೪. ದಾನಕಥಾವಣ್ಣನಾ

೪೭೮. ದೇಯ್ಯಧಮ್ಮವಸೇನ ಚೋದೇತುನ್ತಿ ಯದಿ ಚೇತಸಿಕೋವ ಧಮ್ಮೋ ದಾನಂ, ‘‘ದಿಯ್ಯತೀತಿ ದಾನ’’ನ್ತಿ ಇಮಿನಾಪಿ ಅತ್ಥೇನ ಚೇತಸಿಕಸ್ಸೇವ ದಾನಭಾವೋ ಆಪಜ್ಜತೀತಿ ಚೋದೇತುನ್ತಿ ಅತ್ಥೋ.

೪೭೯. ಅನಿಟ್ಠಫಲನ್ತಿಆದಿ ಅಚೇತಸಿಕಸ್ಸ ಧಮ್ಮಸ್ಸ ದಾನಭಾವದೀಪನತ್ಥಂ ವುತ್ತನ್ತಿ ಫಲದಾನಭಾವದೀಪನತ್ಥಂ ನ ವುತ್ತನ್ತಿ ಅತ್ಥೋ ದಟ್ಠಬ್ಬೋ. ಅನಿಟ್ಠಫಲನ್ತಿಆದಿನಾ ಅಚೇತಸಿಕಸ್ಸ ಧಮ್ಮಸ್ಸ ಫಲದಾನಂ ವುತ್ತಂ ವಿಯ ಹೋತಿ, ನ ದಾನಭಾವೋ, ತನ್ನಿವಾರಣತ್ಥಞ್ಚೇತಮಾಹಾತಿ. ಏವಞ್ಚ ಕತ್ವಾ ಅನನ್ತರಮೇವಾಹ ‘‘ನ ಹಿ ಅಚೇತಸಿಕೋ ಅನ್ನಾದಿಧಮ್ಮೋ ಆಯತಿಂ ವಿಪಾಕಂ ದೇತೀ’’ತಿ. ಇಟ್ಠಫಲಭಾವನಿಯಮನತ್ಥನ್ತಿ ದೇಯ್ಯಧಮ್ಮೋ ವಿಯ ಕೇನಚಿ ಪರಿಯಾಯೇನ ಅನಿಟ್ಠಫಲತಾ ದಾನಸ್ಸ ನತ್ಥಿ, ಏಕನ್ತಂ ಪನ ಇಟ್ಠಫಲಮೇವಾತಿ ನಿಯಮನತ್ಥನ್ತಿ ಅತ್ಥೋ.

ಇತರೇನಾತಿ ‘‘ದಿಯ್ಯತೀತಿ ದಾನ’’ನ್ತಿ ಇಮಿನಾ ಪರಿಯಾಯೇನ. ನ ಪನ ಏಕೇನತ್ಥೇನಾತಿ ‘‘ದೇಯ್ಯಧಮ್ಮೋವ ದಾನ’’ನ್ತಿ ಇಮಂ ಸಕವಾದೀವಾದಂ ನಿವತ್ತೇತುಂ ‘‘ಸದ್ಧಾ ಹಿರಿಯ’’ನ್ತಿಆದಿಕಂ ಸುತ್ತಸಾಧನಂ ಪರವಾದೀವಾದೇ ಯುಜ್ಜತಿ, ‘‘ಇಧೇಕಚ್ಚೋ ಅನ್ನಂ ದೇತೀ’’ತಿಆದಿಕಞ್ಚ, ‘‘ಚೇತಸಿಕೋವ ಧಮ್ಮೋ ದಾನ’’ನ್ತಿ ಇಮಂ ನಿವತ್ತೇತುಂ ‘‘ಚೇತಸಿಕೋ ಧಮ್ಮೋ ದಾನ’’ನ್ತಿ ಇಮಂ ಪನ ಸಾಧೇತುಂ ‘‘ಸದ್ಧಾ ಹಿರಿಯ’’ನ್ತಿಆದಿಕಂ ಸಕವಾದೀವಾದೇ ಯುಜ್ಜತಿ, ‘‘ಇಧೇಕಚ್ಚೋ ಅನ್ನಂ ದೇತೀ’’ತಿಆದಿಕಂ ವಾ ‘‘ದೇಯ್ಯಧಮ್ಮೋ ದಾನ’’ನ್ತಿ ಸಾಧೇತುನ್ತಿ ಏವಂ ನಿವತ್ತನಸಾಧನತ್ಥನಾನತ್ತಂ ಸನ್ಧಾಯ ‘‘ನ ಪನ ಏಕೇನತ್ಥೇನಾ’’ತಿ ವುತ್ತನ್ತಿ ದಟ್ಠಬ್ಬಂ. ತತ್ಥ ಯಥಾ ಪರವಾದೀವಾದೇ ಚ ಸುತ್ತಸಾಧನತ್ಥಂ ‘‘ನ ವತ್ತಬ್ಬಂ ಚೇತಸಿಕೋ ಧಮ್ಮೋ ದಾನ’’ನ್ತಿ ಪುಚ್ಛಾಯಂ ಚೇತಸಿಕೋವಾತಿ ಅತ್ಥೋ ದಟ್ಠಬ್ಬೋ, ತಥಾ ‘‘ನ ವತ್ತಬ್ಬಂ ದೇಯ್ಯಧಮ್ಮೋ ದಾನ’’ನ್ತಿ ಪುಚ್ಛಾಯ ಚ ದೇಯ್ಯಧಮ್ಮೋವಾತಿ. ದೇಯ್ಯಧಮ್ಮೋ ಇಟ್ಠಫಲೋತಿ ಇಟ್ಠಫಲಾಭಾವಮತ್ತಮೇವ ಪಟಿಕ್ಖಿತ್ತನ್ತಿ ಏತ್ಥ ‘‘ಇಟ್ಠಫಲಭಾವಮತ್ತಮೇವ ಪಟಿಕ್ಖಿತ್ತ’’ನ್ತಿ ಪಾಠೇನ ಭವಿತಬ್ಬನ್ತಿ. ‘‘ಇಟ್ಠಫಲಾಭಾವಮತ್ತಮೇವ ದಿಸ್ವಾ ಪಟಿಕ್ಖಿತ್ತ’’ನ್ತಿ ವಾ ವತ್ತಬ್ಬಂ. ಸಙ್ಕರಭಾವಮೋಚನತ್ಥನ್ತಿ ಚೇತಸಿಕಸ್ಸ ದಾತಬ್ಬಟ್ಠೇನ ದೇಯ್ಯಧಮ್ಮಸ್ಸ ಚ ಇಟ್ಠಫಲಟ್ಠೇನ ದಾನಭಾವಮೋಚನತ್ಥನ್ತಿ ವುತ್ತಂ ಹೋತಿ.

ದಾನಕಥಾವಣ್ಣನಾ ನಿಟ್ಠಿತಾ.