೧೨. ಉಪಾದಾಪಞ್ಞತ್ತಾನುಯೋಗವಣ್ಣನಾ

೯೭. ನೀಲಂ ರೂಪಂ ಉಪಾದಾಯ ನೀಲೋತಿಆದೀಸೂತಿ ‘‘ನೀಲಂ ರೂಪಂ ಉಪಾದಾಯ ನೀಲಕಸ್ಸ ಪುಗ್ಗಲಸ್ಸ ಪಞ್ಞತ್ತೀ’’ತಿ ಏತ್ಥ ಯೋ ಪುಟ್ಠೋ ನೀಲಂ ಉಪಾದಾಯ ನೀಲೋತಿ, ತದಾದೀಸೂತಿ ಅತ್ಥೋ.

೯೮. ಛೇಕಟ್ಠಂ ಸನ್ಧಾಯಾತಿ ಛೇಕಟ್ಠಂ ಸನ್ಧಾಯ ವುತ್ತಂ, ನ ಕುಸಲಪಞ್ಞತ್ತಿಂ. ‘‘ಕುಸಲಂ ವೇದನಂ ಉಪಾದಾಯಾ’’ತಿ ಮಞ್ಞಮಾನೋ ಪಟಿಜಾನಾತೀತಿ ಅತ್ಥೋ ದಟ್ಠಬ್ಬೋ.

೧೧೨. ಇದಾನಿ …ಪೇ… ದಸ್ಸೇತುಂ ‘‘ಯಥಾ ರುಕ್ಖ’’ನ್ತಿಆದಿಮಾಹಾತಿ ಪುಬ್ಬಪಕ್ಖಂ ದಸ್ಸೇತ್ವಾ ಉತ್ತರಮಾಹಾತಿ ವುತ್ತಂ ಹೋತಿ.

೧೧೫. ‘‘ಯಸ್ಸ ರೂಪಂ ಸೋ ರೂಪವಾ’’ತಿ ಉತ್ತರಪಕ್ಖೇ ವುತ್ತಂ ವಚನಂ ಉದ್ಧರಿತ್ವಾ ‘‘ಯಸ್ಮಾ’’ತಿಆದಿಮಾಹ.

೧೧೬. ಚಿತ್ತಾನುಪಸ್ಸನಾವಸೇನಾತಿ ಚಿತ್ತಾನುಪಸ್ಸನಾವಸೇನ ಪರಿದೀಪಿತಸ್ಸ ಸರಾಗಾದಿಚಿತ್ತಯೋಗಸ್ಸ ವಸೇನಾತಿ ಅಧಿಪ್ಪಾಯೋ.

೧೧೮. ಯೇನಾತಿ ಚಕ್ಖುನ್ತಿ ‘‘ಯೇನಾ’’ತಿ ವುತ್ತಂ ಕರಣಂ ಚಕ್ಖುನ್ತಿ ಅತ್ಥೋ. ಚಕ್ಖುಮೇವ ರೂಪಂ ಪಸ್ಸತೀತಿ ವಿಞ್ಞಾಣನಿಸ್ಸಯಭಾವೂಪಗಮನಮೇವ ಚಕ್ಖುಸ್ಸ ದಸ್ಸನಂ ನಾಮ ಹೋತೀತಿ ಸನ್ಧಾಯ ವದತಿ.

ಉಪಾದಾಪಞ್ಞತ್ತಾನುಯೋಗವಣ್ಣನಾ ನಿಟ್ಠಿತಾ.