೧. ಪಠಮೋ ಪರಿಚ್ಛೇದೋ

ರೂಪಸಙ್ಖೇಪೋ

೩. ಸಚ್ಚಾನಿ ಪರಮತ್ಥಞ್ಚ, ಸಮ್ಮುತಿಞ್ಚಾತಿ ದ್ವೇ ತಹಿಂ;

ಥದ್ಧಭಾವಾದಿನಾ ಞೇಯ್ಯಂ, ಸಚ್ಚಂ ತಂ ಪರಮತ್ಥಕಂ.

೪. ಸನ್ನಿವೇಸವಿಸೇಸಾದಿಞೇಯ್ಯಂ ಸಮ್ಮುತಿ ತಂ ದ್ವಯಂ;

ಭಾವಸಙ್ಕೇತಸಿದ್ಧೀನಂ, ತಥತ್ತಾ ಸಚ್ಚಮೀರಿತಂ.

೫. ಪರಮತ್ಥೋ ಸನಿಬ್ಬಾನಪಞ್ಚಕ್ಖನ್ಧೇತ್ಥ ರಾಸಿತೋ;

ಖನ್ಧತ್ಥೋ ಚ ಸಮಾಸೇತ್ವಾ, ವುತ್ತೋತೀತಾದಿಭೇದನಂ.

೬. ವೇದನಾದೀಸುಪೇಕಸ್ಮಿಂ, ಖನ್ಧಸದ್ದೋ ತು ರುಳ್ಹಿಯಾ;

ಸಮುದ್ದಾದೇಕದೇಸೇ ತು, ಸಮುದ್ದಾದಿರವೋ ಯಥಾ.

೭. ತತ್ಥ ಸೀತಾದಿರುಪ್ಪತ್ತಾ, ರೂಪಂ ಭ್ವಾಪಾನಲಾನಿಲಂ;

ಭೂತಂ ಕಥಿನದವತಾಪಚನೀರಣಭಾವಕಂ.

೮. ಚಕ್ಖು ಸೋತಞ್ಚ ಘಾನಞ್ಚ, ಜಿವ್ಹಾ ಕಾಯೋ ಪಭಾ ರವೋ;

ಗನ್ಧೋ ರಸೋಜಾ ಇತ್ಥೀ ಚ, ಪುಮಾ ವತ್ಥು ಚ ಜೀವಿತಂ.

೯. ಖಂ ಜಾತಿ ಜರತಾ ಭಙ್ಗೋ, ರೂಪಸ್ಸ ಲಹುತಾ ತಥಾ;

ಮುದುಕಮ್ಮಞ್ಞತಾ ಕಾಯವಚೀವಿಞ್ಞತ್ತಿ ಭೂತಿಕಂ.

೧೦. ಚಕ್ಖಾದೀ ದಟ್ಠುಕಾಮಾದಿಹೇತುಕಮ್ಮಜಭೂತಿಕಾ;

ಪಸಾದಾ ರೂಪಸದ್ದಾದೀ, ಚಕ್ಖುಞಾಣಾದಿಗೋಚರಾ.

೧೧. ಓಜಾ ಹಿ ಯಾಪನಾ ಇತ್ಥಿಪುಮಲಿಙ್ಗಾದಿಹೇತುಕಂ;

ಭಾವದ್ವಯಂ ತು ಕಾಯಂವ, ಬ್ಯಾಪಿ ನೋ ಸಹವುತ್ತಿಕಂ.

೧೨. ನಿಸ್ಸಯಂ ವತ್ಥು ಧಾತೂನಂ, ದ್ವಿನ್ನಂ ಕಮ್ಮಜಪಾಲನಂ;

ಜೀವಿತಂ ಉಪ್ಪಲಾದೀನಂ, ಉದಕಂವ ಠಿತಿಕ್ಖಣೇ.

೧೩. ಖಂ ರೂಪಾನಂ ಪರಿಚ್ಛೇದೋ, ಜಾತಿಆದಿತ್ತಯಂ ಪನ;

ರೂಪನಿಬ್ಬತ್ತಿ ಪಾಕೋ ಚ, ಭೇದೋ ಚೇವ ಯಥಾಕ್ಕಮಂ.

೧೪. ಲಹುತಾದಿತ್ತಯಂ ತಂ ಹಿ, ರೂಪಾನಂ ಕಮತೋ ಸಿಯಾ;

ಅದನ್ಧಥದ್ಧತಾ ಚಾಪಿ, ಕಾಯಕಮ್ಮಾನುಕೂಲತಾ.

೧೫. ಅಭಿಕ್ಕಮಾದಿಜನಕಚಿತ್ತಜಸ್ಸಾನಿಲಸ್ಸ ಹಿ;

ವಿಕಾರೋ ಕಾಯವಿಞ್ಞತ್ತಿ, ರೂಪತ್ಥಮ್ಭಾದಿಕಾರಣಂ.

೧೬. ವಚೀಭೇದಕಚಿತ್ತೇನ, ಭೂತಭೂಮಿವಿಕಾರತಾ;

ವಚೀವಿಞ್ಞತ್ತುಪಾದಿನ್ನಘಟ್ಟನಸ್ಸೇವ ಕಾರಣಂ.

೧೭. ರೂಪಮಬ್ಯಾಕತಂ ಸಬ್ಬಂ, ವಿಪ್ಪಯುತ್ತಮಹೇತುಕಂ;

ಅನಾಲಮ್ಬಂ ಪರಿತ್ತಾದಿ, ಇತಿ ಏಕವಿಧಂ ನಯೇ.

೧೮. ಅಜ್ಝತ್ತಿಕಾನಿ ಚಕ್ಖಾದೀ, ಪಞ್ಚೇತೇವ ಪಸಾದಕಾ;

ವತ್ಥುನಾ ವತ್ಥು ತಾನೇವ, ದ್ವಾರಾ ವಿಞ್ಞತ್ತಿಭೀ ಸಹ.

೧೯. ಸೇಸಂ ಬಾವೀಸತಿ ಚೇಕವೀಸ ವೀಸತಿ ಬಾಹಿರಂ;

ಅಪ್ಪಸಾದಮವತ್ಥುಂ ಚ, ಅದ್ವಾರಞ್ಚ ಯಥಾಕ್ಕಮಂ.

೨೦. ಪಸಾದಾ ಪಞ್ಚ ಭಾವಾಯು, ಇನ್ದ್ರಿಯನಿನ್ದ್ರಿಯೇತರಂ;

ವಿನಾಪಂ ಆದಿತೋ ಯಾವ, ರಸಾ ಥೂಲಂ ನ ಚೇತರಂ.

೨೧. ಅಟ್ಠಕಂ ಅವಿನಿಬ್ಭೋಗಂ, ವಣ್ಣಗನ್ಧರಸೋಜಕಂ;

ಭೂತಂ ತಂ ತು ವಿನಿಬ್ಭೋಗಮಿತರನ್ತಿ ವಿನಿದ್ದಿಸೇ.

೨೨. ಅಟ್ಠಾರಸಾದಿತೋ ರೂಪಾ, ನಿಪ್ಫನ್ನಂ ತು ನ ಚೇತರಂ;

ಫೋಟ್ಠಬ್ಬಮಾಪವಜ್ಜಂ ತು, ಭೂತಂ ಕಾಮೇ ನ ಚೇತರಂ.

೨೩. ಸೇಕ್ಖಸಪ್ಪಟಿಘಾಸೇಕ್ಖಪಟಿಘಂ ದ್ವಯವಜ್ಜಿತಂ;

ವಣ್ಣಂ ತದಿತರಂ ಥೂಲಂ, ಸುಖುಮಞ್ಚೇತಿ ತಂ ತಿಧಾ.

೨೪. ಕಮ್ಮಜಾಕಮ್ಮಜಂನೇವಕಮ್ಮಾಕಮ್ಮಜತೋ ತಿಧಾ;

ಚಿತ್ತೋಜಉತುಜಾದೀನಂ, ವಸೇನಾಪಿ ತಿಧಾ ತಥಾ.

೨೫. ದಿಟ್ಠಂ ಸುತಂ ಮುತಞ್ಚಾಪಿ, ವಿಞ್ಞಾತಂ ವತ ಚೇತಸಾ;

ಏಕಮೇಕಞ್ಚ ಪಞ್ಚಾಪಿ, ವೀಸತಿ ಚ ಕಮಾ ಸಿಯುಂ.

೨೬. ಹದಯಂ ವತ್ಥು ವಿಞ್ಞತ್ತಿ, ದ್ವಾರಂ ಚಕ್ಖಾದಿಪಞ್ಚಕಂ;

ವತ್ಥು ದ್ವಾರಞ್ಚ ಸೇಸಾನಿ, ವತ್ಥು ದ್ವಾರಞ್ಚ ನೋ ಸಿಯಾ.

೨೭. ನಿಪ್ಫನ್ನಂ ರೂಪರೂಪಂ ಖಂ, ಪರಿಚ್ಛೇದೋಥ ಲಕ್ಖಣಂ;

ಜಾತಿಆದಿತ್ತಯಂ ರೂಪಂ, ವಿಕಾರೋ ಲಹುತಾದಿಕಂ.

೨೮. ಯಥಾ ಸಙ್ಖತಧಮ್ಮಾನಂ, ಲಕ್ಖಣಂ ಸಙ್ಖತಂ ತಥಾ;

ಪರಿಚ್ಛೇದಾದಿಕಂ ರೂಪಂ, ತಜ್ಜಾತಿಮನತಿಕ್ಕಮಾ.

೨೯. ಕಮ್ಮಚಿತ್ತಾನಲಾಹಾರಪಚ್ಚಯಾನಂ ವಸೇನಿಧ;

ಞೇಯ್ಯಾ ಪವತ್ತಿ ರೂಪಸ್ಸ, ಪಿಣ್ಡಾನಞ್ಚ ವಸಾ ಕಥಂ.

೩೦. ಕಮ್ಮಜಂ ಸೇನ್ದ್ರಿಯಂ ವತ್ಥು, ವಿಞ್ಞತ್ತಿ ಚಿತ್ತಜಾ ರವೋ;

ಚಿತ್ತಗ್ಗಿಜೋ ಲಹುತಾದಿತ್ತಯಂ ಚಿತ್ತಾನಲನ್ನಜಂ.

೩೧. ಅಟ್ಠಕಂ ಜಾತಿ ಚಾಕಾಸೋ, ಚತುಜಾ ಜರತಾ ಖಯಂ;

ಕುತೋಚಿ ನೇವ ಜಾತಂ ತಪ್ಪಾಕಭೇದಂ ಹಿ ತಂ ದ್ವಯಂ.

೩೨. ಜಾತಿಯಾಪಿ ನ ಜಾತತ್ತಂ, ಕುತೋಚಿಟ್ಠಕಥಾನಯಾ;

ಲಕ್ಖಣಾಭಾವತೋ ತಸ್ಸಾ, ಸತಿ ತಸ್ಮಿಂ ನ ನಿಟ್ಠಿತಿ.

೩೩. ಕಮ್ಮಚಿತ್ತಾನಲನ್ನೇಹಿ, ಪಿಣ್ಡಾ ನವ ಚ ಸತ್ತ ಚ;

ಚತ್ತಾರೋ ದ್ವೇ ಚ ವಿಞ್ಞೇಯ್ಯಾ, ಸಜೀವೇ ದ್ವೇ ಅಜೀವಕೇ.

೩೪. ಅಟ್ಠಕಂ ಜೀವಿತೇನಾಯುನವಕಂ ಭಾವವತ್ಥುನಾ;

ಚಕ್ಖಾದೀ ಪಞ್ಚ ದಸಕಾ, ಕಲಾಪಾ ನವ ಕಮ್ಮಜಾ.

೩೫. ಸುದ್ಧಟ್ಠವಿಞ್ಞತ್ತಿಯುತ್ತನವಕೋಪಿ ಚ ದಸಕೋ;

ಸುದ್ಧಸದ್ದೇನ ನವಕೋ, ಲಹುತಾದಿದಸೇಕಕೋ.

೩೬. ವಿಞ್ಞತ್ತಿಲಹುತಾದೀಹಿ, ಪುನ ದ್ವಾದಸ ತೇರಸ;

ಚಿತ್ತಜಾ ಇತಿ ವಿಞ್ಞೇಯ್ಯಾ, ಕಲಾಪಾ ಸತ್ತ ವಾ ಛ ವಾ.

೩೭. ಸುದ್ಧಟ್ಠಂ ಸದ್ದನವಕಂ, ಲಹುತಾದಿದಸೇಕಕಂ;

ಸದ್ದೇನಲಹುತಾದೀಹಿ, ಚತುರೋತುಜಕಣ್ಣಿಕಾ.

೩೮. ಸುದ್ಧಟ್ಠಲಹುತಾದೀಹಿ, ಅನ್ನಜಾ ದ್ವೇತಿಮೇ ನವ;

ಸತ್ತ ಚತ್ತಾರಿ ದ್ವೇ ಚೇತಿ, ಕಲಾಪಾ ವೀಸತೀ ದ್ವಿಭಿ.

೩೯. ತಯಟ್ಠಕಾ ಚ ಚತ್ತಾರೋ, ನವಕಾ ದಸಕಾ ನವ;

ತಯೋ ದ್ವೇಕೋ ಚ ಏಕೇನ, ದಸ ದ್ವೀಹಿ ಚ ತೀಹಿ ಚ.

೪೦. ಚತುನ್ನಮ್ಪಿ ಚ ಧಾತೂನಂ, ಅಧಿಕಂಸವಸೇನಿಧ;

ರೂಪಭೇದೋಥ ವಿಞ್ಞೇಯ್ಯೋ, ಕಮ್ಮಚಿತ್ತಾನಲನ್ನಜೋ.

೪೧. ಕೇಸಾದಿಮತ್ಥಲುಙ್ಗನ್ತಾ, ಪಥವಂಸಾತಿ ವೀಸತಿ;

ಪಿತ್ತಾದಿಮುತ್ತಕನ್ತಾ ತೇ, ಜಲಂಸಾ ದ್ವಾದಸೀರಿತಾ.

೪೨. ಯೇನ ಸನ್ತಪ್ಪನಂ ಯೇನ, ಜೀರಣಂ ದಹನಂ ತಥಾ;

ಯೇನಸಿತಾದಿಪಾಕೋತಿ, ಚತುರಂಸಾನಲಾಧಿಕಾ.

೪೩. ಉದ್ಧಾಧೋಗಮಕುಚ್ಛಿಟ್ಠಾ, ಕೋಟ್ಠಾಸೇಯ್ಯಙ್ಗಸಾರಿ ಚ;

ಅಸ್ಸಾಸೋತಿ ಚ ವಿಞ್ಞೇಯ್ಯಾ, ಛಳಂಸಾ ವಾಯುನಿಸ್ಸಿತಾ.

೪೪. ಪುಬ್ಬಮುತ್ತಕರೀಸಞ್ಚುದರಿಯಂ ಚತುರೋತುಜಾ;

ಕಮ್ಮಾ ಪಾಚಗ್ಗಿ ಚಿತ್ತಮ್ಹಾ-ಸ್ಸಾಸೋತಿ ಛಪಿ ಏಕಜಾ.

೪೫. ಸೇದಸಿಙ್ಘಾನಿಕಸ್ಸು ಚ, ಖೇಳೋ ಚಿತ್ತೋತುಸಮ್ಭವಾ;

ದ್ವಿಜಾ ದ್ವತ್ತಿಂಸ ಕೋಟ್ಠಾಸಾ, ಸೇಸಾ ಏವ ಚತುಬ್ಭವಾ.

೪೬. ಏಕಜೇಸ್ವಾದಿಚತೂಸು, ಉತುಜಾ ಚತುರಟ್ಠಕಾ;

ಜೀವೀತನವಕೋ ಪಾಚೇಸ್ಸಾಸೇ ಚಿತ್ತಭವಟ್ಠಕೋ.

೪೭. ದ್ವಿಜೇಸು ಮನತೇಜೇಹಿ, ದ್ವೇ ದ್ವೇ ಹೋನ್ತಿ ಪನಟ್ಠಕಾ;

ಸೇಸತೇಜಾನಿಲಂಸೇಸು, ಏಕೇಕಮ್ಹಿ ತಯೋ ತಯೋ.

೪೮. ಅಟ್ಠಕೋಜಮನಗ್ಗೀಹಿ, ಹೋನ್ತಿ ಅಟ್ಠಸು ಕಮ್ಮತೋ;

ಅಟ್ಠಾಯುನವಕಾ ಏವಂ, ಇಮೇ ಅಟ್ಠ ಚತುಬ್ಭವಾ.

೪೯. ಚತುವೀಸೇಸು ಸೇಸೇಸು, ಚತುಜೇಸುಟ್ಠಕಾ ತಯೋ;

ಏಕೇಕಮ್ಹಿ ಚ ವಿಞ್ಞೇಯ್ಯಾ, ಪಿಣ್ಡಾ ಚಿತ್ತಾನಲನ್ನಜಾ.

೫೦. ಕಮ್ಮಜಾ ಕಾಯಭಾವವ್ಹಾ, ದಸಕಾಪಿ ಸಿಯುಂ ತಹಿಂ;

ಚತುವೀಸೇಸು ಅಂಸೇಸು, ಏಕೇಕಮ್ಹಿ ದುವೇ ದುವೇ.

೫೧. ಪಞ್ಚಾಪಿ ಚಕ್ಖುಸೋತಾದೀ, ಪದೇಸದಸಕಾ ಪುನ;

ನವಕಾ ಸದ್ದಸಙ್ಖಾತಾ, ದ್ವೇತಿಚ್ಚೇವಂ ಕಲಾಪತೋ.

೫೨. ತೇಪಞ್ಞಾಸ ದಸೇಕಞ್ಚ, ನವುತ್ತರಸತಾನಿ ಚ;

ದಸಕಾ ನವಕಾ ಚೇವ, ಅಟ್ಠಕಾ ಚ ಸಿಯುಂ ಕಮಾ.

೫೩. ಸೇಕಪಞ್ಚಸತಂ ಕಾಯೇ, ಸಹಸ್ಸಂ ತಂ ಪವತ್ತತಿ;

ಪರಿಪುಣ್ಣಿನ್ದ್ರಿಯೇ ರೂಪಂ, ನಿಪ್ಫನ್ನಂ ಧಾತುಭೇದತೋ.

೫೪. ಚಿತ್ತುಪ್ಪಾದೇ ಸಿಯುಂ ರೂಪ-ಹೇತೂ ಕಮ್ಮಾದಯೋ ಪನ;

ಠಿತಿ ನ ಪಾಠೇ ಚಿತ್ತಸ್ಸ, ನ ಭಙ್ಗೇ ರೂಪಸಮ್ಭವೋ.

೫೫. ‘‘ಅಞ್ಞಥತ್ತಂ ಠಿತಸ್ಸಾ’’ತಿ, ವುತ್ತತ್ತಾವ ಠಿತಿಕ್ಖಣಂ;

ಅತ್ಥೀತಿ ಚೇ ಪಬನ್ಧೇನ, ಠಿತಿ ತತ್ಥ ಪವುಚ್ಚತಿ.

೫೬. ಅಥ ವಾ ತಿಕ್ಖಣೇ ಕಮ್ಮಂ, ಚಿತ್ತಮತ್ತುದಯಕ್ಖಣೇ;

ಉತುಓಜಾತ್ತನೋ ಠಾನೇ, ರೂಪಹೇತೂ ಭವನ್ತಿ ಹಿ.

೫೭. ಸೇಯ್ಯಸ್ಸಾದಿಕ್ಖಣೇ ಕಾಯ-

ಭಾವವತ್ಥುವಸಾ ತಯೋ;

ದಸಕಾ ಹೋನ್ತಿಭಾವಿಸ್ಸ,

ವಿನಾ ಭಾವಂ ದುವೇ ಸಿಯುಂ.

೫೮. ತತೋ ಪರಞ್ಚ ಕಮ್ಮಗ್ಗಿಚಿತ್ತಜಾ ತೇ ಚ ಪಿಣ್ಡಿಕಾ;

ಅಟ್ಠಕಾ ಚ ದುವೇ ಪುಬ್ಬೇ, ವುತ್ತವುತ್ತಕ್ಖಣೇ ವದೇ.

೫೯. ಕಾಲೇನಾಹಾರಜಂ ಹೋತಿ, ಚಕ್ಖಾದಿದಸಕಾನಿ ಚ;

ಚತುಪಚ್ಚಯತೋ ರೂಪಂ, ಸಮ್ಪಿಣ್ಡೇವಂ ಪವತ್ತತಿ.

೬೦. ತಂ ಸತ್ತರಸಚಿತ್ತಾಯು, ವಿನಾ ವಿಞ್ಞತ್ತಿಲಕ್ಖಣಂ;

ಸನ್ತತಾಮರಣಾ ರೂಪಂ, ಜರಾದಿಫಲಮಾವಹಂ.

೬೧. ಭಙ್ಗಾ ಸತ್ತರಸುಪ್ಪಾದೇ, ಜಾಯತೇ ಕಮ್ಮಜಂ ನ ತಂ;

ತದುದ್ಧಂ ಜಾಯತೇ ತಸ್ಮಾ, ತಕ್ಖಯಾ ಮರಣಂ ಭವೇ.

೬೨. ಆಯುಕಮ್ಮುಭಯೇಸಂ ವಾ, ಖಯೇನ ಮರಣಂ ಭವೇ;

ಉಪಕ್ಕಮೇನ ವಾ ಕೇಸಞ್ಚುಪಚ್ಛೇದಕಕಮ್ಮುನಾ.

೬೩. ಓಪಪಾತಿಕಭಾವಿಸ್ಸ, ದಸಕಾ ಸತ್ತ ಕಮ್ಮಜಾ;

ಕಾಮೇ ಆದೋ ಭವನ್ತಗ್ಗಿಜಾಹಿ ಪುಬ್ಬೇವ ಭೂಯತೇ.

೬೪. ಆದಿಕಪ್ಪನರಾನಞ್ಚ, ಅಪಾಯೇ ಅನ್ಧಕಸ್ಸ ಚ;

ಬಧಿರಸ್ಸಾಪಿ ಆದೋ ಛ, ಪುಬ್ಬೇವೇತರಜಾ ಸಿಯುಂ.

೬೫. ತತ್ಥೇವನ್ಧಬಧಿರಸ್ಸ, ಪಞ್ಚ ಹೋನ್ತಿ ಅಭಾವಿನೋ;

ಯುತ್ತಿಯಾ ಇಧ ವಿಞ್ಞೇಯ್ಯಾ, ಪಞ್ಚ ವಾ ಚತುರೋಪಿ ವಾ.

೬೬. ಚಕ್ಖಾದಿತ್ತಯಹೀನಸ್ಸ, ಚತುರೋವ ಭವನ್ತಿತಿ;

ವುತ್ತಂ ಉಪಪರಿಕ್ಖಿತ್ವಾ, ಗಹೇತಬ್ಬಂ ವಿಜಾನತಾ.

೬೭. ರೂಪೇ ಜೀವಿತಛಕ್ಕಞ್ಚ, ಚಕ್ಖಾದಿಸತ್ತಕತ್ತಯಂ;

ಪಞ್ಚ ಛ ಉತುಚಿತ್ತೇಹಿ, ಪಞ್ಚ ಛಾಸಞ್ಞಿನಂ ಭವೇ.

೬೮. ಪಞ್ಚಧಾತ್ವಾದಿನಿಯಮಾ, ಪಾಠೇ ಗನ್ಧರಸೋಜನಂ;

ನುಪ್ಪತ್ತಿ ತತ್ಥ ಭೂತಾನಂ, ಅಫೋಟ್ಠಬ್ಬಪವತ್ತಿನಂ.

೬೯. ಥದ್ಧುಣ್ಹೀರಣಭಾವೋವ, ನತ್ಥಿ ಧಾತ್ವಾದಿಕಿಚ್ಚತೋ;

ಅಞ್ಞಂ ಗನ್ಧಾದೀನಂ ತೇಸಂ, ತಕ್ಕಿಚ್ಚೇನೋಪಲದ್ಧಿತೋ.

೭೦. ರೂಪೇ ಸಪ್ಪಟಿಘತ್ತಾದಿ, ತತ್ಥ ರುಪ್ಪನತಾ ವಿಯ;

ಘಟ್ಟನಞ್ಚ ರವುಪ್ಪಾದಸ್ಸಞ್ಞತ್ಥಸ್ಸೇವ ಹೇತುತಾ.

೭೧. ಇಚ್ಛಿತಬ್ಬಮಿಮೇಕನ್ತಮೇವಂ ಪಾಠಾವಿರೋಧತೋ;

ಅಥ ವಾ ತೇಹಿ ವಿಞ್ಞೇಯ್ಯಂ, ದಸಕಂ ನವಕಟ್ಠಕಂ.

೭೨. ಸಬ್ಬಂ ಕಾಮಭವೇ ರೂಪಂ, ರೂಪೇ ಏಕೂನವೀಸತಿ;

ಅಸಞ್ಞೀನಂ ದಸ ಗನ್ಧರಸೋಜಾಹಿ ಚ ಬ್ರಹ್ಮುನಂ.

ಇತಿ ಸಚ್ಚಸಙ್ಖೇಪೇ ರೂಪಸಙ್ಖೇಪೋ ನಾಮ

ಪಠಮೋ ಪರಿಚ್ಛೇದೋ.