೫. ದಾರುಕಮ್ಮಿಕಸುತ್ತವಣ್ಣನಾ

೫೯. ಪಞ್ಚಮೇ ಪುತ್ತಸಮ್ಬಾಧಸಯನನ್ತಿ ಪುತ್ತೇಹಿ ಸಮ್ಬಾಧಸಯನಂ. ಏತ್ಥ ಪುತ್ತಸೀಸೇನ ದಾರಪರಿಗ್ಗಹಂ ಪುತ್ತದಾರೇಸು ಉಪ್ಪಿಲೋ ವಿಯ. ತೇನ ತೇಸಂ ರೋಗಾದಿಹೇತು ಸೋಕಾಭಿಭವೇನ ಚ ಚಿತ್ತಸ್ಸ ಸಂಕಿಲಿಟ್ಠತಂ ದಸ್ಸೇತಿ. ಕಾಮಭೋಗಿನಾತಿ ಇಮಿನಾ ಪನ ರಾಗಾಭಿಭವನ್ತಿ. ಉಭಯೇನಪಿ ವಿಕ್ಖಿತ್ತಚಿತ್ತತಂ ದಸ್ಸೇತಿ. ಕಾಸಿಕಚನ್ದನನ್ತಿ ಉಜ್ಜಲಚನ್ದನಂ. ತಂ ಕಿರ ವಣ್ಣವಿಸೇಸಸಮುಜ್ಜಲಂ ಹೋತಿ ಪಭಸ್ಸರಂ, ತದತ್ಥಮೇವ ನಂ ಸಣ್ಹತರಂ ಕರೋನ್ತಿ. ತೇನೇವಾಹ ‘‘ಸಣ್ಹಚನ್ದನ’’ನ್ತಿ, ಕಾಸಿಕವತ್ಥಞ್ಚ ಚನ್ದನಞ್ಚಾತಿ ಅತ್ಥೋ. ಮಾಲಾಗನ್ಧವಿಲೇಪನನ್ತಿ ವಣ್ಣಸೋಭತ್ಥಞ್ಚೇವ ಸುಗನ್ಧಭಾವತ್ಥಞ್ಚ ಮಾಲಂ, ಸುಗನ್ಧಭಾವತ್ಥಾಯ ಗನ್ಧಂ, ಛವಿರಾಗಕರಣತ್ಥಞ್ಚೇವ ಸುಭತ್ಥಞ್ಚ ವಿಲೇಪನಂ ಧಾರೇನ್ತೇನ. ಜಾತರೂಪರಜತನ್ತಿ ಸುವಣ್ಣಞ್ಚೇವ ಅವಸಿಟ್ಠಧನಞ್ಚ ಸಾದಿಯನ್ತೇನ. ಸಬ್ಬೇನಪಿ ಕಾಮೇಸು ಅಭಿಗಿದ್ಧಭಾವಮೇವ ಪಕಾಸೇತಿ.

ದಾರುಕಮ್ಮಿಕಸುತ್ತವಣ್ಣನಾ ನಿಟ್ಠಿತಾ.