೪. ಸೂಚಿಘರಸಿಕ್ಖಾಪದವಣ್ಣನಾ

ಚತುತ್ಥೇ ಭೇದನಮೇವ ಭೇದನಕಂ, ತಂ ಅಸ್ಸ ಅತ್ಥೀತಿ ಭೇದನಕಂ. ತಸ್ಮಾ ಏವರೂಪೇ ಸೂಚಿಘರೇ ಕರಣಕಾರಾಪನೇಸು ದುಕ್ಕಟಂ, ಪಟಿಲಾಭೇನ ಪನ ತಂ ಭಿನ್ದಿತ್ವಾ ಪಾಚಿತ್ತಿಯಂ ದೇಸೇತಬ್ಬಂ.

ಸಕ್ಕೇಸು ಸಮ್ಬಹುಲೇ ಭಿಕ್ಖೂ ಆರಬ್ಭ ಬಹುಸೂಚಿಘರವಿಞ್ಞಾಪನವತ್ಥುಸ್ಮಿಂ ಪಞ್ಞತ್ತಂ, ಸಾಧಾರಣಪಞ್ಞತ್ತಿ, ಸಾಣತ್ತಿಕಂ, ಅತ್ತನಾ ವಿಪ್ಪಕತಂ ಅತ್ತನಾ ವಾ, ಪರೇಹಿ ವಾ, ಪರೇಹಿ ವಿಪ್ಪಕತಮ್ಪಿ ಅತ್ತನಾ ವಾ, ಪರೇಹಿ ವಾ ಪರಿಯೋಸಾಪೇತ್ವಾ ಲಭನ್ತಸ್ಸ ಚತುಕ್ಕಪಾಚಿತ್ತಿಯಂ. ಅಞ್ಞಸ್ಸತ್ಥಾಯ ಕರಣಕಾರಾಪನೇಸು, ಅಞ್ಞೇನ ಕತಂ ಪಟಿಲಭಿತ್ವಾ ಪರಿಭುಞ್ಜನೇ ದುಕ್ಕಟಂ. ಗಣ್ಠಿಕೇ ಅರಣಿಕೇ ವಿಧೇ ಅಞ್ಜನಿಯಾ ಅಞ್ಜನಿಸಲಾಕಾಯ ವಾಸಿಜಟೇ ಉದಕಪುಞ್ಛನಿಯಾತಿ ಏತೇಸು ಯಂಕಿಞ್ಚಿ ಅಟ್ಠಿಆದೀಹಿ ಕರೋನ್ತಸ್ಸ, ಉಮ್ಮತ್ತಕಾದೀನಞ್ಚ ಅನಾಪತ್ತಿ. ಸೂಚಿಘರತಾ, ಅಟ್ಠಿಮಯಾದಿತಾ, ಅತ್ತನೋ ಅತ್ಥಾಯ ಕರಣಂ ವಾ ಕಾರಾಪೇತ್ವಾ ವಾ ಪಟಿಲಾಭೋತಿ ಇಮಾನೇತ್ಥ ತೀಣಿ ಅಙ್ಗಾನಿ. ಸಮುಟ್ಠಾನಾದೀನಿ ಸಞ್ಚರಿತ್ತಸದಿಸಾನೀತಿ.

ಸೂಚಿಘರಸಿಕ್ಖಾಪದವಣ್ಣನಾ ನಿಟ್ಠಿತಾ.