೪. ಞಾಣಕಥಾವಣ್ಣನಾ

೬೧೪-೬೧೫. ಞಾಣಕಥಾಯಂ ಸೇಯ್ಯಥಾಪಿ ಮಹಾಸಙ್ಘಿಕಾನನ್ತಿ ಪುಬ್ಬೇ ಞಾಣಂಅನಾರಮ್ಮಣನ್ತಿಕಥಾಯಂ (ಕಥಾ. ೫೫೭ ಆದಯೋ) ವುತ್ತೇಹಿ ಅನ್ಧಕೇಹಿ ಅಞ್ಞೇ ಇಧ ಮಹಾಸಙ್ಘಿಕಾ ಭವೇಯ್ಯುಂ. ಯದಿ ಅಞ್ಞಾಣೇ ವಿಗತೇತಿಆದಿನಾ ರಾಗವಿಗಮೋ ವಿಯ ವೀತರಾಗಪಞ್ಞತ್ತಿಯಾ ಅಞ್ಞಾಣವಿಗಮೋ ಞಾಣೀಪಞ್ಞತ್ತಿಯಾ ಕಾರಣನ್ತಿ ದಸ್ಸೇತಿ. ನ ಹಿ ಞಾಣಂ ಅಸ್ಸ ಅತ್ಥೀತಿ ಞಾಣೀ, ಅಥ ಖೋ ಅಞ್ಞಾಣೀಪಟಿಪಕ್ಖತೋ ಞಾಣೀತಿ. ಯಸ್ಮಾ ಞಾಣಪಟಿಲಾಭೇನಾತಿ ಏತ್ಥ ಚ ಞಾಣಪಟಿಲಾಭೇನ ಅಞ್ಞಾಣಸ್ಸ ವಿಗತತ್ತಾ ಸೋ ಞಾಣೀತಿ ವತ್ತಬ್ಬತಂ ಆಪಜ್ಜತೀತಿ ಅತ್ಥೋ ದಟ್ಠಬ್ಬೋ.

ಞಾಣಕಥಾವಣ್ಣನಾ ನಿಟ್ಠಿತಾ.