(೮) ೩. ಯೋಧಾಜೀವವಗ್ಗೋ

೧-೨. ಪಠಮಚೇತೋವಿಮುತ್ತಿಫಲಸುತ್ತಾದಿವಣ್ಣನಾ

೭೧-೭೨. ತತಿಯಸ್ಸ ಪಠಮೇ ಅವಿಜ್ಜಾಪಲಿಘನ್ತಿ ಏತ್ಥ ಅವಿಜ್ಜಾತಿ ವಟ್ಟಮೂಲಿಕಾ ಅವಿಜ್ಜಾ, ಅಯಂ ಪಚುರಜನೇಹಿ ಉಕ್ಖಿಪಿತುಂ ಅಸಕ್ಕುಣೇಯ್ಯಭಾವತೋ ದುಕ್ಖಿಪನಟ್ಠೇನ ನಿಬ್ಬಾನದ್ವಾರಪ್ಪವೇಸವಿಬನ್ಧನೇನ ಚ ‘‘ಪಲಿಘೋ ವಿಯಾತಿ ಪಲಿಘೋ’’ತಿ ವುಚ್ಚತಿ. ತೇನೇಸ ತಸ್ಸಾ ಉಕ್ಖಿತ್ತತ್ತಾ ‘‘ಉಕ್ಖಿತ್ತಪಲಿಘೋ’’ತಿ ವುತ್ತೋ. ಪುನಬ್ಭವಸ್ಸ ಕರಣಸೀಲೋ, ಪುನಬ್ಭವಂ ವಾ ಫಲಂ ಅರಹತೀತಿ ಪೋನೋಭವಿಕಾ, ಪುನಬ್ಭವದಾಯಿಕಾತಿ ಅತ್ಥೋ. ಜಾತಿಸಂಸಾರೋತಿ ಜಾಯನವಸೇನ ಚೇವ ಸಂಸರಣವಸೇನ ಚ ಏವಂಲದ್ಧನಾಮಾನಂ ಪುನಬ್ಭವಕ್ಖನ್ಧಾನಂ ಪಚ್ಚಯೋ ಕಮ್ಮಾಭಿಸಙ್ಖಾರೋ. ಜಾತಿಸಂಸಾರೋತಿ ಹಿ ಫಲೂಪಚಾರೇನ ಕಾರಣಂ ವುತ್ತಂ. ತಞ್ಹಿ ಪುನಪ್ಪುನಂ ಉಪ್ಪತ್ತಿಕಾರಣವಸೇನ ಪರಿಕ್ಖಿಪಿತ್ವಾ ಠಿತತ್ತಾ ‘‘ಪರಿಖಾ’’ತಿ ವುಚ್ಚತಿ ಸನ್ತಾನಸ್ಸ ಪರಿಕ್ಖಿಪನತೋ. ತೇನೇಸ ತಸ್ಸ ಸಂಕಿಣ್ಣತ್ತಾ ವಿಕಿಣ್ಣತ್ತಾ ಸಬ್ಬಸೋ ಖಿತ್ತತ್ತಾ ವಿನಾಸಿತತ್ತಾ ‘‘ಸಂಕಿಣ್ಣಪರಿಖೋ’’ತಿ ವುತ್ತೋ.

ತಣ್ಹಾಸಙ್ಖಾತನ್ತಿ ಏತ್ಥ ತಣ್ಹಾತಿ ವಟ್ಟಮೂಲಿಕಾ ತಣ್ಹಾ. ಅಯಞ್ಹಿ ಗಮ್ಭೀರಾನುಗತಟ್ಠೇನ ‘‘ಏಸಿಕಾ’’ತಿ ವುಚ್ಚತಿ. ಲುಞ್ಚಿತ್ವಾ ಉದ್ಧರಿತ್ವಾ. ಓರಮ್ಭಾಗಿಯಾನೀತಿ ಓರಮ್ಭಾಗಜನಕಾನಿ ಕಾಮಭವೇ ಉಪಪತ್ತಿಪಚ್ಚಯಾನಿ ಕಾಮರಾಗಸಂಯೋಜನಾದೀನಿ. ಏತಾನಿ ಹಿ ಕವಾಟಂ ವಿಯ ನಗರದ್ವಾರಂ ಚಿತ್ತಂ ಪಿದಹಿತ್ವಾ ಠಿತತ್ತಾ ‘‘ಅಗ್ಗಳಾ’’ತಿ ವುಚ್ಚನ್ತಿ. ತೇನೇಸ ತೇಸಂ ನಿಗ್ಗತತ್ತಾ ಭಿನ್ನತ್ತಾ ‘‘ನಿರಗ್ಗಳೋ’’ತಿ ವುತ್ತೋತಿ. ಅಗ್ಗಮಗ್ಗೇನ ಪನ್ನೋ ಅಪಚಿತೋ ಮಾನದ್ಧಜೋ ಏತಸ್ಸಾತಿ ಪನ್ನದ್ಧಜೋ. ಪನ್ನಭಾರೋತಿ ಖನ್ಧಭಾರಕಿಲೇಸಭಾರಅಭಿಸಙ್ಖಾರಭಾರಾ ಓರೋಪಿತಾ ಅಸ್ಸಾತಿ ಪನ್ನಭಾರೋ. ವಿಸಂಯುತ್ತೋತಿ ಚತೂಹಿ ಯೋಗೇಹಿ ಸಬ್ಬಕಿಲೇಸೇಹಿ ಚ ವಿಸಂಯುತ್ತೋ. ಅಸ್ಮಿಮಾನೋತಿ ರೂಪೇ ಅಸ್ಮೀತಿ ಮಾನೋ, ವೇದನಾಯ, ಸಞ್ಞಾಯ, ಸಙ್ಖಾರೇಸು, ವಿಞ್ಞಾಣೇ ಅಸ್ಮಿಮಾನೋ. ಏತ್ಥ ಹಿ ಪಞ್ಚಪಿ ಖನ್ಧೇ ಅವಿಸೇಸತೋ ‘‘ಅಸ್ಮೀ’’ತಿ ಗಹೇತ್ವಾ ಪವತ್ತಮಾನೋ ಅಸ್ಮಿಮಾನೋತಿ ಅಧಿಪ್ಪೇತೋ.

ನಗರದ್ವಾರಸ್ಸ ಪರಿಸ್ಸಯಪಟಿಬಾಹನತ್ಥಞ್ಚೇವ ಸೋಧನತ್ಥಞ್ಚ ಉಭೋಸು ಪಸ್ಸೇಸು ಏಸಿಕಾಥಮ್ಭೇ ನಿಖಣಿತ್ವಾ ಠಪೇತೀತಿ ಆಹ ‘‘ನಗರದ್ವಾರೇ ಉಸ್ಸಾಪಿತೇ ಏಸಿಕಾಥಮ್ಭೇ’’ತಿ. ಪಾಕಾರವಿದ್ಧಂಸನೇನೇವ ಪರಿಖಾಭೂಮಿಸಮಕರಣಂ ಹೋತೀತಿ ಆಹ ‘‘ಪಾಕಾರಂ ಭಿನ್ದಿತ್ವಾ ಪರಿಖಂ ವಿಕಿರಿತ್ವಾ’’ತಿ. ‘‘ಏವ’’ನ್ತಿಆದಿ ಉಪಮಾಸಂಸನ್ದನಂ. ಸನ್ತೋ ಸಂವಿಜ್ಜಮಾನೋ ಕಾಯೋ ಧಮ್ಮಸಮೂಹೋತಿ ಸಕ್ಕಾಯೋ, ಉಪಾದಾನಕ್ಖನ್ಧಪಞ್ಚಕಂ. ದ್ವತ್ತಿಂಸಕಮ್ಮಕಾರಣಾ ದುಕ್ಖಕ್ಖನ್ಧೇ ಆಗತದುಕ್ಖಾನಿ. ಅಕ್ಖಿರೋಗಸೀಸರೋಗಾದಯೋ. ಅಟ್ಠನವುತಿ ರೋಗಾ, ರಾಜಭಯಾದೀನಿ ಪಞ್ಚವೀಸತಿಮಹಾಭಯಾನಿ. ದುತಿಯಂ ಉತ್ತಾನಮೇವ.

ಪಠಮಚೇತೋವಿಮುತ್ತಿಫಲಸುತ್ತಾದಿವಣ್ಣನಾ ನಿಟ್ಠಿತಾ.

೩-೪. ಪಠಮಧಮ್ಮವಿಹಾರೀಸುತ್ತಾದಿವಣ್ಣನಾ

೭೩-೭೪. ತತಿಯೇ ನಿಯಕಜ್ಝತ್ತೇತಿ ಅತ್ತನೋ ಸನ್ತಾನೇ. ಮೇತ್ತಾಯ ಉಪಸಂಹರಣವಸೇನ ಹಿತಂ ಏಸನ್ತೇನ. ಕರುಣಾಯ ವಸೇನ ಅನುಕಮ್ಪಮಾನೇನ. ಪರಿಗ್ಗಹೇತ್ವಾತಿ ಪರಿತೋ ಗಹೇತ್ವಾ, ಫರಿತ್ವಾತಿ ಅತ್ಥೋ. ಪರಿಚ್ಚಾತಿ ಪರಿತೋ ಕತ್ವಾ, ಸಮನ್ತತೋ ಫರಿತ್ವಾ ಇಚ್ಚೇವ ಅತ್ಥೋ. ‘‘ಪಟಿಚ್ಚಾ’’ತಿಪಿ ಪಾಠೋ. ಮಾ ಪಮಜ್ಜಿತ್ಥಾತಿ ‘‘ಝಾಯಥಾ’’ತಿ ವುತ್ತಸಮಥವಿಪಸ್ಸನಾನಂ ಅನನುಯುಞ್ಜನೇನ ಅಞ್ಞೇನ ವಾ ಕೇನಚಿ ಪಮಾದಕಾರಣೇನ ಮಾ ಪಮಾದಂ ಆಪಜ್ಜಿತ್ಥ. ನಿಯ್ಯಾನಿಕಸಾಸನೇ ಅಕತ್ತಬ್ಬಕರಣಂ ವಿಯ ಕತ್ತಬ್ಬಾಕರಣಮ್ಪಿ ಪಮಾದೋತಿ. ವಿಪತ್ತಿಕಾಲೇತಿ ಸತ್ತಅಸಪ್ಪಾಯಾದಿವಿಪತ್ತಿಯುತ್ತೇ ಕಾಲೇ. ಸಬ್ಬೇಪಿ ಸಾಸನೇ ಗುಣಾ ಇಧೇವ ಸಙ್ಗಹಂ ಗಚ್ಛನ್ತೀತಿ ಆಹ ‘‘ಝಾಯಥ ಮಾ ಪಮಾದತ್ಥ…ಪೇ… ಅನುಸಾಸನೀ’’ತಿ. ಚತುತ್ಥೇ ನತ್ಥಿ ವತ್ತಬ್ಬಂ.

ಪಠಮಧಮ್ಮವಿಹಾರೀಸುತ್ತಾದಿವಣ್ಣನಾ ನಿಟ್ಠಿತಾ.

೫. ಪಠಮಯೋಧಾಜೀವಸುತ್ತವಣ್ಣನಾ

೭೫. ಪಞ್ಚಮೇ ಯುಜ್ಝನಂ ಯೋಧೋ, ಸೋ ಆಜೀವೋ ಏತೇಸನ್ತಿ ಯೋಧಾಜೀವಾ. ತೇನಾಹ ‘‘ಯುದ್ಧೂಪಜೀವಿನೋ’’ತಿ. ಸನ್ಥಮ್ಭಿತ್ವಾ ಠಾತುಂ ನ ಸಕ್ಕೋತೀತಿ ಬದ್ಧೋ ಧಿತಿಸಮ್ಪನ್ನೋ ಠಾತುಂ ನ ಸಕ್ಕೋತಿ. ಸಮಾಗತೇತಿ ಸಮ್ಪತ್ತೇ. ಬ್ಯಾಪಜ್ಜತೀತಿ ವಿಕಾರಮಾಪಜ್ಜತಿ. ತೇನಾಹ ‘‘ಪಕತಿಭಾವಂ ಜಹತೀ’’ತಿ.

ರಜಗ್ಗಸ್ಮಿನ್ತಿ ಪಚ್ಚತ್ತೇ ಭುಮ್ಮವಚನನ್ತಿ ಆಹ ‘‘ಕಿಂ ತಸ್ಸ ಪುಗ್ಗಲಸ್ಸ ರಜಗ್ಗಂ ನಾಮಾ’’ತಿ. ವಿನಿಬ್ಬೇಠೇತ್ವಾತಿ ಗಹಿತಗ್ಗಹಣಂ ವಿಸ್ಸಜ್ಜಾಪೇತ್ವಾ. ಮೋಚೇತ್ವಾತಿ ಸರೀರತೋ ಅಪನೇತ್ವಾ.

ಪಠಮಯೋಧಾಜೀವಸುತ್ತವಣ್ಣನಾ ನಿಟ್ಠಿತಾ.

೬. ದುತಿಯಯೋಧಾಜೀವಸುತ್ತವಣ್ಣನಾ

೭೬. ಛಟ್ಠೇ ಚಮ್ಮನ್ತಿ ಇಮಿನಾ ಚಮ್ಮಮಯಂ ಚಮ್ಮಮಿತಿ ಸಿಬ್ಬಿತಂ, ಅಞ್ಞಂ ವಾ ಕೇಟಕಫಲಕಾದಿಂ ಸಙ್ಗಣ್ಹಾತಿ. ಧನುಕಲಾಪಂ ಸನ್ನಯ್ಹಿತ್ವಾತಿ ಧನುಞ್ಚೇವ ತೂಣಿರಞ್ಚ ಸನ್ನಯ್ಹಿತ್ವಾ ಸಜ್ಜೇತ್ವಾ. ಧನುದಣ್ಡಸ್ಸ ಜಿಯಾಯತ್ತಭಾವಕರಣಾದಿಪಿ ಹಿ ಧನುನೋ ಸನ್ನಯ್ಹನಂ. ತೇನೇವಾಹ ‘‘ಧನುಞ್ಚ ಸರಕಲಾಪಞ್ಚ ಸನ್ನಯ್ಹಿತ್ವಾ’’ತಿ. ಯುದ್ಧಸನ್ನಿವೇಸೇನ ಠಿತನ್ತಿ ದ್ವಿನ್ನಂ ಸೇನಾನಂ ಬ್ಯೂಹನಸಂವಿಧಾನನಯೇನ ಕತೋ ಯೋ ಸನ್ನಿವೇಸೋ, ತಸ್ಸ ವಸೇನ ಠಿತಂ, ಸೇನಾಬ್ಯೂಹಸಂವಿಧಾನವಸೇನ ಸನ್ನಿವಿಟ್ಠನ್ತಿ ವುತ್ತಂ ಹೋತಿ. ಉಸ್ಸಾಹಞ್ಚ ವಾಯಾಮಞ್ಚ ಕರೋತೀತಿ ಯುಜ್ಝನವಸೇನ ಉಸ್ಸಾಹಂ ವಾಯಾಮಞ್ಚ ಕರೋತಿ. ಪರಿಯಾಪಾದೇನ್ತೀತಿ ಮರಣಪರಿಯನ್ತಿಕಂ ಅಪರಂ ಪಾಪೇನ್ತಿ. ತೇನಾಹ ‘‘ಪರಿಯಾಪಾದಯನ್ತೀ’’ತಿ, ಜೀವಿತಂ ಪರಿಯಾಪಾದಯನ್ತಿ ಮರಣಂ ಪಟಿಪಜ್ಜಾಪೇನ್ತೀತಿ ವುತ್ತಂ ಹೋತಿ.

ಅರಕ್ಖಿತೇನೇವ ಕಾಯೇನಾತಿಆದೀಸು ಹತ್ಥಪಾದೇ ಕೀಳಾಪೇನ್ತೋ ಗೀವಂ ವಿಪರಿವತ್ತೇನ್ತೋ ಕಾಯಂ ನ ರಕ್ಖತಿ ನಾಮ. ನಾನಪ್ಪಕಾರಂ ದುಟ್ಠುಲ್ಲಂ ಕರೋನ್ತೋ ವಾಚಂ ನ ರಕ್ಖತಿ ನಾಮ. ಕಾಮವಿತಕ್ಕಾದಯೋ ವಿತಕ್ಕೇನ್ತೋ ಚಿತ್ತಂ ನ ರಕ್ಖತಿ ನಾಮ. ಅನುಪಟ್ಠಿತಾಯ ಸತಿಯಾತಿ ಕಾಯಗತಾಯ ಸತಿಯಾ ಅನುಪಟ್ಠಿತಾಯ. ರಾಗೇನ ಅನುಗತೋತಿ ರಾಗೇನ ಅನುಪಹತೋ. ರಾಗಪರೇತೋತಿ ವಾ ರಾಗೇನ ಫುಟ್ಠೋ ಫುಟ್ಠವಿಸೇನ ವಿಯ ಸಪ್ಪೇನ.

ಅನುದಹನಟ್ಠೇನಾತಿ ಅನುಪಾಯಪ್ಪಟಿಪತ್ತಿಯಾ. ಸಮ್ಪತಿ ಆಯತಿಞ್ಚ ಮಹಾಭಿತಾಪಟ್ಠೇನ. ಅನವತ್ಥಿತಸಭಾವತಾಯ ಇತ್ತರಪಚ್ಚುಪಟ್ಠಾನಟ್ಠೇನ. ಮುಹುತ್ತರಮಣೀಯತಾಯ ತಾವಕಾಲಿಕಟ್ಠೇನ. ಬ್ಯತ್ತೇಹಿ ಅಭಿಭವನೀಯತಾಯ ಸಬ್ಬಙ್ಗಪಚ್ಚಙ್ಗಪಲಿಭಞ್ಜನಟ್ಠೇನ. ಛೇದನಭೇದನಾದಿಅಧಿಕರಣಭಾವೇನ ಉಗ್ಘಟ್ಟನಸದಿಸತಾಯ ಅಧಿಕುಟ್ಟನಟ್ಠೇನ. ಅವಣೇ ವಣಂ ಉಪ್ಪಾದೇತ್ವಾ ಅನ್ತೋ ಅನುಪವಿಸನಸಭಾವತಾಯ ವಿನಿವಿಜ್ಝನಟ್ಠೇನ. ದಿಟ್ಠಧಮ್ಮಿಕಸಮ್ಪರಾಯಿಕ ಅನತ್ಥನಿಮಿತ್ತತಾಯ ಸಾಸಙ್ಕಸಪ್ಪಟಿಭಯಟ್ಠೇನ.

ದುತಿಯಯೋಧಾಜೀವಸುತ್ತವಣ್ಣನಾ ನಿಟ್ಠಿತಾ.

೭-೮. ಪಠಮಅನಾಗತಭಯಸುತ್ತಾದಿವಣ್ಣನಾ

೭೭-೭೮. ಸತ್ತಮೇ ವಿಸೇಸಸ್ಸ ಪತ್ತಿಯಾ ವಿಸೇಸಸ್ಸ ಪಾಪುಣನತ್ಥಂ. ವೀರಿಯನ್ತಿ ಪಧಾನವೀರಿಯಂ. ತಂ ಪನ ಚಙ್ಕಮನವಸೇನ ಕರಣೇ ‘‘ಕಾಯಿಕ’’ನ್ತಿಪಿ ವತ್ತಬ್ಬತಂ ಲಭತೀತಿ ಆಹ – ‘‘ದುವಿಧಮ್ಪೀ’’ತಿ. ಸತ್ಥಕವಾತಾತಿ ಸನ್ಧಿಬನ್ಧನಾನಿ ಕತ್ತರಿಯಾ ಛಿನ್ದನ್ತಾ ವಿಯ ಪವತ್ತವಾತಾ. ತೇನಾಹ – ‘‘ಸತ್ಥಂ ವಿಯಾ’’ತಿಆದಿ. ಕತಕಮ್ಮೇಹೀತಿ ಕತಚೋರಕಮ್ಮೇಹಿ. ತೇ ಕಿರ ಕತಕಮ್ಮಾ ಯಂ ನೇಸಂ ದೇವತಂ ಆಯಾಚಿತ್ವಾ ಕಮ್ಮಂ ನಿಪ್ಫನ್ನಂ, ತಸ್ಸ ಉಪಕಾರತ್ಥಾಯ ಮನುಸ್ಸೇ ಮಾರೇತ್ವಾ ಗಲಲೋಹಿತಾನಿ ಗಣ್ಹನ್ತಿ. ತೇ ‘‘ಅಞ್ಞೇಸು ಮನುಸ್ಸೇಸು ಮಾರಿಯಮಾನೇಸು ಕೋಲಾಹಲಂ ಉಪ್ಪಜ್ಜಿಸ್ಸತಿ, ಪಬ್ಬಜಿತಂ ಪರಿಯೇಸನ್ತೋ ನಾಮ ನತ್ಥೀ’’ತಿ ಮಞ್ಞಮಾನಾ ಭಿಕ್ಖೂ ಗಹೇತ್ವಾ ಮಾರೇನ್ತಿ. ತಂ ಸನ್ಧಾಯೇತಂ ವುತ್ತಂ. ಅಕತಕಮ್ಮೇಹೀತಿ ಅಟವಿತೋ ಗಾಮಂ ಆಗಮನಕಾಲೇ ಕಮ್ಮನಿಪ್ಫತ್ತತ್ಥಂ ಪುರೇತರಂ ಬಲಿಕಮ್ಮಂ ಕಾತುಕಾಮೇಹಿ. ತೇನೇವಾಹ – ‘‘ಚೋರಿಕಂ ಕತ್ವಾ ನಿಕ್ಖನ್ತಾ ಕತಕಮ್ಮಾ ನಾಮಾ’’ತಿಆದಿ. ಅಟ್ಠಮೇ ನತ್ಥಿ ವತ್ತಬ್ಬಂ.

ಪಠಮಅನಾಗತಭಯಸುತ್ತಾದಿವಣ್ಣನಾ ನಿಟ್ಠಿತಾ.

೯. ತತಿಯಅನಾಗತಭಯಸುತ್ತವಣ್ಣನಾ

೭೯. ನವಮೇ ಪಾಳಿಗಮ್ಭೀರಾತಿ (ಸಂ. ನಿ. ಟೀ. ೨.೨.೨೨೯) ಪಾಳಿವಸೇನ ಗಮ್ಭೀರಾ ಅಗಾಧಾ ದುಕ್ಖೋಗಾಹಾ ಸಲ್ಲಸುತ್ತಸದಿಸಾ. ಸಲ್ಲಸುತ್ತಞ್ಹಿ (ಸು. ನಿ. ೫೭೯) ‘‘ಅನಿಮಿತ್ತಮನಞ್ಞಾತ’’ನ್ತಿಆದಿನಾ ಪಾಳಿವಸೇನ ಗಮ್ಭೀರಂ, ನ ಅತ್ಥಗಮ್ಭೀರಂ. ತಥಾ ಹಿ ತತ್ಥ ತಾ ತಾ ಗಾಥಾ ದುವಿಞ್ಞೇಯ್ಯರೂಪಾ ತಿಟ್ಠನ್ತಿ. ದುವಿಞ್ಞೇಯ್ಯಞ್ಹಿ ಞಾಣೇನ ದುಕ್ಖೋಗಾಹನ್ತಿ ಕತ್ವಾ ‘‘ಗಮ್ಭೀರ’’ನ್ತಿ ವುಚ್ಚತಿ. ಪುಬ್ಬಾಪರಂಪೇತ್ಥ ಕಾಸಞ್ಚಿ ಗಾಥಾನಂ ದುವಿಞ್ಞೇಯ್ಯತಾಯ ದುಕ್ಖೋಗಾಹಮೇವ, ತಸ್ಮಾ ಪಾಳಿವಸೇನ ಗಮ್ಭೀರಂ. ಅತ್ಥಗಮ್ಭೀರಾತಿ ಅತ್ಥವಸೇನ ಗಮ್ಭೀರಾ ಮಹಾವೇದಲ್ಲಸುತ್ತಸದಿಸಾ, ಮಹಾವೇದಲ್ಲಸುತ್ತಸ್ಸ (ಮ. ನಿ. ೧.೪೪೯ ಆದಯೋ) ಅತ್ಥವಸೇನ ಗಮ್ಭೀರತಾ ಪಾಕಟಾಯೇವ. ಲೋಕಂ ಉತ್ತರತೀತಿ ಲೋಕುತ್ತರೋ, ಸೋ ಅತ್ಥಭೂತೋ ಏತೇಸಂ ಅತ್ಥೀತಿ ಲೋಕುತ್ತರಾ. ತೇನಾಹ – ‘‘ಲೋಕುತ್ತರಧಮ್ಮದೀಪಕಾ’’ತಿ. ಸುಞ್ಞತಾಪಟಿಸಂಯುತ್ತಾತಿ ಸತ್ತಸುಞ್ಞಧಮ್ಮಪ್ಪಕಾಸಕಾ. ತೇನಾಹ ‘‘ಖನ್ಧಧಾತುಆಯತನಪಚ್ಚಯಾಕಾರಪ್ಪಟಿಸಂಯುತ್ತಾ’’ತಿ. ಉಗ್ಗಹೇತಬ್ಬಂ ಪರಿಯಾಪುಣಿತಬ್ಬನ್ತಿ ಚ ಲಿಙ್ಗವಚನವಿಪಲ್ಲಾಸೇನ ವುತ್ತನ್ತಿ ಆಹ ‘‘ಉಗ್ಗಹೇತಬ್ಬೇ ಚೇವ ವಳಞ್ಜೇತಬ್ಬೇ ಚಾ’’ತಿ. ಕವಿನೋ ಕಮ್ಮಂ ಕವಿತಾ. ಯಸ್ಸ ಪನ ಯಂ ಕಮ್ಮಂ, ತಂ ತೇನ ಕತನ್ತಿ ವುಚ್ಚತೀತಿ ಆಹ ‘‘ಕವಿತಾತಿ ಕವೀಹಿ ಕತಾ’’ತಿ. ಕಾವೇಯ್ಯನ್ತಿ ಕಬ್ಯಂ, ಕಬ್ಯನ್ತಿ ಚ ಕವಿನಾ ವುತ್ತನ್ತಿ ಅತ್ಥೋ. ತೇನಾಹ ‘‘ತಸ್ಸೇವ ವೇವಚನ’’ನ್ತಿ. ಚಿತ್ತಕ್ಖರಾತಿ ಚಿತ್ರಾಕಾರಅಕ್ಖರಾ. ಇತರಂ ತಸ್ಸೇವ ವೇವಚನಂ. ಸಾಸನತೋ ಬಹಿದ್ಧಾ ಠಿತಾತಿ ನ ಸಾಸನಾವಚರಾ. ಬಾಹಿರಕಸಾವಕೇಹೀತಿ ‘‘ಬುದ್ಧಾ’’ತಿ ಅಪ್ಪಞ್ಞಾತಾನಂ ಯೇಸಂ ಕೇಸಞ್ಚಿ ಸಾವಕೇಹಿ. ಸುಸ್ಸೂಸಿಸ್ಸನ್ತೀತಿ ಅಕ್ಖರಚಿತ್ತತಾಯ ಚೇವ ಸರಸಮ್ಪತ್ತಿಯಾ ಚ ಅತ್ತಮನಾ ಹುತ್ವಾ ಸಾಮಣೇರದಹರಭಿಕ್ಖುಮಾತುಗಾಮಮಹಾಗಹಪತಿಕಾದಯೋ ‘‘ಏಸ ಧಮ್ಮಕಥಿಕೋ’’ತಿ ಸನ್ನಿಪತಿತ್ವಾ ಸೋತುಕಾಮಾ ಭವಿಸ್ಸನ್ತಿ.

ತತಿಯಅನಾಗತಭಯಸುತ್ತವಣ್ಣನಾ ನಿಟ್ಠಿತಾ.

೧೦. ಚತುತ್ಥಅನಾಗತಭಯಸುತ್ತವಣ್ಣನಾ

೮೦. ದಸಮೇ ಪಞ್ಚವಿಧೇನ ಸಂಸಗ್ಗೇನಾತಿ ‘‘ಸವನಸಂಸಗ್ಗೋ, ದಸ್ಸನಸಂಸಗ್ಗೋ, ಸಮುಲ್ಲಾಪಸಂಸಗ್ಗೋ, ಸಮ್ಭೋಗಸಂಸಗ್ಗೋ, ಕಾಯಸಂಸಗ್ಗೋ’’ತಿ ಏವಂ ವುತ್ತೇನ ಪಞ್ಚವಿಧೇನ ಸಂಸಗ್ಗೇನ. ಸಂಸಜ್ಜತಿ ಏತೇನಾತಿ ಸಂಸಗ್ಗೋ, ರಾಗೋ. ಸವನಹೇತುಕೋ, ಸವನವಸೇನ ವಾ ಪವತ್ತೋ ಸಂಸಗ್ಗೋ ಸವನಸಂಸಗ್ಗೋ. ಏಸ ನಯೋ ಸೇಸೇಸುಪಿ. ಕಾಯಸಂಸಗ್ಗೋ ಪನ ಕಾಯಪರಾಮಾಸೋ. ತೇಸು ಪರೇಹಿ ವಾ ಕಥಿಯಮಾನಂ ರೂಪಾದಿಸಮ್ಪತ್ತಿಂ ಅತ್ತನಾ ವಾ ಸಿತಲಪಿತಗೀತಸದ್ದಂ ಸುಣನ್ತಸ್ಸ ಸೋತವಿಞ್ಞಾಣವೀಥಿವಸೇನ ಉಪ್ಪನ್ನೋ ರಾಗೋ ಸವನಸಂಸಗ್ಗೋ ನಾಮ. ವಿಸಭಾಗರೂಪಂ ಓಲೋಕೇನ್ತಸ್ಸ ಪನ ಚಕ್ಖುವಿಞ್ಞಾಣವೀಥಿವಸೇನ ಉಪ್ಪನ್ನೋ ರಾಗೋ ದಸ್ಸನಸಂಸಗ್ಗೋ ನಾಮ. ಅಞ್ಞಮಞ್ಞಆಲಾಪಸಲ್ಲಾಪವಸೇನ ಉಪ್ಪನ್ನರಾಗೋ ಸಮುಲ್ಲಾಪಸಂಸಗ್ಗೋ ನಾಮ. ಭಿಕ್ಖುನೋ ಭಿಕ್ಖುನಿಯಾ ಸನ್ತಕಂ, ಭಿಕ್ಖುನಿಯಾ ಭಿಕ್ಖುಸ್ಸ ಸನ್ತಕಂ ಗಹೇತ್ವಾ ಪರಿಭೋಗಕರಣವಸೇನ ಉಪ್ಪನ್ನರಾಗೋ ಸಮ್ಭೋಗಸಂಸಗ್ಗೋ ನಾಮ. ಹತ್ಥಗ್ಗಾಹಾದಿವಸೇನ ಉಪ್ಪನ್ನೋ ರಾಗೋ ಕಾಯಸಂಸಗ್ಗೋ ನಾಮ.

ಅನೇಕವಿಹಿತನ್ತಿ ಅನ್ನಸನ್ನಿಧಿಪಾನಸನ್ನಿಧಿವತ್ಥಸನ್ನಿಧಿಯಾನಸನ್ನಿಧಿಸಯನಸನ್ನಿಧಿಗನ್ಧಸನ್ನಿಧಿ- ಆಮಿಸಸನ್ನಿಧಿವಸೇನ ಅನೇಕಪ್ಪಕಾರಂ. ಸನ್ನಿಧಿಕತಸ್ಸಾತಿ ಏತೇನ ‘‘ಸನ್ನಿಧಿಕಾರಪರಿಭೋಗ’’ನ್ತಿ (ಧ. ಸ. ತಿಕಮಾತಿಕಾ ೧೦) ಏತ್ಥ ಕಾರ-ಸದ್ದಸ್ಸ ಕಮ್ಮತ್ಥತಂ ದಸ್ಸೇತಿ. ಯಥಾ ವಾ ‘‘ಆಚಯಂ ಗಾಮಿನೋ’’ತಿ ವತ್ತಬ್ಬೇ ಅನುನಾಸಿಕಲೋಪೇನ ‘‘ಆಚಯಗಾಮಿನೋ’’ತಿ ನಿದ್ದೇಸೋ ಕತೋ, ಏವಂ ‘‘ಸನ್ನಿಧಿಕಾರಂ ಪರಿಭೋಗ’’ನ್ತಿ ವತ್ತಬ್ಬೇ ಅನುನಾಸಿಕಲೋಪೇನ ‘‘ಸನ್ನಿಧಿಕಾರಪರಿಭೋಗ’’ನ್ತಿ ವುತ್ತಂ, ಸನ್ನಿಧಿಂ ಕತ್ವಾ ಪರಿಭೋಗನ್ತಿ ಅತ್ಥೋ.

‘‘ಸನ್ನಿಧಿಕತಸ್ಸ ಪರಿಭೋಗ’’ನ್ತಿ ಏತ್ಥ (ದೀ. ನಿ. ಅಟ್ಠ. ೧.೧೨) ಪನ ದುವಿಧಾ ಕಥಾ ವಿನಯವಸೇನ ಸಲ್ಲೇಖವಸೇನ ಚ. ವಿನಯವಸೇನ ತಾವ ಯಂ ಕಿಞ್ಚಿ ಅನ್ನಂ ಅಜ್ಜ ಪಟಿಗ್ಗಹಿತಂ ಅಪರಜ್ಜು ಸನ್ನಿಧಿಕಾರಂ ಹೋತಿ, ತಸ್ಸ ಪರಿಭೋಗೇ ಪಾಚಿತ್ತಿಯಂ. ಅತ್ತನಾ ಲದ್ಧಂ ಪನ ಸಾಮಣೇರಾನಂ ದತ್ವಾ ತೇಹಿ ಲದ್ಧಂ ವಾ ಪಾಪೇತ್ವಾ ದುತಿಯದಿವಸೇ ಭುಞ್ಜಿತುಂ ವಟ್ಟತಿ, ಸಲ್ಲೇಖೋ ಪನ ನ ಹೋತಿ. ಪಾನಸನ್ನಿಧಿಮ್ಹಿಪಿ ಏಸೇವ ನಯೋ. ವತ್ಥಸನ್ನಿಧಿಮ್ಹಿ ಅನಧಿಟ್ಠಿತಾವಿಕಪ್ಪಿತಂ ಸನ್ನಿಧಿ ಚ ಹೋತಿ, ಸಲ್ಲೇಖಞ್ಚ ಕೋಪೇತಿ. ಅಯಂ ನಿಪ್ಪರಿಯಾಯಕಥಾ. ಪರಿಯಾಯತೋ ಪನ ತಿಚೀವರಸನ್ತುಟ್ಠೇನ ಭವಿತಬ್ಬಂ, ಚತುತ್ಥಂ ಲಭಿತ್ವಾ ಅಞ್ಞಸ್ಸ ದಾತಬ್ಬಂ. ಸಚೇ ಯಸ್ಸ ಕಸ್ಸಚಿ ದಾತುಂ ನ ಸಕ್ಕೋತಿ, ಯಸ್ಸ ಪನ ದಾತುಕಾಮೋ ಹೋತಿ, ಸೋ ಉದ್ದೇಸತ್ಥಾಯ ವಾ ಪರಿಪುಚ್ಛತ್ಥಾಯ ವಾ ಗತೋ, ಆಗತಮತ್ತೇ ದಾತಬ್ಬಂ, ಅದಾತುಂ ನ ವಟ್ಟತಿ. ಚೀವರೇ ಪನ ಅಪ್ಪಹೋನ್ತೇ, ಸತಿಯಾ ವಾ ಪಚ್ಚಾಸಾಯ ಅನುಞ್ಞಾತಕಾಲಂ ಠಪೇತುಂ ವಟ್ಟತಿ. ಸೂಚಿಸುತ್ತಚೀವರಕಾರಕಾನಂ ಅಲಾಭೇ ತತೋಪಿ ವಿನಯಕಮ್ಮಂ ಕತ್ವಾ ಠಪೇತುಂ ವಟ್ಟತಿ ‘‘ಇಮಸ್ಮಿಂ ಜಿಣ್ಣೇ ಪುನ ಈದಿಸಂ ಕುತೋ ಲಭಿಸ್ಸಾಮೀ’’ತಿ ಪನ ಠಪೇತುಂ ನ ವಟ್ಟತಿ, ಸನ್ನಿಧಿ ಚ ಹೋತಿ, ಸಲ್ಲೇಖಞ್ಚ ಕೋಪೇತಿ.

ಯಾನಸನ್ನಿಧಿಮ್ಹಿ ಯಾನಂ ನಾಮ ವಯ್ಹಂ ರಥೋ ಸಕಟಂ ಸನ್ದಮಾನಿಕಾ ಪಾಟಙ್ಕೀತಿ. ನ ಪನೇತಂ ಪಬ್ಬಜಿತಸ್ಸ ಯಾನಂ, ಉಪಾಹನಂ ಪನ ಯಾನಂ. ಏಕಭಿಕ್ಖುಸ್ಸ ಹಿ ಏಕೋ ಅರಞ್ಞವಾಸತ್ಥಾಯ, ಏಕೋ ಧೋತಪಾದಕತ್ಥಾಯಾತಿ ಉಕ್ಕಂಸತೋ ದ್ವೇ ಉಪಾಹನಸಙ್ಘಾಟಕಾ ವಟ್ಟನ್ತಿ, ತತಿಯಂ ಲಭಿತ್ವಾ ಅಞ್ಞಸ್ಸ ದಾತಬ್ಬೋ. ‘‘ಇಮಸ್ಮಿಂ ಜಿಣ್ಣೇ ಅಞ್ಞಂ ಕುತೋ ಲಭಿಸ್ಸಾಮೀ’’ತಿ ಠಪೇತುಂ ನ ವಟ್ಟತಿ, ಸನ್ನಿಧಿ ಚ ಹೋತಿ, ಸಲ್ಲೇಖಞ್ಚ ಕೋಪೇತಿ. ಸಯನಸನ್ನಿಧಿಮ್ಹಿ ಸಯನನ್ತಿ ಮಞ್ಚೋ. ಏಕಸ್ಸ ಭಿಕ್ಖುನೋ ಏಕೋ ಸಯನಗಬ್ಭೇ, ಏಕೋ ದಿವಾಟ್ಠಾನೇತಿ ಉಕ್ಕಂಸತೋ ದ್ವೇ ಮಞ್ಚಾ ವಟ್ಟನ್ತಿ. ತತೋ ಉತ್ತರಿಂ ಲಭಿತ್ವಾ ಅಞ್ಞಸ್ಸ ಭಿಕ್ಖುನೋ, ಗಣಸ್ಸ ವಾ ದಾತಬ್ಬೋ, ಅದಾತುಂ ನ ವಟ್ಟತಿ, ಸನ್ನಿಧಿ ಚೇವ ಹೋತಿ, ಸಲ್ಲೇಖೋ ಚ ಕುಪ್ಪತಿ. ಗನ್ಧಸನ್ನಿಧಿಮ್ಹಿ ಭಿಕ್ಖುನೋ ಕಣ್ಡುಕಚ್ಛುಛವಿದೋಸಾದಿಆಬಾಧೇ ಸತಿ ಗನ್ಧಾ ವಟ್ಟನ್ತಿ. ಗನ್ಧತ್ಥಿಕೇನ ಗನ್ಧಞ್ಚ ಆಹರಾಪೇತ್ವಾ ತಸ್ಮಿಂ ರೋಗೇ ವೂಪಸನ್ತೇ ಅಞ್ಞೇಸಂ ವಾ ಆಬಾಧಿಕಾನಂ ದಾತಬ್ಬಂ, ದ್ವಾರೇ ಪಞ್ಚಙ್ಗುಲಿಘರಧೂಪನಾದೀಸು ವಾ ಉಪನೇತಬ್ಬಂ. ‘‘ಪುನ ರೋಗೇ ಸತಿ ಭವಿಸ್ಸತೀ’’ತಿ ಠಪೇತುಂ ನ ವಟ್ಟತಿ, ಗನ್ಧಸನ್ನಿಧಿ ಚ ಹೋತಿ, ಸಲ್ಲೇಖಞ್ಚ ಕೋಪೇತಿ.

ಆಮಿಸನ್ತಿ ವುತ್ತಾವಸೇಸಂ ದಟ್ಠಬ್ಬಂ. ಸೇಯ್ಯಥಿದಂ – ಇಧೇಕಚ್ಚೋ ಭಿಕ್ಖು ‘‘ತಥಾರೂಪೇ ಕಾಲೇ ಉಪಕಾರಾಯ ಭವಿಸ್ಸನ್ತೀ’’ತಿ ತಿಲತಣ್ಡುಲಮುಗ್ಗಮಾಸನಾಳಿಕೇರಲೋಣಮಚ್ಛಸಪ್ಪಿತೇಲಕುಲಾಲಭಾಜನಾದೀನಿ ಆಹರಾಪೇತ್ವಾ ಠಪೇತಿ. ಸೋ ವಸ್ಸಕಾಲೇ ಕಾಲಸ್ಸೇವ ಸಾಮಣೇರೇಹಿ ಯಾಗುಂ ಪಚಾಪೇತ್ವಾ ಪರಿಭುಞ್ಜಿತ್ವಾ ‘‘ಸಾಮಣೇರ ಉದಕಕದ್ದಮೇ ದುಕ್ಖಂ ಗಾಮಂ ಪವಿಸಿತುಂ, ಗಚ್ಛ ಅಸುಕಕುಲಂ ಗನ್ತ್ವಾ ಮಯ್ಹಂ ವಿಹಾರೇ ನಿಸಿನ್ನಭಾವಂ ಆರೋಚೇಹಿ, ಅಸುಕಕುಲತೋ ದಧಿಆದೀನಿ ಆಹರಾ’’ತಿ ಪೇಸೇತಿ. ಭಿಕ್ಖೂಹಿ ‘‘ಕಿಂ, ಭನ್ತೇ, ಗಾಮಂ ಪವಿಸಿಸ್ಸಾಮಾ’’ತಿ ವುತ್ತೇಪಿ ‘‘ದುಪ್ಪವೇಸೋ, ಆವುಸೋ, ಇದಾನಿ ಗಾಮೋ’’ತಿ ವದತಿ. ತೇ ‘‘ಹೋತು, ಭನ್ತೇ, ಅಚ್ಛಥ ತುಮ್ಹೇ, ಮಯಂ ಭಿಕ್ಖಂ ಪರಿಯೇಸಿತ್ವಾ ಆಹರಿಸ್ಸಾಮಾ’’ತಿ ಗಚ್ಛನ್ತಿ. ಅಥ ಸಾಮಣೇರೋ ದಧಿಆದೀನಿ ಆಹರಿತ್ವಾ ಭತ್ತಞ್ಚ ಬ್ಯಞ್ಜನಞ್ಚ ಸಮ್ಪಾದೇತ್ವಾ ಉಪನೇತಿ, ತಂ ಭುಞ್ಜನ್ತಸ್ಸೇವ ಉಪಟ್ಠಾಕಾ ಭತ್ತಂ ಪಹಿಣನ್ತಿ, ತತೋಪಿ ಮನಾಪಮನಾಪಂ ಭುಞ್ಜತಿ. ಅಥ ಭಿಕ್ಖೂ ಪಿಣ್ಡಪಾತಂ ಗಹೇತ್ವಾ ಆಗಚ್ಛನ್ತಿ, ತತೋಪಿ ಮನಾಪಮನಾಪಂ ಭುಞ್ಜತಿಯೇವ. ಏವಂ ಚತುಮಾಸಮ್ಪಿ ವೀತಿನಾಮೇತಿ. ಅಯಂ ವುಚ್ಚತಿ ಭಿಕ್ಖು ಮುಣ್ಡಕುಟುಮ್ಬಿಕಜೀವಿಕಂ ಜೀವತಿ, ನ ಸಮಣಜೀವಿಕನ್ತಿ. ಏವರೂಪೋ ಆಮಿಸಸನ್ನಿಧಿ ನಾಮ ಹೋತಿ. ಭಿಕ್ಖುನೋ ಪನ ವಸನಟ್ಠಾನೇ ಏಕಾ ತಣ್ಡುಲನಾಳಿ ಏಕೋ ಗುಳಪಿಣ್ಡೋ ಕುಡುವಮತ್ತಂ ಸಪ್ಪೀತಿ ಏತ್ತಕಂ ನಿಧೇತುಂ ವಟ್ಟತಿ ಅಕಾಲೇ ಸಮ್ಪತ್ತಚೋರಾನಂ ಅತ್ಥಾಯ. ತೇ ಹಿ ಏತ್ತಕಂ ಆಮಿಸಪಟಿಸನ್ಥಾರಂ ಅಲಭನ್ತಾ ಜೀವಿತಾ ವೋರೋಪೇಯ್ಯುಂ, ತಸ್ಮಾ ಸಚೇ ಹಿ ಏತ್ತಕಂ ನತ್ಥಿ, ಆಹರಾಪೇತ್ವಾಪಿ ಠಪೇತುಂ ವಟ್ಟತಿ. ಅಫಾಸುಕಕಾಲೇ ಚ ಯದೇತ್ಥ ಕಪ್ಪಿಯಂ, ತಂ ಅತ್ತನಾಪಿ ಪರಿಭುಞ್ಜಿತುಂ ವಟ್ಟತಿ. ಕಪ್ಪಿಯಕುಟಿಯಂ ಪನ ಬಹುಂ ಠಪೇನ್ತಸ್ಸಪಿ ಸನ್ನಿಧಿ ನಾಮ ನತ್ಥಿ.

ಚತುತ್ಥಅನಾಗತಭಯಸುತ್ತವಣ್ಣನಾ ನಿಟ್ಠಿತಾ.

ಯೋಧಾಜೀವವಗ್ಗವಣ್ಣನಾ ನಿಟ್ಠಿತಾ.