೧೦. ಪುರೇಜಾತಪಚ್ಚಯನಿದ್ದೇಸವಣ್ಣನಾ

೧೦. ನಯದಸ್ಸನವಸೇನ ಯಾನಿ ವಿನಾ ಆರಮ್ಮಣಪುರೇಜಾತೇನ ನ ವತ್ತನ್ತಿ, ತೇಸಂ ಚಕ್ಖುವಿಞ್ಞಾಣಾದೀನಂ ಆರಮ್ಮಣಪುರೇಜಾತದಸ್ಸನೇನ ಮನೋದ್ವಾರೇಪಿ ಯಂ ಯದಾರಮ್ಮಣಪುರೇಜಾತೇನ ವತ್ತತಿ, ತಸ್ಸ ತದಾಲಮ್ಬಿತಂ ಸಬ್ಬಮ್ಪಿ ರೂಪರೂಪಂ ಆರಮ್ಮಣಪುರೇಜಾತನ್ತಿ ದಸ್ಸಿತಮೇವ ಹೋತಿ, ಸರೂಪೇನ ಪನ ಅದಸ್ಸಿತತ್ತಾ ‘‘ಸಾವಸೇಸವಸೇನ ದೇಸನಾ ಕತಾ’’ತಿ ಆಹ. ಚಿತ್ತವಸೇನ ಕಾಯಂ ಪರಿಣಾಮಯತೋ ಇದ್ಧಿವಿಧಾಭಿಞ್ಞಾಯ ಚ ಅಟ್ಠಾರಸಸು ಯಂಕಿಞ್ಚಿ ಆರಮ್ಮಣಪುರೇಜಾತಂ ಹೋತೀತಿ ದಟ್ಠಬ್ಬಂ.

ತದಾರಮ್ಮಣಭಾವಿನೋತಿ ಏತ್ಥ ಪಟಿಸನ್ಧಿಭಾವಿನೋ ವತ್ಥುಪುರೇಜಾತಾಭಾವೇನ ಇತರಸ್ಸಪಿ ಅಭಾವಾ ಅಗ್ಗಹಣಂ. ಭವಙ್ಗಭಾವಿನೋ ಪನ ಗಹಣಂ ಕಾತಬ್ಬಂ ನ ವಾ ಕಾತಬ್ಬಂ ಪಟಿಸನ್ಧಿಯಾ ವಿಯ ಅಪರಿಬ್ಯತ್ತಸ್ಸ ಆರಮ್ಮಣಸ್ಸ ಆರಮ್ಮಣಮತ್ತಭಾವತೋ, ‘‘ಮನೋಧಾತೂನಞ್ಚಾ’’ತಿ ಏತ್ಥ ಸನ್ತೀರಣಭಾವಿನೋ ಮನೋವಿಞ್ಞಾಣಧಾತುಯಾಪಿ.

ಪುರೇಜಾತಪಚ್ಚಯನಿದ್ದೇಸವಣ್ಣನಾ ನಿಟ್ಠಿತಾ.