೇನ ಕಾಯಪ್ಪಟಿಬದ್ಧಾದಿಭೇದೇತಿ ‘‘ಕಾಯಪ್ಪಟಿಬದ್ಧೇನ ಕಾಯಪ್ಪಟಿಬದ್ಧಂ ಆಮಸತಿ, ಆಪತ್ತಿ ದುಕ್ಕಟಸ್ಸಾ’’ತಿಆದಿಕೇ (ಪಾಚಿ. ೬೫೯, ೬೬೨) ಸಬ್ಬವಾರೇ. ‘‘ಅಸಞ್ಚಿಚ್ಚಾ’’ತಿಆದೀಸು ವಿರಜ್ಝಿತ್ವಾ ವಾ ಆಮಸನ್ತಿಯಾ, ಅಞ್ಞವಿಹಿತಾಯ ವಾ, ‘‘ಅಯಂ ಪುರಿಸೋ’’ತಿ ವಾ ‘‘ಇತ್ಥೀ’’ತಿ ವಾ ಅಜಾನನ್ತಿಯಾ ವಾ, ತೇನ ಫುಟ್ಠಾಯಪಿ ತಂ ಫಸ್ಸಂ ಅಸ್ಸಾದಯನ್ತಿಯಾ ವಾ ಆಮಸನೇಪಿ ಸತಿ ಅನಾಪತ್ತಿ.

ಉಬ್ಭಜಾಣುಮಣ್ಡಲಸಿಕ್ಖಾಪದವಣ್ಣನಾ ನಿಟ್ಠಿತಾ.