೪. ತುವಟ್ಟವಗ್ಗೋ

೧. ಏಕಮಞ್ಚತುವಟ್ಟನಸಿಕ್ಖಾಪದವಣ್ಣನಾ

ತುವಟ್ಟವಗ್ಗಸ್ಸ ಪಠಮೇ ತುವಟ್ಟೇಯ್ಯುನ್ತಿ ನಿಪಜ್ಜೇಯ್ಯುಂ. ತಾಸು ಪನ ಏಕಾಯ ವಾ ನಿಪನ್ನಾಯ ಅಪರಾ ನಿಪಜ್ಜತು, ದ್ವೇಪಿ ವಾ ಸಹೇವ ನಿಪಜ್ಜನ್ತು, ದ್ವಿನ್ನಮ್ಪಿ ಪಾಚಿತ್ತಿಯಂ.

ಸಾವತ್ಥಿಯಂ ಸಮ್ಬಹುಲಾ ಭಿಕ್ಖುನಿಯೋ ಆರಬ್ಭ ದ್ವಿನ್ನಂ ಏಕಮಞ್ಚೇ ತುವಟ್ಟನವತ್ಥುಸ್ಮಿಂ ಪಞ್ಞತ್ತಂ, ಸಚೇ ಪನ ಏಕಾಯ ನಿಪನ್ನಾಯ ಏಕಾ ನಿಸೀದತಿ, ಉಭೋ ವಾ ನಿಸೀದನ್ತಿ, ತಾಸಂ, ಉಮ್ಮತ್ತಿಕಾದೀನಞ್ಚ ಅನಾಪತ್ತಿ. ಏಕಮಞ್ಚತಾ, ದ್ವಿನ್ನಂ ತುವಟ್ಟನನ್ತಿ ಇಮಾನೇತ್ಥ ದ್ವೇ ಅಙ್ಗಾನಿ. ಸಮುಟ್ಠಾನಾದೀನಿ ಏಳಕಲೋಮಸದಿಸಾನೀತಿ.

ಏಕಮಞ್ಚತುವಟ್ಟನಸಿಕ್ಖಾಪದವಣ್ಣನಾ ನಿಟ್ಠಿತಾ.

೨. ಏಕತ್ಥರಣತುವಟ್ಟನಸಿಕ್ಖಾಪದವಣ್ಣನಾ

ದುತಿಯೇ ಏಕಂ ಅತ್ಥರಣಞ್ಚೇವ ಪಾವುರಣಞ್ಚ ಏತಾಸನ್ತಿ ಏಕತ್ಥರಣಪಾವುರಣಾ, ಸಂಹಾರಿಮಾನಂ ಪಾವಾರತ್ಥರಣಕಟಸಾರಕಾದೀನಂ ಏಕಂ ಅನ್ತಂ ಅತ್ಥರಿತ್ವಾ ಏಕಂ ಪಾರುಪಿತ್ವಾ ತುವಟ್ಟೇನ್ತೀನಮೇತಂ ಅಧಿವಚನಂ. ಪಾಚಿತ್ತಿಯನ್ತಿ ತಂಯೇವ ಅತ್ಥರಿತ್ವಾ ತಂ ಪಾರುಪಿತ್ವಾ ನಿಪಜ್ಜನ್ತೀನಂ ಪಾಚಿತ್ತಿಯಂ.

ಸಾವತ್ಥಿಯಂ ಸಮ್ಬಹುಲಾ ಭಿಕ್ಖುನಿಯೋ ಆರಬ್ಭ ಏವಂ ತುವಟ್ಟನವತ್ಥುಸ್ಮಿಂ ಪಞ್ಞತ್ತಂ, ತಿಕಪಾಚಿತ್ತಿಯಂ, ಅತ್ಥರಣೇ ವಾ ಪಾವುರಣೇ ವಾ ಏಕಸ್ಮಿಂ ದುಕ್ಕಟಂ, ನಾನತ್ಥರಣಪಾವುರಣೇ ದ್ವಿಕದುಕ್ಕಟಂ. ತಸ್ಮಿಂ ಪನ ನಾನತ್ಥರಣಪಾವುರಣಸಞ್ಞಾಯ, ವವತ್ಥಾನಂ ದಸ್ಸೇತ್ವಾ ನಿಪಜ್ಜನ್ತಿಯಾ, ಉಮ್ಮತ್ತಿಕಾದೀನಞ್ಚ ಅನಾಪತ್ತಿ. ಸೇಸಂ ಪಠಮಸದಿಸಮೇವಾತಿ.

ಏಕತ್ಥರಣತುವಟ್ಟನಸಿಕ್ಖಾಪದವಣ್ಣನಾ ನಿಟ್ಠಿತಾ.

೩. ಅಫಾಸುಕರಣಸಿಕ್ಖಾಪದವಣ್ಣನಾ

ತತಿಯೇ ಅಫಾಸುನ್ತಿ ‘‘ಇಮಿನಾ ಇಮಿಸ್ಸಾ ಅಫಾಸು ಭವಿಸ್ಸತೀ’’ತಿ ಅನಾಪುಚ್ಛಾ ಪುರತೋ ಚಙ್ಕಮನಟ್ಠಾನನಿಸ್ಸಜ್ಜಾದಯೋ ವಾ ಉದ್ದಿಸಉದ್ದಿಸಾಪನಪರಿಪುಚ್ಛನಸಜ್ಝಾಯಂ ವಾ ಕರೋನ್ತಿಯಾ ಚಙ್ಕಮನೇ ನಿವತ್ತನಗಣನಾಯ, ಠಾನಾದೀಸು ಪಯೋಗಗಣನಾಯ, ಉದ್ದೇಸಾದೀಸು ಪದಗಣನಾಯ ಪಾಚಿತ್ತಿಯಂ.

ಸಾವತ್ಥಿಯಂ ಥುಲ್ಲನನ್ದಂ ಆರಬ್ಭ ಸಞ್ಚಿಚ್ಚ ಅಫಾಸುಕರಣವತ್ಥುಸ್ಮಿಂ ಪಞ್ಞತ್ತಂ, ತಿಕಪಾಚಿತ್ತಿಯಂ, ಅನುಪಸಮ್ಪನ್ನಾಯ ತಿಕದುಕ್ಕಟಂ, ನ ಅಫಾಸುಕಾಮತಾಯ, ಆಪುಚ್ಛಾ ಪುರತೋ ಚಙ್ಕಮನಾದೀನಿ ಕರೋನ್ತಿಯಾ, ಉಮ್ಮತ್ತಿಕಾದೀನಞ್ಚ ಅನಾಪತ್ತಿ. ಉಪಸಮ್ಪನ್ನತಾ, ಅಫಾಸುಕಾಮತಾ, ಅಫಾಸುಕರಣಂ, ಅನಾಪುಚ್ಛನನ್ತಿ ಇಮಾನೇತ್ಥ ಚತ್ತಾರಿ ಅಙ್ಗಾನಿ. ಸಮುಟ್ಠಾನಾದೀನಿ ಅದಿನ್ನಾದಾನಸದಿಸಾನಿ, ಇದಂ ಪನ ಕಿರಿಯಾಕಿರಿಯಂ, ದುಕ್ಖವೇದನನ್ತಿ.

ಅಫಾಸುಕರಣಸಿಕ್ಖಾಪದವಣ್ಣನಾ ನಿಟ್ಠಿತಾ.

೪. ನಉಪಟ್ಠಾಪನಸಿಕ್ಖಾಪದವಣ್ಣನಾ

ಚತುತ್ಥೇ ದುಕ್ಖಿತನ್ತಿ ಗಿಲಾನಂ. ಸಹಜೀವಿನಿನ್ತಿ ಸದ್ಧಿವಿಹಾರಿನಿಂ. ನೇವ ಉಪಟ್ಠಹೇಯ್ಯಾತಿ ತಸ್ಸಾ ಉಪಟ್ಠಾನಂ ಸಯಂ ವಾ ಅಕರೋನ್ತಿಯಾ, ಪರೇಹಿ ವಾ ಅಕಾರೇನ್ತಿಯಾ ಧುರಂ ನಿಕ್ಖಿತ್ತಮತ್ತೇ ಪಾಚಿತ್ತಿಯಂ.

ಸಾವತ್ಥಿಯಂ ಥುಲ್ಲನನ್ದಂ ಆರಬ್ಭ ದುಕ್ಖಿತಂ ಸಹಜೀವಿನಿಂ ಅನುಪಟ್ಠಾನವತ್ಥುಸ್ಮಿಂ ಪಞ್ಞತ್ತಂ, ಅನ್ತೇವಾಸಿನಿಯಾ ವಾ ಅನುಪಸಮ್ಪನ್ನಾಯ ವಾ ದುಕ್ಕಟಂ, ದಸಸು ಅಞ್ಞತರನ್ತರಾಯೇ ಸತಿ ಪರಿಯೇಸಿತ್ವಾ ಅಲಭನ್ತಿಯಾ, ಗಿಲಾನಾಯ, ಆಪದಾಸು, ಉಮ್ಮತ್ತಿಕಾದೀನಞ್ಚ ಅನಾಪತ್ತಿ. ಗಿಲಾನತಾ, ಸದ್ಧಿವಿಹಾರಿತಾ, ಅನುಞ್ಞಾತಕಾರಣಾಭಾವೋ, ಉಪಟ್ಠಾನೇ ಧುರನಿಕ್ಖೇಪೋತಿ ಇಮಾನೇತ್ಥ ಚತ್ತಾರಿ ಅಙ್ಗಾನಿ. ಸಮುಟ್ಠಾನಾದೀನಿ ಸಮನುಭಾಸನಸದಿಸಾನೀತಿ.

ನಉಪಟ್ಠಾಪನಸಿಕ್ಖಾಪದವಣ್ಣನಾ ನಿಟ್ಠಿತಾ.

೫. ನಿಕ್ಕಡ್ಢನಸಿಕ್ಖಾಪದವಣ್ಣನಾ

ಪಞ್ಚಮೇ ಉಪಸ್ಸಯಂ ದತ್ವಾತಿ ಸಕವಾಟಬದ್ಧಂ ಅತ್ತನೋ ಪುಗ್ಗಲಿಕವಿಹಾರಂ ದತ್ವಾ. ನಿಕ್ಕಡ್ಢೇಯ್ಯಾತಿ ಬಹೂನಿಪಿ ದ್ವಾರಾನಿ ಏಕಪ್ಪಯೋಗೇನ ನಿಕ್ಕಡ್ಢೇನ್ತಿಯಾ ಏಕಾ ಆಪತ್ತಿ, ನಾನಾಪಯೋಗೇಹಿ ಪಯೋಗಗಣನಾಯ ಆಪತ್ತಿಯೋ, ಆಣತ್ತಿಯಮ್ಪಿ ಏಸೇವ ನಯೋ. ಸಚೇ ಪನ ‘‘ಇಮಞ್ಚಿಮಞ್ಚ ದ್ವಾರಂ ಅತಿಕ್ಕಾಮೇಹೀ’’ತಿ ಆಣಾಪೇತಿ, ಏಕಾಯ ಆಣತ್ತಿಯಾ ಏವ ದ್ವಾರಗಣನಾಯ ಆಪತ್ತಿಯೋ.

ಸಾವತ್ಥಿಯಂ ಥುಲ್ಲನನ್ದಂ ಆರಬ್ಭ ಏತಾದಿಸೇ ವತ್ಥುಸ್ಮಿಂ ಪಞ್ಞತ್ತಂ, ತಿಕಪಾಚಿತ್ತಿಯಂ, ಅಕವಾಟಬದ್ಧತೋ ದುಕ್ಕಟಂ, ಅನುಪಸಮ್ಪನ್ನಾಯ ತಿಕದುಕ್ಕಟಂ, ಸಕವಾಟಬದ್ಧತೋ ವಾ ಅಕವಾಟಬದ್ಧತೋ ವಾ ಉಭಿನ್ನಮ್ಪಿ ಪರಿಕ್ಖಾರನಿಕ್ಕಡ್ಢನೇ ದುಕ್ಕಟಮೇವ, ಸೇಸಂ ಸಙ್ಘಿಕವಿಹಾರನಿಕ್ಕಡ್ಢನಸಿಕ್ಖಾಪದೇ ವುತ್ತನಯಮೇವಾತಿ.

ನಿಕ್ಕಡ್ಢನಸಿಕ್ಖಾಪದವಣ್ಣನಾ ನಿಟ್ಠಿತಾ.

೬. ಸಂಸಟ್ಠಸಿಕ್ಖಾಪದವಣ್ಣನಾ

ಛಟ್ಠಂ ಉತ್ತಾನಪದತ್ಥಮೇವ. ಸಾವತ್ಥಿಯಂ ಚಣ್ಡಕಾಳಿಂ ಆರಬ್ಭ ಸಂಸಟ್ಠವಿಹಾರವತ್ಥುಸ್ಮಿಂ ಪಞ್ಞತ್ತಂ, ಸೇಸಮೇತ್ಥ ಪಠಮಅರಿಟ್ಠಸಿಕ್ಖಾಪದೇ ವುತ್ತವಿನಿಚ್ಛಯಸದಿಸಮೇವಾತಿ.

ಸಂಸಟ್ಠಸಿಕ್ಖಾಪದವಣ್ಣನಾ ನಿಟ್ಠಿತಾ.

೭. ಅನ್ತೋರಟ್ಠಸಿಕ್ಖಾಪದವಣ್ಣನಾ

ಸತ್ತಮೇ ಅನ್ತೋರಟ್ಠೇತಿ ಯಸ್ಸ ವಿಜಿತೇ ವಿಹರತಿ, ತಸ್ಸ ರಟ್ಠೇ. ಅಸತ್ಥಿಕಾ ಚಾರಿಕನ್ತಿ ವಿನಾ ಸತ್ಥೇನ ಗಚ್ಛನ್ತಿಯಾ, ಗಾಮನ್ತರಗಣನಾಯ, ಅಗಾಮಕೇ ಅರಞ್ಞೇ ಅದ್ಧಯೋಜನಗಣನಾಯ ಪಾಚಿತ್ತಿಯಂ.

ಸಾವತ್ಥಿಯಂ ಸಮ್ಬಹುಲಾ ಭಿಕ್ಖುನಿಯೋ ಆರಬ್ಭ ವುತ್ತನಯೇನೇವ ದೇಸಚಾರಿಕಂ ಪಕ್ಕಮನವತ್ಥುಸ್ಮಿಂ ಪಞ್ಞತ್ತಂ. ಸತ್ಥೇನ ಸಹ ಗಚ್ಛನ್ತಿಯಾ, ಖೇಮೇ ಅಪ್ಪಟಿಭಯೇ, ಆಪದಾಸು, ಉಮ್ಮತ್ತಿಕಾದೀನಞ್ಚ ಅನಾಪತ್ತಿ. ಅನ್ತೋರಟ್ಠತಾ, ಅಖೇಮತಾ, ಅನುಞ್ಞಾತಕಾರಣಾಭಾವೋ, ಚಾರಿಕಂ ಪಕ್ಕಮನನ್ತಿ ಇಮಾನೇತ್ಥ ಚತ್ತಾರಿ ಅಙ್ಗಾನಿ. ಸಮುಟ್ಠಾನಾದೀನಿ ಏಳಕಲೋಮಸದಿಸಾನೀತಿ.

ಅನ್ತೋರಟ್ಠಸಿಕ್ಖಾಪದವಣ್ಣನಾ ನಿಟ್ಠಿತಾ.

೮. ತಿರೋರಟ್ಠಸಿಕ್ಖಾಪದವಣ್ಣನಾ

ಅಟ್ಠಮೇ ತಿರೋರಟ್ಠೇತಿ ಯಸ್ಸ ವಿಜಿತೇ ವಿಹರತಿ, ತಂ ಠಪೇತ್ವಾ ಅಞ್ಞಸ್ಸ ರಟ್ಠೇ. ಸೇಸಂ ಸತ್ತಮೇ ವುತ್ತನಯೇನೇವ ವೇದಿತಬ್ಬಂ, ನಗರಂ ಪನೇತ್ಥ ರಾಜಗಹನ್ತಿ.

ತಿರೋರಟ್ಠಸಿಕ್ಖಾಪದವಣ್ಣನಾ ನಿಟ್ಠಿತಾ.

೯. ಅನ್ತೋವಸ್ಸಸಿಕ್ಖಾಪದವಣ್ಣನಾ

ನವಮೇ ಅನ್ತೋವಸ್ಸನ್ತಿ ಪುರಿಮಂ ವಾ ತೇಮಾಸಂ, ಪಚ್ಛಿಮಂ ವಾ ತೇಮಾಸಂ ಅವಸಿತ್ವಾ ತಸ್ಸ ವಸ್ಸಸ್ಸ ಅನ್ತೋಯೇವ. ಇಧ ಸತ್ತಾಹಕರಣೀಯೇನ ವಾ ಕೇನಚಿ ಉಬ್ಬಳ್ಹಾಯ ವಾ ಆಪದಾಸು ವಾ ಗಚ್ಛನ್ತಿಯಾ ಉಮ್ಮತ್ತಿಕಾದೀನಞ್ಚ ಅನಾಪತ್ತಿ. ಸೇಸಂ ಅಟ್ಠಮಸದಿಸಮೇವಾತಿ.

ಅನ್ತೋವಸ್ಸಸಿಕ್ಖಾಪದವಣ್ಣನಾ ನಿಟ್ಠಿತಾ.

೧೦. ಚಾರಿಕನಪಕ್ಕಮನಸಿಕ್ಖಾಪದವಣ್ಣನಾ

ದಸಮೇ ವಸ್ಸಂವುಟ್ಠಾತಿ ಪುರಿಮಂ ವಾ ತೇಮಾಸಂ, ಪಚ್ಛಿಮಂ ವಾ ತೇಮಾಸಂ ವುಟ್ಠಾ. ಛಪ್ಪಞ್ಚಯೋಜನಾನೀತಿ ಏತ್ಥ ಪವಾರೇತ್ವಾ ಪಞ್ಚ ಯೋಜನಾನಿ ಗನ್ತುಮ್ಪಿ ವಟ್ಟತಿ, ಛಸು ವತ್ತಬ್ಬಮೇವ ನತ್ಥಿ. ಸಚೇ ಪನ ತೀಣಿ ಗನ್ತ್ವಾ ತೇನೇವ ಮಗ್ಗೇನ ಪಚ್ಚಾಗಚ್ಛತಿ, ನ ವಟ್ಟತಿ, ಅಞ್ಞೇನ ಆಗನ್ತುಂ ವಟ್ಟತಿ. ‘‘ವುತ್ತಪ್ಪಮಾಣಂ ಅದ್ಧಾನಂ ನ ಗಚ್ಛಿಸ್ಸಾಮೀ’’ತಿ ಧುರೇ ನಿಕ್ಖಿತ್ತಮತ್ತೇ ಪಾಚಿತ್ತಿಯಂ.

ರಾಜಗಹೇ ಸಮ್ಬಹುಲಾ ಭಿಕ್ಖುನಿಯೋ ಆರಬ್ಭ ವಸ್ಸಂ ವಸಿತ್ವಾ ಚಾರಿಕಂ ಅಪಕ್ಕಮನವತ್ಥುಸ್ಮಿಂ ಪಞ್ಞತ್ತಂ. ಅನ್ತರಾಯೇ ಸತಿ, ಪರಿಯೇಸಿತ್ವಾ ದುತಿಯಿಕಂ ಭಿಕ್ಖುನಿಂ ಅಲಭನ್ತಿಯಾ, ಗಿಲಾನಾಯ, ಆಪದಾಸು, ಉಮ್ಮತ್ತಿಕಾದೀನಞ್ಚ ಅನಾಪತ್ತಿ. ವಸ್ಸಂವುಟ್ಠತಾ, ಅನುಞ್ಞಾತಕಾರಣಾಭಾವೋ, ಪಞ್ಚಯೋಜನಾನತಿಕ್ಕಮೋತಿ ಇಮಾನೇತ್ಥ ತೀಣಿ ಅಙ್ಗಾನಿ. ಸಮುಟ್ಠಾನಾದೀನಿ ಪಠಮಪಾರಾಜಿಕಸದಿಸಾನಿ, ಇದಂ ಪನ ಅಕಿರಿಯಂ, ದುಕ್ಖವೇದನನ್ತಿ.

ಚಾರಿಕನಪಕ್ಕಮನಸಿಕ್ಖಾಪದವಣ್ಣನಾ ನಿಟ್ಠಿತಾ.

ತುವಟ್ಟವಗ್ಗೋ ಚತುತ್ಥೋ.