೧೩. ತೇರಸಮೋ ಪರಿಚ್ಛೇದೋ

ನಿಸ್ಸನ್ದಫಲವಿಭಾಗೋ

೧೭೯೨. ವಿಪಸ್ಸನಾಯ ನಿಸ್ಸನ್ದಮಿತಿ ವುತ್ತಮಿತೋ ಪರಂ;

ಸಚ್ಚಾನಂ ಪಟಿವೇಧಾದಿಂ, ಪವಕ್ಖಾಮಿ ಯಥಾಕ್ಕಮಂ.

೧೭೯೩. ಪರಿಞ್ಞಾ ಚ ಪಹಾನಞ್ಚ, ಸಚ್ಛಿಕಿರಿಯಾ ಚ ಭಾವನಾ;

ಇತಿ ದುಕ್ಖಾದಿಸಚ್ಚೇಸು, ಕಿಚ್ಚಮಾಹು ಚತುಬ್ಬಿಧಂ.

೧೭೯೪. ತಂ ಸಬ್ಬಂ ಮಗ್ಗಕಾಲಮ್ಹಿ, ಕರಿಸ್ಸತಿ ತತೋ ಪರಂ;

ಪಟಿಪಸ್ಸದ್ಧಕಿಚ್ಚತ್ತಾ, ಕತಂ ಹೋತಿ ಫಲೇ ಕಥಂ.

೧೭೯೫. ಛಿನ್ನತಾಲೋ ಫಲಸ್ಸೇವ, ಛಿನ್ನಾನುಸಯಮೂಲಕಾ;

ಖನ್ಧಾ ನಾಲಮಧಿಟ್ಠಾನಂ, ವಿಪಲ್ಲಾಸಪವತ್ತಿಯಾ.

೧೭೯೬. ಅಚ್ಚನ್ತಪಟಿಪಕ್ಖತ್ತಾ, ಚತುಮಗ್ಗಪವತ್ತಿಯಾ;

ಪರಂ ಕ್ಲೇಸಾ ನ ಜಾಯನ್ತಿ, ದಡ್ಢಬೀಜಙ್ಕುರಂ ಯಥಾ.

೧೭೯೭. ನಿಯ್ಯಾನಟ್ಠವಿಸೇಸೇನ, ಅಞ್ಞಮಞ್ಞಸ್ಸ ಪಚ್ಚಯೋ;

ಮಗ್ಗೋವ ಮಗ್ಗಂ ಭಾವೇತಿ, ಜಾಯಮಾನೋಥ ವಾ ಪುನ.

೧೭೯೮. ಮಗ್ಗಪ್ಪವತ್ತಿಸನ್ತಾನೇ, ಭಾವನಾತಿ ಪವುಚ್ಚತಿ;

ವತ್ತಮಾನೇನ ತಂ ಕಿಚ್ಚಂ, ನಿಪ್ಫಾದಿತಮಸೇಸತೋ.

೧೭೯೯. ಇತಿ ತೀಣಿಪಿ ಸಚ್ಚಾನಿ, ಕಿಚ್ಚತೋ ಪಟಿವಿಜ್ಝತಿ;

ನಿಬ್ಬಾನಂ ಸಚ್ಛಿಕುಬ್ಬನ್ತೋ, ಮಗ್ಗೋ ಏಕಕ್ಖಣೇ ಸಹ.

೧೮೦೦. ಕಿಚ್ಚಪ್ಪವತ್ತಿತೋ ಚೇತ್ಥ, ಪಟಿವೇಧೋತಿ ವುಚ್ಚತಿ;

ತಞ್ಚ ಸಾಧೇತಿ ಮಗ್ಗೋಯಂ, ನಿಯ್ಯನ್ತೋ ಸನ್ತಿಗೋಚರೋ.

೧೮೦೧. ಪರಿಚ್ಚಜಿತ್ವಾ ಸಙ್ಖಾರೇ, ಮಗ್ಗಸ್ಸಾರಬ್ಭ ನಿಬ್ಬುತಿಂ,

ನಿಯ್ಯಾನಮೇವ ಸಚ್ಚೇಸು, ಕಿಚ್ಚಸಾಧನಮೀರಿತಂ.

೧೮೦೨. ಮಗ್ಗೋ ಏವ ಹಿ ನಿಯ್ಯಾತಿ, ಸೇಸಾ ತಸ್ಸೋಪಕಾರಕಾ;

ಅಪ್ಪೇನ್ತಾ ಝಾನಧಮ್ಮಾ ಚ, ಬುಜ್ಝನ್ತಾ ಬೋಧಿಪಕ್ಖಿಯಾ.

೧೮೦೩. ತಸ್ಮಾ ತಸ್ಸೇವ ವುಟ್ಠಾನಂ, ಪಕಾಸೇನ್ತಿ ವಿಸೇಸತೋ;

ಖನ್ಧೇಹಿ ಚ ಕಿಲೇಸೇಹಿ, ವಿಮೋಕ್ಖತ್ತಯತೋ ಕಥಂ.

೧೮೦೪. ಕತ್ವಾನಾಭಿನಿವೇಸಂ ತು, ಯತ್ಥ ತತ್ಥ ಯಥಾ ತಥಾ;

ಭೂಮಿಧಮ್ಮಂ ಪರಿಗ್ಗಯ್ಹ, ವಿಪಸ್ಸಿತ್ವಾ ತತೋ ಪರಂ.

೧೮೦೫. ಯತೋ ಕುತೋಚಿ ವುಟ್ಠಾನಂ, ಯದಿ ಹೋತಿ ಅನಿಚ್ಚತೋ;

ಹುತ್ವಾಧಿಮೋಕ್ಖಬಹುಲೋ, ಸದ್ಧಿನ್ದ್ರಿಯವಿಸೇಸತೋ.

೧೮೦೬. ಅನಿಮಿತ್ತವಿಮೋಕ್ಖೇನ, ನಿಯ್ಯನ್ತೋ ಸತ್ತಪುಗ್ಗಲೋ;

ಸದ್ಧಾನುಸಾರೀ ಪಠಮೇ, ಮಜ್ಝೇ ಸದ್ಧಾವಿಮುತ್ತಕೋ.

೧೮೦೭. ಅನ್ತೇ ಪಞ್ಞಾವಿಮುತ್ತೋತಿ, ತಮೀರೇನ್ತಿ ತಥಾಗತಾ;

ಸಙ್ಖಾರೇ ದುಕ್ಖತೋ ದಿಸ್ವಾ, ವುಟ್ಠಹನ್ತೋ ಸ ಪುಗ್ಗಲೋ.

೧೮೦೮. ಪಸ್ಸದ್ಧಿಬಹುಲೋ ಹುತ್ವಾ, ಸಮಾಧಿನ್ದ್ರಿಯಲಾಭತೋ;

ತಥೇವಾಪ್ಪಣಿಹಿತೇನ, ನಿಯ್ಯನ್ತೋ ತಿವಿಧೋ ಭವೇ.

೧೮೦೯. ಅನತ್ತತೋ ವುಟ್ಠಹಿತ್ವಾ, ವೇದಬಾಹುಲ್ಯಯೋಗತೋ;

ಸುಞ್ಞತೇನಾಥ ನಿಯ್ಯನ್ತೋ, ಪಞ್ಞಿನ್ದ್ರಿಯವಿಸೇಸತೋ.

೧೮೧೦. ಧಮ್ಮಾನುಸಾರೀ ಪಠಮೇ, ದಿಟ್ಠಿಪ್ಪತ್ತೋ ತತೋ ಪರಂ;

ಅನ್ತೇ ಪಞ್ಞಾವಿಮುತ್ತೋತಿ, ತಮ್ಪಿ ದೀಪೇನ್ತಿ ಪಣ್ಡಿತಾ.

೧೮೧೧. ಆನೇಞ್ಜಪಾದಕಜ್ಝಾನ-ನಾಮಕಾಯವಿಸೇಸತೋ;

ಸಚ್ಛಿಕತ್ವಾನ ನಿಬ್ಬಾನಂ, ಮಜ್ಝೇ ಛ ಕಾಯಸಕ್ಖಿನೋ.

೧೮೧೨. ಅರೂಪತೋ ಚ ಮಗ್ಗೇನ, ಆನೇಞ್ಜೇನ ಚ ರೂಪತೋ;

ವಿಮುತ್ತೋ ಉಭತೋಭಾಗ-ವಿಮುತ್ತೋ ಅರಹಾ ಭವೇ.

೧೮೧೩. ತಿವಿಮೋಕ್ಖಮುಖೀಭೂತಾ, ಇತಿ ವುಟ್ಠಾನಸಾಧಿಕಾ;

ಸತ್ತಪುಗ್ಗಲಭೇದಞ್ಚ, ಸಮ್ಪಾದೇತಿ ವಿಪಸ್ಸನಾ.

೧೮೧೪. ಅಧಿಮುಚ್ಚತಿ ಸದ್ಧಾ ಚ, ಯಥಾವತ್ಥುಸಭಾವತೋ;

ಞೇಯ್ಯಧಮ್ಮೇಸು ಸಬ್ಬತ್ಥ, ಪಞ್ಞಾ ಚ ಪಟಿವಿಜ್ಝತಿ.

೧೮೧೫. ತಸ್ಮಾ ಸದ್ಧಾ ಚ ಪಞ್ಞಾ ಚ, ವತ್ಥುನಿಚ್ಛಯಲಕ್ಖಣಾ;

ವತ್ಥುಪ್ಪತಿಟ್ಠಿತಾ ಚಾಯಂ, ತಿಲಕ್ಖಣವಿಪಸ್ಸನಾ.

೧೮೧೬. ತಸ್ಮಾ ಸದ್ಧಾಧುರೋ ಯೋಗೀ, ದಿಸ್ವೋಳಾರಿಕಲಕ್ಖಣಂ;

ತತೋ ಪರಮನತ್ತಾತಿ, ಸುಖುಮೇ ಅಧಿಮುಚ್ಚತಿ.

೧೮೧೭. ತಸ್ಸೇವಮಧಿಮುತ್ತಸ್ಸ, ಸದ್ಧಾ ವಾ ಪನ ಕೇವಲಾ;

ಸಮಾಧಿನ್ದ್ರಿಯಾಧಿಕಾ ಚ, ವುಟ್ಠಾನಘಟಿಕಾ ಭವೇ.

೧೮೧೮. ಥೂಲಲಕ್ಖಣಮೋಹಾಯ, ಪಞ್ಞಾಧುರೇ ವಿಪಸ್ಸತೋ;

ಧಮ್ಮಸಭಾವಮಾಹಚ್ಚ, ಸುಖುಮಂ ಪಟಿವಿಜ್ಝತಿ.

೧೮೧೯. ತಸ್ಮಾ ಸದ್ಧಾಧುರಸ್ಸೇವ, ವುಟ್ಠಾನದ್ವಯಮಾದಿತೋ;

ಅನ್ತೇ ಸದ್ಧಾನುಗತಸ್ಸ, ಪಞ್ಞಾ ಸುಪರಿಪೂರತಿ.

೧೮೨೦. ಪಞ್ಞಾಧುರಸ್ಸ ಸೇಸನ್ತಿ, ಕೇಚಿ ಆಚರಿಯಾ ಪನ;

ಧುರಸಂಸನ್ದನಂ ನಾಮ, ವುಟ್ಠಾನೇಸು ವಿಭಾವಯುಂ.

೧೮೨೧. ಸತ್ತಕ್ಖತ್ತುಪರಮೋ ಚ,

ಕೋಲಂಕೋಲೋ ತಥಾಪರೋ;

ಏಕಬೀಜೀತಿ ತಿವಿಧೋ,

ಸೋತಾಪನ್ನೋ ಪವುಚ್ಚತಿ.

೧೮೨೨. ಸಕಿಂದೇವ ಇಮಂ ಲೋಕಂ, ಆಗನ್ತ್ವಾ ಪುನ ಪುಗ್ಗಲೋ;

ಸಕದಾಗಾಮಿನಾಮೇನ, ದುತಿಯೋಪಿ ಪಕಾಸಿತೋ.

೧೮೨೩. ಅನ್ತರಾಪರಿನಿಬ್ಬಾಯೀ, ಉಪಹಚ್ಚಾಪರೋ ತಥಾ;

ಅಸಙ್ಖಾರಂ ಸಸಙ್ಖಾರಂ, ಉದ್ಧಂಸೋತೋತಿ ಪಞ್ಚಧಾ.

೧೮೨೪. ಅನಾಗಾಮೀ ಚ ತತಿಯೋ, ಚತುತ್ಥೋ ಅರಹಾತಿ ಚ;

ಇತ್ಥಂ ಫಲಟ್ಠಾ ಚತ್ತಾರೋ, ಮಗ್ಗಟ್ಠಾ ಚ ತತೋಪರೇ.

೧೮೨೫. ಭಾವನಾಪರಿಯಾಯೇನ, ಪಟಿವೇಧಾನುರೂಪತೋ;

ಚತ್ತಾರೋ ಚ ಯುಗಾ ಹೋನ್ತಿ, ಅಟ್ಠ ಚಾರಿಯಪುಗ್ಗಲಾ.

೧೮೨೬. ದಿಟ್ಠಿಕಙ್ಖಾ ಪಹೀಯನ್ತಿ, ಆದಿಮಗ್ಗೇನ ಸಬ್ಬಥಾ;

ಅಪಾಯಗಮನೀಯಮ್ಪಿ, ಪಾಪಮಞ್ಞಂ ಪಹೀಯತಿ.

೧೮೨೭. ಸಕದಾಗಾಮಿಮಗ್ಗೇನ, ಖೀಯನ್ತೋಳಾರಿಕಾ ತಥಾ;

ಅನಾಗಾಮಿಕಮಗ್ಗೇನ, ಕಾಮದೋಸಾವ ಸಬ್ಬಥಾ.

೧೮೨೮. ಅರಹತ್ತೇನ ಸಬ್ಬೇಪಿ, ಕ್ಲೇಸಾ ಖೀಯನ್ತಿ ಸಬ್ಬಥಾ;

ಕ್ಲೇಸಹಾನಿ ಯಥಾಯೋಗ-ಮಿತಿ ಞೇಯ್ಯಾ ವಿಭಾವಿನಾ.

೧೮೨೯. ಪಟಿಸಮ್ಭಿದಾ ಚತಸ್ಸೋ, ಅತ್ಥೇ ಧಮ್ಮೇ ನಿರುತ್ತಿಯಂ;

ಪಟಿಭಾನೇ ಚ ಭಾಸನ್ತಿ, ಞಾಣಂ ಭೇದಗತಂ ಬುಧಾ.

೧೮೩೦. ಹೇತುಪ್ಫಲಞ್ಚ ನಿಬ್ಬಾನಂ, ಭಾಸಿತತ್ಥೋ ತಥಾಪರೋ;

ಪಾಕಾಕ್ರಿಯಾತಿ ಪಞ್ಚೇತೇ, ಅತ್ಥನಾಮೇನ ಭಾಸಿತಾ.

೧೮೩೧. ಹೇತು ಚಾರಿಯಮಗ್ಗೋ ಚ, ಭಾಸಿತಞ್ಚ ತಥಾಪರಂ;

ಕುಸಲಾಕುಸಲಞ್ಚೇತಿ, ಪಞ್ಚ ಧಮ್ಮೋ ಪಕಾಸಿತೋ.

೧೮೩೨. ತತ್ಥೇವಂ ದಸಧಾ ಭೇದೇ, ಅತ್ಥಧಮ್ಮೇ ಯಥಾರಹಂ;

ಯೋ ವೋಹಾರೋ ಸಭಾವೇನ, ಸಾ ನಿರುತ್ತೀತಿ ಸಮ್ಮತಾ.

೧೮೩೩. ತಂತಂಗೋಚರಕಿಚ್ಚಾದಿ-ಭೇದಭಿನ್ನಂ ತಹಿಂ ತಹಿಂ;

ಪವತ್ತಮಾನಂ ಯಂ ಞಾಣಂ, ಪಟಿಭಾನಂ ತಮೀರಿತಂ.

೧೮೩೪. ಪುಬ್ಬಯೋಗೋ ಬಾಹುಸ್ಸಚ್ಚಂ,

ದೇಸಭಾಸಾ ತಥಾಗಮೋ;

ಪರಿಪುಚ್ಛಾ ಚಾಧಿಗಮೋ,

ನಿಸ್ಸಯೋ ಮಿತ್ತಸಮ್ಪದಾ.

೧೮೩೫. ಇಚ್ಚೂಪನಿಸ್ಸಯಂ ಲದ್ಧಾ, ಭಿಜ್ಜತಿ ಪಟಿಸಮ್ಭಿದಾ;

ಅಸೇಕ್ಖಭೂಮಿಯಂ ವಾಥ, ಸೇಕ್ಖಭೂಮಿಯಮೇವ ವಾ.

೧೮೩೬. ಸರಸ್ಸತೋ ಆಗಮತೋ, ತಥಾಲಮ್ಬಣತೋಪಿ ಚ;

ನಾಮುಪ್ಪತ್ತಿಂ ಪಕಾಸೇನ್ತಿ, ಫಲಸ್ಸ ತಿವಿಧಂ ಬುಧಾ.

೧೮೩೭. ತಿಧಾ ತತೋ ಸಮಾಪತ್ತಿ, ಸೋತಾಪತ್ತಿಫಲಾದಿಕಾ;

ಸುಞ್ಞತಾ ಚಾನಿಮಿತ್ತಾ ಚ, ತಥಾಪ್ಪಣಿಹಿತಾತಿ ಚ.

೧೮೩೮. ತಞ್ಚ ವುತ್ತನಯೇನೇವ, ಸಮಾಪಜ್ಜಿತುಮಿಚ್ಛತೋ;

ವಿಪಸ್ಸನ್ತಸ್ಸ ಸಙ್ಖಾರೇ, ಫಲಮಪ್ಪೇತಿ ಅತ್ತನೋ.

೧೮೩೯. ನಿರೋಧಂ ತು ಸಮಾಪತ್ತಿಂ, ರೂಪಾರೂಪಸ್ಸ ಲಾಭಕೋ;

ಸಮಾಪಜ್ಜತಾನಾಗಾಮೀ, ಅರಹಾ ಚ ಯಥಾ ತಥಾ.

೧೮೪೦. ರೂಪಾರೂಪಸಮಾಪತ್ತಿಂ, ಸಮಾಪಜ್ಜ ಯಥಾಕ್ಕಮಂ;

ವುಟ್ಠಹಿತ್ವಾ ವಿಪಸ್ಸನ್ತೋ, ತತ್ಥ ತತ್ಥೇವ ಸಙ್ಖತೇ.

೧೮೪೧. ಯುಗನನ್ಧಂ ಪವತ್ತೇತ್ವಾ, ಸಮಥಞ್ಚ ವಿಪಸ್ಸನಂ;

ಯಾವಾಕಿಞ್ಚಞ್ಞಾಯತನ-ಮಿತ್ಥಂ ಪತ್ವಾ ತತೋ ಪರಂ.

೧೮೪೨. ಅಧಿಟ್ಠೇಯ್ಯಮಧಿಟ್ಠಾಯ, ಕತ್ವಾಭೋಗಂ ಯಥಾರಹಂ;

ಮಗ್ಗಾರೂಪಸಮಾಪತ್ತಿಂ, ಸಮಾಪಜ್ಜತಿ ಪಣ್ಡಿತೋ.

೧೮೪೩. ತತೋ ನಿರೋಧಂ ಫುಸತಿ, ಚಿತ್ತುಪ್ಪಾದದ್ವಯಾ ಪರಂ;

ತಸ್ಸೇವಂ ಮನಸಾಭಾವೋ, ನಿರೋಧೋತಿ ಪವುಚ್ಚತಿ.

೧೮೪೪. ಫಲಚಿತ್ತಸಮುಪ್ಪಾದಾ, ವುಟ್ಠಾನಂ ತಸ್ಸ ದೀಪಿತಂ;

ತತೋ ಭವಙ್ಗಂ ಛೇತ್ವಾನ, ಪಚ್ಚವೇಕ್ಖತಿ ಬುದ್ಧಿಮಾ.

೧೮೪೫. ಇಚ್ಚಾನೇಕಗುಣಾಧಾರಂ, ಪಞ್ಞಾಭಾವನಮುತ್ತಮಂ;

ಭಾವೇಯ್ಯ ಮತಿಮಾ ಯೋಗೀ, ಪತ್ಥೇನ್ತೋ ಹಿತಮತ್ತನೋ.

೧೮೪೬. ಇತ್ಥಂ ಸುಸಮ್ಪಾದಿತಸೀಲಚಿತ್ತ-

ಪಞ್ಞಾವಿಸುದ್ಧೀ ಪಟಿಪಾದಯನ್ತಾ;

ಪತ್ವಾನ ಸಮ್ಬೋಧಿಮಪೇತಸೋಕಾ,

ಪಾಲೇನ್ತಿ ಸೋತ್ಥಿಂ ಪರಮಂ ಚಿರಾಯ.

೧೮೪೭. ತೇ ಪತ್ತಿಪತ್ತಾ ಪರಮಪ್ಪತೀತಾ,

ಪಕ್ಖಾಲಿತಕ್ಲೇಸಮಲಾ ಮಹೇಸೀ;

ಅಚ್ಚನ್ತವೋದಾತಗುಣೋದಿತತ್ತಾ,

ಲೋಕಸ್ಸ ಹೋನ್ತುತ್ತಮದಕ್ಖಿಣೇಯ್ಯಾ.

ಇತಿ ನಾಮರೂಪಪರಿಚ್ಛೇದೇ ನಿಸ್ಸನ್ದಫಲವಿಭಾಗೋ ನಾಮ

ತೇರಸಮೋ ಪರಿಚ್ಛೇದೋ.

ನಿಟ್ಠಿತೋ ಚ ಸಬ್ಬಥಾಪಿ ವಿಪಸ್ಸನಾವಿಭಾಗೋ.

ನಿಗಮನಕಥಾ

೧೮೪೮. ಏತ್ತಾವತಾ ಪಟಿಞ್ಞಾತೋ, ಪವಕ್ಖಾಮೀತಿ ಆದಿತೋ;

ನಾಮರೂಪಪರಿಚ್ಛೇದೋ, ಪರಿನಿಟ್ಠಾಪಿತೋ ಮಯಾ.

೧೮೪೯. ತೇರಸೇವ ಪರಿಚ್ಛೇದಾ, ವಿಭತ್ತಾ ಸತ್ತ ಸಾಧಿಕಾ;

ನಾಮರೂಪಪರಿಚ್ಛೇದೇ, ಭಾಣವಾರಾ ಪಕಾಸಿತಾ.

೧೮೫೦. ಅಭಿಧಮ್ಮಪರಮತ್ಥಾ, ಸಮಥೋ ಚ ವಿಪಸ್ಸನಾ;

ವಿಸುಂ ವಿಸುಂ ವಿಭತ್ತಾತಿ, ವಿಭಾಗೇತ್ಥ ತಿಧಾ ಮತಾ.

೧೮೫೧. ಸೋಯಂ ವಿಜ್ಜಾವಿಮೋಕ್ಖಾ ಚ, ಹದಯೇಸು ವಿಭಾವಿನಂ;

ವಲ್ಲಭತ್ತಮಧಿಟ್ಠಾಯ, ಸಾಸನೇತ್ಥ ಗವೇಸಿನಂ.

೧೮೫೨. ಮನೋಗತತಮುದ್ಧಂಸೀ, ರವಿರಂಸೀವ ಪಣ್ಡಿತೋ;

ದಸ್ಸೇತು ಚಿರಮಾಲೋಕಂ, ಸದ್ಧಮ್ಮರತನಾಲಯೇ.

೧೮೫೩. ಪಣ್ಡಿಚ್ಚಂ ಪರಮತ್ಥೇಸು, ಪಾಟವಂ ಪಟಿಪತ್ತಿಯಂ;

ಪತ್ಥಯನ್ತೇನ ಭಿಕ್ಖೂನ-ಮಿತ್ಥಂ ಸುಗತಸಾಸನೇ.

೧೮೫೪. ನಾಮರೂಪಪರಿಚ್ಛೇದ-ಮಸಂಕಿಣ್ಣಮನಾಕುಲಂ;

ಕುಬ್ಬತಾ ಹಿತಕಾಮೇನ, ಸುಕತೇನ ಕತೇನ ಮೇ.

೧೮೫೫. ಮಹಾಮೇರುನಿಭಂ ಗೇಹಂ, ಮಹಾಚೇತಿಯಭೂಸಿತಂ;

ಮಹಾವಿಹಾರಮಾರುಳ್ಹ-ಮಹಾಬೋಧಿಮಹುಸ್ಸವಂ.

೧೮೫೬. ಅಲಙ್ಕಾತುಂ ಪಹೋನ್ತಾಲಂ, ಚಿರಕಾಲಂ ತಪೋಧನಾ;

ಲಙ್ಕಾದೀಪಸ್ಸಲಙ್ಕಾರಂ, ಕಲಙ್ಕಾಪಗತಾಲಯಂ.

೧೮೫೭. ನಾಮರೂಪಪರಿಚ್ಛೇದೋ,

ಅನ್ತರಾಯಂ ವಿನಾ ಯಥಾ;

ನಿಟ್ಠಿತೋಯಂ ತಥಾ ಲೋಕೇ,

ನಿಟ್ಠನ್ತಜ್ಝಾಸಯಾ ಸುಭಾ.

ಇತಿ ಅನುರುದ್ಧಾಚರಿಯೇನ ವಿರಚಿತಂ

ನಾಮರೂಪಪರಿಚ್ಛೇದಪಕರಣಂ ನಿಟ್ಠಿತಂ.