೪. ವಿಮುಚ್ಚಮಾನಕಥಾವಣ್ಣನಾ

೩೬೬. ಝಾನೇನ ವಿಕ್ಖಮ್ಭನವಿಮುತ್ತಿಯಾ ವಿಮುತ್ತಂ ಚಿತ್ತಂ ಮಗ್ಗಕ್ಖಣೇ ಸಮುಚ್ಛೇದವಿಮುತ್ತಿಯಾ ವಿಮುಚ್ಚಮಾನಂ ನಾಮ ಹೋತೀತಿ ಏತಿಸ್ಸಾ ಲದ್ಧಿಯಾ ಕೋ ದೋಸೋತಿ ವಿಚಾರೇತಬ್ಬಂ. ಯದಿ ವಿಪ್ಪಕತನಿದ್ದೇಸೇ ದೋಸೋ, ತತ್ರಾಪಿ ತೇನ ವಿಮುಚ್ಚಮಾನತಾಯ ‘‘ವಿಮುತ್ತಂ ವಿಮುಚ್ಚಮಾನ’’ನ್ತಿ ವುತ್ತಂ. ಸತಿ ಚ ದೋಸೇ ಉಪ್ಪಾದಕ್ಖಣೇ ವಿಮುತ್ತಂ, ವಯಕ್ಖಣೇ ವಿಮುಚ್ಚಮಾನನ್ತಿ ವಿಮುತ್ತವಿಮುಚ್ಚಮಾನವಚನಸ್ಸ ನ ಚೋದೇತಬ್ಬಂ ಸಿಯಾ, ಅಥ ಖೋ ವಿಮುಚ್ಚಮಾನವಚನಮೇವಾತಿ. ಏಕದೇಸೇನ, ಏಕದೇಸೇ ವಾ ವಿಮುಚ್ಚಮಾನಸ್ಸ ಚ ವಿಮುತ್ತಕಿರಿಯಾಯ ಏಕದೇಸೋ ವಿಸೇಸನಂ ಹೋತೀತಿ ‘‘ಭಾವನಪುಂಸಕ’’ನ್ತಿ ವುತ್ತಂ. ಕಟಾದಯೋತಿ ಕಟಪಟಾದಯೋ. ಏಕೇನೇವ ಚಿತ್ತೇನಾತಿ ಏಕೇನೇವ ಫಲಚಿತ್ತೇನಾತಿ ಅಧಿಪ್ಪಾಯೋ.

ವಿಮುಚ್ಚಮಾನಕಥಾವಣ್ಣನಾ ನಿಟ್ಠಿತಾ.