೨೧. ಉಪ್ಪತ್ತಿಕಥಾ

೭೯೭. ಅಟ್ಠವೀಸತಿ ರೂಪಾನಿ, ಕಲಾಪಾ ಚೇಕವೀಸತಿ;

ವುತ್ತಾ ಚೇತ್ತಾವತಾ ತೇಸಂ, ಉಪ್ಪಾದೋ ದಾನಿ ನಿಯ್ಯತೇ.

೭೯೮. ಅಣ್ಡಜಾ ಜಲಾಬುಜಾ ಚ, ಸಂಸೇದಜೋಪಪಾತಿಕಾ;

ಇಚ್ಚುಪ್ಪತ್ತಿಪಭೇದೇನ, ಚತಸ್ಸೋ ಯೋನಿಯೋ ಮತಾ.

೭೯೯. ಭುಮ್ಮವಜ್ಜೇಸು ದೇವೇಸು,

ಪೇತೇ ನಿಜ್ಝಾಮತಣ್ಹಿಕೇ;

ನಿರಯೇಸು ಚ ಸಮ್ಭೋತಿ,

ಯೋನೇಕಾವೋಪಪಾತಿಕಾ.

೮೦೦. ಭುಮ್ಮದೇವೇ ಮನುಸ್ಸೇಸು,

ತಿರಚ್ಛಾನಾಸುರೇ ತಥಾ;

ಪೇತೇಸು ಚಾವಸೇಸೇಸು,

ಚತಸ್ಸೋಪಿ ಚ ಯೋನಿಯೋ.

೮೦೧. ತತ್ಥಣ್ಡಜಾ ಜಲಾಬುಜಾ, ಗಬ್ಭಸೇಯ್ಯಸಮುಗ್ಗಮೋ;

ಸಂಸೇದಜೋಪಪಾತಿಕಾ, ಓಪಪಾತಿಕನಾಮಕಾ.

೮೦೨. ತತ್ಥ ಸಮ್ಪುಣ್ಣಾಯತನೋ, ಗಬ್ಭಸೇಯ್ಯಸಮುಗ್ಗಮೋ;

ಅಭಾವೋ ದ್ವೇ ಸಭಾವಾ ಚ, ಇತ್ಥಿಪುಮ್ಭಾವಮಿಸ್ಸಿತಾ.

೮೦೩. ಪರಿಪುಣ್ಣಾಪರಿಪುಣ್ಣೋ, ಓಪಪಾತಿಕನಾಮಕೋ;

ಅಭಾವೋ ದ್ವೇ ಸಭಾವಾ ಚ, ಚತುರಾಪಾಯಭೂಮಿಯಂ.

೮೦೪. ಸಮ್ಪುಣ್ಣಾಯತನೋವೇಸೋ,

ಕಾಮೇ ಸುಗತಿಯಂ ಪನ;

ಆದಿಕಪ್ಪೇ ಅಭಾವೋ ಚ,

ದ್ವೇ ಸಭಾವಾ ತತೋ ಪರಂ.

೮೦೫. ಅಪರಿಪುಣ್ಣಾಯತನೋ, ಅಭಾವೋ ಚ ಮಹಗ್ಗತೇ;

ಇಚ್ಚೇವಂ ದಸಧಾ ಹೋನ್ತಿ, ಸಬ್ಬಾ ಸನ್ಧಿಸಮುಗ್ಗಮಾ.

೮೦೬. ತತ್ಥೇವ ದಸಧಾ ಭಿನ್ನೇ, ಅತ್ತಭಾವಸಮುಗ್ಗಮೇ;

ಸನ್ಧಿಯಞ್ಚ ಪವತ್ತೇ ಚ, ರೂಪುಪ್ಪತ್ತಿಂ ವಿಭಾವಯೇ.

೮೦೭. ತತ್ಥಾಭಾವಕಸತ್ತಾನಂ, ಗಬ್ಭಸೇಯ್ಯಸಮುಗ್ಗಮೇ;

ಕಾಯವತ್ಥುವಸಾ ದ್ವೇವ, ದಸಕಾ ಹೋನ್ತಿ ಕಮ್ಮಜಾ.

೮೦೮. ರೂಪಸನ್ತತಿಸೀಸಾನಿ, ದ್ವೇ ಚ ರೂಪಾನಿ ವೀಸತಿ;

ಅಗಹೀತಗ್ಗಹಣೇನ, ತತ್ಥೇಕಾದಸ ನಿದ್ದಿಸೇ.

೮೦೯. ತತೋ ಪರಂ ಪವತ್ತಿಮ್ಹಿ, ವಡ್ಢಮಾನಸ್ಸ ಜನ್ತುನೋ;

ಚಕ್ಖುದಸಕಾದಯೋ ಚ, ಚತ್ತಾರೋ ಹೋನ್ತಿ ಸಮ್ಭವಾ.

೮೧೦. ಇಚ್ಚಾಭಾವಕಸತ್ತಾನಂ, ಛಳೇವುತ್ತಮಕೋಟಿಯಾ;

ಹೇಟ್ಠಿಮಕೋಟಿಯಾ ದ್ವೇವ, ಗಬ್ಭಸೇಯ್ಯಸಮುಗ್ಗಮೇ.

೮೧೧. ಚಕ್ಖುಸೋತಘಾನವಸಾ, ತತ್ಥ ತಿದ್ವೇಕಹೀನಕಾ;

ಏಕೋ ತಯೋ ತಯೋ ಚೇವ, ಸಿಯುಂತಿಚತುಪಞ್ಚಕಾ.

೮೧೨. ಓಪಪಾತಿಕಸಙ್ಖಾತೇ, ಅಭಾವಕಸಮುಗ್ಗಮೇ;

ಜಿವ್ಹಾಕಾಯವತ್ಥುವಸಾ, ತಯೋ ಹೇಟ್ಠಿಮಕೋಟಿಯಾ.

೮೧೩. ಉತ್ತಮಕೋಟಿಯಾ ಹೋನ್ತಿ, ಛಳೇವೋಭಿನ್ನಮನ್ತರೇ;

ಚತುಕ್ಕಪಞ್ಚಕಾ ತತ್ಥ, ದ್ವೇಕಹೀನಾ ತಯೋ ತಯೋ.

೮೧೪. ಛಕ್ಕಾದಯೋ ಅಭಾವಾನಂ,

ಇಚ್ಚೇವಂ ಪಞ್ಚಸಙ್ಗಹಾ;

ಏಕೋ ತಯೋ ತಯೋ ಚೇಕೋ,

ಏಕೋತಿ ಚ ಯಥಾಕ್ಕಮಂ.

೮೧೫. ಸಭಾವಕಾನಂ ದ್ವಿನ್ನಮ್ಪಿ, ದುವಿಧಾ ಸತ್ತಕಾದಯೋ;

ಭಾವಾದಿಕಾ ಯಥಾವುತ್ತಾ, ನವಧಾ ನವಧಾ ಸಿಯುಂ.

೮೧೬. ಸತ್ತೇವುತ್ತಮತೋ ಹೇಟ್ಠಾ, ತಿಚತುಕ್ಕಾ ತದನ್ತರೇ;

ಚತುಕ್ಕಪಞ್ಚಕಚ್ಛಕ್ಕಾ, ಪಞ್ಚಛಕ್ಕಾಪಿ ಚ ದ್ವಿಧಾ.

೮೧೭. ತಿಣ್ಣನ್ನಮ್ಪಿ ವಸೇನೇವ, ಸತ್ತಕಚ್ಛಕ್ಕಪಞ್ಚಕಾ;

ಚತುಕ್ಕತಿಕದುಕ್ಕಾ ಚ, ಛ ಕೋಟ್ಠಾಸಾ ಯಥಾರಹಂ.

೮೧೮. ದ್ವೇ ಸತ್ತ ಚ ನವ ಪಞ್ಚ, ತಯೋ ಚೇಕೋ ಯಥಾಕ್ಕಮಂ;

ರೂಪಸನ್ತತಿಸೀಸಾನಂ, ರಾಸಯೋ ಸತ್ತವೀಸತಿ.

೮೧೯. ಕಮ್ಮಜಾತಾ ಯಥಾಯೋಗಂ, ಪವತ್ತನ್ತಿ ಖಣೇ ಖಣೇ;

ಕಾಮಾವಚರಸತ್ತಾನಂ, ಪಟಿಸನ್ಧಿಪವತ್ತಿಯಂ.

೮೨೦. ತತ್ಥ ಸನ್ತತಿಸೀಸಾನಿ, ರೂಪಾನಿ ಚ ಯಥಾರಹಂ;

ಪುಬ್ಬೇ ವುತ್ತನಯೇನೇವ, ಸಬ್ಬತ್ಥಾಪಿ ವಿನಿದ್ದಿಸೇ.

೮೨೧. ಸೀತುಣ್ಹೋತುಸಮಞ್ಞಾತಾ,

ತೇಜೋಧಾತು ಠಿತಿಕ್ಖಣೇ;

ಭೂತಾ ಸನ್ಧಿಕ್ಖಣೇ ರೂಪಂ,

ಜನೇತಿ ಉತುಜಟ್ಠಕಂ.

೮೨೨. ಪಟಿಸನ್ಧಿಮತಿಕ್ಕಮ್ಮ, ಚಿತ್ತಂ ಚಿತ್ತಜಮಟ್ಠಕಂ;

ಭವಙ್ಗಾದಿಮುಪಾದಾಯ, ಜನೇತುಪ್ಪತ್ತಿಯಂ ಪನ.

೮೨೩. ಭುತ್ತಾಹಾರೋ ಠಿತಿಪ್ಪತ್ತೋ, ಮಾತರಾ ಚ ಸಯಮ್ಪಿ ಚ;

ಸರೀರಾನುಗತೋ ಹುತ್ವಾ, ಜನೇತಾಹಾರಜಟ್ಠಕಂ.

೮೨೪. ಇತಿ ಸುದ್ಧಟ್ಠಕಾನಿ ಚ, ತೇಸಮುಟ್ಠಾನಿಕಾಪರೇ;

ಸದ್ದವಿಞ್ಞತ್ತಿಲಹುತಾ, ಸಮ್ಭವೇ ಸಮ್ಭವನ್ತಿ ಚ.

೮೨೫. ಇತ್ಥಂ ಚತುಸಮುಟ್ಠಾನಾ, ಕಲಾಪಾ ಕಾಮಭೂಮಿಯಂ;

ಯಾವಜೀವಂ ಪವತ್ತನ್ತಿ, ದೀಪಜಾಲಾವ ಸನ್ತತಿ.

೮೨೬. ಚಕ್ಖುಸೋತವತ್ಥುವಸಾ, ದಸಕಾ ಚ ತಯೋ ಪರಂ;

ಜೀವಿತನವಕಞ್ಚೇವ, ರೂಪಾವಚರಭೂಮಿಯಂ.

೮೨೭. ಹೋನ್ತಿ ಸನ್ಧಿಪವತ್ತೀಸು, ಚತ್ತಾರೋ ಕಮ್ಮಜಾ ಸದಾ;

ಪುಬ್ಬೇ ವುತ್ತನಯೇನೇವ, ಪವತ್ತೇ ಉತುಚಿತ್ತಜಾ.

೮೨೮. ಜೀವಿತನವಕಞ್ಚೇಕಂ, ಪಟಿಸನ್ಧಿಪವತ್ತಿಯಂ;

ಪವತ್ತೇ ಉತುಜಞ್ಚೇತಿ, ದ್ವೇಧಾಸಞ್ಞೀನಮುದ್ದಿಸೇ.

೮೨೯. ಇಚ್ಚುಪ್ಪತ್ತಿಕಮಂ ಞತ್ವಾ, ವಿಭಾವೇಯ್ಯ ತತೋ ಪರಂ;

ಕಲಾಪಾನಞ್ಚ ರೂಪಾನಂ, ಸಮ್ಭವಾಸಮ್ಭವಮ್ಪಿ ಚ.

೮೩೦. ಇನ್ದ್ರಿಯಬದ್ಧಸನ್ತಾನೇ, ಸಬ್ಬೇ ಸಮ್ಭೋನ್ತಿ ಸಮ್ಭವಾ;

ಕಲಾಪಾ ಚೇವ ರೂಪಾನಿ, ತಥಾ ಸನ್ತತಿರಾಸಯೋ.

೮೩೧. ಬಹಿದ್ಧಾ ಮತಕಾಯೇ ಚ, ನೋಪಲಬ್ಭನ್ತಿ ಕಮ್ಮಜಾ;

ಚಿತ್ತೋಜಜಾ ಕಲಾಪಾ ಚ, ಉತುಜಾ ಲಹುತಾದಯೋ.

೮೩೨. ತಥಾ ಸುದ್ಧಟ್ಠಕಸದ್ದ-ನವಕಞ್ಚೋತು ಸಬ್ಬಥಾ;

ಕಲಾಪಾ ತತ್ಥ ಲಬ್ಭನ್ತಿ, ದ್ವೇ ಚ ರೂಪಾನಿ ಉದ್ದಿಸೇ.

೮೩೩. ತೇಸಮುಟ್ಠಾನಿಕಾ ಸಬ್ಬೇ, ಕಲಾಪಾ ನತ್ಥಿ ಸನ್ಧಿಯಂ;

ಉಪ್ಪಾದಕಾಲೇ ಸಬ್ಬತ್ಥ, ಜರತಾನಿಚ್ಚತಾಪಿ ಚ.

೮೩೪. ಕಲಾಪಾ ಕಮ್ಮಜಾ ಸನ್ತಿ, ಜಾತಿರೂಪಞ್ಚ ಸನ್ಧಿಯಂ;

ರೂಪಾನಿ ಚ ಕಲಾಪಾ ಚ, ಸಬ್ಬೇಪಿ ಚ ಪವತ್ತಿಯಂ.

೮೩೫. ಸನ್ತಿ ಸಬ್ಬಾನಿ ರೂಪಾನಿ, ಕಾಮೇಸು ಚತುಸಮ್ಭವಾ;

ಜೀವಿತನವಕಂ ಹಿತ್ವಾ, ಕಲಾಪಾ ಹೋನ್ತಿ ವೀಸತಿ.

೮೩೬. ದಸಕೇಸ್ವೇವ ಗಹಿತಂ, ವಿಸುಂ ಕಾಮೇ ನ ಲಬ್ಭತಿ;

ಜೀವಿತನವಕಂ ನಾಮ, ರೂಪಲೋಕೇ ವಿಸುಂ ಸಿಯಾ.

೮೩೭. ಆಹಾರಜಕಲಾಪಾ ಚ, ಭಾವಾ ದ್ವೇ ಚಾದಿಕಪ್ಪಿಕೇ;

ಆದಿಕಾಲೇ ನ ಲಬ್ಭನ್ತಿ, ಪಚ್ಛಾ ಲಬ್ಭನ್ತಿ ಕೇಚಿಪಿ.

೮೩೮. ಘಾನಜಿವ್ಹಾಕಾಯಭಾವ-ದಸಕಾ ರೂಪಭೂಮಿಯಂ;

ಆಹಾರಜಕಲಾಪಾ ಚ, ನ ಲಬ್ಭನ್ತೇವ ಸಬ್ಬಥಾ.

೮೩೯. ಚಕ್ಖುಸೋತವತ್ಥುಸದ್ದಾ, ಕಲಾಪಾ ಚಿತ್ತಜಾಪಿ ಚ;

ಅಸಞ್ಞಿಭೂಮಿಯಂ ಪುಬ್ಬೇ, ವುತ್ತಾಪಿ ಚ ನ ಲಬ್ಭರೇ.

೮೪೦. ಕಲಾಪಾ ಸತ್ತ ರೂಪಾನಿ, ಪಞ್ಚ ರೂಪೇಸ್ವಸಞ್ಞಿಸು;

ನತ್ಥೇಕಾದಸ ರೂಪಾನಿ, ಕಲಾಪೇಕೂನವೀಸತಿ.

೮೪೧. ತಸ್ಮಾ ತೇವೀಸ ರೂಪಾನಿ, ಕಲಾಪಾ ಪನ ಚುದ್ದಸ;

ತೇಸಮುಟ್ಠಾನಿಕಾ ಸನ್ತಿ, ರೂಪಾವಚರಭೂಮಿಯಂ.

೮೪೨. ಸತ್ತರಸೇವ ರೂಪಾನಿ, ಕಲಾಪಾ ದ್ವೇ ದ್ವಿಸಮ್ಭವಾ;

ಅಸಞ್ಞೀನಂ ತು ಸಮ್ಭೋನ್ತಿ, ನತ್ಥಾರೂಪೇಸು ಕಿಞ್ಚಿಪಿ.

೮೪೩. ಉಪ್ಪತ್ತಿಕ್ಕಮಮಿಚ್ಚೇವಂ, ಸಮ್ಭವಾಸಮ್ಭವಮ್ಪಿ ಚ;

ಕಲಾಪಾನಞ್ಚ ರೂಪಾನಂ, ಯಥಾಯೋಗಂ ವಿಭಾವಯೇತಿ.

ಇತಿ ರೂಪವಿಭಾಗೇ ಉಪ್ಪತ್ತಿಕಥಾ ನಿಟ್ಠಿತಾ.

ಏಕವೀಸತಿಮೋ ಪರಿಚ್ಛೇದೋ.