೯. ಧಮ್ಮಪದಸುತ್ತವಣ್ಣನಾ

೨೯. ನವಮೇ ಝಾನಾದಿಭೇದೋ ಧಮ್ಮೋ ಪಜ್ಜತಿ ಏತೇನಾತಿ ಧಮ್ಮಪದಂ, ಅನಭಿಜ್ಝಾವ ಧಮ್ಮಪದಂ ಅನಭಿಜ್ಝಾಧಮ್ಮಪದಂ, ಅನಭಿಜ್ಝಾಪಧಾನೋ ವಾ ಧಮ್ಮಕೋಟ್ಠಾಸೋ ಅನಭಿಜ್ಝಾಧಮ್ಮಪದಂ. ಏವಂ ಸೇಸೇಸುಪಿ. ಅತ್ಥತೋ ಪನ ಅನಭಿಜ್ಝಾಧಮ್ಮಪದಂ ನಾಮ ಅಲೋಭೋ ವಾ ಅಲೋಭಸೀಸೇನ ಅಧಿಗತಜ್ಝಾನವಿಪಸ್ಸನಾಮಗ್ಗಫಲನಿಬ್ಬಾನಾನಿ ವಾ. ಅಬ್ಯಾಪಾದೋ ಧಮ್ಮಪದಂ ನಾಮ ಮೇತ್ತಾ ವಾ ಮೇತ್ತಾಸೀಸೇನ ಅಧಿಗತಜ್ಝಾನಾದೀನಿ ವಾ. ಸಮ್ಮಾಸತಿಧಮ್ಮಪದಂ ನಾಮ ಸೂಪಟ್ಠಿತಸ್ಸತಿ ವಾ ಸತಿಸೀಸೇನ ಅಧಿಗತಜ್ಝಾನಾದೀನಿ ವಾ. ಸಮ್ಮಾಸಮಾಧಿಧಮ್ಮಪದಂ ನಾಮ ಅಟ್ಠಸಮಾಪತ್ತಿ ವಾ ಅಟ್ಠಸಮಾಪತ್ತಿಸೀಸೇನ ಅಧಿಗತಜ್ಝಾನವಿಪಸ್ಸನಾಮಗ್ಗಫಲನಿಬ್ಬಾನಾನಿ ವಾ. ದಸಅಸುಭವಸೇನ ವಾ ಅಧಿಗತಜ್ಝಾನಾದೀನಿ ಅನಭಿಜ್ಜಾ ಧಮ್ಮಪದಂ. ಚತುಬ್ರಹ್ಮವಿಹಾರವಸೇನ ಅಧಿಗತಾನಿ ಅಬ್ಯಾಪಾದೋ ಧಮ್ಮಪದಂ. ದಸಾನುಸ್ಸತಿ ಆಹಾರೇಪಟಿಕೂಲಸಞ್ಞಾವಸೇನ ಅಧಿಗತಾನಿ ಸಮ್ಮಾಸತಿಧಮ್ಮಪದಂ. ದಸಕಸಿಣಆನಾಪಾನವಸೇನ ಅಧಿಗತಾನಿ ಸಮ್ಮಾಸಮಾಧಿಧಮ್ಮಪದಂ. ಅನಭಿಜ್ಝಾಲೂತಿ ಅನಭಿಜ್ಝಾಯನಸೀಲೋ. ಅಭಿಪುಬ್ಬೋ ಝೇಸದ್ದೋ ಅಭಿಜ್ಝಾಯನಟ್ಠೋ. ತೇನೇವಾಹ ‘‘ನಿತ್ತಣ್ಹೋ ಹುತ್ವಾ’’ತಿ. ಪಕತಿಭಾವಂ ಅವಿಜಹನ್ತೇನಾತಿ ಪರಿಸುದ್ಧಭಾವಂ ಸಭಾವಸಙ್ಖಾತಅನವಜ್ಜಸಙ್ಖಾತಂ ಪಕತಿಭಾವಂ ಅವಿಜಹನ್ತೇನ. ಸಾವಜ್ಜಧಮ್ಮಸಮುಪ್ಪತ್ತಿಯಾ ಹಿ ಚಿತ್ತಸ್ಸ ಅನವಜ್ಜಭಾವೋ ಜಹಿತೋ ಹೋತೀತಿ.

ಧಮ್ಮಪದಸುತ್ತವಣ್ಣನಾ ನಿಟ್ಠಿತಾ.