೩. ತತಿಯೋ ಪರಿಚ್ಛೇದೋ

ಚಿತ್ತಪವತ್ತಿಪರಿದೀಪನೋ

೧೧೬. ಚಿತ್ತಂ ವಿಸಯಗ್ಗಾಹಂ ತಂ, ಪಾಕಾಪಾಕದತೋ ದುಧಾ;

ಕುಸಲಾಕುಸಲಂ ಪುಬ್ಬಂ, ಪರಮಬ್ಯಾಕತಂ ಮತಂ.

೧೧೭. ಕುಸಲಂ ತತ್ಥ ಕಾಮಾದಿಭೂಮಿತೋ ಚತುಧಾ ಸಿಯಾ;

ಅಟ್ಠ ಪಞ್ಚ ಚತ್ತಾರಿ ಚ, ಚತ್ತಾರಿ ಕಮತೋ ಕಥಂ.

೧೧೮. ಸೋಮನಸ್ಸಮತಿಯುತ್ತಮಸಙ್ಖಾರಮನಮೇಕಂ;

ಸಸಙ್ಖಾರಮನಞ್ಚೇಕಂ, ತಥಾ ಹೀನಮತಿದ್ವಯಂ.

೧೧೯. ತಥೋಪೇಕ್ಖಾಮತಿಯುತ್ತಂ, ಮತಿಹೀನನ್ತಿ ಅಟ್ಠಧಾ;

ಕಾಮಾವಚರಪುಞ್ಞೇತ್ಥ, ಭಿಜ್ಜತೇ ವೇದನಾದಿತೋ.

೧೨೦. ದಾನಂ ಸೀಲಞ್ಚ ಭಾವನಾ, ಪತ್ತಿದಾನಾನುಮೋದನಾ;

ವೇಯ್ಯಾವಚ್ಚಾಪಚಾಯಞ್ಚ, ದೇಸನಾ ಸುತಿ ದಿಟ್ಠಿಜು.

೧೨೧. ಏತೇಸ್ವೇಕಮಯಂ ಹುತ್ವಾ, ವತ್ಥುಂ ನಿಸ್ಸಾಯ ವಾ ನ ವಾ;

ದ್ವಾರಹೀನಾದಿಯೋನೀನಂ, ಗತಿಯಾದಿಪ್ಪಭೇದವಾ.

೧೨೨. ತಿಕಾಲಿಕಪರಿತ್ತಾದಿಗೋಚರೇಸ್ವೇಕಮಾದಿಯ;

ಉದೇತಿ ಕಾಲಮುತ್ತಂ ವಾ, ಮತಿಹೀನಂ ವಿನಾಮಲಂ.

೧೨೩. ಛಗೋಚರೇಸು ರೂಪಾದಿಪಞ್ಚಕಂ ಪಞ್ಚ ಗೋಚರಾ;

ಸೇಸಂ ರೂಪಮರೂಪಞ್ಚ, ಪಞ್ಞತ್ತಿ ಛಟ್ಠಗೋಚರೋ.

೧೨೪. ಞಾಣಯುತ್ತವರಂ ತತ್ಥ, ದತ್ವಾ ಸನ್ಧಿಂ ತಿಹೇತುಕಂ;

ಪಚ್ಛಾ ಪಚ್ಚತಿ ಪಾಕಾನಂ, ಪವತ್ತೇ ಅಟ್ಠಕೇ ದುವೇ.

೧೨೫. ತೇಸುಯೇವ ನಿಹೀನಂ ತು, ದತ್ವಾ ಸನ್ಧಿಂ ದುಹೇತುಕಂ;

ದೇತಿ ದ್ವಾದಸ ಪಾಕೇ ಚ, ಪವತ್ತೇ ಧೀಯುತಂ ವಿನಾ.

೧೨೬. ಏವಂ ಧೀಹೀನಮುಕ್ಕಟ್ಠಂ, ಸನ್ಧಿಯಞ್ಚ ಪವತ್ತಿಯಂ;

ಹೀನಂ ಪನುಭಯತ್ಥಾಪಿ, ಹೇತುಹೀನೇವ ಪಚ್ಚತಿ.

೧೨೭. ಕಾಮಸುಗತಿಯಂಯೇವ, ಭವಭೋಗದದಂ ಇದಂ;

ರೂಪಾಪಾಯೇ ಪವತ್ತೇವ, ಪಚ್ಚತೇ ಅನುರೂಪತೋ.

೧೨೮. ವಿತಕ್ಕಚಾರಪೀತೀಹಿ, ಸುಖೇಕಗ್ಗಯುತಂ ಮನಂ;

ಆದಿ ಚಾರಾದಿಪೀತಾದಿಸುಖಾದೀಹಿ ಪರಂ ತಯಂ.

೧೨೯. ಉಪೇಕ್ಖೇಕಗ್ಗತಾಯನ್ತಮಾರುಪ್ಪಞ್ಚೇವಮಙ್ಗತೋ;

ಪಞ್ಚಧಾ ರೂಪಪುಞ್ಞಂ ತು, ಹೋತಾರಮ್ಮಣತೋ ಪನ.

೧೩೦. ಆದಿಸ್ಸಾಸುಭಮನ್ತಸ್ಸು-

ಪೇಕ್ಖಾ ಮೇತ್ತಾದಯೋ ತಯೋ;

ಆದೋ ಚತುನ್ನಂ ಪಞ್ಚನ್ನಂ,

ಸಸ್ಸಾಸಕಸಿಣಾನಿ ತು.

೧೩೧. ನಭತಮ್ಮನತಸ್ಸುಞ್ಞತಚ್ಚಿತ್ತಚತುಗೋಚರೇ;

ಕಮೇನಾತಿಕ್ಕಮಾರುಪ್ಪಪುಞ್ಞಂ ಹೋತಿ ಚತುಬ್ಬಿಧಂ.

೧೩೨. ಅಮಲಂ ಸನ್ತಿಮಾರಬ್ಭ, ಹೋತಿ ತಂ ಮಗ್ಗಯೋಗತೋ;

ಚತುಧಾ ಪಾದಕಜ್ಝಾನಭೇದತೋ ಪುನ ವೀಸತಿ.

೧೩೩. ದಿಟ್ಠಿಕಙ್ಖಾನುದಂ ಆದಿ, ಕಾಮದೋಸತನೂಕರಂ;

ಪರಂ ಪರಂ ತದುಚ್ಛೇದೀ, ಅನ್ತಂ ಸೇಸಕನಾಸಕಂ.

೧೩೪. ಏವಂ ಭೂಮಿತ್ತಯಂ ಪುಞ್ಞಂ, ಭಾವನಾಮಯಮೇತ್ಥ ಹಿ;

ಪಠಮಂ ವತ್ಥುಂ ನಿಸ್ಸಾಯ, ದುತಿಯಂ ಉಭಯೇನಪಿ.

೧೩೫. ತತಿಯೇ ಆದಿ ನಿಸ್ಸಾಯ,

ಸೇಸಾ ನಿಸ್ಸಾಯ ವಾ ನ ವಾ;

ಹೋನ್ತಿ ಆದಿದ್ವಯಂ ತತ್ಥ,

ಸಾಧೇತಿ ಸಕಭೂಭವಂ.

೧೩೬. ಸಾಧೇತಾನುತ್ತರಂ ಸನ್ತಿಂ, ಅಭಿಞ್ಞಾ ಪನಿಧೇವ ತು;

ಝಾನೂದಯಫಲತ್ತಾ ನ, ಫಲದಾನಾಪಿ ಸಮ್ಭವಾ.

೧೩೭. ನಾಞ್ಞಭೂಫಲದಂ ಕಮ್ಮಂ, ರೂಪಪಾಕಸ್ಸ ಗೋಚರೋ;

ಸಕಮ್ಮಗೋಚರೋಯೇವ, ನ ಚಞ್ಞೋಯಮಸಮ್ಭವೋ.

೧೩೮. ಪಾಪಂ ಕಾಮಿಕಮೇವೇಕಂ, ಹೇತುತೋ ತಂ ದ್ವಿಧಾ ಪುನ;

ಮೂಲತೋ ತಿವಿಧಂ ಲೋಭ-ದೋಸಮೋಹವಸಾ ಸಿಯಾ.

೧೩೯. ಸೋಮನಸ್ಸಕುದಿಟ್ಠೀಹಿ, ಯುತ್ತಮೇಕಮಸಙ್ಖರಂ;

ಸಸಙ್ಖಾರಮನಞ್ಚೇಕಂ, ಹೀನದಿಟ್ಠಿದ್ವಯಂ ತಥಾ.

೧೪೦. ಉಪೇಕ್ಖಾದಿಟ್ಠಿಯುತ್ತಮ್ಪಿ, ತಥಾ ದಿಟ್ಠಿವಿಯುತ್ತಕಂ;

ವೇದನಾದಿಟ್ಠಿಆದೀಹಿ, ಲೋಭಮೂಲೇವಮಟ್ಠಧಾ.

೧೪೧. ಸದುಕ್ಖದೋಸಾಸಙ್ಖಾರಂ, ಇತರಂ ದೋಸಮೂಲಕಂ;

ಮೋಹಮೂಲಮ್ಪಿ ಸೋಪೇಕ್ಖಂ, ಕಙ್ಖುದ್ಧಚ್ಚಯುತಂ ದ್ವಿಧಾ.

೧೪೨. ತತ್ಥ ದೋಸದ್ವಯಂ ವತ್ಥುಂ, ನಿಸ್ಸಾಯೇವಿತರೇ ಪನ;

ನಿಸ್ಸಾಯ ವಾ ನ ವಾ ಹೋನ್ತಿ, ವಧಾದಿಸಹಿತಾ ಕಥಂ.

೧೪೩. ಫರುಸ್ಸವಧಬ್ಯಾಪಾದಾ, ಸದೋಸೇನ ಸಲೋಭತೋ;

ಕುದಿಟ್ಠಿಮೇಥುನಾಭಿಜ್ಝಾ, ಸೇಸಾ ಕಮ್ಮಪಥಾ ದ್ವಿಭಿ.

೧೪೪. ಸನ್ಧಿಂ ಚತೂಸ್ವಪಾಯೇಸು, ದೇತಿ ಸಬ್ಬತ್ಥ ವುತ್ತಿಯಂ;

ಪಚ್ಚತೇ ಗೋಚರಂ ತಸ್ಸ, ಸಕಲಂ ಅಮಲಂ ವಿನಾ.

೧೪೫. ಅಬ್ಯಾಕತಂ ದ್ವಿಧಾ ಪಾಕ-ಕ್ರಿಯಾ ತತ್ಥಾದಿ ಭೂಮಿತೋ;

ಚತುಧಾ ಕಾಮಪಾಕೇತ್ಥ, ಪುಞ್ಞಪಾಕಾದಿತೋ ದುಧಾ.

೧೪೬. ಪುಞ್ಞಪಾಕಾ ದ್ವಿಧಾಹೇತು-ಸಹೇತೂತಿ ದ್ವಿರಟ್ಠಕಾ;

ಅಹೇತೂ ಪಞ್ಚ ಞಾಣಾನಿ, ಗಹಣಂ ತೀರಣಾ ಉಭೋ.

೧೪೭. ಕಾಯಞಾಣಂ ಸುಖೀ ತತ್ಥ, ಸೋಮನಸ್ಸಾದಿ ತೀರಣಂ;

ಸೋಪೇಕ್ಖಾನಿ ಛ ಸೇಸಾನಿ, ಸಪುಞ್ಞಂವ ಸಹೇತುಕಂ.

೧೪೮. ಕೇವಲಂ ಸನ್ಧಿಭವಙ್ಗ-ತದಾಲಮ್ಬಚುತಿಬ್ಬಸಾ;

ಜಾಯತೇ ಸೇಸಮೇತಸ್ಸ, ಪುಬ್ಬೇ ವುತ್ತನಯಾ ನಯೇ.

೧೪೯. ಮನುಸ್ಸವಿನಿಪಾತೀನಂ, ಸನ್ಧಾದಿ ಅನ್ತತೀರಣಂ;

ಹೋತಿ ಅಞ್ಞೇನ ಕಮ್ಮೇನ, ಸಹೇತುಪಿ ಅಹೇತುನಂ.

೧೫೦. ಪಾಪಜಾ ಪುಞ್ಞಜಾಹೇತು-ಸಮಾ ತೀರಂ ವಿನಾದಿಕಂ;

ಸದುಕ್ಖಂ ಕಾಯವಿಞ್ಞಾಣಂ, ಅನಿಟ್ಠಾರಮ್ಮಣಾ ಇಮೇ.

೧೫೧. ತೇ ಸಾತಗೋಚರಾ ತೇಸು, ದ್ವಿಟ್ಠಾನಂ ಆದಿತೀರಣಂ;

ಪಞ್ಚಟ್ಠಾನಾಪರಾ ದ್ವೇ ತೇ, ಪರಿತ್ತವಿಸಯಾಖಿಲಾ.

೧೫೨. ಸಮ್ಪಟಿಚ್ಛದ್ವಿಪಞ್ಚನ್ನಂ, ಪಞ್ಚ ರೂಪಾದಯೋ ತಹಿಂ;

ಪಚ್ಚುಪ್ಪನ್ನಾವ ಸೇಸಾನಂ, ಪಾಕಾನಂ ಛ ತಿಕಾಲಿಕಾ.

೧೫೩. ರೂಪಾರೂಪವಿಪಾಕಾನಂ, ಸಬ್ಬಸೋ ಸದಿಸಂ ವದೇ;

ಸಕಪುಞ್ಞೇನ ಸನ್ಧಾದಿ-ಸಕಿಚ್ಚತ್ತಯತಂ ವಿನಾ.

೧೫೪. ಸಮಾನುತ್ತರಪಾಕಾಪಿ, ಸಕಪುಞ್ಞೇನ ಸಬ್ಬಸೋ;

ಹಿತ್ವಾ ಮೋಕ್ಖಮುಖಂ ತಂ ಹಿ, ದ್ವಿಧಾ ಮಗ್ಗೇ ತಿಧಾ ಫಲೇ.

೧೫೫. ಕ್ರಿಯಾ ತಿಧಾಮಲಾಭಾವಾ,

ಭೂಮಿತೋ ತತ್ಥ ಕಾಮಿಕಾ;

ದ್ವಿಧಾ ಹೇತುಸಹೇತೂತಿ,

ತಿಧಾಹೇತು ತಹಿಂ ಕಥಂ.

೧೫೬. ಆವಜ್ಜಹಸಿತಾವಜ್ಜಾ, ಸೋಪೇಕ್ಖಸುಖುಪೇಕ್ಖವಾ;

ಪಞ್ಚಛಕಾಮಾವಚರಾ, ಸಕಲಾರಮ್ಮಣಾ ಚ ತೇ.

೧೫೭. ಸಹೇತುರೂಪರೂಪಾ ಚ, ಸಕಪಞ್ಞಂವಾರಹತೋ;

ವುತ್ತಿಯಾ ನ ಫಲೇ ಪುಪ್ಫಂ, ಯಥಾ ಛಿನ್ನಲತಾ ಫಲಂ.

೧೫೮. ಅನಾಸೇವನಯಾವಜ್ಜ-ದ್ವಯಂ ಪುಥುಜ್ಜನಸ್ಸ ಹಿ;

ನ ಫಲೇ ವತ್ತಮಾನಮ್ಪಿ, ಮೋಘಪುಪ್ಫಂ ಫಲಂ ಯಥಾ.

೧೫೯. ತಿಸತ್ತ ದ್ವಿಛ ಛತ್ತಿಂಸ, ಚತುಪಞ್ಚ ಯಥಾಕ್ಕಮಂ;

ಪುಞ್ಞಂ ಪಾಪಂ ಫಲಂ ಕ್ರಿಯಾ, ಏಕೂನನವುತೀವಿಧಂ.

೧೬೦. ಸನ್ಧಿ ಭವಙ್ಗಮಾವಜ್ಜಂ, ದಸ್ಸನಾದಿಕಪಞ್ಚಕಂ;

ಗಹತೀರಣವೋಟ್ಠಬ್ಬ-ಜವತಗ್ಗೋಚರಂ ಚುತಿ.

೧೬೧. ಇತಿ ಏಸಂ ದ್ವಿಸತ್ತನ್ನಂ, ಕಿಚ್ಚವುತ್ತಿವಸಾಧುನಾ;

ಚಿತ್ತಪ್ಪವತ್ತಿ ಛದ್ವಾರೇ, ಸಙ್ಖೇಪಾ ವುಚ್ಚತೇ ಕಥಂ.

೧೬೨. ಕಾಮೇ ಸರಾಗಿನಂ ಕಮ್ಮ-ನಿಮಿತ್ತಾದಿ ಚುತಿಕ್ಖಣೇ;

ಖಾಯತೇ ಮನಸೋಯೇವ, ಸೇಸಾನಂ ಕಮ್ಮಗೋಚರೋ.

೧೬೩. ಉಪಟ್ಠಿತಂ ತಮಾರಬ್ಭ, ಪಞ್ಚವಾರಂ ಜವೋ ಭವೇ;

ತದಾಲಮ್ಬಂ ತತೋ ತಮ್ಹಾ, ಚುತಿ ಹೋತಿ ಜವೇಹಿ ವಾ.

೧೬೪. ಅವಿಜ್ಜಾತಣ್ಹಾಸಙ್ಖಾರ-ಸಹಜೇಹಿ ಅಪಾಯಿನಂ;

ವಿಸಯಾದೀನವಚ್ಛಾದಿ-ನಮನಕ್ಖಿಪಕೇಹಿ ತು.

೧೬೫. ಅಪ್ಪಹೀನೇಹಿ ಸೇಸಾನಂ, ಛಾದನಂ ನಮನಮ್ಪಿ ಚ;

ಖಿಪಕಾ ಪನ ಸಙ್ಖಾರಾ, ಕುಸಲಾವ ಭವನ್ತಿಹ.

೧೬೬. ಕಿಚ್ಚತ್ತಯೇ ಕತೇ ಏವಂ, ಕಮ್ಮದೀಪಿತಗೋಚರೇ;

ತಜ್ಜಂ ವತ್ಥುಂ ಸಹುಪ್ಪನ್ನಂ, ನಿಸ್ಸಾಯ ವಾ ನ ವಾ ತಹಿಂ.

೧೬೭. ತಜ್ಜಾ ಸನ್ಧಿ ಸಿಯಾ ಹಿತ್ವಾ, ಅನ್ತರತ್ತಂ ಭವನ್ತರೇ;

ಅನ್ತರತ್ತಂ ವಿನಾ ದೂರೇ, ಪಟಿಸನ್ಧಿ ಕಥಂ ಭವೇ.

೧೬೮. ಇಹೇವ ಕಮ್ಮತಣ್ಹಾದಿ-ಹೇತುತೋ ಪುಬ್ಬಚಿತ್ತತೋ;

ಚಿತ್ತಂ ದೂರೇ ಸಿಯಾ ದೀಪ-ಪಟಿಘೋಸಾದಿಕಂ ಯಥಾ.

೧೬೯. ನಾಸಞ್ಞಾ ಚವಮಾನಸ್ಸ, ನಿಮಿತ್ತಂ ನ ಚುತೀ ಚ ಯಂ;

ಉದ್ಧಂ ಸನ್ಧಿನಿಮಿತ್ತಂ ಕಿಂ, ಪಚ್ಚಯೋಪಿ ಕನನ್ತರೋ.

೧೭೦. ಪುಬ್ಬಭವೇ ಚುತಿ ದಾನಿ, ಕಾಮೇ ಜಾಯನಸನ್ಧಿಯಾ;

ಅಞ್ಞಚಿತ್ತನ್ತರಾಭಾವಾ, ಹೋತಾನನ್ತರಕಾರಣಂ.

೧೭೧. ಭವನ್ತರಕತಂ ಕಮ್ಮಂ, ಯಮೋಕಾಸಂ ಲಭೇ ತತೋ;

ಹೋತಿ ಸಾ ಸನ್ಧಿ ತೇನೇವ, ಉಪಟ್ಠಾಪಿತಗೋಚರೇ.

೧೭೨. ಯಸ್ಮಾ ಚಿತ್ತವಿರಾಗತ್ತಂ, ಕಾತುಂ ನಾಸಕ್ಖಿ ಸಬ್ಬಸೋ;

ತಸ್ಮಾ ಸಾನುಸಯಸ್ಸೇವ, ಪುನುಪ್ಪತ್ತಿ ಸಿಯಾ ಭವೇ.

೧೭೩. ಪಞ್ಚದ್ವಾರೇ ಸಿಯಾ ಸನ್ಧಿ, ವಿನಾ ಕಮ್ಮಂ ದ್ವಿಗೋಚರೇ;

ಭವಸನ್ಧಾನತೋ ಸನ್ಧಿ, ಭವಙ್ಗಂ ತಂ ತದಙ್ಗತೋ.

೧೭೪. ತಮೇವನ್ತೇ ಚುತಿ ತಸ್ಮಿಂ, ಗೋಚರೇ ಚವನೇನ ತು;

ಏಕಸನ್ತತಿಯಾ ಏವಂ, ಉಪ್ಪತ್ತಿಟ್ಠಿತಿಭೇದಕಾ.

೧೭೫. ಅಥಞ್ಞಾರಮ್ಮಣಾಪಾಥ-ಗತೇ ಚಿತ್ತನ್ತರಸ್ಸ ಹಿ;

ಹೇತುಸಙ್ಖ್ಯಂ ಭವಙ್ಗಸ್ಸ, ದ್ವಿಕ್ಖತ್ತುಂ ಚಲನಂ ಭವೇ.

೧೭೬. ಘಟ್ಟಿತೇ ಅಞ್ಞವತ್ಥುಮ್ಹಿ, ಅಞ್ಞನಿಸ್ಸಿತಕಮ್ಪನಂ;

ಏಕಾಬದ್ಧೇನ ಹೋತೀತಿ, ಸಕ್ಖರೋಪಮಯಾ ವದೇ.

೧೭೭. ಮನೋಧಾತುಕ್ರಿಯಾವಜ್ಜಂ, ತತೋ ಹೋತಿ ಸಕಿಂ ಭವೇ;

ದಸ್ಸನಾದಿ ಸಕದ್ವಾರ-ಗೋಚರೋ ಗಹಣಂ ತತೋ.

೧೭೮. ಸನ್ತೀರಣಂ ತತೋ ತಮ್ಹಾ, ವೋಟ್ಠಬ್ಬಞ್ಚ ಸಕಿಂ ತತೋ;

ಸತ್ತಕ್ಖತ್ತುಂ ಜವೋ ಕಾಮೇ, ತಮ್ಹಾ ತದನುರೂಪತೋ.

೧೭೯. ತದಾಲಮ್ಬದ್ವಿಕಂ ತಮ್ಹಾ, ಭವಙ್ಗಂತಿಮಹನ್ತರಿ;

ಜವಾ ಮಹನ್ತೇ ವೋಟ್ಠಬ್ಬಾ, ಪರಿತ್ತೇ ನಿತರೇ ಮನಂ.

೧೮೦. ವೋಟ್ಠಬ್ಬಸ್ಸ ಪರಿತ್ತೇ ತು, ದ್ವತ್ತಿಕ್ಖತ್ತುಂ ಜವೋ ವಿಯ;

ವದನ್ತಿ ವುತ್ತಿಂ ತಂ ಪಾಠೇ, ಅನಾಸೇವನತೋ ನ ಹಿ.

೧೮೧. ನಿಯಮೋಪಿಧ ಚಿತ್ತಸ್ಸ, ಕಮ್ಮಾದಿನಿಯಮೋ ವಿಯ;

ಞೇಯ್ಯೋ ಅಮ್ಬೋಪಮಾದೀಹಿ, ದಸ್ಸೇತ್ವಾ ತಂ ಸುದೀಪಯೇ.

೧೮೨. ಮನೋದ್ವಾರೇತರಾವಜ್ಜಂ, ಭವಙ್ಗಮ್ಹಾ ಸಿಯಾ ತತೋ;

ಜವೋಕಾಮೇ ವಿಭೂತೇ ತು, ಕಾಮವ್ಹೇ ವಿಸಯೇ ತತೋ.

೧೮೩. ಕಾಮೀನಂ ತು ತದಾಲಮ್ಬಂ, ಭವಙ್ಗಂ ತು ತತೋ ಸಿಯಾ;

ಅವಿಭೂತೇ ಪರಿತ್ತೇ ಚ, ಭವಙ್ಗಂ ಜವತೋ ಭವೇ.

೧೮೪. ಅವಿಭೂತೇ ವಿಭೂತೇ ಚ, ಪರಿತ್ತೇ ಅಪರಿತ್ತಕೇ;

ಜವಾಯೇವ ಭವಙ್ಗಂ ತು, ಬ್ರಹ್ಮಾನಂ ಚತುಗೋಚರೇ.

೧೮೫. ಮಹಗ್ಗತಂ ಪನಾರಬ್ಭ, ಜವಿತೇ ದೋಸಸಂಯುತೇ;

ವಿರುದ್ಧತ್ತಾ ಭವಙ್ಗಂ ನ, ಕಿಂ ಸಿಯಾ ಸುಖಸನ್ಧಿನೋ.

೧೮೬. ಉಪೇಕ್ಖಾತೀರಣಂ ಹೋತಿ, ಪರಿತ್ತೇನಾವಜ್ಜಂ ಕಥಂ.

ನಿಯಮೋ ನ ವಿನಾವಜ್ಜಂ, ಮಗ್ಗತೋ ಫಲಸಮ್ಭವಾ.