೧೧. ಅಪ್ಪಮಾದಸುತ್ತವಣ್ಣನಾ

೫೩. ಏಕಾದಸಮೇ ಜಙ್ಗಲಾನನ್ತಿ ಏತ್ಥ ಯೋ ನಿಪಿಚ್ಛಲೋ ನ ಅನೂಪೋ ನಿರುದಕತಾಯ ಥದ್ಧಲೂಖೋ ಭೂಮಿಪ್ಪದೇಸೋ, ಸೋ ‘‘ಜಙ್ಗಲೋ’’ತಿ ವುಚ್ಚತಿ. ತಬ್ಬಹುಲತಾಯ ಪನ ಇಧ ಸಬ್ಬೋ ಭೂಮಿಪ್ಪದೇಸೋ ಜಙ್ಗಲೋ. ತಸ್ಮಿಂ ಜಙ್ಗಲೇ ಜಾತಾ ಭವಾತಿ ವಾ ಜಙ್ಗಲಾ, ತೇಸಂ ಜಙ್ಗಲಾನಂ. ಏವಞ್ಹಿ ನದಿಚರಾನಮ್ಪಿ ಹತ್ಥೀನಂ ಸಙ್ಗಹೋ ಕತೋ ಹೋತಿ ಸಮೋಧಾತಬ್ಬಾನಂ ವಿಯ ಸಮೋಧಾಯಕಾನಮ್ಪಿ ಇಧ ಜಙ್ಗಲಗ್ಗಹಣೇನ ಗಹೇತಬ್ಬತೋ. ಪಥವೀತಲಚಾರೀನನ್ತಿ ಇಮಿನಾ ಜಲಚಾರಿನೋ ಚ ನಿವತ್ತೇತಿ ಅದಿಸ್ಸಮಾನಪಾದತ್ತಾ. ‘‘ಪಾಣಾನ’’ನ್ತಿ ಸಾಧಾರಣವಚನಮ್ಪಿ ‘‘ಪದಜಾತಾನೀ’’ತಿ ಸದ್ದನ್ತರಸನ್ನಿಧಾನೇನ ವಿಸೇಸನಿವಿಟ್ಠಮೇವ ಹೋತೀತಿ ಆಹ ‘‘ಸಪಾದಕಪಾಣಾನ’’ನ್ತಿ. ‘‘ಮುತ್ತಗತ’’ನ್ತಿಆದೀಸು (ಮ. ನಿ. ೨.೧೧೯; ಅ. ನಿ. ೯.೧೧) ಗತ-ಸದ್ದೋ ವಿಯ ಇಧ ಜಾತ-ಸದ್ದೋ ಅನತ್ಥನ್ತರೋತಿ ಆಹ ‘‘ಪದಜಾತಾನೀತಿ ಪದಾನೀ’’ತಿ. ಸಮೋಧಾನನ್ತಿ ಸಮವರೋಧಂ, ಅನ್ತೋಗಧಂ ವಾ. ತೇನಾಹ ‘‘ಓಧಾನಂ ಉಪನಿಕ್ಖೇಪಂ ಗಚ್ಛನ್ತೀ’’ತಿ. ಕೂಟಙ್ಗಮಾತಿ ಪಾರಿಮನ್ತೇನ ಕೂಟಂ ಉಪಗಚ್ಛನ್ತಿ. ಕೂಟನಿನ್ನಾತಿ ಕೂಟಚ್ಛಿದ್ದಮಗ್ಗೇ ಪವಿಸನವಸೇನ ಕೂಟೇ ನಿನ್ನಾ. ಕೂಟಸಮೋಸರಣಾತಿ ಛಿದ್ದೇ ಅನುಪವಿಸನವಸೇನ ಚ ಆಹಚ್ಚ ಅವತ್ಥಾನೇನ ಚ ಕೂಟೇ ಸಮೋದಹಿತ್ವಾ ಠಿತಾ. ವಣ್ಟೇ ಪತಮಾನೇ ಸಬ್ಬಾನಿ ಭೂಮಿಯಂ ಪತನ್ತೀತಿ ಆಹ ‘‘ವಣ್ಟಾನುವತ್ತಕಾನಿ ಭವನ್ತೀ’’ತಿ.

ಅಪ್ಪಮಾದಸುತ್ತವಣ್ಣನಾ ನಿಟ್ಠಿತಾ.