೮. ಅರಹತ್ತವಗ್ಗೋ

೧-೩. ದುಕ್ಖಸುತ್ತಾದಿವಣ್ಣನಾ

೭೫-೭೭. ಅಟ್ಠಮಸ್ಸ ಪಠಮಾದೀಸು ನತ್ಥಿ ವತ್ತಬ್ಬಂ. ತತಿಯೇ ತಿವಿಧಂ ಕುಹನವತ್ಥುನ್ತಿ ಪಚ್ಚಯಪ್ಪಟಿಸೇವನಸಾಮನ್ತಜಪ್ಪನಇರಿಯಾಪಥಪ್ಪವತ್ತನಸಙ್ಖಾತಂ ತಿವಿಧಂ ಕುಹನವತ್ಥುಂ. ಉಕ್ಖಿಪಿತ್ವಾತಿ ‘‘ಮಹಾಕುಟುಮ್ಬಿಕೋ ಮಹಾನಾವಿಕೋ ಮಹಾದಾನಪತೀ’’ತಿಆದಿನಾ ಪಗ್ಗಣ್ಹಿತ್ವಾ ಲಪನಂ. ಅವಕ್ಖಿಪಿತ್ವಾತಿ ‘‘ಕಿಂ ಇಮಸ್ಸ ಜೀವಿತಂ, ಬೀಜಭೋಜನೋ ನಾಮಾಯ’’ನ್ತಿ ಹೀಳೇತ್ವಾ ಲಪನಂ.

ದುಕ್ಖಸುತ್ತಾದಿವಣ್ಣನಾ ನಿಟ್ಠಿತಾ.

೪. ಸುಖಸೋಮನಸ್ಸಸುತ್ತವಣ್ಣನಾ

೭೮. ಚತುತ್ಥೇ ಯಥಾವುತ್ತಧಮ್ಮಾದೀಸು ತಸ್ಸ ಕಿಲೇಸನಿಮಿತ್ತಂ ದುಕ್ಖಂ ಅನವಸ್ಸನನ್ತಿ ‘‘ಸುಖಸೋಮನಸ್ಸಬಹುಲೋ ವಿಹರತೀ’’ತಿ ವುತ್ತಂ. ಕಾಯಿಕಸುಖಞ್ಚೇವ ಚೇತಸಿಕಸೋಮನಸ್ಸಞ್ಚ ಬಹುಲಂ ಅಸ್ಸಾತಿ ಸುಖಸೋಮನಸ್ಸಬಹುಲೋ. ಯವತಿ ತೇನ ಫಲಂ ಮಿಸ್ಸಿತಂ ವಿಯ ಹೋತೀತಿ ಯೋನಿ, ಏಕನ್ತಿಕಂ ಕಾರಣಂ. ಅಸ್ಸಾತಿ ಯಥಾವುತ್ತಸ್ಸ ಭಿಕ್ಖುನೋ. ಪರಿಪುಣ್ಣನ್ತಿ ಅವಿಕಲಂ ಅನವಸೇಸಂ.

ಸುಖಸೋಮನಸ್ಸಸುತ್ತವಣ್ಣನಾ ನಿಟ್ಠಿತಾ.

೫. ಅಧಿಗಮಸುತ್ತವಣ್ಣನಾ

೭೯. ಪಞ್ಚಮೇ ಆಗಚ್ಛನ್ತಿ ಏತೇನ ಕುಸಲಾ ವಾ ಅಕುಸಲಾ ವಾತಿ ಆಗಮನಂ, ಕುಸಲಾಕುಸಲಾನಂ ಉಪ್ಪತ್ತಿಕಾರಣಂ. ತತ್ಥ ಕುಸಲೋತಿ ಆಗಮನಕುಸಲೋ. ಏವಂ ಧಮ್ಮೇ ಮನಸಿಕರೋತೋ ಕುಸಲಾ ವಾ ಅಕುಸಲಾ ವಾ ಧಮ್ಮಾ ಅಭಿವಡ್ಢನ್ತೀತಿ ಏವಂ ಜಾನನ್ತೋ. ಅಪಗಚ್ಛನ್ತಿ ಕುಸಲಾ ವಾ ಅಕುಸಲಾ ವಾ ಏತೇನಾತಿ ಅಪಗಮನಂ. ತೇಸಂ ಏವ ಅನುಪ್ಪತ್ತಿಕಾರಣಂ, ತತ್ಥ ಕುಸಲೋತಿ ಅಪಗಮನಕುಸಲೋ. ಏವಂ ಧಮ್ಮೇ ಮನಸಿಕರೋತೋ ಕುಸಲಾ ವಾ ಅಕುಸಲಾ ವಾ ಧಮ್ಮಾ ನಾಭಿವಡ್ಢನ್ತೀತಿ ಏವಂ ಜಾನನ್ತೋ. ಉಪಾಯಕುಸಲೋತಿ ಠಾನುಪ್ಪತ್ತಿಕಪಞ್ಞಾಸಮನ್ನಾಗತೋ. ಇದಞ್ಚ ಅಚ್ಚಾಯಿಕಕಿಚ್ಚೇ ವಾ ಭಯೇ ವಾ ಉಪ್ಪನ್ನೇ ತಸ್ಸ ತಿಕಿಚ್ಛನತ್ಥಂ ಠಾನುಪ್ಪತ್ತಿಯಾ ಕಾರಣಜಾನನವಸೇನ ವೇದಿತಬ್ಬಂ.

ಅಧಿಗಮಸುತ್ತವಣ್ಣನಾ ನಿಟ್ಠಿತಾ.

೬-೭. ಮಹನ್ತತ್ತಸುತ್ತಾದಿವಣ್ಣನಾ

೮೦-೮೧. ಛಟ್ಠೇ ಸಮ್ಪತ್ತೇತಿ ಕಿಲೇಸೇ ಸಮ್ಪತ್ತೇ. ಸತ್ತಮಂ ಉತ್ತಾನಮೇವ.

ಮಹನ್ತತ್ತಸುತ್ತಾದಿವಣ್ಣನಾ ನಿಟ್ಠಿತಾ.

೮-೧೦. ದುತಿಯನಿರಯಸುತ್ತಾದಿವಣ್ಣನಾ

೮೨-೮೪. ಅಟ್ಠಮೇ ಕಾಯಪಾಗಬ್ಭಿಯಾದೀಹೀತಿ ಆದಿ-ಸದ್ದೇನ ವಚೀಪಾಗಬ್ಭಿಯಂ ಮನೋಪಾಗಬ್ಭಿಯಞ್ಚ ಸಙ್ಗಣ್ಹಾತಿ. ನವಮಾದೀನಿ ಉತ್ತಾನತ್ಥಾನೇವ.

ದುತಿಯನಿರಯಸುತ್ತಾದಿವಣ್ಣನಾ ನಿಟ್ಠಿತಾ.

ಅರಹತ್ತವಗ್ಗವಣ್ಣನಾ ನಿಟ್ಠಿತಾ.