೩. ಪಞ್ಚವಿಞ್ಞಾಣಸಮಙ್ಗಿಸ್ಸಮಗ್ಗಕಥಾವಣ್ಣನಾ

೫೭೬. ತಂ ಲಕ್ಖಣನ್ತಿ ‘‘ಛ ವಿಞ್ಞಾಣಾ’’ತಿ ಅವತ್ವಾ ‘‘ಪಞ್ಚವಿಞ್ಞಾಣಾ ಉಪ್ಪನ್ನವತ್ಥುಕಾ’’ತಿಆದಿನಾ ವುತ್ತಂ ಲಕ್ಖಣಂ. ‘‘ಛ ವಿಞ್ಞಾಣಾ’’ತಿ ಅವಚನಂ ಪನೇತ್ಥ ‘‘ನೋ ಚ ವತ ರೇ ವತ್ತಬ್ಬೇ’’ತಿಆದಿವಚನಸ್ಸ ಕಾರಣನ್ತಿ ಅಧಿಪ್ಪೇತಂ.

೫೭೭. ಲೋಕಿಯೋತಿ ವಿಪಸ್ಸನಾಮಗ್ಗಮಾಹ. ಯಂ ತತ್ಥ ಅನಿಮಿತ್ತನ್ತಿ ಚಕ್ಖುವಿಞ್ಞಾಣಸಮಙ್ಗಿಕ್ಖಣೇ ಯಂ ಅನಿಮಿತ್ತಂ ಗಣ್ಹನ್ತೋ ನ ನಿಮಿತ್ತಗ್ಗಾಹೀತಿ ವುತ್ತೋ, ತದೇವ ಸುಞ್ಞತನ್ತಿ ಅಧಿಪ್ಪಾಯೋ.

ಪಞ್ಚವಿಞ್ಞಾಣಸಮಙ್ಗಿಸ್ಸಮಗ್ಗಕಥಾವಣ್ಣನಾ ನಿಟ್ಠಿತಾ.