೧೦. ಭರಿಯಾಸುತ್ತವಣ್ಣನಾ

೬೩. ದಸಮೇ ಉಚ್ಚಾಸದ್ದಾ ಮಹಾಸದ್ದಾ ಉದ್ಧಂ ಉಗ್ಗತತ್ತಾ ಉಚ್ಚಂ ಪತ್ಥಟತ್ತಾ ಮಹನ್ತಂ ಅವಿನಿಬ್ಭೋಗಂ ವಿನಿಭುಞ್ಜಿತ್ವಾ ಗಹೇತುಂ ಅಸಕ್ಕುಣೇಯ್ಯಂ ಸದ್ದಂ ಕರೋನ್ತಾ ವದನ್ತಿ. ವಚೀಘೋಸೋಪಿ ಹಿ ಬಹೂಹಿ ಏಕಜ್ಝಂ ಪವತ್ತಿತೋ ಅತ್ಥತೋ ಚ ಸದ್ದತೋ ಚ ದುರವಬೋಧೋ ಕೇವಲಂ ಮಹಾನಿಗ್ಘೋಸೋ ಏವ ಹುತ್ವಾ ಸೋತಪಥಮಾಗಚ್ಛತಿ. ಮಚ್ಛವಿಲೋಪೇತಿ ಮಚ್ಛೇ ವಿಲುಮ್ಪಿತ್ವಾ ವಿಯ ಗಹಣೇ, ಮಚ್ಛಾನಂ ವಾ ವಿಲುಮ್ಪನೇ. ಕೇವಟ್ಟಾನಞ್ಹಿ ಮಚ್ಛಪಚ್ಛಿಟ್ಠಪಿತಟ್ಠಾನೇ ಮಹಾಜನೋ ಸನ್ನಿಪತಿತ್ವಾ ‘‘ಇಧ ಅಞ್ಞಂ ಏಕಂ ಮಚ್ಛಂ ದೇಹಿ, ಏಕಂ ಮಚ್ಛಫಾಲಂ ದೇಹಿ, ಏತಸ್ಸ ತೇ ಮಹಾ ದಿನ್ನೋ, ಮಯ್ಹಂ ಖುದ್ದಕೋ’’ತಿ ಏವಂ ಉಚ್ಚಾಸದ್ದಮಹಾಸದ್ದಂ ಕರೋನ್ತಿ. ತಂ ಸನ್ಧಾಯೇತಂ ವುತ್ತಂ ‘‘ಕೇವಟ್ಟಾನಂ ಮಚ್ಛಪಚ್ಛಿಂ ಓತಾರೇತ್ವಾ ಠಿತಟ್ಠಾನೇ’’ತಿ. ಮಚ್ಛಗ್ಗಹಣತ್ಥಂ ಜಾಲೇ ಪಕ್ಖಿತ್ತೇಪಿ ತಸ್ಮಿಂ ಠಾನೇ ಕೇವಟ್ಟಾ ಚೇವ ಅಞ್ಞೇ ಚ ‘‘ಪವಿಟ್ಠೋ ನ ಪವಿಟ್ಠೋ, ಗಹಿತೋ ನ ಗಹಿತೋ’’ತಿ ಮಹಾಸದ್ದಂ ಕರೋನ್ತಿ. ತಂ ಸನ್ಧಾಯೇತಂ ವುತ್ತಂ ‘‘ಜಾಲೇ ವಾ…ಪೇ… ಮಹಾಸದ್ದೋ ಹೋತೀ’’ತಿ. ಕತ್ತಬ್ಬವತ್ತನ್ತಿ ಪಾದಪರಿಕಮ್ಮಾದಿಕತ್ತಬ್ಬಕಿಚ್ಚಂ. ಖರಾತಿ ಚಿತ್ತೇನ ವಾಚಾಯ ಚ ಕಕ್ಖಳಾ. ಸೇಸಮೇತ್ಥ ಉತ್ತಾನಮೇವ.

ಭರಿಯಾಸುತ್ತವಣ್ಣನಾ ನಿಟ್ಠಿತಾ.