೯. ಪಠಮಅರಿಯಾವಾಸಸುತ್ತವಣ್ಣನಾ

೧೯. ನವಮೇ ಅರಿಯಾನಂ ಏವ ಆವಾಸಾತಿ ಅರಿಯಾವಾಸಾ ಅನರಿಯಾನಂ ತಾದಿಸಾನಂ ಅಸಮ್ಭವತೋ. ಅರಿಯಾತಿ ಚೇತ್ಥ ಉಕ್ಕಟ್ಠನಿದ್ದೇಸೇನ ಖೀಣಾಸವಾ ಗಹಿತಾ. ತೇ ಚ ಯಸ್ಮಾ ತೇಹಿ ಸಬ್ಬಕಾಲಂ ಅವಿಜಹಿತವಾಸಾ ಏವ, ತಸ್ಮಾ ವುತ್ತಂ ‘‘ತೇ ಆವಸಿಂಸು ಆವಸನ್ತಿ ಆವಸಿಸ್ಸನ್ತೀ’’ತಿ. ತತ್ಥ ಆವಸಿಂಸೂತಿ ನಿಸ್ಸಾಯ ಆವಸಿಂಸು. ಪಞ್ಚಙ್ಗವಿಪ್ಪಹೀನತಾದಯೋ ಹಿ ಅರಿಯಾನಂ ಅಪಸ್ಸಯಾ. ತೇಸು ಪಞ್ಚಙ್ಗವಿಪ್ಪಹಾನಪಚ್ಚೇಕಸಚ್ಚಪನೋದನಏಸನಾಓಸಟ್ಠಾನಿ, ‘‘ಸಙ್ಖಾಯೇಕಂ ಪಟಿಸೇವತಿ, ಅಧಿವಾಸೇತಿ ಪರಿವಜ್ಜೇತಿ ವಿನೋದೇತೀ’’ತಿ (ದೀ. ನಿ. ೩.೩೦೮; ಮ. ನಿ. ೨.೧೬೮; ಅ. ನಿ. ೧೦.೨೦) ವುತ್ತೇಸು ಅಪಸ್ಸೇನೇಸು ವಿನೋದನಞ್ಚ ಮಗ್ಗಕಿಚ್ಚಾನೇವ, ಇತರೇ ಮಗ್ಗೇನ ಚ ಸಮಿಜ್ಝನ್ತೀತಿ.

ಪಠಮಅರಿಯಾವಾಸಸುತ್ತವಣ್ಣನಾ ನಿಟ್ಠಿತಾ.