೨. ದುತಿಯೋ ಪರಿಚ್ಛೇದೋ

ಖನ್ಧತ್ತಯಸಙ್ಖೇಪೋ

೭೩. ವೇದನಾನುಭವೋ ತೇಧಾ, ಸುಖದುಕ್ಖಮುಪೇಕ್ಖಯಾ;

ಇಟ್ಠಾನಿಟ್ಠಾನುಭವನಮಜ್ಝಾನುಭವಲಕ್ಖಣಾ.

೭೪. ಕಾಯಿಕಂ ಮಾನಸಂ ದುಕ್ಖಂ, ಸುಖೋಪೇಕ್ಖಾ ಚ ವೇದನಾ;

ಏಕಂ ಮಾನಸಮೇವೇತಿ, ಪಞ್ಚಧಿನ್ದ್ರಿಯಭೇದತೋ.

೭೫. ಯಥಾ ತಥಾ ವಾ ಸಞ್ಞಾಣಂ, ಸಞ್ಞಾ ಸತಿನಿಬನ್ಧನಂ;

ಛಧಾ ಛದ್ವಾರಸಮ್ಭೂತಫಸ್ಸಜಾನಂ ವಸೇನ ಸಾ.

೭೬. ಸಙ್ಖಾರಾ ಚೇತನಾ ಫಸ್ಸೋ,

ಮನಕ್ಕಾರಾಯು ಸಣ್ಠಿತಿ;

ತಕ್ಕೋ ಚಾರೋ ಚ ವಾಯಾಮೋ,

ಪೀತಿ ಛನ್ದೋಧಿಮೋಕ್ಖಕೋ.

೭೭. ಸದ್ಧಾ ಸತಿ ಹಿರೋತ್ತಪ್ಪಂ, ಚಾಗೋ ಮೇತ್ತಾ ಮತಿ ಪುನ;

ಮಜ್ಝತ್ತತಾ ಚ ಪಸ್ಸದ್ಧೀ, ಕಾಯಚಿತ್ತವಸಾ ದುವೇ.

೭೮. ಲಹುತಾ ಮುದುಕಮ್ಮಞ್ಞಪಾಗುಞ್ಞಮುಜುತಾ ತಥಾ;

ದಯಾ ಮುದಾ ಮಿಚ್ಛಾವಾಚಾ, ಕಮ್ಮನ್ತಾಜೀವಸಂವರೋ.

೭೯. ಲೋಭೋ ದೋಸೋ ಚ ಮೋಹೋ ಚ, ದಿಟ್ಠಿ ಉದ್ಧಚ್ಚಮೇವ ಚ;

ಅಹಿರೀಕಂ ಅನೋತ್ತಪ್ಪಂ, ವಿಚಿಕಿಚ್ಛಿತಮೇವ ಚ.

೮೦. ಮಾನೋ ಇಸ್ಸಾ ಚ ಮಚ್ಛೇರಂ, ಕುಕ್ಕುಚ್ಚಂ ಥಿನಮಿದ್ಧಕಂ;

ಇತಿ ಏತೇವ ಪಞ್ಞಾಸ, ಸಙ್ಖಾರಕ್ಖನ್ಧಸಞ್ಞಿತಾ.

೮೧. ಬ್ಯಾಪಾರೋ ಚೇತನಾ ಫಸ್ಸೋ, ಫುಸನಂ ಸರಣಂ ತಹಿಂ;

ಮನಕ್ಕಾರೋ ಪಾಲನಾಯು, ಸಮಾಧಿ ಅವಿಸಾರತಾ.

೮೨. ಆರೋಪನಾನುಮಜ್ಜಟ್ಠಾ, ತಕ್ಕಚಾರಾ ಪನೀಹನಾ;

ವೀರಿಯಂ ಪೀನನಾ ಪೀತಿ, ಛನ್ದೋ ತು ಕತ್ತುಕಾಮತಾ.

೮೩. ಅಧಿಮೋಕ್ಖೋ ನಿಚ್ಛಯೋ ಸದ್ಧಾ,

ಪಸಾದೋ ಸರಣಂ ಸತಿ;

ಹಿರೀ ಪಾಪಜಿಗುಚ್ಛಾ ಹಿ,

ಓತ್ತಪ್ಪಂ ತಸ್ಸ ಭೀರುತಾ.

೮೪. ಅಲಗ್ಗೋ ಚ ಅಚಣ್ಡಿಕ್ಕಂ, ಚಾಗೋ ಮೇತ್ತಾ ಮತಿ ಪನ;

ಯಾಥಾವಬೋಧೋ ಮಜ್ಝತ್ತಂ, ಸಮವಾಹಿತಲಕ್ಖಣಂ.

೮೫. ಛ ಯುಗಾನಿ ಕಾಯಚಿತ್ತದರಗಾರವಥದ್ಧತಾ-

ಅಕಮ್ಮಞ್ಞತ್ತಗೇಲಞ್ಞಕುಟಿಲಾನಂ ವಿನೋದನಾ.

೮೬. ತಾನುದ್ಧತಾದಿಥಿನಾದಿದಿಟ್ಠಾದೀನಂ ಯಥಾಕ್ಕಮಂ;

ಸೇಸಕಾದಿಅಸದ್ಧಾದಿಮಾಯಾದೀನಂ ವಿಪಕ್ಖಿನೋ.

೮೭. ದುಕ್ಖಾಪನಯನಕಾಮಾ, ದಯಾ ಮೋದಾ ಪಮೋದನಾ;

ವಚೀದುಚ್ಚರಿತಾದೀನಂ, ವಿರಾಮೋ ವಿರತಿತ್ತಯಂ.

೮೮. ಲೋಭೋ ದೋಸೋ ಚ ಮೋಹೋ ಚ,

ಗೇಧಚಣ್ಡಮನನ್ಧನಾ;

ಕಮೇನ ದಿಟ್ಠಿ ದುಗ್ಗಾಹೋ,

ಉದ್ಧಚ್ಚಂ ಭನ್ತತಂ ಮತಂ.

೮೯. ಅಹಿರೀಕಮಲಜ್ಜತ್ತಂ, ಅನೋತ್ತಪ್ಪಮತಾಸತಾ;

ಸಂಸಯೋ ವಿಚಿಕಿಚ್ಛಾ ಹಿ, ಮಾನೋ ಉನ್ನತಿಲಕ್ಖಣೋ.

೯೦. ಪರಸ್ಸಕಸಮ್ಪತ್ತೀನಂ,

ಉಸೂಯಾ ಚ ನಿಗೂಹನಾ;

ಇಸ್ಸಾಮಚ್ಛೇರಕಾ ತಾಪೋ,

ಕತಾಕತಸ್ಸ ಸೋಚನಾ.

೯೧. ಥಿನಂ ಚಿತ್ತಸ್ಸ ಸಙ್ಕೋಚೋ, ಅಕಮ್ಮಞ್ಞತ್ತತಾ ಪನ;

ಮಿದ್ಧಮಿಚ್ಚೇವಮೇತೇಸಂ, ಲಕ್ಖಣಞ್ಚ ನಯೇ ಬುಧೋ.

೯೨. ವೇದನಾದಿಸಮಾಧನ್ತಾ, ಸತ್ತ ಸಬ್ಬಗಸಞ್ಞಿತಾ;

ತಕ್ಕಾದಿಅಧಿಮೋಕ್ಖನ್ತಾ, ಛ ಪಕಿಣ್ಣಕನಾಮಕಾ.

೯೩. ಸದ್ಧಾದಯೋ ವಿರಮನ್ತಾ, ಅರಣಾ ಪಞ್ಚವೀಸತಿ;

ಲೋಭಾದಿಮಿದ್ಧಕನ್ತಾನಿ, ಸರಣಾನಿ ಚತುದ್ದಸ.

೯೪. ಇಸ್ಸಾಮಚ್ಛೇರಕುಕ್ಕುಚ್ಚದೋಸಾ ಕಾಮೇ ದಯಾ ಮುದಾ;

ಕಾಮೇ ರೂಪೇ ಚ ಸೇಸಾ ಛ-ಚತ್ತಾಲೀಸ ತಿಧಾತುಜಾ.

೯೫. ಛನ್ದನಿಚ್ಛಯಮಜ್ಝತ್ತಮನಕ್ಕಾರಾ ಸಉದ್ಧವಾ;

ದಯಾದೀ ಪಞ್ಚ ಮಾನಾದೀ, ಛ ಯೇವಾಪನ ಸೋಳಸ.

೯೬. ಛನ್ದಾದೀ ಪಞ್ಚ ನಿಯತಾ, ತತ್ಥೇಕಾದಸ ನೇತರಾ;

ಅಹಿರೀಕಮನೋತ್ತಪ್ಪಂ, ಲೋಕನಾಸನಕಂ ದ್ವಯಂ.

೯೭. ಏತೇ ದ್ವೇ ಮೋಹುದ್ಧಚ್ಚಾತಿ, ಚತ್ತಾರೋ ಪಾಪಸಬ್ಬಗಾ;

ಲೋಕಪಾಲದುಕಂ ವುತ್ತಂ, ಹಿರಿಓತ್ತಪ್ಪನಾಮಕಂ.

೯೮. ಆರಮ್ಮಣೂಪನಿಜ್ಝಾನಾ, ಝಾನಙ್ಗಾ ತಕ್ಕಚಾರಕಾ;

ಪೀತಿ ಏಕಗ್ಗತಾ ಚೇತಿ, ಸತ್ತ ವಿತ್ತಿತ್ತಯೇನ ವೇ.

೯೯. ಸದ್ಧಾ ಸತಿ ಮತೇಕಗ್ಗ-ಧಿತಿ ಲೋಕವಿನಾಸಕಾ;

ಪಾಲಕಾ ನವ ಚೇತಾನಿ, ಬಲಾನಿ ಅವಿಕಮ್ಪತೋ.

೧೦೦. ಏತ್ಥ ಸದ್ಧಾದಿಪಞ್ಚಾಯು, ಕತ್ವಾತ್ರ ಚತುಧಾ ಮತಿಂ;

ವೇದನಾಹಿ ದ್ವಿಸತ್ತೇತೇ, ಇನ್ದ್ರಿಯಾನಾಧಿಪಚ್ಚತೋ.

೧೦೧. ಮನರೂಪಿನ್ದ್ರಿಯೇಹೇತೇ, ಸಬ್ಬೇ ಇನ್ದ್ರಿಯನಾಮಕಾ;

ಬಾವೀಸತಿ ಭವನ್ತಾಯುದ್ವಯಂ ಕತ್ವೇಕಸಙ್ಗಹಂ.

೧೦೨. ದಿಟ್ಠೀಹೇಕಗ್ಗತಾತಕ್ಕಸತೀವಿರತಿಯೋ ಪಥಾ;

ಅಟ್ಠ ನಿಯ್ಯಾನತೋ ಆದಿಚತುರೋ ಭಿತ್ವಾನ ದ್ವಾದಸ.

೧೦೩. ಫಸ್ಸೋ ಚ ಚೇತನಾ ಚೇವ,

ದ್ವೇವೇತ್ಥಾಹಾರಣತ್ತತೋ;

ಆಹಾರಾ ಮನವೋಜಾಹಿ,

ಭವನ್ತಿ ಚತುರೋಥವಾ.

೧೦೪. ಹೇತು ಮೂಲಟ್ಠತೋ ಪಾಪೇ,

ಲೋಭಾದಿತ್ತಯಮೀರಿತಂ;

ಕುಸಲಾಬ್ಯಾಕತೇ ಚಾಪಿ,

ಅಲೋಭಾದಿತ್ತಯಂ ತಥಾ.

೧೦೫. ದಿಟ್ಠಿಲೋಭದುಸಾ ಕಮ್ಮಪಥಾಪಾಯಸ್ಸ ಮಗ್ಗತೋ;

ತಬ್ಬಿಪಕ್ಖಾ ಸುಗತಿಯಾ, ತಯೋತಿ ಛ ಪಥೀರಿತಾ.

೧೦೬. ಪಸ್ಸದ್ಧಾದಿಯುಗಾನಿ ಛ, ವಗ್ಗತ್ತಾ ಯುಗಳಾನಿ ತು;

ಉಪಕಾರಾ ಸತಿ ಧೀ ಚ, ಬಹೂಪಕಾರಭಾವತೋ.

೧೦೭. ಓಘಾಹರಣತೋ ಯೋಗಾ,

ಯೋಜನೇನಾಭವಗ್ಗತೋ;

ಸವನೇನಾಸವಾ ದಿಟ್ಠಿ-

ಮೋಹೇಜೇತ್ಥ ದುಧಾ ಲುಭೋ.

೧೦೮. ದಳ್ಹಗ್ಗಾಹೇನ ದಿಟ್ಠೇಜಾ, ಉಪಾದಾನಂ ತಿಧಾ ತಹಿಂ;

ದಿಟ್ಠಿ ದೋಸೇನ ತೇ ಗನ್ಥಾ, ಗನ್ಥತೋ ದಿಟ್ಠಿಹ ದ್ವಿಧಾ.

೧೦೯. ಪಞ್ಚಾವರಣತೋ ಕಾಮ-ಕಙ್ಖಾದೋಸುದ್ಧವಂ ತಪೋ;

ಥಿನಮಿದ್ಧಞ್ಚ ಮೋಹೇನ, ಛ ವಾ ನೀವರಣಾನಿಥ.

೧೧೦. ಕತ್ವಾ ತಾಪುದ್ಧವಂ ಏಕಂ, ಥಿನಮಿದ್ಧಞ್ಚ ವುಚ್ಚತಿ;

ಕಿಚ್ಚಸ್ಸಾಹಾರತೋ ಚೇವ, ವಿಪಕ್ಖಸ್ಸ ಚ ಲೇಸತೋ.

೧೧೧. ದಿಟ್ಠೇಜುದ್ಧವದೋಸನ್ಧ-

ಕಙ್ಖಾಥಿನುಣ್ಣತೀ ದಸ;

ಲೋಕನಾಸಯುಗೇನೇತೇ,

ಕಿಲೇಸಾ ಚಿತ್ತಕ್ಲೇಸತೋ.

೧೧೨. ಲೋಭದೋಸಮೂಹಮಾನ-ದಿಟ್ಠಿಕಙ್ಖಿಸ್ಸಮಚ್ಛರಾ;

ಸಂಯೋಜನಾನಿ ದಿಟ್ಠೇಜಾ, ಭಿತ್ವಾ ಬನ್ಧನತೋ ದುಧಾ.

೧೧೩. ತಾನಿ ಮೋಹುದ್ಧವಂಮಾನಕಙ್ಖಾದೋಸೇಜದಿಟ್ಠಿಯೋ;

ದುಧಾದಿಟ್ಠಿ ತಿಧಾ ಲೋಭಂ, ಭಿತ್ವಾ ಸುತ್ತೇ ದಸೀರಿತಾ.

೧೧೪. ದಿಟ್ಠಿಲೋಭಮೂಹಮಾನದೋಸಕಙ್ಖಾ ತಹಿಂ ದುಧಾ;

ಕತ್ವಾ ಲೋಭಮಿಮೇ ಸತ್ತಾನುಸಯಾ ಸಮುದೀರಿತಾ.

೧೧೫. ದಿಟ್ಠಿ ಏವ ಪರಾಮಾಸೋ, ಞೇಯ್ಯೋ ಏವಂ ಸಮಾಸತೋ;

ಅತ್ಥೋ ಸಙ್ಖಾರಕ್ಖನ್ಧಸ್ಸ, ವುತ್ತೋ ವುತ್ತಾನುಸಾರತೋ.

ಇತಿ ಸಚ್ಚಸಙ್ಖೇಪೇ ಖನ್ಧತ್ತಯಸಙ್ಖೇಪೋ ನಾಮ

ದುತಿಯೋ ಪರಿಚ್ಛೇದೋ.