೭-೮. ಪಠಮಅನಾಗತಭಯಸುತ್ತಾದಿವಣ್ಣನಾ

೭೭-೭೮. ಸತ್ತಮೇ ವಿಸೇಸಸ್ಸ ಪತ್ತಿಯಾ ವಿಸೇಸಸ್ಸ ಪಾಪುಣನತ್ಥಂ. ವೀರಿಯನ್ತಿ ಪಧಾನವೀರಿಯಂ. ತಂ ಪನ ಚಙ್ಕಮನವಸೇನ ಕರಣೇ ‘‘ಕಾಯಿಕ’’ನ್ತಿಪಿ ವತ್ತಬ್ಬತಂ ಲಭತೀತಿ ಆಹ – ‘‘ದುವಿಧಮ್ಪೀ’’ತಿ. ಸತ್ಥಕವಾತಾತಿ ಸನ್ಧಿಬನ್ಧನಾನಿ ಕತ್ತರಿಯಾ ಛಿನ್ದನ್ತಾ ವಿಯ ಪವತ್ತವಾತಾ. ತೇನಾಹ – ‘‘ಸತ್ಥಂ ವಿಯಾ’’ತಿಆದಿ. ಕತಕಮ್ಮೇಹೀತಿ ಕತಚೋರಕಮ್ಮೇಹಿ. ತೇ ಕಿರ ಕತಕಮ್ಮಾ ಯಂ ನೇಸಂ ದೇವತಂ ಆಯಾಚಿತ್ವಾ ಕಮ್ಮಂ ನಿಪ್ಫನ್ನಂ, ತಸ್ಸ ಉಪಕಾರತ್ಥಾಯ ಮನುಸ್ಸೇ ಮಾರೇತ್ವಾ ಗಲಲೋಹಿತಾನಿ ಗಣ್ಹನ್ತಿ. ತೇ ‘‘ಅಞ್ಞೇಸು ಮನುಸ್ಸೇಸು ಮಾರಿಯಮಾನೇಸು ಕೋಲಾಹಲಂ ಉಪ್ಪಜ್ಜಿಸ್ಸತಿ, ಪಬ್ಬಜಿತಂ ಪರಿಯೇಸನ್ತೋ ನಾಮ ನತ್ಥೀ’’ತಿ ಮಞ್ಞಮಾನಾ ಭಿಕ್ಖೂ ಗಹೇತ್ವಾ ಮಾರೇನ್ತಿ. ತಂ ಸನ್ಧಾಯೇತಂ ವುತ್ತಂ. ಅಕತಕಮ್ಮೇಹೀತಿ ಅಟವಿತೋ ಗಾಮಂ ಆಗಮನಕಾಲೇ ಕಮ್ಮನಿಪ್ಫತ್ತತ್ಥಂ ಪುರೇತರಂ ಬಲಿಕಮ್ಮಂ ಕಾತುಕಾಮೇಹಿ. ತೇನೇವಾಹ – ‘‘ಚೋರಿಕಂ ಕತ್ವಾ ನಿಕ್ಖನ್ತಾ ಕತಕಮ್ಮಾ ನಾಮಾ’’ತಿಆದಿ. ಅಟ್ಠಮೇ ನತ್ಥಿ ವತ್ತಬ್ಬಂ.

ಪಠಮಅನಾಗತಭಯಸುತ್ತಾದಿವಣ್ಣನಾ ನಿಟ್ಠಿತಾ.