(೧೦.) ದಸಕನಿದ್ದೇಸವಣ್ಣನಾ

೯೭೦. ಜಾಲಕ್ಖಿಪಸಂವಿಧಾನಾದಿಕುಸಲತಾಸಙ್ಕಪ್ಪನಂ ಉಪಾಯಚಿನ್ತಾ, ತಸ್ಸಾ ಮಿಚ್ಛಾಭಾವಪಟಿಚ್ಛಾದನಭಾವೇನ ಪವತ್ತೋ ತದಾಕಾರೋ ಮೋಹೋ ಉಪಾಯಚಿನ್ತಾವಸೇನ ಉಪ್ಪನ್ನೋತಿ ದಟ್ಠಬ್ಬೋ. ಯಥಾಕತೇ ಪನ ಪಾಪೇ ಅನಾದೀನವದಸ್ಸನವಸೇನ ಪವತ್ತಾ ಸಞ್ಞಾ, ಸಙ್ಕಪ್ಪೋ ವಾ ಪಚ್ಚವೇಕ್ಖಣಾ, ತಸ್ಸಾಪಿ ಮಿಚ್ಛಾಭಾವಪಟಿಚ್ಛಾದಕಂ ತದಾಕಾರಂ, ಅನಾದೀನವದಸ್ಸನಂ ವಾ ಪಚ್ಚವೇಕ್ಖಣಾಕಾರೇನ ಉಪ್ಪನ್ನೋ ಮೋಹೋತಿ. ವಿಮುತ್ತಸಞ್ಞಿತಾತಿ ಅಧಿಮಾನಸಮ್ಪಯುತ್ತಂ, ತಿತ್ಥಿಯಾನಂ ವಾ ಅತ್ತನೋ ದಿಟ್ಠಿಯಾ ವಿಮುತ್ತತಾಸಞ್ಜಾನನಂ. ‘‘ವಿಮುತ್ತೋಮ್ಹೀ’’ತಿ ಏವಂ ಪವತ್ತೋ ಅಕುಸಲಚಿತ್ತುಪ್ಪಾದೋ ಮಿಚ್ಛಾವಿಮುತ್ತೀತಿ ಕೇಚಿ ವದನ್ತಿ. ಫಲಂ ವಿಯ ವಿಮುತ್ತನ್ತಿ ಗಹಿತೇ ಪನ ದಿಟ್ಠಿಸಮ್ಪಯುತ್ತಚಿತ್ತೇ ದಿಟ್ಠಿ ಮಿಚ್ಛಾಞಾಣಂ, ಸಮಾಧಿ ಚ ಮಿಚ್ಛಾವಿಮುತ್ತೀತಿ ಯುತ್ತಂ ಸಿಯಾ.

ದಸಕನಿದ್ದೇಸವಣ್ಣನಾ ನಿಟ್ಠಿತಾ.

ತಣ್ಹಾವಿಚರಿತನಿದ್ದೇಸವಣ್ಣನಾ

೯೭೩. ಸಮೂಹಗಾಹತೋತಿ ತಣ್ಹಾಮಾನದಿಟ್ಠೀನಂ ಸಾಧಾರಣಗ್ಗಹಣತೋತಿ ವದನ್ತಿ. ‘‘ಇತ್ಥಂ ಏವಂ ಅಞ್ಞಥಾ’’ತಿ ಪನ ವಿಸೇಸಂ ಅಕತ್ವಾ ಗಹಣಂ ಸಮೂಹಗಾಹೋತಿ ದಟ್ಠಬ್ಬೋ. ಅಞ್ಞಂ ಆಕಾರನ್ತಿ ಪರಸನ್ತಾನಗತಂ ಆಕಾರಂ. ಅತ್ಥೀತಿ ಸದಾ ಸಂವಿಜ್ಜತೀತಿ ಅತ್ಥೋ. ಸೀದತೀತಿ ವಿನಸ್ಸತಿ. ಸಂಸಯಪರಿವಿತಕ್ಕವಸೇನಾತಿ ‘‘ಕಿಂ ನು ಖೋ ಅಹಂ ಸಿಯಂ, ನ ಸಿಯ’’ನ್ತಿ ಏವಂ ಪರಿವಿತಕ್ಕವಸೇನ. ಪತ್ಥನಾಕಪ್ಪನವಸೇನಾತಿ ‘‘ಅಪಿ ನಾಮ ಸಾಧು ಪನಾಹಂ ಸಿಯ’’ನ್ತಿ ಏವಂ ಪತ್ಥನಾಯ ಕಪ್ಪನವಸೇನ.

ಸುದ್ಧಸೀಸಾತಿ ತಣ್ಹಾಮಾನದಿಟ್ಠೀನಂ ಸಾಧಾರಣಸೀಸಾ ವಿಸೇಸಸ್ಸ ಅನಿಸ್ಸಿತತ್ತಾ ‘‘ಸುದ್ಧಸೀಸಾ’’ತಿ ವುತ್ತಾ. ತತ್ಥ ದಿಟ್ಠಿಸೀಸೇಹಿ ದಿಟ್ಠಿಯಾ ತಣ್ಹಾ ದಸ್ಸಿತಾ, ಸೀಸಸೀಸಮೂಲಕೇಹಿ ಮಾನದಿಟ್ಠೀಹಿ ಸಯಮೇವ ಚಾತಿ ಆಹ ‘‘ಏವಮೇತೇ…ಪೇ… ತಣ್ಹಾ ವಿಚರಿತಧಮ್ಮಾ ವೇದಿತಬ್ಬಾ’’ತಿ. ದಿಟ್ಠಿಮಾನೇಸುಪಿ ‘‘ತಣ್ಹಾವಿಚರಿತಾನೀ’’ತಿ ವಚನಞ್ಚ ಅಞ್ಞಮಞ್ಞಂ ವಿಪ್ಪಯೋಗೀನಂ ದಿಟ್ಠಿಮಾನಾನಂ ತಣ್ಹಾಯ ಅವಿಪ್ಪಯೋಗೀನಂ ತಂಮೂಲಕತ್ತಾವ ತಪ್ಪಧಾನತಾಯ ಕತನ್ತಿ ವೇದಿತಬ್ಬಂ.

೯೭೪. ಅವಕ್ಕರೀತಿ ನಿಪಾತೋ ನಾನಾಭಾವೇ ವತ್ತತೀತಿ ಅನಾನಾಕರಣಂ ಅನವಕ್ಕರಿ, ತಂ ಕತ್ವಾ, ಅವಕ್ಕರಿ ವಾ ಅಕತ್ವಾ ಅನವಕ್ಕರಿ ಕತ್ವಾತಿ ಏವಂ ದಸ್ಸೇನ್ತೋ ಆಹ ‘‘ಅವಿನಿಬ್ಭೋಗಂ ಕತ್ವಾ’’ತಿ. ‘‘ಅನವಕಾರಿಂ ಕರಿತ್ವಾ’’ತಿ ವಾ ಪಾಠೋ, ತತ್ಥ ಅವಕಿರಣಂ ವಿಕ್ಖೇಪನಂ ಸಮೂಹಸ್ಸ ಏಕದೇಸಾನಂ ವಿನಿಬ್ಭುಜ್ಜನಂ ಅವಕಾರಿ, ತಂ ಅವಕಾರಿಂ ವಿನಿಬ್ಭೋಗಂ ಅಕತ್ವಾ, ಪಞ್ಚಪಿ ಖನ್ಧೇ ಸಮೂಹತೋ ಏಕತ್ತೇನೇವ ಗಹೇತ್ವಾ ಅತ್ತತೋ ಅವಿನಿಬ್ಭುಜ್ಜಿತ್ವಾ ಅಸ್ಮೀತಿ ಛನ್ದಮಾನದಿಟ್ಠಿಯೋ ಪಟಿಲಭತೀತಿ ಅತ್ಥೋ. ಅಸಿತಬ್ಯಾಭಙ್ಗಿತಾಯಾತಿ ದಾತ್ತೇನ ಕಾಜೇನ ಚಾತಿ ಏತೇನ ಪರಿಕ್ಖಾರೇನ, ಅಸಿತಬ್ಯಾಭಙ್ಗೀಹಿ ಲವನವಹನಕಿರಿಯಾ ವಾ ‘‘ಅಸಿತಬ್ಯಾಭಙ್ಗೀ’’ತಿ ವುತ್ತಾ.

೯೭೬. ಅವಕಾರಿಂ ಕರಿತ್ವಾತಿ ರೂಪಾದೀನಿ ಅತ್ತತೋ ವಿನಿಬ್ಭುಜ್ಜಿತ್ವಾ ಇಮಿನಾ ರೂಪೇನ…ಪೇ… ಇಮಿನಾ ವಿಞ್ಞಾಣೇನ ಅಸ್ಮೀತಿ ಛನ್ದಂ ಪಟಿಲಭತೀತಿ ಏವಂ ಸಬ್ಬತ್ಥ ಇಮಿನಾತಿ ಏತಸ್ಸ ಅತ್ತತೋ ಅವಿನಿಬ್ಭುತ್ತೇನ ರೂಪಾದಿನಾತಿ ಅತ್ಥೋ ದಟ್ಠಬ್ಬೋ. ಅತ್ತತೋ ಹಿ ಅವಿನಿಬ್ಭುತ್ತಾನಿ ಅಬಹಿಕತಾನಿ ಅಹಮಿಚ್ಚೇವ ಗಹಿತಾನಿ ರೂಪಾದೀನಿ ಉಪಾದಾಯ ಉಪಗನ್ತ್ವಾ ಪವತ್ತಾ ತಣ್ಹಾ ‘‘ಅಜ್ಝತ್ತಿಕಸ್ಸ ಉಪಾದಾಯಾ’’ತಿ ವುತ್ತಾ, ಅತ್ತತೋ ಚ ವಿನಿಬ್ಭುತ್ತಾನಿ ಬಹಿಕತಾನಿ ಉಪಗನ್ತ್ವಾ ಪವತ್ತಾ ‘‘ಬಾಹಿರಸ್ಸ ಉಪಾದಾಯಾ’’ತಿ. ಖಗ್ಗೇನ ವಾ ಛತ್ತೇನ ವಾ ಅಹಂ ನಿಚ್ಚೋತಿ ಅಭಿಮಙ್ಗಲಸಮ್ಮತೇನ ಖಗ್ಗಾದಿನಾ ಮಮ ವಿನಾಸೋ ನತ್ಥೀತಿ ಮಞ್ಞತೀತಿ ಅತ್ಥೋ. ಏಕೇಕಸ್ಸಾತಿ ಇದಂ ಅನಾದಿಮ್ಹಿ ಅನನ್ತೇ ಚ ಸಂಸಾರೇ ಏಕೇಕಸ್ಸ ಅತೀತಾನಾಗತೇಸು ಛತ್ತಿಂಸಾಯಪಿ ಸಮ್ಭವದಸ್ಸನತ್ಥಂ ವುತ್ತಂ, ಏಕೇಕಸ್ಸ ವಾ ಪುಗ್ಗಲಸ್ಸ ಯಥಾಲಾಭವಸೇನಾತಿ ಇದಮ್ಪಿ ಅನಿಸ್ಸಿತತಣ್ಹಾಮಾನದಿಟ್ಠಿಂ ಕತ್ವಾ ಪುಥುಜ್ಜನಸ್ಸ ಅದ್ಧಾಪಚ್ಚುಪ್ಪನ್ನೇ ಕಸ್ಸಚಿ ಸಮ್ಭವದಸ್ಸನತ್ಥಂ.

ತಣ್ಹಾವಿಚರಿತನಿದ್ದೇಸವಣ್ಣನಾ ನಿಟ್ಠಿತಾ.

ಖುದ್ದಕವತ್ಥುವಿಭಙ್ಗವಣ್ಣನಾ ನಿಟ್ಠಿತಾ.