೫. ಪಞ್ಚಮೋ ಪರಿಚ್ಛೇದೋ

ನಿಬ್ಬಾನಪಞ್ಞತ್ತಿಪರಿದೀಪನೋ

೩೦೪. ರಾಗಾದೀನಂ ಖಯಂ ವುತ್ತಂ, ನಿಬ್ಬಾನಂ ಸನ್ತಿಲಕ್ಖಣಂ;

ಸಂಸಾರದುಕ್ಖಸನ್ತಾಪತತ್ತಸ್ಸಾಲಂ ಸಮೇತವೇ.

೩೦೫. ಖಯಮತ್ತಂ ನ ನಿಬ್ಬಾನಂ, ಸಗಮ್ಭೀರಾದಿವಾಚತೋ;

ಅಭಾವಸ್ಸ ಹಿ ಕುಮ್ಮಾನಂ, ಲೋಮಸ್ಸೇವ ನ ವಾಚತಾ.

೩೦೬. ಖಯೋತಿ ವುಚ್ಚತೇ ಮಗ್ಗೋ, ತಪ್ಪಾಪತ್ತಾ ಇದಂ ಖಯಂ;

ಅರಹತ್ತಂ ವಿಯುಪ್ಪಾದ-ವಯಾಭಾವಾ ಧುವಞ್ಚ ತಂ.

೩೦೭. ಸಙ್ಖತಂ ಸಮ್ಮುತಿಞ್ಚಾಪಿ, ಞಾಣಮಾಲಮ್ಬ ನೇವ ಹಿ;

ಛಿನ್ದೇ ಮಲೇ ತತೋ ವತ್ಥು, ಇಚ್ಛಿತಬ್ಬಮಸಙ್ಖತಂ.

೩೦೮. ಪತ್ತುಕಾಮೇನ ತಂ ಸನ್ತಿಂ, ಛಬ್ಬಿಸುದ್ಧಿಂ ಸಮಾದಿಯ;

ಞಾಣದಸ್ಸನಸುದ್ಧೀ ತು, ಸಾಧೇತಬ್ಬಾ ಹಿತತ್ಥಿನಾ.

೩೦೯. ಚೇತನಾದಿವಿಧಾ ಸೀಲ-ಸುದ್ಧಿ ತತ್ಥ ಚತುಬ್ಬಿಧಾ;

ಸೋಪಚಾರಸಮಾಧೀ ತು, ಚಿತ್ತಸುದ್ಧೀತಿ ವುಚ್ಚತೇ.

೩೧೦. ಸಮ್ಪಾದೇತ್ವಾದಿದ್ವೇಸುದ್ಧಿಂ, ನಮನಾ ನಾಮಂ ತು ರುಪ್ಪ-

ತೋ ರೂಪಂ ನತ್ಥಿ ಅತ್ತಾದಿವತ್ಥೂತಿ ಚ ವವತ್ಥಪೇ.

೩೧೧. ಮಣಿನ್ಧನಾತಪೇ ಅಗ್ಗಿ, ಅಸನ್ತೋಪಿ ಸಮಾಗಮೇ;

ಯಥಾ ಹೋತಿ ತಥಾ ಚಿತ್ತಂ, ವತ್ಥಾಲಮ್ಬಾದಿಸಙ್ಗಮೇ.

೩೧೨. ಪಙ್ಗುಲನ್ಧಾ ಯಥಾ ಗನ್ತುಂ, ಪಚ್ಚೇಕಮಸಮತ್ಥಕಾ;

ಯನ್ತಿ ಯುತ್ತಾ ಯಥಾ ಏವಂ, ನಾಮರೂಪವ್ಹಯಾ ಕ್ರಿಯಾ.

೩೧೩. ನ ನಾಮರೂಪತೋ ಅಞ್ಞೋ, ಅತ್ತಾದಿ ಇತಿ ದಸ್ಸನಂ;

ಸೋಧನತ್ತಾ ಹಿ ದುದ್ದಿಟ್ಠಿಂ, ದಿಟ್ಠಿಸುದ್ಧೀತಿ ವುಚ್ಚತಿ.

೩೧೪. ಅವಿಜ್ಜಾತಣ್ಹುಪಾದಾನ-ಕಮ್ಮೇನಾದಿಮ್ಹಿ ತಂ ದ್ವಯಂ;

ರೂಪಂ ಕಮ್ಮಾದಿತೋ ನಾಮಂ, ವತ್ಥಾದೀಹಿ ಪವತ್ತಿಯಂ.

೩೧೫. ಸದಾ ಸಬ್ಬತ್ಥ ಸಬ್ಬೇಸಂ, ಸದಿಸಂ ನ ಯತೋ ತತೋ;

ನಾಹೇತುನಾಞ್ಞೋ ಅತ್ತಾದಿನಿಚ್ಚಹೇತೂತಿ ಪಸ್ಸತಿ.

೩೧೬. ಏವಂ ತೀರಯತೇ ಕಙ್ಖಾ, ಯಾಯ ಪಞ್ಞಾಯ ಪಚ್ಚಯೇ;

ದಿಟ್ಠತ್ತಾ ಸುದ್ಧಿ ಸಾ ಕಙ್ಖಾತರಣಂ ಇತಿ ವುಚ್ಚತಿ.

೩೧೭. ಪತ್ತಞ್ಞಾತಪರಿಞ್ಞೋ ಸೋ, ಅತ್ರಟ್ಠೋ ಯತತೇಯತಿ;

ತೀರಣವ್ಹಪರಿಞ್ಞಾಯ, ವಿಸುದ್ಧತ್ಥಂ ಸದಾದರೋ.

೩೧೮. ತಿಕಾಲಾದಿವಸಾ ಖನ್ಧೇ, ಸಮಾಸೇತ್ವಾ ಕಲಾಪತೋ;

ಅನಿಚ್ಚಾ ದುಕ್ಖಾನತ್ತಾತಿ, ಆದೋ ಏವಂ ವಿಪಸ್ಸತಿ.

೩೧೯. ಖನ್ಧಾನಿಚ್ಚಾ ಖಯಟ್ಠೇನ, ಭಯಟ್ಠೇನ ದುಖಾವ ತೇ;

ಅನತ್ತಾಸಾರಕಟ್ಠೇನ, ಇತಿ ಪಸ್ಸೇ ಪುನಪ್ಪುನಂ.

೩೨೦. ಆಕಾರೇಹಿ ಅನಿಚ್ಚಾದಿಚತ್ತಾಲೀಸೇಹಿ ಸಮ್ಮಸೇ;

ಲಕ್ಖಣಾನಂ ವಿಭೂತತ್ಥಂ, ಖನ್ಧಾನಂ ಪನ ಸಬ್ಬಸೋ.

೩೨೧. ಏವಞ್ಚಾಪಿ ಅಸಿಜ್ಝನ್ತೇ, ನವಧಾ ನಿಸಿತಿನ್ದ್ರಿಯೋ;

ಸತ್ತಕದ್ವಯತೋ ಸಮ್ಮಾ, ರೂಪಾರೂಪೇ ವಿಪಸ್ಸಯೇ.

೩೨೨. ರೂಪಮಾದಾನನಿಕ್ಖೇಪಾ, ವಯೋವುದ್ಧತ್ತಗಾಮಿತೋ;

ಸಮ್ಮಸೇವನ್ನಜಾದೀಹಿ, ಧಮ್ಮತಾರೂಪತೋಪಿ ಚ.

೩೨೩. ನಾಮಂ ಕಲಾಪಯಮತೋ, ಖಣತೋ ಕಮತೋಪಿ ಚ;

ದಿಟ್ಠಿಮಾನನಿಕನ್ತೀನಂ, ಪಸ್ಸೇ ಉಗ್ಘಾಟನಾದಿತೋ.

೩೨೪. ಅವಿಜ್ಜಾತಣ್ಹಾಕಮ್ಮನ್ನ-ಹೇತುತೋ ರೂಪಂ ಉಬ್ಭವೇ;

ವಿನಾಹಾರಂ ಸಫಸ್ಸೇಹಿ, ವೇದನಾದಿತ್ತಯಂ ಭವೇ.

೩೨೫. ತೇಹಿಯೇವ ವಿನಾ ಫಸ್ಸಂ,

ನಾಮರೂಪಾಧಿಕೇಹಿ ತು;

ಚಿತ್ತಂ ಹೇತುಕ್ಖಯಾ ಸೋ ಸೋ,

ವೇತಿ ವೇ ತಸ್ಸ ತಸ್ಸ ತು.

೩೨೬. ಹೇತುತೋದಯನಾಸೇವಂ, ಖಣೋದಯವಯೇನಪಿ;

ಇತಿ ಪಞ್ಞಾಸಾಕಾರೇಹಿ, ಪಸ್ಸೇ ಪುನೂದಯಬ್ಬಯಂ.

೩೨೭. ಯೋಗಿಸ್ಸೇವಂ ಸಮಾರದ್ಧಉದಯಬ್ಬಯದಸ್ಸಿನೋ;

ಪಾತುಭೋನ್ತಿ ಉಪಕ್ಲೇಸಾ, ಸಭಾವಾ ಹೇತುತೋಪಿ ಚ.

೩೨೮. ತೇ ಓಭಾಸಮತುಸ್ಸಾಹಪಸ್ಸದ್ಧಿಸುಖುಪೇಕ್ಖನಾ;

ಸತಿ ಪೀತಾಧಿಮೋಕ್ಖೋ ಚ, ನಿಕನ್ತಿ ಚ ದಸೀರಿತಾ.

೩೨೯. ತಣ್ಹಾದಿಟ್ಠುನ್ನತಿಗ್ಗಾಹವತ್ಥುತೋ ತಿಂಸಧಾ ತೇ ಚ;

ತದುಪ್ಪನ್ನೇ ಚಲೇ ಬಾಲೋ, ಅಮಗ್ಗೇ ಮಗ್ಗದಸ್ಸಕೋ.

೩೩೦. ವಿಪಸ್ಸನಾ ಪಥೋಕ್ಕನ್ತಾ, ತದಾಸಿ ಮತಿಮಾಧುನಾ;

ನ ಮಗ್ಗೋ ಗಾಹವತ್ಥುತ್ತಾ, ತೇಸಂ ಇತಿ ವಿಪಸ್ಸತಿ.

೩೩೧. ಉಪಕ್ಲೇಸೇ ಅನಿಚ್ಚಾದಿ-ವಸಗೇ ಸೋದಯಬ್ಬಯೇ;

ಪಸ್ಸತೋ ವೀಥಿನೋಕ್ಕನ್ತದಸ್ಸನಂ ವುಚ್ಚತೇ ಪಥೋ.

೩೩೨. ಮಗ್ಗಾಮಗ್ಗೇ ವವತ್ಥೇತ್ವಾ, ಯಾ ಪಞ್ಞಾ ಏವಮುಟ್ಠಿತಾ;

ಮಗ್ಗಾಮಗ್ಗಿಕ್ಖಸಙ್ಖಾತಾ, ಸುದ್ಧಿ ಸಾ ಪಞ್ಚಮೀ ಭವೇ.

೩೩೩. ಪಹಾನವ್ಹಪರಿಞ್ಞಾಯ, ಆದಿತೋ ಸುದ್ಧಿಸಿದ್ಧಿಯಾ;

ತೀರಣವ್ಹಪರಿಞ್ಞಾಯ, ಅನ್ತಗೋ ಯತತೇಧುನಾ.

೩೩೪. ಜಾಯತೇ ನವಞಾಣೀ ಸಾ, ವಿಸುದ್ಧಿ ಕಮತೋದಯ-

ಬ್ಬಯಾದೀ ಘಟಮಾನಸ್ಸ, ನವ ಹೋನ್ತಿ ಪನೇತ್ಥ ಹಿ.

೩೩೫. ಸನ್ತತೀರಿಯತೋ ಚೇವ, ಘನೇನಾಪಿ ಚ ಛನ್ನತೋ;

ಲಕ್ಖಣಾನಿ ನ ಖಾಯನ್ತೇ, ಸಂಕಿಲಿಟ್ಠಾ ವಿಪಸ್ಸನಾ.

೩೩೬. ತತೋತ್ರ ಸಮ್ಮಸೇ ಭಿಯ್ಯೋ, ಪುನದೇವುದಯಬ್ಬಯಂ;

ತೇನಾನಿಚ್ಚಾದಿಸಮ್ಪಸ್ಸಂ, ಪಟುತಂ ಪರಮಂ ವಜೇ.

೩೩೭. ಆವಟ್ಟೇತ್ವಾ ಯದುಪ್ಪಾದಟ್ಠಿತಿಆದೀಹಿ ಪಸ್ಸತೋ;

ಭಙ್ಗೇವ ತಿಟ್ಠತೇ ಞಾಣಂ, ತದಾ ಭಙ್ಗಮತೀ ಸಿಯಾ.

೩೩೮. ಏವಂ ಪಸ್ಸಯತೋ ಭಙ್ಗಂ, ತಿಭವೋ ಖಾಯತೇ ಯದಾ;

ಸೀಹಾದಿವ ಭಯಂ ಹುತ್ವಾ, ಸಿಯಾ ಲದ್ಧಾ ಭಯಿಕ್ಖಣಾ.

೩೩೯. ಸಾದೀನವಾ ಪತಿಟ್ಠನ್ತೇ, ಖನ್ಧಾದಿತ್ತಘರಂ ವಿಯ;

ಯದಾ ತದಾ ಸಿಯಾ ಲದ್ಧಾ, ಆದೀನವಾನುಪಸ್ಸನಾ.

೩೪೦. ಸಙ್ಖಾರಾದೀನವಂ ದಿಸ್ವಾ, ರಮತೇ ನ ಭವಾದಿಸು;

ಮತಿ ಯದಾ ತದಾ ಲದ್ಧಾ, ಸಿಯಾ ನಿಬ್ಬಿದಪಸ್ಸನಾ.

೩೪೧. ಞಾಣಂ ಮುಚ್ಚಿತುಕಾಮಂ ತೇ, ಸಬ್ಬಭೂಸಙ್ಖತೇ ಯದಾ;

ಜಾಲಾದೀಹಿ ಚ ಮಚ್ಛಾದೀ, ತದಾ ಲದ್ಧಾ ಚಜ್ಜಮತಿ.

೩೪೨. ಸಙ್ಖಾರೇ ಅಸುಭಾನಿಚ್ಚದುಕ್ಖತೋನತ್ತತೋ ಮತಿ;

ಪಸ್ಸನ್ತೀ ಚತ್ತುಮುಸ್ಸುಕ್ಕಾ, ಪಟಿಸಙ್ಖಾನುಪಸ್ಸನಾ.

೩೪೩. ವುತ್ತಾತ್ರ ಪಟುಭಾವಾಯ, ಸಬ್ಬಞಾಣಪವತ್ತಿಯಾ;

ಮೀನಸಞ್ಞಾಯ ಸಪ್ಪಸ್ಸ, ಗಾಹಲುದ್ದಸಮೋಪಮಾ.

೩೪೪. ಅತ್ತತ್ತನಿಯತೋ ಸುಞ್ಞಂ, ದ್ವಿಧಾ ‘‘ನಾಹಂ ಕ್ವಚಾ’’ದಿನಾ;

ಚತುಧಾ ಛಬ್ಬಿಧಾ ಚಾಪಿ, ಬಹುಧಾ ಪಸ್ಸತೋ ಭುಸಂ.

೩೪೫. ಆವಟ್ಟತಿಗ್ಗಿಮಾಸಜ್ಜ,

ನ್ಹಾರೂವ ಮತಿ ಸಙ್ಖತಂ;

ಚತ್ತಭರಿಯೋ ಯಥಾ ದೋಸೇ,

ತಥಾ ತಂ ಸಮುಪೇಕ್ಖತೇ.

೩೪೬. ತಾವ ಸಾದೀನವಾನಮ್ಪಿ, ಲಕ್ಖಣೇ ತಿಟ್ಠತೇ ಮತಿ;

ನ ಪಸ್ಸೇ ಯಾವ ಸಾ ತೀರಂ, ಸಾಮುದ್ದಸಕುಣೀ ಯಥಾ.

೩೪೭. ಸಙ್ಖಾರುಪೇಕ್ಖಾಞಾಣಾಯಂ, ಸಿಖಾಪತ್ತಾ ವಿಪಸ್ಸನಾ;

ವುಟ್ಠಾನಗಾಮಿನೀತಿ ಚ, ಸಾನುಲೋಮಾತಿ ವುಚ್ಚತಿ.

೩೪೮. ಪತ್ವಾ ಮೋಕ್ಖಮುಖಂ ಸತ್ತ, ಸಾಧೇತಿರಿಯಪುಗ್ಗಲೇ;

ಝಾನಙ್ಗಾದಿಪ್ಪಭೇದೇ ಚ, ಪಾದಕಾದಿವಸೇನ ಸಾ.

೩೪೯. ಅನಿಚ್ಚತೋ ಹಿ ವುಟ್ಠಾನಂ, ಯದಿ ಯಸ್ಸಾಸಿ ಯೋಗಿನೋ;

ಸೋಧಿಮೋಕ್ಖಸ್ಸ ಬಾಹುಲ್ಲಾ, ತಿಕ್ಖಸದ್ಧಿನ್ದ್ರಿಯೋ ಭವೇ.

೩೫೦. ದುಕ್ಖತೋನತ್ತತೋ ತಞ್ಚೇ, ಸಿಯಾ ಹೋನ್ತಿ ಕಮೇನ ತೇ;

ಪಸ್ಸದ್ಧಿವೇದಬಾಹುಲ್ಲಾ, ತಿಕ್ಖೇಕಗ್ಗಮತಿನ್ದ್ರಿಯಾ.

೩೫೧. ಪಞ್ಞಾಧುರತ್ತಮುದ್ದಿಟ್ಠಂ, ವುಟ್ಠಾನಂ ಯದಿನತ್ತತೋ;

ಸದ್ಧಾಧುರತ್ತಂ ಸೇಸೇಹಿ, ತಂ ವಿಯಾಭಿನಿವೇಸತೋ.

೩೫೨. ದ್ವೇ ತಿಕ್ಖಸದ್ಧಸಮಥಾ, ಸಿಯುಂ ಸದ್ಧಾನುಸಾರಿನೋ;

ಆದೋ ಮಜ್ಝೇಸು ಠಾನೇಸು, ಛಸು ಸದ್ಧಾವಿಮುತ್ತಕಾ.

೩೫೩. ಇತರೋ ಧಮ್ಮಾನುಸಾರೀದೋ, ದಿಟ್ಠಿಪ್ಪತ್ತೋ ಅನನ್ತಕೇ;

ಪಞ್ಞಾಮುತ್ತೋಭಯತ್ಥನ್ತೇ, ಅಝಾನಿಝಾನಿಕಾ ಚ ತೇ.

೩೫೪. ತಿಕ್ಖಸದ್ಧಸ್ಸ ಚನ್ತೇಪಿ, ಸದ್ಧಾಮುತ್ತತ್ತಮೀರಿತಂ;

ವಿಸುದ್ಧಿಮಗ್ಗೇ ಮಜ್ಝಸ್ಸ, ಕಾಯಸಕ್ಖಿತ್ತಮಟ್ಠಸು.

೩೫೫. ವುತ್ತಂ ಮೋಕ್ಖಕಥಾಯಂ ಯಂ, ತಿಕ್ಖಪಞ್ಞಾರಹಸ್ಸ ತು;

ದಿಟ್ಠಿಪತ್ತತ್ತಂ ಹೇತಞ್ಚ, ತಞ್ಚ ನತ್ಥಾಭಿಧಮ್ಮಿಕೇ.

೩೫೬. ತೇ ಸಬ್ಬೇ ಅಟ್ಠಮೋಕ್ಖಾನಂ, ಲಾಭೀ ಚೇ ಛಸು ಮಜ್ಝಸು;

ಕಾಯಸಕ್ಖೀ ಸಿಯುಂ ಅನ್ತೇ, ಉಭತೋಭಾಗಮುತ್ತಕಾ.

೩೫೭. ಅನುಲೋಮಾನಿ ಚತ್ತಾರಿ, ತೀಣಿ ದ್ವೇ ವಾ ಭವನ್ತಿ ಹಿ;

ಮಗ್ಗಸ್ಸ ವೀಥಿಯಂ ಮನ್ದಮಜ್ಝತಿಕ್ಖಮತಿಬ್ಬಸಾ.

೩೫೮. ವಿಸುದ್ಧಿಮಗ್ಗೇ ಚತ್ತಾರಿ, ಪಟಿಸಿದ್ಧಾನಿ ಸಬ್ಬಥಾ;

ಏವಮಟ್ಠಸಾಲಿನಿಯಾ, ವುತ್ತತ್ತಾ ಏವಮೀರಿತಂ.

೩೫೯. ಭವಙ್ಗಾಸನ್ನದೋಸೋಪಿ, ನಪ್ಪನಾಯ ಥಿರತ್ತತೋ;

ಸುದ್ಧಿಂ ಪಟಿಪದಾಞಾಣದಸ್ಸನೇವಂ ಲಭೇ ಯತಿ.

೩೬೦. ಆವಜ್ಜಂ ವಿಯ ಮಗ್ಗಸ್ಸ, ಛಟ್ಠಸತ್ತಮಸುದ್ಧಿನಂ;

ಅನ್ತರಾ ಸನ್ತಿಮಾರಬ್ಭ, ತೇಹಿ ಗೋತ್ರಭು ಜಾಯತೇ.

೩೬೧. ಸಂಯೋಜನತ್ತಯಚ್ಛೇದೀ, ಮಗ್ಗೋ ಉಪ್ಪಜ್ಜತೇ ತತೋ;

ಫಲಾನಿ ಏಕಂ ದ್ವೇ ತೀಣಿ, ತತೋ ವುತ್ತಮತಿಕ್ಕಮಾ.

೩೬೨. ತಥಾ ಭಾವಯತೋ ಹೋತಿ, ರಾಗದೋಸತನೂಕರಂ;

ದುತಿಯೋ ತಪ್ಫಲಂ ತಮ್ಹಾ, ಸಕದಾಗಾಮಿ ತಪ್ಫಲೀ.

೩೬೩. ಏವಂ ಭಾವಯತೋ ರಾಗದೋಸನಾಸಕರುಬ್ಭವೇ;

ತತಿಯೋ ತಪ್ಫಲಂ ತಮ್ಹಾ, ತಪ್ಫಲಟ್ಠೋನಾಗಾಮಿಕೋ.

೩೬೪. ಏವಂ ಭಾವಯತೋ ಸೇಸದೋಸನಾಸಕರುಬ್ಭವೇ;

ಚತುತ್ಥೋ ತಪ್ಫಲಂ ತಮ್ಹಾ, ಅರಹಾ ತಪ್ಫಲಟ್ಠಕೋ.

೩೬೫. ಕತಕಿಚ್ಚೋ ಭವಚ್ಛೇದೋ, ದಕ್ಖಿಣೇಯ್ಯೋಪಧಿಕ್ಖಯಾ;

ನಿಬ್ಬುತಿಂ ಯಾತಿ ದೀಪೋವ, ಸಬ್ಬದುಕ್ಖನ್ತಸಞ್ಞಿತಂ.

೩೬೬. ಏವಂ ಸಿದ್ಧಾ ಸಿಯಾ ಸುದ್ಧಿ, ಞಾಣದಸ್ಸನಸಞ್ಞಿತಾ;

ವುತ್ತಂ ಏತ್ತಾವತಾ ಸಚ್ಚಂ, ಪರಮತ್ಥಂ ಸಮಾಸತೋ.

೩೬೭. ಸಚ್ಚಂ ಸಮ್ಮುತಿ ಸತ್ತಾದಿಅವತ್ಥು ವುಚ್ಚತೇ ಯತೋ;

ನ ಲಬ್ಭಾಲಾತಚಕ್ಕಂವ, ತಂ ಹಿ ರೂಪಾದಯೋ ವಿನಾ.

೩೬೮. ತೇನ ತೇನ ಪಕಾರೇನ, ರೂಪಾದಿಂ ನ ವಿಹಾಯ ತು;

ತಥಾ ತಥಾಭಿಧಾನಞ್ಚ, ಗಾಹಞ್ಚ ವತ್ತತೇ ತತೋ.

೩೬೯. ಲಬ್ಭತೇ ಪರಿಕಪ್ಪೇನ, ಯತೋ ತಂ ನ ಮುಸಾ ತತೋ;

ಅವುತ್ತಾಲಮ್ಬಮಿಚ್ಚಾಹು, ಪರಿತ್ತಾದೀಸ್ವವಾಚತೋ.

೩೭೦. ಪಾಪಕಲ್ಯಾಣಮಿತ್ತೋಯಂ, ಸತ್ತೋತಿ ಖನ್ಧಸನ್ತತಿ;

ಏಕತ್ತೇನ ಗಹೇತ್ವಾನ, ವೋಹರನ್ತೀಧ ಪಣ್ಡಿತಾ.

೩೭೧. ಪಥವಾದಿ ವಿಯೇಕೋಪಿ, ಪುಗ್ಗಲೋ ನ ಯತೋ ತತೋ;

ಕುದಿಟ್ಠಿವತ್ಥುಭಾವೇನ, ಪುಗ್ಗಲಗ್ಗಹಣಂ ಭವೇ.

೩೭೨. ಏತಂ ವಿಸಯತೋ ಕತ್ವಾ, ಸಙ್ಖಾದೀಹಿ ಪದೇಹಿ ತು;

ಅವಿಜ್ಜಮಾನಪಞ್ಞತ್ತಿ, ಇತಿ ತಞ್ಞೂಹಿ ಭಾಸಿತಾ.

೩೭೩. ಪಞ್ಞತ್ತಿ ವಿಜ್ಜಮಾನಸ್ಸ, ರೂಪಾದಿವಿಸಯತ್ತತೋ;

ಕಾಯಂ ಪಞ್ಞತ್ತಿ ಚೇ ಸುಟ್ಠು, ವದತೋ ಸುಣ ಸಚ್ಚತೋ.

೩೭೪. ಸವಿಞ್ಞತ್ತಿವಿಕಾರೋ ಹಿ, ಸದ್ದೋ ಸಚ್ಚದ್ವಯಸ್ಸ ತು;

ಪಞ್ಞಾಪನತ್ತಾ ಪಞ್ಞತ್ತಿ, ಇತಿ ತಞ್ಞೂಹಿ ಭಾಸಿತಾ.

೩೭೫. ಪಚ್ಚುಪ್ಪನ್ನಾದಿಆಲಮ್ಬಂ, ನಿರುತ್ತಿಪಟಿಸಮ್ಭಿದಾ-

ಞಾಣಸ್ಸಾತಿ ಇದಞ್ಚೇವಂ, ಸತಿ ಯುಜ್ಜತಿ ನಾಞ್ಞಥಾ.