(೯.) ನವಕನಿದ್ದೇಸವಣ್ಣನಾ

೯೬೦. ದಸಮಸ್ಸ ಅವುತ್ತತ್ತಾ ‘‘ಸತ್ತೇಸು ಉಪ್ಪತ್ತಿವಸೇನೇವ ಕಥಿತಾನೀ’’ತಿ ವುತ್ತಂ.

೯೬೩. ಸುಖವಿನಿಚ್ಛಯನ್ತಿ ಸೇವಿತಬ್ಬಾಸೇವಿತಬ್ಬಸುಖಸನ್ನಿಟ್ಠಾನನ್ತಿ ಅತ್ಥೋ. ಅಜ್ಝತ್ತಂ ಸುಖನ್ತಿ ಸೇವಿತಬ್ಬಂ ನೇಕ್ಖಮ್ಮಸುಖಂ. ವಿನಿಚ್ಛಯಾತಿ ದ್ವೇ ವಿನಿಚ್ಛಯಾತಿ ಇದಂ –

‘‘ಸಾತಂ ಅಸಾತನ್ತಿ ಯಮಾಹು ಲೋಕೇ,

ತಮೂಪನಿಸ್ಸಾಯ ಪಹೋತಿ ಛನ್ದೋ;

ರೂಪೇಸು ದಿಸ್ವಾ ವಿಭವಂ ಭವಞ್ಚ,

ವಿನಿಚ್ಛಯಂ ಕುಬ್ಬತಿ ಜನ್ತು ಲೋಕೇ’’ತಿ. (ಸು. ನಿ. ೮೭೩; ಮಹಾನಿ. ೧೦೨) –

ಏತಸ್ಸ ನಿದ್ದೇಸೇ ವುತ್ತಂ.

ಇಧ ವಿನಿಚ್ಛಯೋತಿ ವುತ್ತೋತಿ ಇಮಿಸ್ಸಾ ವಿಭಙ್ಗಪಾಳಿಯಾ ಯೋ ಛನ್ದರಾಗಸ್ಸ ಪಚ್ಚಯಸಭಾವೇನ ವಿನಿಚ್ಛಯ-ಸದ್ದೇನ ವುತ್ತೋ, ಸಕ್ಕಪಞ್ಹೇಪಿ (ದೀ. ನಿ. ೨.೩೫೭) ಛನ್ದಸ್ಸ ನಿದಾನಭಾವೇನ ವಿತಕ್ಕ-ಸದ್ದೇನ ಸೋ ಏವ ಆಗತೋತಿ ಏವಂ ವಿತಕ್ಕಸ್ಸ ವಿನಿಚ್ಛಯಭಾವಂ ತಸ್ಸೇವ ಇಧ ಗಹಿತತಞ್ಚ ದಸ್ಸೇತಿ. ಬಲವಸನ್ನಿಟ್ಠಾನನ್ತಿ ಬಲವತಿಯಾ ತಣ್ಹಾಯ ಆರಮ್ಮಣಸ್ಸ ನಿಟ್ಠಪೇತ್ವಾ ಗಹಣಂ.

೯೬೪. ಸತಿಪಿ ಅಞ್ಞೇಸಞ್ಚ ಸಙ್ಖತಭಾವೇ ಅಹನ್ತಿ ಅಸ್ಮೀತಿ ಚ ಸಾತಿಸಯಾ ಮಾನಸ್ಸ ಸಙ್ಖತತಾತಿ ಕತ್ವಾ ‘‘ಸಙ್ಖತ’’ನ್ತಿ ಮಾನೋ ವುತ್ತೋ. ಸೇಯ್ಯಾದಿವಸೇನ ‘‘ಅಹಮಸ್ಮೀ’’ತಿ ಅತ್ತನೋ ಸಙ್ಖರಣಂ ವಾ ಸಙ್ಖತಂ. ಏತ್ಥ ‘‘ಭವಿಸ್ಸನ್ತೀ’’ತಿಆದಿಕಾ ಪವತ್ತಿ ತಣ್ಹಾದಿಟ್ಠೀನಂ ವಿಸೇಸವತೀತಿ ತಾಸಮ್ಪಿ ಇಞ್ಜಿತಾದಿಭಾವೋ ವುತ್ತೋ.

ನವಕನಿದ್ದೇಸವಣ್ಣನಾ ನಿಟ್ಠಿತಾ.