೨. ಭಯಸುತ್ತವಣ್ಣನಾ

೬೩. ದುತಿಯೇ ಪರಿತ್ತಾತುಂ ಸಮತ್ಥಭಾವೇನಾತಿ ಉಪ್ಪನ್ನಭಯತೋ ರಕ್ಖಿತುಂ ಸಮತ್ಥಭಾವೇನ. ನತ್ಥಿ ಏತ್ಥ ಮಾತಾಪುತ್ತಂ ಅಞ್ಞಮಞ್ಞಂ ತಾಯಿತುಂ ಸಮತ್ಥನ್ತಿ ಅಮಾತಾಪುತ್ತಾನಿ, ತಾನಿಯೇವ ಅಮಾತಾಪುತ್ತಿಕಾನಿ. ತೇನಾಹ ‘‘ನತ್ಥಿ ಏತ್ಥಾ’’ತಿಆದಿ. ಯನ್ತಿ ಭುಮ್ಮತ್ಥೇ ಉಪಯೋಗವಚನನ್ತಿ ಆಹ ‘‘ಯಸ್ಮಿಂ ಸಮಯೇ’’ತಿ. ಮಾತಾಪಿ ಪುತ್ತಂ ಪಸ್ಸಿತುಂ ನ ಲಭತಿ, ಪರಿತ್ತಾತುಂ ನ ಸಮತ್ಥನ್ತಿ ಅಧಿಪ್ಪಾಯೋ. ಪುತ್ತೋಪಿ ಮಾತರನ್ತಿ ಏತ್ಥಾಪಿ ಏಸೇವ ನಯೋ. ಚಿತ್ತುತ್ರಾಸೋಯೇವ ಭಯಂ ಚಿತ್ತುತ್ರಾಸಭಯಂ. ಇಮಿನಾ ಓತ್ತಪ್ಪಭಯಾದಿಂ ನಿವತ್ತೇತಿ. ಅಟವಿಗ್ಗಹಣೇನ ಅಟವಿವಾಸಿನೋ ವುತ್ತಾ ‘‘ಸಬ್ಬೋ ಗಾಮೋ ಆಗತೋ’’ತಿಆದೀಸು ವಿಯಾತಿ ಆಹ ‘‘ಅಟವೀತಿ ಚೇತ್ಥ ಅಟವಿವಾಸಿನೋ ಚೋರಾ ವೇದಿತಬ್ಬಾ’’ತಿ. ಏತೇತಿ ಅಟವಿವಾಸಿನೋ ಚೋರಾ. ಏತಂ ವುತ್ತನ್ತಿ ‘‘ಅಟವಿಸಙ್ಕೋಪೋ’’ತಿ ಇದಂ ವುತ್ತಂ. ಠಾನಗಮನಾದಿಇರಿಯಾಪಥಚಕ್ಕಸಮಙ್ಗಿನೋ ಇರಿಯಾಪಥಚಕ್ಕಸಮಾರುಳ್ಹಾ ನಾಮ ಹೋನ್ತೀತಿ ಆಹ ‘‘ಇರಿಯಾಪಥಚಕ್ಕಮ್ಪಿ ವಟ್ಟತೀ’’ತಿ. ಇರಿಯಾಪಥೋಯೇವ ಪವತ್ತನಟ್ಠೇನ ಚಕ್ಕನ್ತಿ ಇರಿಯಾಪಥಚಕ್ಕಂ.

ಪರಿಯಾಯನ್ತೀತಿ ಪರಿತೋ ತೇನ ತೇನ ದಿಸಾಭಾಗೇನ ಗಚ್ಛನ್ತಿ. ತೇನಾಹ ‘‘ಇತೋ ಚಿತೋ ಚ ಗಚ್ಛನ್ತೀ’’ತಿ. ಮಾತುಪೇಮೇನ ಗನ್ತುಂ ಅವಿಸಹಿತ್ವಾ ಅತ್ತನೋ ಸನ್ತಿಕಂ ಆಗಚ್ಛನ್ತಂ. ಅತ್ತಸಿನೇಹಸ್ಸ ಬಲವಭಾವತೋ ಮಾತರಮ್ಪಿ ಅನಪೇಕ್ಖಿತ್ವಾ ‘‘ಅತ್ತಾನಂಯೇವ ರಕ್ಖಿಸ್ಸಾಮೀ’’ತಿ ಗಚ್ಛನ್ತಂ. ಏಕಸ್ಮಿಂ ಠಾನೇ ನಿಲೀನನ್ತಿ ವುತ್ತನಯೇನೇವ ಗನ್ತ್ವಾ ಏಕಸ್ಮಿಂ ಖೇಮೇ ಪದೇಸೇ ನಿಸಿನ್ನಂ. ಕುಲ್ಲೇ ವಾತಿಆದೀಸು ಕೂಲಂ ಪರತೀರಂ ವಹತಿ ಪಾಪೇತೀಹಿ ಕುಲ್ಲೋ, ತರಣತ್ಥಾಯ ವೇಳುನಳಾದೀಹಿ ಕಲಾಪಂ ಕತ್ವಾ ಬದ್ಧೋ. ಪತ್ಥರಿತ್ವಾ ಬದ್ಧೋ ಪನ ಉಳುಮ್ಪೋ, ಚಾಟಿಆದಿ ಮತ್ತಿಕಾಭಾಜನಂ. ವುಯ್ಹಮಾನನ್ತಿ ಉದಕೋಘೇನ ಅಧೋಸೋತಂ ನೀಯಮಾನಂ.

ಯಥಾವುತ್ತಾನಿ ತೀಣಿ ಭಯಾನಿ ಸಮಾತಾಪುತ್ತಿಕಾನಿಯೇವ ಅಸ್ಸುತವತೋ ಪುಥುಜ್ಜನಸ್ಸ ವಸೇನ ಅಮಾತಾಪುತ್ತಿಕಾನಿ ದಸ್ಸಿತಾನೀತಿ ಆಹ ‘‘ಏವಂ ಪರಿಯಾಯತೋ ಅಮಾತಾಪುತ್ತಿಕಾನಿ ಭಯಾನಿ ದಸ್ಸೇತ್ವಾ’’ತಿ.

ಭಯಸುತ್ತವಣ್ಣನಾ ನಿಟ್ಠಿತಾ.