೨೭. ಪಭೇದಕಥಾ

೧೦೬೨. ಚಿತ್ತಂ ಚೇತಸಿಕಂ ರೂಪಂ, ನಿಬ್ಬಾನಮ್ಪಿ ಚ ಭಾಜಿತಂ;

ತಸ್ಮಾ ದಾನಿ ಯಥಾಯೋಗಂ, ಪಞ್ಞತ್ತಿಪಿ ಪವುಚ್ಚತಿ.

೧೦೬೩. ಸಾ ಚಾಯಂ ಅತ್ಥಪಞ್ಞತ್ತಿ-ನಾಮಪಞ್ಞತ್ತಿಭೇದತೋ;

ದುವಿಧಾ ಹೋತಿ ಪಞ್ಞತ್ತಿ, ಅತ್ಥಪಞ್ಞತ್ತಿ ತತ್ಥ ಚ.

೧೦೬೪. ಸತ್ತಸಮ್ಭಾರಸಣ್ಠಾನ-ಸಙ್ಘಾಟಪರಿಣಾಮತೋ;

ವಿಕಪ್ಪುಪಟ್ಠಾನಾಕಾರವೋಹಾರಾಭಿನಿವೇಸತೋ.

೧೦೬೫. ತಥಾ ಪವತ್ತಸಙ್ಕೇತಸಿದ್ಧಾ ಅತ್ಥಾ ಪಕಪ್ಪಿತಾ;

ಪಞ್ಞಾಪೀಯನ್ತಿ ನಾಮಾತಿ, ಪಞ್ಞತ್ತೀತಿ ಪಕಿತ್ತಿತಾ.

೧೦೬೬. ಅತ್ಥಾ ಹಿ ಪರಮತ್ಥತ್ಥಾ, ಪಞ್ಞತ್ತತ್ಥಾತಿ ಚ ದ್ವಿಧಾ;

ತತ್ಥ ಚ ಪರಮತ್ಥತ್ಥಾ, ಸಚ್ಚಿಕಟ್ಠಾ ಸಲಕ್ಖಣಾ.

೧೦೬೭. ಪಞ್ಞತ್ತತ್ಥಾ ಸಚ್ಚಿಕಟ್ಠಸಲಕ್ಖಣಸಭಾವತೋ;

ಅಞ್ಞಥಾ ಗಹಿತಾ ತಂತಮುಪಾದಾಯ ಪಕಪ್ಪಿತಾ.

೧೦೬೮. ತಸ್ಮಾ ಉಪಾದಾಪಞ್ಞತ್ತಿ, ಅತ್ಥಪಞ್ಞತ್ತಿನಾಮಕಾ;

ಪಞ್ಞಪೇತಬ್ಬನಾಮಾವ, ಪಞ್ಞತ್ತತ್ಥಾವ ಸಬ್ಬಥಾ.

೧೦೬೯. ಪರಮತ್ಥಾ ಯಥಾವುತ್ತಾ, ಚಿತ್ತಚೇತಸಿಕಾದಯೋ;

ಪಞ್ಞತ್ತಾ ಇತ್ಥಿಪುರಿಸಮಞ್ಚಪೀಠಪಟಾದಯೋ.

೧೦೭೦. ಯೇನ ವುಚ್ಚತಿ ತಂ ನಾಮಂ, ಪಞ್ಞಪೇತೀತಿ ವುಚ್ಚತಿ;

ಪಞ್ಞತ್ತೀತಿ ಚ ಸಾ ನಾಮಪಞ್ಞತ್ತೀತಿ ತತೋ ಮತಾ.

೧೦೭೧. ಸಙ್ಖಾ ಸಮಞ್ಞಾ ಪಞ್ಞತ್ತಿ, ವೋಹಾರೋತಿ ಚ ಭಾಜಿತಾ;

ಚತುಧಾ ಪಞ್ಞಪೇತಬ್ಬಪಞ್ಞತ್ತೀತಿ ಹಿ ವಣ್ಣಿತಾ.

೧೦೭೨. ತತೋ ನಾಮಂ ನಾಮಕಮ್ಮಂ, ನಾಮಧೇಯ್ಯಂ ಅಥಾಪರಂ;

ನಿರುತ್ತಿ ಬ್ಯಞ್ಜನಮಭಿಲಾಪೋತಿ ಪನ ಭಾಜಿತಾ.

೧೦೭೩. ನಾಮಪಞ್ಞತ್ತಿ ನಾಮಾತಿ, ಪಞ್ಞತ್ತಿ ದುವಿಧಾ ಕತಾ;

ಸಬ್ಬೇವ ಧಮ್ಮಾ ಪಞ್ಞತ್ತಿಪಥಾತಿ ಪನ ಭಾಜಿತಾ.

೧೦೭೪. ಪರಮತ್ಥಪಞ್ಞತ್ತತ್ಥಾ, ದುವಿಧಾ ಹೋನ್ತಿ ತತ್ಥ ಚ;

ಪಞ್ಞತ್ತಿಪಥಾವ ಹೋನ್ತಿ, ಪರಮತ್ಥಾ ಸಲಕ್ಖಣಾ.

೧೦೭೫. ಪಞ್ಞತ್ತತ್ಥಾ ಪಞ್ಞತ್ತಿ ಚ, ಪಞ್ಞಪೇತಬ್ಬಮತ್ತತೋ;

ಪಞ್ಞತ್ತಿಪಥಾ ಚ ನಾಮಪಞ್ಞತ್ತಿಪಥಭಾವತೋ.

೧೦೭೬. ನಾಮಮ್ಪಿ ಪಞ್ಞಾಪೇತಬ್ಬಮೇವ ಕಿಞ್ಚಾಪಿ ಕೇನಚಿ;

ನಾಮಮೇವಮ್ಪೇತಂ ತತ್ಥ, ಪಞ್ಞತ್ತಿಚ್ಚೇವ ವಣ್ಣಿತಂ.

೧೦೭೭. ಪಞ್ಞಪೇತಬ್ಬಧಮ್ಮಾ ಚ, ತೇಸಂ ಪಞ್ಞಾಪಿತಾಪಿ ಚ;

ಇಚ್ಛಿತಬ್ಬಾಪಿ ಪಞ್ಞತ್ತಿಪಥಾ ಪಞ್ಞತ್ತಿನಾನತಾ.

೧೦೭೮. ಇತಿ ವುತ್ತಾನುಸಾರೇನ, ವುತ್ತಂ ಅಟ್ಠಕಥಾನಯೇ;

ನಯಂ ಗಹೇತ್ವಾ ಏತ್ಥಾಪಿ, ಪಞ್ಞತ್ತಿ ದುವಿಧಾ ಕತಾ.

೧೦೭೯. ತಸ್ಮಿಮ್ಪಿ ಪರಮತ್ಥಾ ಚ, ಸಚ್ಚಿಕಟ್ಠಸಲಕ್ಖಣಾ;

ಅತ್ಥಾ ಪಞ್ಞತ್ತಿಮತ್ತಾ ಚ, ಅತ್ಥಪಞ್ಞತ್ತಿನಾಮಕಾ.

೧೦೮೦. ತೇಸಂ ಪಞ್ಞಾಪಿಕಾ ಚೇವ, ನಾಮಪಞ್ಞತ್ತಿನಾಮಿಕಾ;

ಇಚ್ಚೇವಂ ವಣ್ಣನಾಮಗ್ಗೇ, ಞೇಯ್ಯತ್ತಾ ತಿವಿಧಾ ಕತಾ.

೧೦೮೧. ಪರಮತ್ಥಸಚ್ಚಂ ನಾಮ, ಪರಮತ್ಥಾವ ತತ್ಥ ಚ;

ಸಚ್ಚಿಕಟ್ಠಸಭಾವತ್ತಾ, ಅವಿಸಂವಾದಕಾ ಹಿ ತೇ.

೧೦೮೨. ಸಮ್ಮುತಿಸಚ್ಚಂ ಪಞ್ಞತ್ತಿದ್ವಯಂ ವೋಹಾರವುತ್ತಿಯಾ;

ಲೋಕಸಮಞ್ಞಾಧಿಪ್ಪಾಯಾವಿಸಂವಾದಕಭಾವತೋ.

೧೦೮೩. ಇತಿ ಸಚ್ಚದ್ವಯಮ್ಪೇತಂ, ಅಕ್ಖಾಸಿ ಪುರಿಸುತ್ತಮೋ;

ತೇನಾಪಿ ನಾಮಸಂವಿಞ್ಞೂ, ವೋಹರೇಯ್ಯುಭಯಮ್ಪಿ ವಾ.

ಇತಿ ಪಞ್ಞತ್ತಿವಿಭಾಗೇ ಪಭೇದಕಥಾ ನಿಟ್ಠಿತಾ.

ಸತ್ತವೀಸತಿಮೋ ಪರಿಚ್ಛೇದೋ.