(೬) ೧. ಪುಞ್ಞಾಭಿಸನ್ದವಗ್ಗೋ

೧. ಪಠಮಪುಞ್ಞಾಭಿಸನ್ದಸುತ್ತವಣ್ಣನಾ

೫೧. ದುತಿಯಸ್ಸ ಪಠಮೇ ಪುಞ್ಞಾಭಿಸನ್ದಾತಿ ವಾ ಪುಞ್ಞನದಿಯೋ. ಅವಿಚ್ಛೇದೇನ ನಿಚ್ಚಂ ಪವತ್ತಿಯಮಾನಾನಿ ಹಿ ಪುಞ್ಞಾನಿ ಅಭಿಸನ್ದನಟ್ಠೇನ ‘‘ಪುಞ್ಞಾಭಿಸನ್ದಾ’’ತಿ ವುತ್ತಾ. ಅಪರಿಮಿತನ್ತಿ ಆಳ್ಹಕಗಣನಾಯ ಅಪರಿಮಿತಂ, ಯೋಜನವಸೇನ ಪನಸ್ಸ ಪರಿಮಾಣಂ ಅತ್ಥಿ. ತಥಾ ಹಿ ಹೇಟ್ಠಾ ಮಹಾಪಥವಿಯಾ ಉಪರಿ ಆಕಾಸೇನ ಪರತೋ ಚಕ್ಕವಾಳಪಬ್ಬತೇನ ಮಜ್ಝೇ ತತ್ಥ ತತ್ಥ ಠಿತೇಹಿ ದೀಪಪಬ್ಬತಪರಿಯನ್ತೇಹಿ ಪರಿಚ್ಛಿನ್ನತ್ತಾ ಯೋಜನತೋ ಸಕ್ಕಾ ಪಮಾಣಂ ಕಾತುಂ. ಭೇರವಾರಮ್ಮಣೇಹೀತಿ ಸವಿಞ್ಞಾಣಕಾವಿಞ್ಞಾಣಕೇಹಿ ಭೇರವಾರಮ್ಮಣೇಹಿ. ತಥಾ ಹಿ ತಂ ಮಹಾಸರೀರಮಚ್ಛಕುಮ್ಭೀಲಯಕ್ಖರಕ್ಖಸಮಹಾನಾಗದಾನವಾದೀನಂ ಸವಿಞ್ಞಾಣಕಾನಂ ವಳವಾಮುಖಪಾತಾಲಾದೀನಂ ಅವಿಞ್ಞಾಣಕಾನಞ್ಚ ಭೇರವಾರಮ್ಮಣಾನಂ ವಸೇನ ‘‘ಬಹುಭೇರವ’’ನ್ತಿ ವುಚ್ಚತಿ. ಸೇಸಮೇತ್ಥ ಉತ್ತಾನಮೇವ.

ಪಠಮಪುಞ್ಞಾಭಿಸನ್ದಸುತ್ತವಣ್ಣನಾ ನಿಟ್ಠಿತಾ.

೨. ದುತಿಯಪುಞ್ಞಾಭಿಸನ್ದಸುತ್ತವಣ್ಣನಾ

೫೨. ದುತಿಯೇ ಸೋತಾಪನ್ನಸ್ಸ ಸದ್ಧಾ ಅಧಿಪ್ಪೇತಾತಿ ಸೋತಾಪನ್ನಸ್ಸ ಮಗ್ಗೇನಾಗತಾ ಸದ್ಧಾ ಅಧಿಪ್ಪೇತಾ.

ದುತಿಯಪುಞ್ಞಾಭಿಸನ್ದಸುತ್ತವಣ್ಣನಾ ನಿಟ್ಠಿತಾ.

೩-೪. ಪಠಮಸಂವಾಸಸುತ್ತಾದಿವಣ್ಣನಾ

೫೩-೫೪. ತತಿಯೇ ಯಥಾಕಮ್ಮಂ ತಾ ತಾ ಗತಿಯೋ ಅರನ್ತಿ ಉಪಗಚ್ಛನ್ತೀತಿ ಅರಿಯಾ, ಸತ್ತಾ. ಇಮೇ ಪನ ಕುಚ್ಛಿತಾ ಅರಿಯಾತಿ ಕದರಿಯಾ. ಥದ್ಧಮಚ್ಛರಿನೋ, ಥದ್ಧೇನ ಮಚ್ಛರೇನ ಸಮನ್ನಾಗತಾತಿ ಅತ್ಥೋ. ಥದ್ಧಮಚ್ಛರಿಯಸದಿಸಞ್ಹಿ ಕುಚ್ಛಿತಂ ಸಬ್ಬದಾ ನಿಹೀನಂ ನತ್ಥಿ ಸಬ್ಬಗುಣಾನಂ ಆದಿಭೂತಸ್ಸ ಭೋಗಸಮ್ಪತ್ತಿಆದಿಸಬ್ಬಸಮ್ಪತ್ತೀನಂ ಮೂಲಭೂತಸ್ಸ ದಾನಸ್ಸ ನಿಸೇಧನತೋ. ತೇನಾಹ ‘‘ಕದರಿಯಾತಿ ಥದ್ಧಮಚ್ಛರಿನೋ’’ತಿ. ಏಕಚ್ಚೋ ಹಿ ಅತ್ತನೋ ವಸನಟ್ಠಾನೇ ಭಿಕ್ಖೂ ಹತ್ಥಂ ಪಸಾರೇತ್ವಾಪಿ ನ ವನ್ದತಿ. ಅಞ್ಞತ್ಥ ಗತೋ ವಿಹಾರಂ ಪವಿಸಿತ್ವಾ ಸಕ್ಕಚ್ಚಂ ವನ್ದಿತ್ವಾ ಮಧುರಪ್ಪಟಿಸನ್ಥಾರಂ ಕರೋತಿ ‘‘ಕಿಂ, ಭನ್ತೇ, ಅಮ್ಹಾಕಂ ವಸನಟ್ಠಾನಂ ನಾಗಚ್ಛಥ, ಸಮ್ಪನ್ನೋ ಪದೇಸೋ, ಪಟಿಬಲಾಹಂ ಅಯ್ಯಾನಂ ಯಾಗುಭತ್ತಾದೀಹಿ ಉಪಟ್ಠಾನಂ ಕಾತು’’ನ್ತಿ. ಭಿಕ್ಖು ‘‘ಸದ್ಧೋ ಅಯಂ ಉಪಾಸಕೋ’’ತಿ ಯಾಗುಭತ್ತಾದೀಹಿ ಸಙ್ಗಣ್ಹಾತಿ.

ಅಥೇಕೋ ಥೇರೋ ತಸ್ಸ ಗಾಮಂ ಗನ್ತ್ವಾ ಪಿಣ್ಡಾಯ ಚರತಿ. ಸೋ ತಂ ದಿಸ್ವಾ ಅಞ್ಞೇನ ವಾ ಗಚ್ಛತಿ, ಘರಂ ವಾ ಪವಿಸತಿ. ಸಚೇಪಿ ಸಮ್ಮುಖೀಭಾವಂ ಆಗಚ್ಛತಿ, ಹತ್ಥೇನ ವನ್ದಿತ್ವಾ ‘‘ಅಯ್ಯಸ್ಸ ಭಿಕ್ಖಂ ದೇಥ, ಅಹಂ ಏಕೇನ ಕಮ್ಮೇನ ಗಚ್ಛಾಮೀ’’ತಿ ಪಕ್ಕಮತಿ. ಥೇರೋ ಸಕಲಗಾಮಂ ಚರಿತ್ವಾ ತುಚ್ಛಪತ್ತೋವ ನಿಕ್ಖಮತಿ. ಇದಂ ತಾವ ಮುದುಮಚ್ಛರಿಯಂ ನಾಮ. ಯೇನ ಅದಾಯಕೋಪಿ ದಾಯಕೋ ವಿಯ ಪಞ್ಞಾಯತಿ. ಇಧ ಪನ ಥದ್ಧಮಚ್ಛರಿಯಂ ಅಧಿಪ್ಪೇತಂ. ಯೇನ ಸಮನ್ನಾಗತೋ ಭಿಕ್ಖೂಸು ಪಿಣ್ಡಾಯ ಪವಿಟ್ಠೇಸು ‘‘ಥೇರಾ ಠಿತಾ’’ತಿ ವುತ್ತೇ ‘‘ಕಿಂ ಮಯ್ಹಂ ಪಾದಾ ರುಜ್ಜನ್ತೀ’’ತಿಆದೀನಿ ವತ್ವಾ ಸಿಲಾಥಮ್ಭೋ ವಿಯ ಖಾಣುಕೋ ವಿಯ ಚ ಥದ್ಧೋ ಹುತ್ವಾ ತಿಟ್ಠತಿ, ಸಾಮೀಚಿಮ್ಪಿ ನ ಕರೋತಿ, ಕುತೋ ದಾನಂ. ಅಯಮಿಧ ಅಧಿಪ್ಪೇತೋ. ತೇನ ವುತ್ತಂ ‘‘ಥದ್ಧಮಚ್ಛರಿನೋತಿ ಥದ್ಧೇನ ಮಚ್ಛರೇನ ಸಮನ್ನಾಗತಾತಿ ಅತ್ಥೋ’’ತಿ. ಮಚ್ಛರಂ ಮಚ್ಛೇರಂ ಮಚ್ಛರಿಯನ್ತಿ ಅತ್ಥತೋ ಏಕಂ.

ಪರಿಭಾಸಕಾತಿ ಭಿಕ್ಖೂ ಘರದ್ವಾರೇ ಠಿತೇ ದಿಸ್ವಾ ‘‘ಕಿಂ ತುಮ್ಹೇ ಕಸಿತ್ವಾ ಆಗತಾ ವಪಿತ್ವಾ ಲಾಯಿತ್ವಾ, ಮಯಂ ಅತ್ತನೋಪಿ ನ ಲಭಾಮ, ಕುತೋ ತುಮ್ಹಾಕಂ, ಸೀಘಂ ನಿಕ್ಖಮಥಾ’’ತಿಆದೀಹಿ ಸನ್ತಜ್ಜಕಾ. ಯಾಚಕಾನಂ ವಚನಸ್ಸ ಅತ್ಥಂ ಜಾನನ್ತೀತಿ ಏತ್ಥ ಕಿಞ್ಚಾಪಿ ಭಿಕ್ಖೂ ಘರದ್ವಾರೇ ಠಿತಾ ತುಣ್ಹೀ ಹೋನ್ತಿ, ಅತ್ಥತೋ ಪನ ‘‘ಭಿಕ್ಖಂ ದೇಥಾ’’ತಿ ವದನ್ತಿ ನಾಮ ಅರಿಯಾಯ ಯಾಚನಾಯ. ವುತ್ತಞ್ಹೇತಂ ‘‘ಉದ್ದಿಸ್ಸ ಅರಿಯಾ ತಿಟ್ಠನ್ತಿ, ಏಸಾ ಅರಿಯಾನ ಯಾಚನಾ’’ತಿ (ಮಿ. ಪ. ೪.೫.೯). ತತ್ರ ಯೇ ‘‘ಮಯಂ ಪಚಾಮ, ಇಮೇ ನ ಪಚನ್ತಿ, ಪಚಮಾನೇ ಪತ್ವಾ ಅಲಭನ್ತಾ ಕುಹಿಂ ಲಭಿಸ್ಸತೀ’’ತಿ ದೇಯ್ಯಧಮ್ಮಂ ಸಂವಿಭಜನ್ತಿ, ತೇ ವದಞ್ಞೂ ಯಾಚಕಾನಂ ವಚನಸ್ಸ ಅತ್ಥಂ ಜಾನನ್ತಿ ನಾಮ ಞತ್ವಾ ಕತ್ತಬ್ಬಕರಣತೋ. ಚತುತ್ಥಂ ಉತ್ತಾನಮೇವ.

ಪಠಮಸಂವಾಸಸುತ್ತಾದಿವಣ್ಣನಾ ನಿಟ್ಠಿತಾ.

೫-೬. ಸಮಜೀವೀಸುತ್ತಾದಿವಣ್ಣನಾ

೫೫-೫೬. ಪಞ್ಚಮೇ ಅನುಗ್ಗಣ್ಹನತ್ಥನ್ತಿ ನಕುಲಮಾತಾ ನಕುಲಪಿತಾತಿ ಇಮೇಸಂ ದ್ವಿನ್ನಂ ಸಙ್ಗಹತ್ಥಾಯ. ನಕುಲಸ್ಸ ದಾರಕಸ್ಸ ಪಿತಾ ನಕುಲಪಿತಾ. ನಕುಲಮಾತಾತಿ ಏತ್ಥಾಪಿ ಏಸೇವ ನಯೋ. ಸೇಸಮೇತ್ಥ ಉತ್ತಾನಮೇವ. ಛಟ್ಠೇ ನತ್ಥಿ ವತ್ತಬ್ಬಂ.

ಸಮಜೀವೀಸುತ್ತಾದಿವಣ್ಣನಾ ನಿಟ್ಠಿತಾ.

೭-೧೦. ಸುಪ್ಪವಾಸಾಸುತ್ತಾದಿವಣ್ಣನಾ

೫೭-೬೦. ಸತ್ತಮೇ ಆಯುಭಾಗಪಟಿಲಾಭಿನೀ ಹೋತೀತಿ ಆಯುಕೋಟ್ಠಾಸಸ್ಸ ಪಟಿಲಾಭಿನೀ ಹೋತಿ. ತಿವಿಧಲೋಕನ್ತಿ ಸತ್ತಸಙ್ಖಾರಭಾಜನಸಙ್ಖಾತಂ ತಿವಿಧಂ ಲೋಕಂ. ವಿದಿತಂ ಕತ್ವಾತಿ ವಿಭೂತಂ ಕತ್ವಾ. ಲೋಕವಿದೂನನ್ತಿ ಕರಣತ್ಥೇ ಸಾಮಿವಚನನ್ತಿ ಆಹ ‘‘ಬುದ್ಧೇಹಿ ಪಸತ್ಥಾ’’ತಿ. ಅಟ್ಠಮನವಮದಸಮಾನಿ ಉತ್ತಾನತ್ಥಾನೇವ.

ಸುಪ್ಪವಾಸಾಸುತ್ತಾದಿವಣ್ಣನಾ ನಿಟ್ಠಿತಾ.

ಪುಞ್ಞಾಭಿಸನ್ದವಗ್ಗವಣ್ಣನಾ ನಿಟ್ಠಿತಾ.