೬. ಛಕ್ಕನಿದ್ದೇಸವಣ್ಣನಾ

೮೦೫. ವಿಸುದ್ಧಿಭಾವನ್ತಿ ವಿಸುದ್ಧಿಯಾ ಸಬ್ಭಾವಂ. ‘‘ದಿಬ್ಬಚಕ್ಖುಞಾಣೇಕದೇಸತ್ತಾ’’ತಿ ಇದಂ ತಸ್ಸ ಪರಿಭಣ್ಡಞಾಣತ್ತಾ ವುತ್ತಂ. ತಥಾ ಹಿ ಪಾಳಿಯಂ ‘‘ಸತ್ತಾನಂ ಚುತೂಪಪಾತಞಾಣಾಯ ಚಿತ್ತಂ ಅಭಿನೀಹರತಿ ಅಭಿನಿನ್ನಾಮೇತೀ’’ತಿ (ದೀ. ನಿ. ೧.೨೪೭) ಆರಭಿತ್ವಾ ‘‘ಸೋ ದಿಬ್ಬೇನ ಚಕ್ಖುನಾ ವಿಸುದ್ಧೇನಾ’’ತಿಆದಿ (ದೀ. ನಿ. ೧.೨೪೬) ವುತ್ತಂ. ದಿಬ್ಬಸ್ಸ ತಿರೋಹಿತವಿಪ್ಪಕಟ್ಠಾದಿಭೇದಸ್ಸ, ಇತರಸ್ಸ ಚ ರೂಪಾಯತನಸ್ಸ ದಸ್ಸನಸಮತ್ಥಸ್ಸಾಪಿ ದಿಬ್ಬಚಕ್ಖುಞಾಣಸ್ಸ ಸಿಖಾಪತ್ತಿ ಚವಮಾನೋಪಪಜ್ಜಮಾನಸತ್ತದಸ್ಸನನ್ತಿ ಆಹ ‘‘ಮುದ್ಧಪ್ಪತ್ತೇನ ಚಾ’’ತಿಆದಿ.

ಛಕ್ಕನಿದ್ದೇಸವಣ್ಣನಾ ನಿಟ್ಠಿತಾ.