೪. ಚತುತ್ಥೋ ಪರಿಚ್ಛೇದೋ

ವಿಞ್ಞಾಣಕ್ಖನ್ಧಪಕಿಣ್ಣಕನಯಸಙ್ಖೇಪೋ

೧೯೨. ಏಕಧಾದಿನಯೋದಾನಿ, ಪಟುವಡ್ಢಾಯ ಯೋಗಿನಂ;

ವುಚ್ಚತೇ ವಿಸಯಗ್ಗಾಹಾ, ಸಬ್ಬಮೇಕವಿಧಂ ಮನಂ.

೧೯೩. ಏಕಾಸೀತಿ ತಿಭೂಮಟ್ಠಂ, ಲೋಕಿಯಂ ಸುತ್ತರಞ್ಚ ತಂ;

ಸೇಸಂ ಲೋಕುತ್ತರಂ ಅಟ್ಠ, ಅನುತ್ತರಞ್ಚಿತೀ ದ್ವಿಧಾ.

೧೯೪. ಲೋಕಪಾಕಕ್ರಿಯಾಹೇತೂ, ಚೇಕಹೇತೂತಿ ಸತ್ತಹಿ;

ತಿಂಸ ನಾಧಿಪತಿ ಸಾಧಿ-ಪತಿ ಸೇಸಾತಿಪೀ ದ್ವಿಧಾ.

೧೯೫. ಛನ್ದಚಿತ್ತೀಹವೀಮಂಸಾ-ಸ್ವೇಕೇನ ಮತಿಮಾ ಯುತಂ;

ವಿನಾ ವೀಮಂಸಮೇಕೇನ, ಞಾಣಹೀನಮನಂ ಯುತಂ.

೧೯೬. ಪರಿತ್ತಾನಪ್ಪಮಾಣಾನಿ, ಮಹಗ್ಗತಮನಾನಿತಿ;

ತಿಧಾ ಛನವ ಚಟ್ಠ ಚ, ತಿನವಾ ಚ ಯಥಾಕ್ಕಮಂ.

೧೯೭. ದ್ವಿಪಞ್ಚ ಚಿತ್ತಂ ವಿಞ್ಞಾಣಂ, ತಿಸ್ಸೋ ಹಿ ಮನೋಧಾತುಯೋ;

ಛಸತ್ತತಿ ಮನೋಞಾಣ-ಧಾತೂತಿ ತಿವಿಧಾ ಪುನ.

೧೯೮. ಏಕಾರಮ್ಮಣಚಿತ್ತಾನಿ, ಅನಭಿಞ್ಞಂ ಮಹಗ್ಗತಂ;

ಅಮಲಂ ಪಞ್ಚವಿಞ್ಞಾಣಂ, ನವಪಞ್ಚ ಭವನ್ತಿಮೇ.

೧೯೯. ಪಞ್ಚಾಲಮ್ಬಂ ಮನೋಧಾತು, ಸಾಭಿಞ್ಞಂ ಕಾಮಧಾತುಜಂ;

ಸೇಸಂ ಛಾರಮ್ಮಣಂ ತಂ ಹಿ, ತೇಚತ್ತಾಲೀಸ ಸಙ್ಖ್ಯತೋ.

೨೦೦. ಕಾಮಪಾಕದುಸಾ ಚಾದಿ-ಮಗ್ಗೋ ಚಾದಿಕ್ರಿಯಾ ದುವೇ;

ರೂಪಾ ಸಬ್ಬೇತಿರೂಪೇ ನ, ತೇಚತ್ತಾಲೀಸ ಹೋನ್ತಿಮೇ.

೨೦೧. ವಿನಾವ ರೂಪೇನಾರುಪ್ಪ-ವಿಪಾಕಾ ಚತುರೋ ಸಿಯುಂ;

ದ್ವೇಚತ್ತಾಲೀಸ ಸೇಸಾನಿ, ವತ್ತನ್ತುಭಯಥಾಪಿ ಚ.

೨೦೨. ಚತುಧಾಪಿ ಅಹೇತ್ವೇಕದ್ವಿಹೇತುಕತಿಹೇತುತೋ;

ಅಟ್ಠಾರಸ ದ್ವೇ ಬಾವೀಸ, ಸತ್ತಚತ್ತಾಲಿಸಂ ಭವೇ.

೨೦೩. ಕಾಮೇ ಜವಾ ಸವೋಟ್ಠಬ್ಬಾ, ಅಭಿಞ್ಞಾದ್ವಯಮೇವ ಚ;

ರೂಪಿರಿಯಾಪಥವಿಞ್ಞತ್ತಿಕರಾಮೇ ಚತುರಟ್ಠಕಾ.

೨೦೪. ಛಬ್ಬೀಸತಿ ಜವಾ ಸೇಸಾ, ಕರಾ ರೂಪಿರಿಯಾಪಥೇ;

ದ್ವಿಪಞ್ಚಮನವಜ್ಜಾನಿ, ಕಾಮರೂಪಫಲಾನಿ ಚ.

೨೦೫. ಆದಿಕ್ರಿಯಾತಿ ಚೇಕೂನ-ವೀಸ ರೂಪಕರಾ ಇಮೇ;

ಸೇಸಾ ಚುದ್ದಸ ಭಿನ್ನಾವಚುತಿ ಸನ್ಧಿ ನ ತೀಣಿಪಿ.

೨೦೬. ಏಕಕಿಚ್ಚಾದಿತೋ ಪಞ್ಚ-ವಿಧಾ ತತ್ಥೇಕಕಿಚ್ಚಕಾ;

ದ್ವಿಪಞ್ಚಚಿತ್ತಂ ಜವನಂ, ಮನೋಧಾತುಟ್ಠಸಟ್ಠಿಮೇ.

೨೦೭. ದ್ವಿಕಿಚ್ಚಾದೀನಿ ವೋಟ್ಠಬ್ಬಂ, ಸುಖತೀರಂ ಮಹಗ್ಗತೇ;

ಪಾಕಾ ಕಾಮಮಹಾಪಾಕಾ, ಸೇಸಾ ತೀರಾ ಯಥಾಕ್ಕಮಂ.

೨೦೮. ದಸ್ಸನಂ ಸವನಂ ದಿಟ್ಠಂ, ಸುತಂ ಘಾಯನಕಾದಿಕಂ;

ತಯಂ ಮುತಂ ಮನೋಧಾತುತ್ತಯಂ ದಿಟ್ಠಂ ಸುತಂ ಮುತಂ.

೨೦೯. ದಿಟ್ಠಂ ಸುತಂ ಮುತಂ ಞಾತಂ, ಸಾಭಿಞ್ಞಂ ಸೇಸಕಾಮಿಕಂ;

ವಿಞ್ಞಾತಾರಮ್ಮಣಂ ಸೇಸಮೇವಂ ಛಬ್ಬಿಧಮೀರಯೇ.

೨೧೦. ಸತ್ತಧಾ ಸತ್ತವಿಞ್ಞಾಣಧಾತೂನಂ ತು ವಸಾ ಭವೇ;

ವುಚ್ಚತೇದಾನಿ ತಸ್ಸೇವ, ಅನನ್ತರನಯಕ್ಕಮೋ.

೨೧೧. ಪುಞ್ಞೇಸ್ವಾದಿದ್ವಯಾ ಕಾಮೇ, ರೂಪಪುಞ್ಞಮನನ್ತಕಂ;

ತಪ್ಪಾದಕುತ್ತರಾನನ್ತಂ, ಭವಙ್ಗಞ್ಚಾದಿತೀರಣಂ.

೨೧೨. ದುತಿಯನ್ತದ್ವಯಾ ತೀರಂ, ಭವಙ್ಗಂ ತತಿಯದ್ವಯಾ;

ತೇ ಅನನ್ತಾಮಲಂ ಪುಞ್ಞಂ, ಮಜ್ಝತ್ತಞ್ಚ ಮಹಗ್ಗತಂ.

೨೧೩. ಸಬ್ಬವಾರೇ ಸಯಞ್ಚೇತಿ, ತೇಪಞ್ಞಾಸ ತಿಸತ್ತ ಚ;

ತೇತ್ತಿಂಸ ಚ ಭವನ್ತೇತೇ, ರೂಪೇಸು ಪನ ಪುಞ್ಞತೋ.

೨೧೪. ತಪ್ಪಾಕಾ ಚ ಮತಿಯುತ್ತ-ಕಾಮಪಾಕಾ ಸಯಂ ದಸ;

ಆರುಪ್ಪಪುಞ್ಞತೋ ತೇ ಚ, ಸಕೋ ಪಾಕೋ ಸಯಂ ಪುನ.

೨೧೫. ಅಧೋಪಾಕಾ ಚ ಅನ್ತಮ್ಹಾ, ತತಿಯಞ್ಚ ಫಲನ್ತಿಮೇ;

ದಸೇಕದ್ವಿತಿಪಞ್ಚಾಹಿ, ಮಗ್ಗಾ ಚೇಕಂ ಸಕಂ ಫಲಂ.

೨೧೬. ಲೋಭಮೂಲೇಕಹೇತೂಹಿ, ಅನ್ತಕಾಮಸುಭಾ ವಿಯ;

ಸತ್ತ ದೋಸದ್ವಯಾ ಕಾಮ-ಭವಙ್ಗಪೇಕ್ಖವಾ ಸಯಂ.

೨೧೭. ಮಹಾಪಾಕತಿಹೇತೂಹಿ, ಸಾವಜ್ಜಾ ಸಬ್ಬಸನ್ಧಿಯೋ;

ಕಾಮಚ್ಚುತೀಹಿ ಸೇಸಾಹಿ, ಸಾವಜ್ಜಾ ಕಾಮಸನ್ಧಿಯೋ.

೨೧೮. ಕಾಮಚ್ಚುತಿ ಚ ವೋಟ್ಠಬ್ಬಂ, ಸಯಞ್ಚ ಸುಖತೀರತೋ;

ಪಟಿಚ್ಛಾ ತೀರಣಾನಿ ದ್ವೇ, ಇತರಾ ಸಕತೀರಣಂ.

೨೧೯. ಸಕಂ ಸಕಂ ಪಟಿಚ್ಛಂ ತು, ವಿಞ್ಞಾಣೇಹಿ ದ್ವಿಪಞ್ಚಹಿ;

ರೂಪಪಾಕೇಹಿ ಸಾವಜ್ಜಾ, ಸನ್ಧಿಯೋಹೇತುವಜ್ಜಿತಾ.

೨೨೦. ಅರೂಪಪಾಕೇಸ್ವಾದಿಮ್ಹಾ, ಕಾಮಪಾಕಾ ತಿಹೇತುಕಾ;

ಅನ್ತಾವಜ್ಜಮ್ಪಿ ಚಾರುಪ್ಪ-ಪಾಕಾ ಚ ನವ ಹೋನ್ತಿಮೇ.

೨೨೧. ದುತಿಯಾದೀಹಿ ತೇಯೇವ, ಅಧೋಪಾಕಂ ವಿನಾ ವಿನಾ;

ಫಲಾ ತಿಹೇತುಕಾ ಪಾಕಾ, ಸಯಞ್ಚೇತಿ ಚತುದ್ದಸ.

೨೨೨. ದ್ವಿಪಞ್ಚಾದಿಕ್ರಿಯಾ ಹಾಸಾ, ಸಯಞ್ಚಾರುಪ್ಪವಜ್ಜಿತಾ;

ಞಾಣಯುತ್ತಭವಙ್ಗಾತಿ, ದಸ ವೋಟ್ಠಬ್ಬತೋ ಪನ.

೨೨೩. ಕಾಮೇ ಜವಾ ಭವಙ್ಗಾ ಚ, ಕಾಮರೂಪೇ ಸಯಮ್ಪಿ ವಾ;

ನವಪಞ್ಚ ಸಹೇತಾದಿ-ಕಿರಿಯದ್ವಯತೋ ಪನ.

೨೨೪. ಸಯಂ ಭವಙ್ಗಮತಿಮಾ, ರೂಪೇ ಸಾತಕ್ರಿಯಾಪಿ ಚ;

ತಪ್ಪಾದಕನ್ತಿಮಞ್ಚೇತಿ, ಬಾವೀಸ ತತಿಯಾ ಪನ.

೨೨೫. ತೇ ಚ ಪಾಕಾ ಸಯಞ್ಚನ್ತೇ, ಫಲಂ ಮಜ್ಝಾ ಮಹಗ್ಗತಾ;

ಕ್ರಿಯಾತಿ ವೀಸತಿ ಹೋನ್ತಿ, ಸೇಸದ್ವೀಹಿ ದುಕೇಹಿ ತು.

೨೨೬. ವುತ್ತಪಾಕಾ ಸಯಞ್ಚೇತಿ, ಚುದ್ದಸೇವಂ ಕ್ರಿಯಾಜವಾ;

ತದಾರಮ್ಮಣಂ ಮುಞ್ಚಿತ್ವಾ, ಪಟ್ಠಾನನಯತೋ ನಯೇ.

೨೨೭. ಅಥ ಸಾತಕ್ರಿಯಾ ಸಾತಂ, ಸೇಸಂ ಸೇಸಕ್ರಿಯಾಪಿ ಚ;

ತದಾಲಮ್ಬಂ ಯಥಾಯೋಗಂ, ವದೇ ಅಟ್ಠಕಥಾನಯಾ.

೨೨೮. ಮಹಗ್ಗತಾ ಕ್ರಿಯಾ ಸಬ್ಬಾ, ಸಕಪುಞ್ಞಸಮಾ ತಹಿಂ;

ಅನ್ತಾ ಫಲನ್ತಿಮಂ ಹೋತಿ, ಅಯಮೇವ ವಿಸೇಸತಾ.

೨೨೯. ಇಮಸ್ಸಾನನ್ತರಾ ಧಮ್ಮಾ, ಏತ್ತಕಾತಿ ಪಕಾಸಿತಾ;

ಇಮಂ ಪನೇತ್ತಕೇಹೀತಿ, ವುಚ್ಚತೇಯಂ ನಯೋಧುನಾ.

೨೩೦. ದ್ವೀಹಿ ಕಾಮಜವಾ ತೀಹಿ, ರೂಪಾರೂಪಾ ಚತೂಹಿ ತು;

ಮಗ್ಗಾ ಛಹಿ ಫಲಾದಿ ದ್ವೇ, ಸೇಸಾ ದ್ವೇ ಪನ ಸತ್ತಹಿ.

೨೩೧. ಏಕಮ್ಹಾ ದಸ ಪಞ್ಚಹಿ, ಪಟಿಚ್ಛಾ ಸುಖತೀರಣಂ;

ಕಾಮೇ ದೋಸಕ್ರಿಯಾಹೀನ-ಜವೇಹಿ ಗಹತೋ ಸಕಾ.

೨೩೨. ಕಾಮೇ ಜವಾ ಕ್ರಿಯಾಹೀನಾ, ತದಾಲಮ್ಬಾ ಸವೋಟ್ಠಬ್ಬಾ;

ಸಗಹಞ್ಚೇತಿ ತೇತ್ತಿಂಸಚಿತ್ತೇಹಿ ಪರತೀರಣಾ.

೨೩೩. ಕಾಮಪುಞ್ಞಸುಖೀತೀರಕಣ್ಹವೋಟ್ಠಬ್ಬತೋ ದ್ವಯಂ;

ಮಹಾಪಾಕನ್ತಿಮಂ ಹೋತಿ, ಅನಾರುಪ್ಪಚುತೀಹಿ ಚ.

೨೩೪. ಸತ್ತತಿಂಸ ಪನೇತಾನಿ, ಏತ್ಥ ಹಿತ್ವಾ ದುಸದ್ವಯಂ;

ಏತೇಹಿ ಪಞ್ಚತಿಂಸೇಹಿ, ಜಾಯತೇ ದುತಿಯದ್ವಯಂ.

೨೩೫. ಸುಖತೀರಾದಿ ಸತ್ತೇತೇ, ಕ್ರಿಯತೋ ಚಾಪಿ ಸಮ್ಭವಾ;

ಞೇಯ್ಯಾ ಸೇಸಾನಿ ಚತ್ತಾರಿ, ಭವಙ್ಗೇನ ಚ ಲಬ್ಭರೇ.

೨೩೬. ಮಗ್ಗವಜ್ಜಾ ಸವೋಟ್ಠಬ್ಬಸುಖಿತೀರಜವಾಖಿಲಾ;

ಚುತೀತಿ ನವಕಟ್ಠಾಹಿ, ತತಿಯದ್ವಯಮಾದಿಸೇ.

೨೩೭. ಏತೇಹಿ ದೋಸವಜ್ಜೇಹಿ, ಸತ್ತತೀಹಿತರದ್ವಯಂ;

ರೂಪಪಾಕಾ ವಿನಾರುಪ್ಪಪಾಕಾಹೇತುದುಹೇತುಕೇ.

೨೩೮. ತೇಹೇವೇಕೂನಸಟ್ಠೀಹಿ, ಹೋನ್ತಿರುಪ್ಪಾದಿಕಂ ವಿನಾ;

ಹಾಸಾವಜ್ಜೇ ಜವೇ ರೂಪೇ, ಅಟ್ಠಛಕ್ಕೇಹಿ ತೇಹಿ ತು.

೨೩೯. ಸಾಧೋಪಾಕೇಹಿ ತೇಹೇವ, ದುತಿಯಾದೀನಿ ಅತ್ತನಾ;

ಅಧೋಧೋಜವಹೀನೇಹಿ, ಏಕೇಕೂನೇಹಿ ಜಾಯರೇ.

೨೪೦. ಸುಖತೀರಭವಙ್ಗಾನಿ, ಸಯಞ್ಚಾತಿ ತಿಸತ್ತಹಿ;

ಅನ್ತಾವಜ್ಜಂ ಅನಾರುಪ್ಪಭವಙ್ಗೇಹಿ ಪನೇತರಂ.

೨೪೧. ವುತ್ತಾನನ್ತರಸಙ್ಖಾತೋ, ನಯೋ ದಾನಿ ಅನೇಕಧಾ;

ಪುಗ್ಗಲಾದಿಪ್ಪಭೇದಾಪಿ, ಪವತ್ತಿ ತಸ್ಸ ವುಚ್ಚತೇ.

೨೪೨. ಪುಥುಜ್ಜನಸ್ಸ ಜಾಯನ್ತೇ, ದಿಟ್ಠಿಕಙ್ಖಾಯುತಾನಿ ವೇ;

ಸೇಕ್ಖಸ್ಸೇವಾಮಲಾ ಸತ್ತ, ಅನನ್ತಾನಿತರಸ್ಸ ತು.

೨೪೩. ಅನ್ತಾಮಲಂ ಅನಾವಜ್ಜಕ್ರಿಯಾ ಚೇಕೂನವೀಸತಿ;

ಕುಸಲಾಕುಸಲಾ ಸೇಸಾ, ಹೋನ್ತಿ ಸೇಕ್ಖಪುಥುಜ್ಜನೇ.

೨೪೪. ಇತರಾನಿ ಪನಾವಜ್ಜದ್ವಯಂ ಪಾಕಾ ಚ ಸಾಸವಾ;

ತಿಣ್ಣನ್ನಮ್ಪಿ ಸಿಯುಂ ಏವಂ, ಪಞ್ಚಧಾ ಸತ್ತಭೇದತೋ.

೨೪೫. ಕಾಮೇ ಸೋಳಸ ಘಾನಾದಿತ್ತಯಂ ದೋಸಮಹಾಫಲಾ;

ರೂಪಾರೂಪೇ ಸಪಾಕೋತಿ, ಪಞ್ಚವೀಸತಿ ಏಕಜಾ.

೨೪೬. ಕಾಮಪಾಕಾ ಚ ಸೇಸಾದಿಮಗ್ಗೋ ಆದಿಕ್ರಿಯಾ ದುವೇ;

ರೂಪೇ ಜವಾತಿ ಬಾವೀಸ, ದ್ವಿಜಾ ಸೇಸಾ ತಿಧಾತುಜಾ.

೨೪೭. ವಿತ್ಥಾರೋಪಿ ಚ ಭೂಮೀಸು, ಞೇಯ್ಯೋ ಕಾಮಸುಭಾಸುಭಂ;

ಹಾಸವಜ್ಜಮಹೇತುಞ್ಚ, ಅಪಾಯೇ ಸತ್ತತಿಂಸಿಮೇ.

೨೪೮. ಹಿತ್ವಾ ಮಹಗ್ಗತೇ ಪಾಕೇ, ಅಸೀತಿ ಸೇಸಕಾಮಿಸು;

ಚಕ್ಖುಸೋತಮನೋಧಾತು, ತೀರಣಂ ವೋಟ್ಠಬ್ಬಮ್ಪಿ ಚ.

೨೪೯. ದೋಸಹೀನಜವಾ ಸೋ ಸೋ, ಪಾಕೋ ರೂಪೇ ಅನಾರಿಯೇ;

ಪಞ್ಚಸಟ್ಠಿ ಛಸಟ್ಠೀ ತು, ಪರಿತ್ತಾಭಾದೀಸು ತೀಸು.

೨೫೦. ಆದಿಪಞ್ಚಾಮಲಾ ಕಙ್ಖಾದಿಟ್ಠಿಯುತ್ತೇ ವಿನಾ ತಹಿಂ;

ತೇಯೇವ ಪಞ್ಚಪಞ್ಞಾಸ, ಜಾಯರೇ ಸುದ್ಧಭೂಮಿಸು.

೨೫೧. ಆದಿಮಗ್ಗದುಸಾಹಾಸರೂಪಹೀನಜವಾ ಸಕೋ;

ಪಾಕೋ ವೋಟ್ಠಬ್ಬನಞ್ಚಾತಿ, ತಿತಾಲೀಸಂ ಸಿಯುಂ ನಭೇ.

೨೫೨. ಅಧೋಧೋಮನವಜ್ಜಾ ತೇ,

ಪಾಕೋ ಚೇವ ಸಕೋ ಸಕೋ;

ದುತಿಯಾದೀಸು ಜಾಯನ್ತೇ,

ದ್ವೇ ದ್ವೇ ಊನಾ ತತೋ ತತೋ.

೨೫೩. ಅರೂಪೇಸ್ವೇಕಮೇಕಸ್ಮಿಂ, ರೂಪೇಸ್ವಾದಿತ್ತಿಕೇಪಿ ಚ;

ತಿಕೇ ಚ ತತಿಯೇ ಏಕಂ, ದ್ವೇ ಹೋನ್ತಿ ದುತಿಯತ್ತಿಕೇ.

೨೫೪. ಅನ್ತಿಮಂ ರೂಪಪಾಕಂ ತು, ಛಸು ವೇಹಪ್ಫಲಾದಿಸು;

ಕಾಮಸುಗತಿಯಂಯೇವ, ಮಹಾಪಾಕಾ ಪವತ್ತರೇ.

೨೫೫. ಘಾಯನಾದಿತ್ತಯಂ ಕಾಮೇ, ಪಟಿಘದ್ವಯಮೇವ ಚ;

ಸತ್ತರಸೇಸು ಪಠಮಂ, ಅಮಲಂ ಮಾನವಾದಿಸು.

೨೫೬. ಅರಿಯಾಪಾಯವಜ್ಜೇಸು, ಚತುರೋದಿಪ್ಫಲಾದಿಕಾ;

ಅಪಾಯಾರುಪ್ಪವಜ್ಜೇಸು, ಹಾಸರೂಪಸುಭಕ್ರಿಯಂ.

೨೫೭. ಅಪಾಯುದ್ಧತ್ತಯಂ ಹಿತ್ವಾ, ಹೋತಾಕಾಸಸುಭಕ್ರಿಯಂ;

ತಥಾಪಾಯುದ್ಧದ್ವೇ ಹಿತ್ವಾ, ವಿಞ್ಞಾಣಕುಸಲಕ್ರಿಯಂ.

೨೫೮. ಭವಗ್ಗಾಪಾಯವಜ್ಜೇಸು, ಆಕಿಞ್ಚಞ್ಞಸುಭಕ್ರಿಯಂ;

ದಿಟ್ಠಿಕಙ್ಖಾಯುತಾ ಸುದ್ಧೇ, ವಿನಾ ಸಬ್ಬಾಸು ಭೂಮಿಸು.

೨೫೯. ಅಮಲಾನಿ ಚ ತೀಣನ್ತೇ,

ಭವಗ್ಗೇ ಚ ಸುಭಕ್ರಿಯಾ;

ಮಹಾಕ್ರಿಯಾ ಚ ಹೋನ್ತೇತೇ,

ತೇರಸೇವಾನಪಾಯಿಸು.

೨೬೦. ಅನಾರುಪ್ಪೇ ಮನೋಧಾತು, ದಸ್ಸನಂ ಸವತೀರಣಂ;

ಕಾಮೇ ಅನಿಟ್ಠಸಂಯೋಗೇ, ಬ್ರಹ್ಮಾನಂ ಪಾಪಜಂ ಫಲಂ.

೨೬೧. ವೋಟ್ಠಬ್ಬಂ ಕಾಮಪುಞ್ಞಞ್ಚ, ದಿಟ್ಠಿಹೀನಂ ಸಉದ್ಧವಂ;

ಚುದ್ದಸೇತಾನಿ ಚಿತ್ತಾನಿ, ಜಾಯರೇ ತಿಂಸಭೂಮಿಸು.

೨೬೨. ಇನ್ದ್ರಿಯಾನಿ ದುವೇ ಅನ್ತದ್ವಯವಜ್ಜೇಸ್ವಹೇತುಸು;

ತೀಣಿ ಕಙ್ಖೇತರಾಹೇತುಪಾಪೇ ಚತ್ತಾರಿ ತೇರಸ.

೨೬೩. ಛ ಞಾಣಹೀನೇ ತಬ್ಬನ್ತಸಾಸವೇ ಸತ್ತ ನಿಮ್ಮಲೇ;

ಚತ್ತಾಲೀಸೇ ಪನಟ್ಠೇವಂ, ಞೇಯ್ಯಮಿನ್ದ್ರಿಯಭೇದತೋ.