೧೫. ಆಹಾರಪಚ್ಚಯನಿದ್ದೇಸವಣ್ಣನಾ

೧೫. ಕಬಳಂ ಕರಿತ್ವಾ ಅಜ್ಝೋಹರಿತೋವಾತಿ ಅಸಿತಪೀತಾದಿವತ್ಥೂಹಿ ಸಹ ಅಜ್ಝೋಹರಿತೋವಾತಿ ವುತ್ತಂ ಹೋತಿ. ಪಾತಬ್ಬಸಾಯಿತಬ್ಬಾನಿಪಿ ಹಿ ಸಭಾವವಸೇನ ಕಬಳಾಯೇವ ಹೋನ್ತೀತಿ.

ಸೇಸತಿಸನ್ತತಿಸಮುಟ್ಠಾನಸ್ಸ ಅನುಪಾಲಕೋವ ಹುತ್ವಾತಿ ಏತ್ಥ ಚಿತ್ತಸಮುಟ್ಠಾನಸ್ಸ ಆಹಾರಪಚ್ಚಯಭಾವೋ ವಿಚಾರೇತ್ವಾ ಗಹೇತಬ್ಬೋ. ನ ಹಿ ಚಿತ್ತಸಮುಟ್ಠಾನೋ ಕಬಳೀಕಾರೋ ಆಹಾರೋ ನೋಚಿತ್ತಸಮುಟ್ಠಾನೋ ತದುಭಯಞ್ಚ ಚಿತ್ತಸಮುಟ್ಠಾನಕಾಯಸ್ಸ ಆಹಾರಪಚ್ಚಯೋ ವುತ್ತೋ, ತಿವಿಧೋಪಿ ಪನ ಸೋ ನೋಚಿತ್ತಸಮುಟ್ಠಾನಕಾಯಸ್ಸ ವುತ್ತೋತಿ.

ಆಹಾರಪಚ್ಚಯನಿದ್ದೇಸವಣ್ಣನಾ ನಿಟ್ಠಿತಾ.