೯. ಧಮ್ಮತಣ್ಹಾಅಬ್ಯಾಕತಾತಿಕಥಾವಣ್ಣನಾ

೬೭೬-೬೮೦. ಯಸ್ಮಾ ಧಮ್ಮತಣ್ಹಾತಿ ವುತ್ತಾ, ತಸ್ಮಾ ಅಬ್ಯಾಕತಾತಿ ಕುಸಲೇಸು ಧಮ್ಮೇಸು ಲೋಕುತ್ತರೇಸು ವಾ ಸಬ್ಬೇಸು ತಣ್ಹಾ ‘‘ಧಮ್ಮತಣ್ಹಾ’’ತಿ ಗಹೇತ್ವಾ ಯಸ್ಮಾ ಸಾ ತಣ್ಹಾ, ತಸ್ಮಾ ಕುಸಲಾ ನ ಹೋತಿ, ಯಸ್ಮಾ ಪನ ಧಮ್ಮೇ ಪವತ್ತಾ, ತಸ್ಮಾ ಅಕುಸಲಾ ನ ಹೋತೀತಿ ಅಬ್ಯಾಕತಾತಿ ಲದ್ಧೀತಿ ದಸ್ಸೇತಿ. ತೀಹಿ ಕೋಟ್ಠಾಸೇಹಿ ಛಪಿ ತಣ್ಹಾ ಸಂಖಿಪಿತ್ವಾ ದಸ್ಸಿತಾ, ತಸ್ಮಾ ಧಮ್ಮತಣ್ಹಾಪಿ ಕಾಮತಣ್ಹಾದಿಭಾವತೋ ನ ಅಬ್ಯಾಕತಾತಿ ಅಧಿಪ್ಪಾಯೋ.

ಧಮ್ಮತಣ್ಹಾಅಬ್ಯಾಕತಾತಿಕಥಾವಣ್ಣನಾ ನಿಟ್ಠಿತಾ.

ತೇರಸಮವಗ್ಗವಣ್ಣನಾ ನಿಟ್ಠಿತಾ.