೨. ನತ್ಥಿಅರಹತೋಅಕಾಲಮಚ್ಚೂತಿಕಥಾವಣ್ಣನಾ

೭೮೦. ಅಯೋನಿಸೋ ಗಹೇತ್ವಾತಿ ಅಲದ್ಧವಿಪಾಕವಾರಾನಮ್ಪಿ ಕಮ್ಮಾನಂ ಬ್ಯನ್ತೀಭಾವಂ ನ ವದಾಮೀತಿ ಅತ್ಥಂ ಗಹೇತ್ವಾತಿ ಅಧಿಪ್ಪಾಯೋ. ಕೇಚಿ ಪನ ‘‘ಕಮ್ಮಾನಂ ವಿಪಾಕಂ ಅಪ್ಪಟಿಸಂವಿದಿತ್ವಾ ಪುಗ್ಗಲಸ್ಸ ಬ್ಯನ್ತೀಭಾವಂ ನ ವದಾಮೀತಿ ಏವಂ ಅಯೋನಿಸೋ ಅತ್ಥಂ ಗಹೇತ್ವಾ’’ತಿ ವದನ್ತಿ.

೭೮೧. ತಾವ ನ ಕಮತೀತಿ ಲದ್ಧಿಯಾ ಪಟಿಕ್ಖಿಪತೀತಿ ತಾವ ನ ಕಮತಿ, ತತೋ ಪರಂ ಕಮತೀತಿ ಲದ್ಧಿಯಾ ಪಟಿಕ್ಖಿಪತೀತಿ ಅಧಿಪ್ಪಾಯೋ. ಏತ್ಥ ಕಿರ ‘‘ಸತಿ ಜೀವಿತೇ ಜೀವಿತಾವಸೇಸೇ ಜೀವಿತಾ ವೋರೋಪೇತೀ’’ತಿ ವಚನತೋ ಅತ್ತನೋ ಧಮ್ಮತಾಯ ಮರನ್ತಂ ಕೋಟ್ಟೇನ್ತಸ್ಸ ವಾ ಸೀಸಂ ವಾ ಛಿನ್ದನ್ತಸ್ಸ ನತ್ಥಿ ಪಾಣಾತಿಪಾತೋತಿ ಆಚರಿಯಾ ವದನ್ತಿ. ಪಾಣೋ ಪಾಣಸಞ್ಞಿತಾ ವಧಕಚಿತ್ತಉಪಕ್ಕಮಮರಣೇಸು ವಿಜ್ಜಮಾನೇಸುಪಿ ನ ತೇನ ಉಪಕ್ಕಮೇನ ಮತೋತಿ ನತ್ಥಿ ಪಾಣಾತಿಪಾತೋತಿ ಅಧಿಪ್ಪಾಯೋ. ಏವಂ ಪನ ಮರನ್ತೇನ ತೇನ ಏಕಚಿತ್ತವಾರಮ್ಪಿ ಧಮ್ಮತಾಮರಣತೋ ಓರತೋ ನ ಮತೋತಿ ದುಬ್ಬಿಞ್ಞೇಯ್ಯಮೇತಂ.

ನತ್ಥಿಅರಹತೋಅಕಾಲಮಚ್ಚೂತಿಕಥಾವಣ್ಣನಾ ನಿಟ್ಠಿತಾ.