೧. ನಯಮಾತಿಕಾವಣ್ಣನಾ

೧. ಕೋ ಪನೇತಸ್ಸ ಪಕರಣಸ್ಸ ಪರಿಚ್ಛೇದೋತಿ? ನ ಸೋ ಇಧ ವತ್ತಬ್ಬೋ, ಅಟ್ಠಸಾಲಿನಿಯಂ (ಧ. ಸ. ಅಟ್ಠ. ನಿದಾನಕಥಾ) ಪಕರಣಪರಿಚ್ಛೇದೋ ವುತ್ತೋ ಏವಾತಿ ದಸ್ಸೇನ್ತೋ ಆಹ ‘‘ಚುದ್ದಸವಿಧೇನ ವಿಭತ್ತನ್ತಿ ವುತ್ತ’’ನ್ತಿ. ಖನ್ಧಾದೀನಂ ದೇಸನಾ ನೀಯತಿ ಪವತ್ತೀಯತಿ ಏತೇಹಿ, ಖನ್ಧಾದಯೋ ಏವ ವಾ ನೀಯನ್ತಿ ಞಾಯನ್ತಿ ಏತೇಹಿ ಪಕಾರೇಹೀತಿ ನಯಾ, ನಯಾನಂ ಮಾತಿಕಾ ಉದ್ದೇಸೋ, ನಯಾ ಏವ ವಾ ಮಾತಿಕಾತಿ ನಯಮಾತಿಕಾ. ಏತೇಸಂ ಪದಾನಂ ಮೂಲಭೂತತ್ತಾತಿ ‘‘ಮೂಲಮಾತಿಕಾ’’ತಿ ವತ್ತಬ್ಬಾನಂ ಸಙ್ಗಹಾಸಙ್ಗಹಾದೀನಂ ಚುದ್ದಸನ್ನಂ ಪದಾನಂ ಖನ್ಧಾದಿಧಮ್ಮವಿಭಜನಸ್ಸ ಇಮಸ್ಸ ಪಕರಣಸ್ಸ ಮೂಲಭೂತತ್ತಾ ನಿಸ್ಸಯಭೂತತ್ತಾತಿ ಅತ್ಥೋ.