೯. ಸೀತಿವಗ್ಗೋ

೧. ಸೀತಿಭಾವಸುತ್ತವಣ್ಣನಾ

೮೫. ನವಮಸ್ಸ ಪಠಮೇ ಸೀತಿಭಾವನ್ತಿ ನಿಬ್ಬಾನಂ, ಕಿಲೇಸವೂಪಸಮಂ ವಾ. ನಿಗ್ಗಣ್ಹಾತೀತಿ ಅಚ್ಚಾರದ್ಧವೀರಿಯತಾದೀಹಿ ಉದ್ಧತಂ ಚಿತ್ತಂ ಉದ್ಧಚ್ಚಪಕ್ಖತೋ ರಕ್ಖಣವಸೇನ ನಿಗ್ಗಣ್ಹಾತಿ. ಪಗ್ಗಣ್ಹಾತೀತಿ ಅತಿಸಿಥಿಲವೀರಿಯತಾದೀಹಿ ಲೀನಂ ಚಿತ್ತಂ ಕೋಸಜ್ಜಪಾತತೋ ರಕ್ಖಣವಸೇನ ಪಗ್ಗಣ್ಹಾತಿ. ಸಮ್ಪಹಂಸೇತೀತಿ ಸಮಪ್ಪವತ್ತಚಿತ್ತಂ ತಥಾಪವತ್ತಿಯಂ ಪಞ್ಞಾಯ ತೋಸೇತಿ ಉತ್ತೇಜೇತಿ ವಾ. ಯದಾ ವಾ ಪಞ್ಞಾಪಯೋಗಮನ್ದತಾಯ ಉಪಸಮಸುಖಾನಧಿಗಮೇನ ವಾ ನಿರಸ್ಸಾದಂ ಚಿತ್ತಂ ಭಾವನಾಯ ನ ಪಕ್ಖನ್ದತಿ, ತದಾ ಜಾತಿಆದೀನಿ ಸಂವೇಗವತ್ಥೂನಿ ಪಚ್ಚವೇಕ್ಖಿತ್ವಾ ಸಮ್ಪಹಂಸೇತಿ ಸಮುತ್ತೇಜೇತಿ. ಅಜ್ಝುಪೇಕ್ಖತೀತಿ ಯದಾ ಪನ ಚಿತ್ತಂ ಅಲೀನಂ ಅನುದ್ಧತಂ ಅನಿರಸ್ಸಾದಂ ಆರಮ್ಮಣೇ ಸಮಪ್ಪವತ್ತಂ ಸಮ್ಮದೇವ ಭಾವನಾವೀತಿಂ ಓತಿಣ್ಣಂ ಹೋತಿ, ತದಾ ಪಗ್ಗಹನಿಗ್ಗಹಸಮ್ಪಹಂಸನೇಸು ಕಿಞ್ಚಿ ಬ್ಯಾಪಾರಂ ಅಕತ್ವಾ ಸಮಪ್ಪವತ್ತೇಸು ಅಸ್ಸೇಸು ಸಾರಥೀ ವಿಯ ಅಜ್ಝುಪೇಕ್ಖತಿ, ಉಪೇಕ್ಖಕೋವ ಹೋತಿ. ಪಣೀತಾಧಿಮುತ್ತಿಕೋತಿ ಪಣೀತೇ ಉತ್ತಮೇ ಮಗ್ಗಫಲೇ ಅಧಿಮುತ್ತೋ ನಿನ್ನಪೋಣಪಬ್ಭಾರೋ.

ಸೀತಿಭಾವಸುತ್ತವಣ್ಣನಾ ನಿಟ್ಠಿತಾ.

೨-೧೧. ಆವರಣಸುತ್ತಾದಿವಣ್ಣನಾ

೮೬-೯೫. ದುತಿಯೇ ಅಚ್ಛನ್ದಿಕೋತಿ ಕತ್ತುಕಮ್ಯತಾಕುಸಲಚ್ಛನ್ದರಹಿತೋ. ಉತ್ತರಕುರುಕಾ ಮನುಸ್ಸಾ ಅಚ್ಛನ್ದಿಕಟ್ಠಾನಂ ಪವಿಟ್ಠಾ. ದುಪ್ಪಞ್ಞೋತಿ ಭವಙ್ಗಪಞ್ಞಾಯ ಪರಿಹೀನೋ. ಭವಙ್ಗಪಞ್ಞಾಯ ಪನ ಪರಿಪುಣ್ಣಾಯಪಿ ಯಸ್ಸ ಭವಙ್ಗಂ ಲೋಕುತ್ತರಸ್ಸ ಪಚ್ಚಯೋ ನ ಹೋತಿ, ಸೋಪಿ ದುಪ್ಪಞ್ಞೋ ಏವ ನಾಮ. ಅಭಬ್ಬೋ ನಿಯಾಮಂ ಓಕ್ಕಮಿತುಂ ಕುಸಲೇಸು ಧಮ್ಮೇಸು ಸಮ್ಮತ್ತನ್ತಿ ಕುಸಲೇಸು ಧಮ್ಮೇಸು ಸಮ್ಮತ್ತನಿಯಾಮಸಙ್ಖಾತಂ ಅರಿಯಮಗ್ಗಂ ಓಕ್ಕಮಿತುಂ ಅಧಿಗನ್ತುಂ ಅಭಬ್ಬೋ. ನ ಕಮ್ಮಾವರಣತಾಯಾತಿಆದೀಸು ಅಭಬ್ಬವಿಪರಿಯಾಯೇನ ಅತ್ಥೋ ವೇದಿತಬ್ಬೋ. ಚತುತ್ಥಾದೀನಿ ಉತ್ತಾನತ್ಥಾನಿ.

ಆವರಣಸುತ್ತಾದಿವಣ್ಣನಾ ನಿಟ್ಠಿತಾ.

ಸೀತಿವಗ್ಗವಣ್ಣನಾ ನಿಟ್ಠಿತಾ.