೧. ರಾಜಾಗಾರಸಿಕ್ಖಾಪದವಣ್ಣನಾ

ಚಿತ್ತಾಗಾರವಗ್ಗಸ್ಸ ಪಠಮೇ ರಾಜಾಗಾರನ್ತಿ ರಞ್ಞೋ ಕೀಳನಘರಂ. ಚಿತ್ತಾಗಾರನ್ತಿ ಕೀಳನಚಿತ್ತಸಾಲಂ. ಆರಾಮನ್ತಿ ಕೀಳನಉಪವನಂ. ಉಯ್ಯಾನನ್ತಿ ಕೀಳನುಯ್ಯಾನಂ. ಪೋಕ್ಖರಣಿನ್ತಿ ಕೀಳನಪೋಕ್ಖರಣಿಂ. ದಸ್ಸನಾಯಾತಿ ‘‘ಏತೇಸು ಯಂಕಿಞ್ಚಿ ಪಸ್ಸಿಸ್ಸಾಮೀ’’ತಿ ಗಚ್ಛನ್ತಿಯಾ ಪದೇ ಪದೇ ದುಕ್ಕಟಂ, ಯತ್ಥ ಠತ್ವಾ ಪಸ್ಸತಿ, ತತ್ಥ ಪದಂ ಅನುದ್ಧರಿತ್ವಾ ಪಞ್ಚಾಪಿ ಪಸ್ಸನ್ತಿಯಾ ಏಕಾವ ಆಪತ್ತಿ. ಸಚೇ ಪನ ತಂ ತಂ ವಿಲೋಕೇತ್ವಾ ಪಸ್ಸತಿ, ಗೀವಂ ಪರಿವತ್ತನಪ್ಪಯೋಗಗಣನಾಯ ಆಪತ್ತಿಯೋ, ನ ಉಮ್ಮೀಲನಗಣನಾಯ.

ಸಾವತ್ಥಿಯಂ ಛಬ್ಬಗ್ಗಿಯಾ ಭಿಕ್ಖುನಿಯೋ ಆರಬ್ಭ ಚಿತ್ತಾಗಾರಂ ದಸ್ಸನಾಯ ಗಮನವತ್ಥುಸ್ಮಿಂ ಪಞ್ಞತ್ತಂ, ಭಿಕ್ಖುಸ್ಸ ಸಬ್ಬತ್ಥ ದುಕ್ಕಟಂ, ಅವಸೇಸೋ ವಿನಿಚ್ಛಯೋ ನಚ್ಚದಸ್ಸನಸಿಕ್ಖಾಪದೇ ವುತ್ತನಯೇನೇವ ವೇದಿತಬ್ಬೋತಿ.

ರಾಜಾಗಾರಸಿಕ್ಖಾಪದವಣ್ಣನಾ ನಿಟ್ಠಿತಾ.