೫. ಅಧಿಗಮಸುತ್ತವಣ್ಣನಾ

೭೯. ಪಞ್ಚಮೇ ಆಗಚ್ಛನ್ತಿ ಏತೇನ ಕುಸಲಾ ವಾ ಅಕುಸಲಾ ವಾತಿ ಆಗಮನಂ, ಕುಸಲಾಕುಸಲಾನಂ ಉಪ್ಪತ್ತಿಕಾರಣಂ. ತತ್ಥ ಕುಸಲೋತಿ ಆಗಮನಕುಸಲೋ. ಏವಂ ಧಮ್ಮೇ ಮನಸಿಕರೋತೋ ಕುಸಲಾ ವಾ ಅಕುಸಲಾ ವಾ ಧಮ್ಮಾ ಅಭಿವಡ್ಢನ್ತೀತಿ ಏವಂ ಜಾನನ್ತೋ. ಅಪಗಚ್ಛನ್ತಿ ಕುಸಲಾ ವಾ ಅಕುಸಲಾ ವಾ ಏತೇನಾತಿ ಅಪಗಮನಂ. ತೇಸಂ ಏವ ಅನುಪ್ಪತ್ತಿಕಾರಣಂ, ತತ್ಥ ಕುಸಲೋತಿ ಅಪಗಮನಕುಸಲೋ. ಏವಂ ಧಮ್ಮೇ ಮನಸಿಕರೋತೋ ಕುಸಲಾ ವಾ ಅಕುಸಲಾ ವಾ ಧಮ್ಮಾ ನಾಭಿವಡ್ಢನ್ತೀತಿ ಏವಂ ಜಾನನ್ತೋ. ಉಪಾಯಕುಸಲೋತಿ ಠಾನುಪ್ಪತ್ತಿಕಪಞ್ಞಾಸಮನ್ನಾಗತೋ. ಇದಞ್ಚ ಅಚ್ಚಾಯಿಕಕಿಚ್ಚೇ ವಾ ಭಯೇ ವಾ ಉಪ್ಪನ್ನೇ ತಸ್ಸ ತಿಕಿಚ್ಛನತ್ಥಂ ಠಾನುಪ್ಪತ್ತಿಯಾ ಕಾರಣಜಾನನವಸೇನ ವೇದಿತಬ್ಬಂ.

ಅಧಿಗಮಸುತ್ತವಣ್ಣನಾ ನಿಟ್ಠಿತಾ.