೯. ಧಮ್ಮಟ್ಠಿತತಾಕಥಾವಣ್ಣನಾ

೬೨೭. ಅನನ್ತರಪಚ್ಚಯತಞ್ಚೇವಾತಿ ಅವಿಜ್ಜಾ ಸಙ್ಖಾರಾನಂ ಅನನ್ತರಪಚ್ಚಯೋ ಅವಿಜ್ಜಾಯ ಯಾ ಠಿತತಾ ತತೋ ಹೋತಿ, ತಾಯ ಠಿತತಾಯ ಅನನ್ತರಪಚ್ಚಯಭಾವಸಙ್ಖಾತಾ ಠಿತತಾ ಹೋತೀತಿ ಅಧಿಪ್ಪಾಯೋ. ಅನನ್ತರಪಚ್ಚಯಗ್ಗಹಣಞ್ಚೇತ್ಥ ಅಞ್ಞಮಞ್ಞಪಚ್ಚಯಭಾವರಹಿತಸ್ಸ ಏಕಸ್ಸ ಪಚ್ಚಯಸ್ಸ ದಸ್ಸನತ್ಥನ್ತಿ ದಟ್ಠಬ್ಬಂ. ತೇನ ಹಿ ಸಬ್ಬೋ ತಾದಿಸೋ ಪಚ್ಚಯೋ ದಸ್ಸಿತೋ ಹೋತೀತಿ. ಅಞ್ಞಮಞ್ಞಪಚ್ಚಯತಞ್ಚಾತಿ ಅವಿಜ್ಜಾ ಸಙ್ಖಾರಾನಂ ಪಚ್ಚಯೋ, ಸಙ್ಖಾರಾ ಚ ಅವಿಜ್ಜಾಯ. ತತ್ಥ ಅವಿಜ್ಜಾಯ ಸಙ್ಖಾರಾನಂ ಪಚ್ಚಯಭಾವಸಙ್ಖಾತಾಯ ಠಿತತಾಯ ಸಙ್ಖಾರಾನಂ ಅವಿಜ್ಜಾಯ ಪಚ್ಚಯಭಾವಸಙ್ಖಾತಾ ಠಿತತಾ ಹೋತಿ, ತಸ್ಸಾ ಚ ಇತರಾತಿ ಅಧಿಪ್ಪಾಯೋ.

ಧಮ್ಮಟ್ಠಿತತಾಕಥಾವಣ್ಣನಾ ನಿಟ್ಠಿತಾ.