೧೨. ಪಞ್ಹಾಪುಚ್ಛನಸಿಕ್ಖಾಪದವಣ್ಣನಾ

ದ್ವಾದಸಮೇ ಅನೋಕಾಸಕತನ್ತಿ ‘‘ಅಸುಕಸ್ಮಿಂ ನಾಮ ಠಾನೇ ಪುಚ್ಛಾಮೀ’’ತಿ ಏವಂ ಅಕತಓಕಾಸಂ, ತಸ್ಮಾ ಸುತ್ತನ್ತೇ ಓಕಾಸಂ ಕಾರಾಪೇತ್ವಾ ವಿನಯಂ ವಾ ಅಭಿಧಮ್ಮಂ ವಾ ಪುಚ್ಛನ್ತಿಯಾ ಪಾಚಿತ್ತಿಯಂ. ಸೇಸೇಸುಪಿ ಏಸೇವ ನಯೋ, ಸಬ್ಬಸೋ ಅಕಾರಿತೇ ಪನ ವತ್ತಬ್ಬಮೇವ ನತ್ಥಿ.

ಸಾವತ್ಥಿಯಂ ಸಮ್ಬಹುಲಾ ಭಿಕ್ಖುನಿಯೋ ಆರಬ್ಭ ಅನೋಕಾಸಕತಂ ಭಿಕ್ಖುಂ ಪಞ್ಹಂ ಪುಚ್ಛನವತ್ಥುಸ್ಮಿಂ ಪಞ್ಞತ್ತಂ. ತತ್ಥ ತತ್ಥ ಓಕಾಸಂ ಕಾರಾಪೇತ್ವಾ ಪುಚ್ಛನ್ತಿಯಾ, ಅನೋದಿಸ್ಸ ಓಕಾಸಂ ಕಾರಾಪೇತ್ವಾ ಯತ್ಥ ಕತ್ಥಚಿ ಪುಚ್ಛನ್ತಿಯಾ, ಉಮ್ಮತ್ತಿಕಾದೀನಞ್ಚ ಅನಾಪತ್ತಿ. ಭಿಕ್ಖುಸ್ಸ ಅನೋಕಾಸಕಾರಾಪನಂ, ಪಞ್ಹಂ ಪುಚ್ಛನನ್ತಿ ಇಮಾನೇತ್ಥ ದ್ವೇ ಅಙ್ಗಾನಿ. ಸಮುಟ್ಠಾನಾದೀನಿ ಪದಸೋಧಮ್ಮಸದಿಸಾನಿ, ಇದಂ ಪನ ಕಿರಿಯಾಕಿರಿಯನ್ತಿ.

ಪಞ್ಹಾಪುಚ್ಛನಸಿಕ್ಖಾಪದವಣ್ಣನಾ ನಿಟ್ಠಿತಾ.