(೮.) ಅಟ್ಠಕನಿದ್ದೇಸವಣ್ಣನಾ

೯೫೨. ‘‘ಕಮ್ಮಂ ಖೋ ಮೇ ಕತ್ತಬ್ಬಂ ಭವಿಸ್ಸತೀ’’ತಿಆದಿನಾ ಓಸೀದನಾಕಾರೇನ ಪವತ್ತಚಿತ್ತುಪ್ಪಾದಾ ಕೋಸಜ್ಜಕಾರಣಾನಿ, ಕೋಸಜ್ಜಮೇವ ವಾ ಕೋಸಜ್ಜನ್ತರಕಾರಣತಾಯ ಕೋಸಜ್ಜಕಾರಣಾನೀತಿ ದಟ್ಠಬ್ಬಾನಿ. ಮಾಸಾಚಿತಂ ಮಞ್ಞೇತಿ ಏತ್ಥ ಆಚಿತ-ಸದ್ದೋ ತಿನ್ತ-ಸದ್ದಸ್ಸ, ಮಞ್ಞೇ-ಸದ್ದೋ ಚ ವಿಯ-ಸದ್ದಸ್ಸ ಅತ್ಥಂ ವದತೀತಿ ಅಧಿಪ್ಪಾಯೇನ ‘‘ತಿನ್ತಮಾಸೋ ವಿಯಾ’’ತಿ ಅಯಮತ್ಥೋ ವಿಭಾವಿತೋ, ಮಾಸಚಯೋ ವಿಯಾತಿ ವಾ ಅತ್ಥೋ.

೯೫೭. ಫರತೀತಿ ಫುಸತಿ, ಘಟ್ಟೇತೀತಿ ಅತ್ಥೋ. ಅಞ್ಞೇನ ಕಾರಣೇನಾತಿ ‘‘ಅಜ್ಜ ತಯಾ ವಿಕಾಲೇ ಭುತ್ತಂ, ತೇನ ತ್ವಂ ಆಪತ್ತಿಂ ಆಪನ್ನೋಸೀ’’ತಿ ವುತ್ತೋ ‘‘ಹಿಯ್ಯೋ ಮಯಾ ಕಾಲೇ ಭುತ್ತಂ, ತೇನಾಹಂ ಅನಾಪನ್ನೋ’’ತಿಆದಿನಾ ಅಞ್ಞೇನ ಅಯುತ್ತೇನ ಕಾರಣೇನ ಅಞ್ಞಂ ಯುತ್ತಂ ಕಾರಣಂ ಪಟಿಚ್ಛಾದೇತೀತಿ ಅತ್ಥೋ. ಪುಚ್ಛಿತತ್ಥತೋ ಬಹಿದ್ಧಾ ಯಥಾ ತಂ ನ ಅಲ್ಲೀಯತಿ, ತಥಾ ಕಥಾಯ ಅಪನಯನಂ ವಿಕ್ಖಿಪನಂ ಬಹಿದ್ಧಾ ಅಪನಾಮನಾ.

೯೫೮. ಅಸಞ್ಞೀವಾದಾತಿ ಪುಗ್ಗಲೇಹಿ ದಿಟ್ಠಿಯೋ ದಸ್ಸೇತಿ. ಯೇಹಿ ವಾ ಅಭಿನಿವೇಸೇಹಿ ಅಸಞ್ಞೀ ಅತ್ತಾನಂ ವದನ್ತಿ, ತೇ ಅಸಞ್ಞೀವಾದಾ. ಅರೂಪಸಮಾಪತ್ತಿನಿಮಿತ್ತನ್ತಿ ಆಕಾಸಾದಿಂ.

ಅಟ್ಠಕನಿದ್ದೇಸವಣ್ಣನಾ ನಿಟ್ಠಿತಾ.