೬. ದುತಿಯಸಞ್ಞಾಸುತ್ತವಣ್ಣನಾ

೪೯. ಛಟ್ಠೇ ನ್ಹಾರುವಿಲೇಖನನ್ತಿ ಚಮ್ಮಂ ಲಿಖನ್ತಾನಂ ಚಮ್ಮಂ ಲಿಖಿತ್ವಾ ಛಡ್ಡಿತಕಸಟಂ. ‘‘ಏಸೋಹಮಸ್ಮೀ’’ತಿಆದಿನಾ ಅಹಂಕರಣಂ ಅಹಙ್ಕಾರೋ. ‘‘ಏತಂ ಮಮಾ’’ತಿ ಮಮಂಕರಣಂ ಮಮಙ್ಕಾರೋ. ತೇನಾಹ ‘‘ಅಹಙ್ಕಾರದಿಟ್ಠಿತೋ’’ತಿಆದಿ. ತಿಸ್ಸೋ ವಿಧಾತಿ ಸೇಯ್ಯಸದಿಸಹೀನವಸೇನ ತಯೋ ಮಾನಾ. ‘‘ಏಕವಿಧೇನ ರೂಪಸಙ್ಗಹೋ’’ತಿಆದೀಸು (ಧ. ಸ. ೫೮೪) ಕೋಟ್ಠಾಸೋ ‘‘ವಿಧಾ’’ತಿ ವುತ್ತೋ. ‘‘ಕಥಂವಿಧಂ ಸೀಲವನ್ತಂ ವದನ್ತಿ, ಕಥಂವಿಧಂ ಪಞ್ಞವನ್ತಂ ವದನ್ತೀ’’ತಿಆದೀಸು (ಸಂ. ನಿ. ೧.೯೫) ಪಕಾರೋ. ‘‘ತಿಸ್ಸೋ ಇಮಾ, ಭಿಕ್ಖವೇ, ವಿಧಾ. ಕತಮಾ ತಿಸ್ಸೋ? ಸೇಯ್ಯೋಹಮಸ್ಮೀತಿ ವಿಧಾ’’ತಿ (ವಿಭ. ೯೨೦) ಏತ್ಥ ಮಾನೋ ‘‘ವಿಧಾ’’ತಿ ವುತ್ತೋ. ಇಧಾಪಿ ಮಾನೋವ ಅಧಿಪ್ಪೇತೋ. ಮಾನೋ ಹಿ ವಿದಹನತೋ ಹೀನಾದಿವಸೇನ ತಿವಿಧಾ. ತೇನಾಕಾರೇನ ದಹನತೋ ಉಪದಹನತೋ ‘‘ವಿಧಾ’’ತಿ ವುಚ್ಚತಿ.

ದುತಿಯಸಞ್ಞಾಸುತ್ತವಣ್ಣನಾ ನಿಟ್ಠಿತಾ.