೮. ಪರಉಜ್ಝಾಪನಕಸಿಕ್ಖಾಪದವಣ್ಣನಾ

ಅಟ್ಠಮೇ ದುಗ್ಗಹಿತೇನ ದೂಪಧಾರಿತೇನಾತಿ ಯಂ ವುತ್ತಂ, ತತೋ ಅಞ್ಞಥಾ ಗಹಿತೇನ ಚ ಉಪಧಾರಿತೇನ ಚ. ಪರನ್ತಿ ‘‘ಅಹಂ ಕಿರಯ್ಯೇ ಅಯ್ಯಂ ನ ಸಕ್ಕಚ್ಚಂ ಉಪಟ್ಠಹಾಮೀ’’ತಿಆದಿನಾ (ಪಾಚಿ. ೮೬೯) ನಯೇನ ಉಪಸಮ್ಪನ್ನಂ ಉಜ್ಝಾಪೇನ್ತಿಯಾ ಪಾಚಿತ್ತಿಯಂ.

ಸಾವತ್ಥಿಯಂ ಅಞ್ಞತರಂ ಭಿಕ್ಖುನಿಂ ಆರಬ್ಭ ಏವಂ ಪರಂ ಉಜ್ಝಾಪನವತ್ಥುಸ್ಮಿಂ ಪಞ್ಞತ್ತಂ, ತಿಕಪಾಚಿತ್ತಿಯಂ, ಅನುಪಸಮ್ಪನ್ನಾಯ ತಿಕದುಕ್ಕಟಂ, ಉಮ್ಮತ್ತಿಕಾದೀನಂಯೇವ ಅನಾಪತ್ತಿ. ದುಗ್ಗಹಿತತಾ, ಉಜ್ಝಾಪನಂ, ಯಂ ಉಜ್ಝಾಪೇತಿ, ತಸ್ಸಾ ಉಪಸಮ್ಪನ್ನತಾತಿ ಇಮಾನೇತ್ಥ ತೀಣಿ ಅಙ್ಗಾನಿ. ಸಮುಟ್ಠಾನಾದೀನಿ ಅದಿನ್ನಾದಾನಸದಿಸಾನಿ, ಇದಂ ಪನ ದುಕ್ಖವೇದನನ್ತಿ.

ಪರಉಜ್ಝಾಪನಕಸಿಕ್ಖಾಪದವಣ್ಣನಾ ನಿಟ್ಠಿತಾ.