ಅಟ್ಠವೀಸತಿಮೋ ಪರಿಚ್ಛೇದೋ

೨೮. ಅತ್ಥಪಞ್ಞತ್ತಿಕಥಾ

೧೦೮೪. ತತ್ಥ ಚ ಪುಬ್ಬಾಪರಿಯ-ಪವತ್ತಕ್ಖನ್ಧಸಮ್ಮತಾ;

ವಿಞ್ಞತ್ತಿನ್ದ್ರಿಯವಿಪ್ಫಾರ-ವಿಸೇಸೋಪನಿಬನ್ಧನಾ.

೧೦೮೫. ದೇವಯಕ್ಖಮನುಸ್ಸಾದಿ-ನಾನಾಭೇದಾ ಸಲಕ್ಖಿಕಾ;

ಸತ್ತಪಞ್ಞತ್ತಿ ನಾಮಾಯಂ, ಸ್ವಾಯಂ ಸತ್ತೋತಿ ಸಮ್ಮತೋ.

೧೦೮೬. ವಟ್ಟತ್ತಯಮುಪಾದಾಯ,

ಖನ್ಧಾಯತನವುತ್ತಿಯಾ;

ಕಾರಕೋ ವೇದಕೋ ವಾಯಂ,

ಸನ್ಧಾವತಿ ಭವೇ ಭವೇ.

೧೦೮೭. ತಸ್ಮಾ ಸಂಸಾರಮಾಪನ್ನೋ, ಸತ್ತೋ ನಾಮ ಸ ಪುಗ್ಗಲೋ;

ಅಹಮತ್ತಾಪರಾ ಇತ್ಥೀ, ಪುರಿಸೋತಿ ಚ ಕಪ್ಪಿತೋ.

೧೦೮೮. ಸ್ವಾಯಂ ಖನ್ಧಾದಿತೋ ಸತ್ತೋ, ಅಞ್ಞೋತಿ ಚ ನ ವುಚ್ಚತಿ;

ಖನ್ಧಾದಿವಿನಿಮುತ್ತಸ್ಸ, ಸತ್ತಸ್ಸೇವ ಅಭಾವತೋ.

೧೦೮೯. ಖನ್ಧಾ ಖನ್ಧಾನಮೇವಾಯಂ, ಸತ್ತೋತಿ ಚ ನ ವುಚ್ಚತಿ;

ಖನ್ಧವೋಹಾರತೋ ತಸ್ಸ, ಅಞ್ಞವೋಹಾರಸಮ್ಭವಾ.

೧೦೯೦. ಇಚ್ಚೇವಂ ಖನ್ಧನಾನತ್ತೇ-ಕತ್ತಮುತ್ತೋಪಿ ಅತ್ಥತೋ;

ತಬ್ಬಿಸೇಸಾವಚರಿತ-ವೋಹಾರೋ ಚ ತು ದಿಸ್ಸತಿ.

೧೦೯೧. ತೇನಾಯಂ ಪುಗ್ಗಲೋ ಸತ್ತೋ, ಜಾಯತಿಜ್ಜಿಯ್ಯತೀತಿ ಚ;

ಮೀಯತೀತಿ ಚ ತಸ್ಸಾಯಂ, ಸಂಸಾರೋತಿ ಪವುಚ್ಚತಿ.

೧೦೯೨. ಮತೋ ಜಾತೋ ಚ ನ ಸ್ವೇವ, ಖನ್ಧಭೇದೋಪಚಾರತೋ;

ನಾಪರೋ ಸ್ವೇವ ಸನ್ತಾನಭೇದಾಭಾವೋಪಚಾರತೋ.

೧೦೯೩. ನಾನತ್ತೇಕತ್ತಮಿಚ್ಚೇವಂ, ಪುಗ್ಗಲಸ್ಸೋಪಚಾರತೋ;

ಉಚ್ಛೇದಸಸ್ಸತತ್ತಂ ವಾ, ತಸ್ಮಾ ನೋಪೇತಿ ಪುಗ್ಗಲೋ.

೧೦೯೪. ಇಚ್ಚಾಯಂ ಪುಗ್ಗಲೋ ನಾಮ, ಸತ್ತೋ ಸಂಸಾರಕಾರಕೋ;

ಖನ್ಧಾದಿಕಮುಪಾದಾಯ, ಪಞ್ಞತ್ತೋತಿ ಪವುಚ್ಚತಿ.

೧೦೯೫. ತಸ್ಮಾ ಪುಗ್ಗಲಸಙ್ಖಾತಾ, ಸಂಸಾರೋಪನಿಬನ್ಧನಾ;

ಸತ್ತಪಞ್ಞತ್ತಿ ನಾಮಾತಿ, ವಿಞ್ಞಾತಬ್ಬಾ ವಿಭಾವಿನಾ.

೧೦೯೬. ಅಜ್ಝತ್ತಿಕಾ ಚ ಕೇಸಾದಿಕೋಟ್ಠಾಸಾ ಬಾಹಿರೇಸು ಚ;

ಭೂಮಿಪಬ್ಬತಪಾಸಾಣತಿಣರುಕ್ಖಲತಾದಿಕಾ.

೧೦೯೭. ಭೂತಸಮ್ಭಾರನಿಬ್ಬತ್ತಿವಿಭಾಗಪರಿಕಪ್ಪಿತಾ;

ತಮುಪಾದಾಯ ಸಮ್ಭಾರಪಞ್ಞತ್ತೀತಿ ಪವುಚ್ಚತಿ.

೧೦೯೮. ಭೂತಸಮ್ಭಾರಸಣ್ಠಾನವಿಭಾಗಪರಿಕಪ್ಪಿತಾ;

ಸಣ್ಠಾನಪಞ್ಞತ್ತಿ ನಾಮ, ಥಮ್ಭಕುಮ್ಭಾದಿಕಾ ಮತಾ.

೧೦೯೯. ಭೂತಸಮ್ಭಾರಸಙ್ಘಾತವಿಸೇಸಪರಿಕಪ್ಪಿತಾ;

ಸಙ್ಘಾತಪಞ್ಞತ್ತಿ ನಾಮ, ರಥಗೇಹಾದಿಕಾ ಮತಾ.

೧೧೦೦. ಭೂತಸಮ್ಭಾರವಿಸೇಸಪರಿಣಾಮಪಕಪ್ಪಿತಾ;

ಪರಿಣಾಮಪಞ್ಞತ್ತೀತಿ, ದಧಿಭತ್ತಾದಿಕಾ ಮತಾ.

೧೧೦೧. ಇತ್ಥಮಜ್ಝತ್ತಬಹಿದ್ಧಾ, ಧಮ್ಮಾ ಸಮ್ಭಾರಸಮ್ಭೂತಾ;

ಸನ್ತಾನವುತ್ತಿ ಸಙ್ಕೇತಸಿದ್ಧಾ ಪಞ್ಞತ್ತಿ ಪಞ್ಚಧಾ.

೧೧೦೨. ತಥಾ ತಥಾ ಸಮುಪ್ಪನ್ನವಿಕಪ್ಪಾಭೋಗಸಮ್ಮತಾ;

ವಿಕಪ್ಪಪಞ್ಞತ್ತಿ ನಾಮ, ಕಾಲಾಕಾಸದಿಸಾದಿಕಾ.

೧೧೦೩. ತಂ ತಂ ನಿಮಿತ್ತಮಾಗಮ್ಮ, ತತೋಪಟ್ಠಾನಕಪ್ಪಿತಾ;

ಉಪಟ್ಠಾನಪಞ್ಞತ್ತೀತಿ, ಪಟಿಭಾಗಾದಿಕಾ ಮತಾ.

೧೧೦೪. ವಿಸೇಸಾಕಾರಮತ್ತಾಪಿ, ಅತ್ಥನ್ತರಪಕಪ್ಪಿತಾ;

ಆಕಾರಪಞ್ಞತ್ತಿ ನಾಮ, ವಿಞ್ಞತ್ತಿಲಹುತಾದಿಕಾ.

೧೧೦೫. ತಂ ತಂ ಕಾರಣಮಾಗಮ್ಮ, ತಥಾ ವೋಹಾರಕಪ್ಪಿತಾ;

ವೋಹಾರಪಞ್ಞತ್ತಿ ನಾಮ, ಕಥಿನಾಪತ್ತಿಆದಿಕಾ.

೧೧೦೬. ಬಾಲೋ ಯೋ ಸೋ ಚ ಮೇ ಅತ್ತಾ,

ಸೋ ಭವಿಸ್ಸಾಮಿ ಮಂ ಚ ತು;

ನಿಚ್ಚೋ ಧುವೋ ಸಸ್ಸತೋತಿ-

ಆದಿಕಾ ಪನ ಸಬ್ಬಥಾ.

೧೧೦೭. ತಬ್ಬೋಹಾರನಿಮಿತ್ತಾನಂ, ಅಭಾವೇಪಿ ಪವತ್ತಿತೋ;

ಅಭಿನಿವೇಸಪಞ್ಞತ್ತಿ, ನಾಮ ತಿತ್ಥಿಯಕಪ್ಪಿತಾ.

೧೧೦೮. ಇಚ್ಚೇವಂ ಲೋಕಸಾಸನತಿತ್ಥಾಯತನಕಪ್ಪಿತಾ;

ಸನ್ತಾನಮುತ್ತಸಙ್ಕೇತಸಿದ್ಧಾ ಅತ್ಥಾಪಿ ಪಞ್ಚಧಾ.

೧೧೦೯. ಸಙ್ಕಾನವುತ್ತಿಸನ್ತಾನಮುತ್ತಭೇದವಸಾ ದ್ವಿಧಾ;

ಅತ್ಥಪಞ್ಞತ್ತಿ ನಾಮಾಯಂ, ದಸಧಾ ಪರಿದೀಪಿತಾ.

೧೧೧೦. ಇತಿ ವುತ್ತಪ್ಪಕಾರೇಸು, ಪಞ್ಞತ್ತತ್ಥೇಸು ಪಣ್ಡಿತಾ;

ಪಞ್ಞತ್ತಿಮತ್ತಂ ಸನ್ಧಾಯ, ವೋಹರನ್ತಿ ಯಥಾಕಥಂ.

೧೧೧೧. ತದಞ್ಞೇ ಪನ ಬಾಲಾ ಚ, ತಿತ್ಥಿಯಾಪಿ ಅಕೋವಿದಾ;

ಪಞ್ಞತ್ತಿಮತಿಧಾವಿತ್ವಾ, ಗಣ್ಹನ್ತಿ ಪರಮತ್ಥತೋ.

೧೧೧೨. ತೇ ತಥಾ ಗಹಿತಾಕಾರಾ, ಅಞ್ಞಾಣಗಹಿತಾ ಜನಾ;

ಮಿಚ್ಛತ್ತಾಭಿನಿವಿಟ್ಠಾ ಚ, ವಡ್ಢನ್ತಿ ಭವಬನ್ಧನಂ.

೧೧೧೩. ದುವಿಧೇಸುಪಿ ಅತ್ಥೇಸು, ತಸ್ಮಾ ಪಣ್ಡಿತಜಾತಿಕೋ;

ಪರಮತ್ಥಪಞ್ಞತ್ತೀಸು, ವಿಭಾಗಮಿತಿ ಲಕ್ಖಯೇತಿ.

ಇತಿ ಪಞ್ಞತ್ತಿವಿಭಾಗೇ ಅತ್ಥಪಞ್ಞತ್ತಿಕಥಾ ನಿಟ್ಠಿತಾ.

ಅಟ್ಠವೀಸತಿಮೋ ಪರಿಚ್ಛೇದೋ.