ದ್ವಾವೀಸತಿಮೋ ಪರಿಚ್ಛೇದೋ

೨೨. ಪಕಿಣ್ಣಕಕಥಾ

೮೪೪. ಇತ್ಥಂ ರೂಪಾನಮುಪ್ಪತ್ತಿಂ, ದೀಪೇತ್ವಾ ದಾನಿ ವುಚ್ಚತಿ;

ಪವತ್ತಿಕೋಸಲ್ಲತ್ಥಾಯ, ತತ್ಥೇವೇತಂ ಪಕಿಣ್ಣಕಂ.

೮೪೫. ದುವಿಧಾ ಸನ್ಧಿಯೋ ತತ್ಥ, ಮಿಸ್ಸಾಮಿಸ್ಸವಿಭಾಗತೋ;

ತಿವಿಧಾಪಿ ಚೇಕಚತು-ಪಞ್ಚವೋಕಾರಭೇದತೋ.

೮೪೬. ರೂಪಮತ್ತಾ ಅಸಞ್ಞೀನಂ, ನಾಮಾಭಾವಾ ಅಮಿಸ್ಸಿತಾ;

ನಾಮಮತ್ತಾ ಅರೂಪೀನಂ, ರೂಪಾಭಾವಾತಿ ಚ ದ್ವಿಧಾ.

೮೪೭. ಕಾಮಾವಚರಿಕಾ ಚೇವ, ರೂಪಾವಚರಿಕಾತಿ ಚ;

ದುವಿಧಾ ಮಿಸ್ಸಿತಾ ಚೇತಿ, ಭವನ್ತಿ ಚ ಚತುಬ್ಬಿಧಾ.

೮೪೮. ಏಕಚ್ಚತುವೋಕಾರಾ ಚ, ಅಮಿಸ್ಸಾ ಪಞ್ಚ ಸನ್ಧಿಯೋ;

ಛಬ್ಬೀಸತಿವಿಧಾ ಮಿಸ್ಸಾ, ಪಞ್ಚವೋಕಾರಸನ್ಧಿಯೋ.

೮೪೯. ಇತ್ಥಂ ಭೂಮಿಪ್ಪಭೇದೇನ, ಏಕತಿಂಸವಿಧಾಪಿ ಚ;

ಸನ್ತತಿರಾಸಿಭೇದೇನ, ಸಿಯುಂ ತಿಂಸವಿಧಾ ಕಥಂ.

೮೫೦. ರೂಪಸನ್ತತಿಸೀಸಾನಂ,

ರಾಸಯೋ ಸತ್ತವೀಸತಿ;

ವುತ್ತಾ ಕಾಮೇ ವಸಾ ತೇಸಂ,

ಸತ್ತಕಾ ಕಾಮಸನ್ಧಿಯೋ.

೮೫೧. ವೇದನಾಸಞ್ಞಾಸಙ್ಖಾರ-ವಿಞ್ಞಾಣಕ್ಖನ್ಧಸಙ್ಗಹಾ;

ಸಬ್ಬತ್ಥಾಪಿ ಚತಸ್ಸೋವ, ನಾಮಸನ್ತತಿಯೋ ಸಿಯುಂ.

೮೫೨. ಇಚ್ಚುಭಿನ್ನಂ ವಸಾ ಹೋನ್ತಿ, ತತ್ಥೇಕಾದಸಕಾದಯೋ;

ಸನ್ತತಿರಾಸಯೋ ಪುಬ್ಬೇ, ವಿಭತ್ತಾ ಸತ್ತಕಾದಯೋ.

೮೫೩. ಏಕಾದಸಕದಸಕ-ನವಟ್ಠಸತ್ತಕಾ ಸಿಯುಂ;

ಛಕ್ಕೇನ ಸದ್ಧಿಂ ವಿಞ್ಞೇಯ್ಯಾ, ತಸ್ಮಾ ತತ್ಥ ಛ ಸಙ್ಗಹಾ.

೮೫೪. ಅಟ್ಠ ಸನ್ತತಿಯೋ ಹೋನ್ತಿ, ರೂಪಲೋಕೇನ ಮಿಸ್ಸಿತಾ;

ಅಟ್ಠಕೋ ರಾಸಿ ತತ್ಥೇಕೋ, ತಸ್ಮಾ ಸನ್ತತಿ ವುಚ್ಚತಿ.

೮೫೫. ಜೀವಿತನವಕೋ ತ್ವೇಕೋ, ಅಸಞ್ಞೀ ಪಟಿಸನ್ಧಿಯಂ;

ಅರೂಪೀನಂ ಚತಸ್ಸೋಪಿ, ನಾಮಸನ್ತತಿಯೋ ಸಿಯುಂ.

೮೫೬. ಇಚ್ಚೇಕಕಚತುಕ್ಕಾನಂ, ವಸೇನ ದ್ವೇ ಅಮಿಸ್ಸಿತಾ;

ಅಟ್ಠವೀಸಞ್ಚ ಮಿಸ್ಸಾತಿ, ತಿಂಸೇವ ಹೋನ್ತಿ ಸನ್ಧಿಯೋ.

೮೫೭. ಏಕುಪ್ಪಾದನಿರೋಧಾ ಚ, ಅಮಿಸ್ಸಾ ತತ್ಥ ರಾಸಯೋ;

ಮಿಸ್ಸಿತಾನಂ ವಿಭಾಗೋಯಂ, ಯಥಾಯೋಗಂ ಕಥೀಯತಿ.

೮೫೮. ಉಪ್ಪಾದಟ್ಠಿತಿಭಙ್ಗಾನಂ, ವಸಾ ತೀಣಿ ಖಣಾನಿಪಿ;

ಸಮಾನಾನೇವ ನಾಮಾನಂ, ಏಕಚಿತ್ತಕ್ಖಣಂ ಮತಂ.

೮೫೯. ತುಲ್ಯಮುಪ್ಪಾದಭಙ್ಗಾನಂ, ರೂಪಾನಮ್ಪಿ ಖಣದ್ವಯಂ;

ಏಕೂನಪಞ್ಞಾಸಮತ್ತಂ, ಠಿತಿಕ್ಖಣಮುದೀರಿತಂ.

೮೬೦. ನಾಮರೂಪಾನಮುಪ್ಪಾದೋ, ಭಙ್ಗೋಪಿ ಹಿ ಸಮೋ ಮತೋ;

ದನ್ಧಂ ಹಿ ವತ್ತಿಕಂ ರೂಪಂ, ನಾಮಂ ತು ಲಹುವತ್ತಿಕಂ.

೮೬೧. ತಥಾ ಹಿ ರೂಪೇ ತಿಟ್ಠನ್ತೇ, ಚಿತ್ತುಪ್ಪಾದಾ ತು ಸೋಳಸ;

ಉಪ್ಪಜ್ಜಿತ್ವಾ ಪವತ್ತಿತ್ವಾ, ಭಿಜ್ಜನ್ತಿ ಚ ಲಹುಂ ಲಹುಂ.

೮೬೨. ತಸ್ಮಾ ಹಿ ಏಕಪಞ್ಞಾಸ-ಖಣರೂಪಕ್ಖಣಂ ತಥಾ;

ಸತ್ತರಸಚಿತ್ತಕ್ಖಣಂ, ತಿಖಣನ್ತಿ ಚ ವುಚ್ಚತಿ.

೮೬೩. ಚಿತ್ತಕ್ಖಣಂ ಹಿ ತಿಣ್ಣನ್ನಂ, ತತ್ಥ ವಿಞ್ಞತ್ತಿಕದ್ವಯಂ;

ಲಕ್ಖಣತ್ತಯರೂಪಂ ತು, ಸಲಕ್ಖಣವವತ್ಥಿತಂ.

೮೬೪. ತಸ್ಮಾ ಹಿತ್ವಾ ದ್ವಯಞ್ಚೇತಂ, ಬಾವೀಸತಿವಿಧಮ್ಪಿ ಚ;

ರೂಪಂ ನಾಮ ಚತುಕ್ಕಞ್ಚ, ಸಲಕ್ಖಣನಿಯಾಮಿತಂ.

೮೬೫. ಏಕುಪ್ಪಾದನಿರೋಧಾ ಚ, ತತ್ಥ ತುಲ್ಯಕ್ಖಣಾ ಮತಾ;

ಅತುಲ್ಯಕ್ಖಣಧಮ್ಮಾನಂ, ಸಿಯಾ ಭೇದಂ ಯಥಾರಹಂ.

೮೬೬. ಪಟಿಸನ್ಧಿಕ್ಖಣೇ ಜಾತಂ, ತಸ್ಮಾ ರೂಪಂ ತತೋ ಪರಂ;

ಸತ್ತರಸಮಚಿತ್ತಸ್ಸ, ಭಙ್ಗೇನ ಸಹ ಭಿಜ್ಜತಿ.

೮೬೭. ತಸ್ಸ ಠಿತಿಕ್ಖಣೇ ಜಾತಂ, ರೂಪಮ್ಪಿ ಚ ತತೋ ಪರಂ;

ಅಟ್ಠಾರಸಮಚಿತ್ತಸ್ಸ, ಉಪ್ಪಾದೇ ಪನ ಭಿಜ್ಜತಿ.

೮೬೮. ತಸ್ಸ ಭಙ್ಗಕ್ಖಣೇ ಜಾತಂ, ರೂಪಮ್ಪಿ ಚ ತತೋ ಪರಂ;

ಅಟ್ಠಾರಸಮಚಿತ್ತಸ್ಸ, ಠಿತಿಕಾಲೇಸು ಭಿಜ್ಜತಿ.

೮೬೯. ತಥಾ ದುತಿಯಚಿತ್ತಸ್ಸ, ಉಪ್ಪಾದಮ್ಹಿ ಸಮುಟ್ಠಿತಂ;

ಅಟ್ಠಾರಸಮಚಿತ್ತಸ್ಸ, ಭಙ್ಗೇನ ಸಹ ಭಿಜ್ಜತಿ.

೮೭೦. ಇತಿ ವುತ್ತನಿಯಾಮೇನ, ಸಜಾತಿಕ್ಖಣತೋ ಪರಂ;

ಠತ್ವಾ ಏಕೂನಪಞ್ಞಾಸ, ಖಣಾನಿ ಪುನ ಭಿಜ್ಜತಿ.

೮೭೧. ತಸ್ಮಾ ಏಕೂನಪಞ್ಞಾಸ, ಕಲಾಪಾ ಸಹ ವತ್ತರೇ;

ಏಕೋ ಜಾಯತಿ ಏಕೋ ಚ, ಭಿಜ್ಜತೀತಿ ಚ ಸಬ್ಬಥಾ.

೮೭೨. ಏಕಸನ್ತತಿಸಮ್ಬನ್ಧಾ, ಕಲಾಪಾ ಸಹ ಕಮ್ಮಜಾ;

ಯಥಾನುಪುಬ್ಬಘಟಿತಾ, ಏಕಪಞ್ಞಾಸ ಲಬ್ಭರೇ.

೮೭೩. ಸತ್ತವೀಸ ಪನಿಚ್ಚೇವಂ, ಕಾಮೇ ದ್ವೇ ರೂಪಭೂಮಿಯಂ;

ರೂಪಸನ್ತತಿಸೀಸಾನಂ, ರಾಸಯೋ ಸತ್ತಕಾದಯೋ.

೮೭೪. ಏಕೂನತಿಂಸ ಸಬ್ಬೇಪಿ, ಕಮ್ಮಜಾತಾ ಯಥಾರಹಂ;

ಏಕಪಞ್ಞಾಸ ಘಟಿಕಾ, ಪವತ್ತನ್ತಿ ಖಣೇ ಖಣೇ.

೮೭೫. ತತ್ಥ ಸನ್ಧಿಕ್ಖಣೇ ಜಾತಂ, ಸತ್ತರಸಮಚೇತಸೋ;

ಉಪ್ಪಾದೇ ಭಿಜ್ಜತಿಚ್ಚೇವಂ, ವುತ್ತೋ ಅಟ್ಠಕಥಾನಯೋ.

೮೭೬. ತಂ ನಯಂ ಪಟಿಬಾಹಿತ್ವಾ, ಚಿತ್ತೇನ ಸಹ ಭಿಜ್ಜತಿ;

ಚಿತ್ತೇನ ಸಹ ಜಾತನ್ತಿ, ವುತ್ತಮಾಚರಿಯೇನ ಹಿ.

೮೭೭. ಆನಾಪಾನತಕ್ಕಚಾರಾ, ಏಕುಪ್ಪಾದನಿರೋಧಕಾ;

ವುತ್ತಾ ಹಿ ಯಮಕೇ ಕಾಯವಚೀಸಙ್ಖಾರನಾಮಕಾ.

೮೭೮. ಚಿತ್ತುಪ್ಪಾದಕ್ಖಣೇ ಜಾತಾ, ಉತು ತಸ್ಸ ಠಿತಿಕ್ಖಣೇ;

ರೂಪಂ ಜನೇತಿ ತತ್ಥಾಪಿ, ಉತು ಭಙ್ಗಕ್ಖಣೇಪಿ ಚ.

೮೭೯. ಅನುಪುಬ್ಬಕ್ಕಮೇನೇವಂ, ಜಾತಂ ರೂಪಂ ತಥಾಪರಂ;

ಅಟ್ಠಾರಸಮಉಪ್ಪಾದಟ್ಠಿತಿಆದೀಸು ಭಿಜ್ಜತಿ.

೮೮೦. ಇತ್ಥಂ ಕಲಾಪಾ ಘಟಿತಾ, ಉತುಜಾಹಾರಜಾಪಿ ಚ;

ಏಕಸನ್ತತಿಸಮ್ಬನ್ಧಾ, ಏಕಪಞ್ಞಾಸ ಲಬ್ಭರೇ.

೮೮೧. ಕಲಾಪಾ ಚಿತ್ತಜಾ ಯಸ್ಮಾ, ಉಪ್ಪಾದಕ್ಖಣಸಮ್ಭೂತಾ;

ಘಟಿಕಾ ಸಹ ಲಬ್ಭನ್ತಿ, ತಸ್ಮಾ ಸತ್ತರಸೇವ ತೇ.

೮೮೨. ಸಬ್ಬೇಪಿ ರೂಪಜನಕಾ, ಚಿತ್ತುಪ್ಪಾದೇ ಯಥಾಸಕಂ;

ಜನೇನ್ತಿ ಠಿತಿಭಙ್ಗೇಸು, ನ ಜನೇನ್ತೀತಿ ಕೇಚನಾ.

೮೮೩. ಕುಸಲಾಬ್ಯಾಕತಾದೀನಂ, ಏಕುಪ್ಪಾದನಿರೋಧತಾ;

ಧಮ್ಮಾನಂ ಯಮಕೇ ವುತ್ತಾ, ಇತಿ ಪಾಳಿ ವದನ್ತಿ ಚ.

೮೮೪. ಕುಸಲಾದಿಕಸಮ್ಬನ್ಧಾ, ತತ್ಥ ತತ್ಥ ಹಿ ದೇಸಿತಾ;

ಇತಿ ವತ್ವಾ ಪುರೇ ವುತ್ತಂ, ಇಚ್ಛನ್ತಾಚರಿಯಾ ನಯಂ.

೮೮೫. ಇಚ್ಚೇವಂ ಚತುಸಮ್ಭೂತಾ, ರೂಪಸನ್ತತಿರಾಸಯೋ;

ರೂಪಾನಿ ಚ ಕಲಾಪಾ ಚ, ಏಕಾಬದ್ಧಾ ಯಥಾರಹಂ.

೮೮೬. ಸುತ್ತಪವತ್ತಮತ್ತಾನಂ, ಸಮ್ಬುದ್ಧಾನಮ್ಪಿ ಪಾಣಿನಂ;

ಯಾವ ಮರಣಕಾಲಾಪಿ, ಪವತ್ತನ್ತಿ ನಿರನ್ತರಂ.

೮೮೭. ಆಯುಕ್ಖಯಾ ಚ ಮರಣಂ, ತಥಾ ಕಮ್ಮಕ್ಖಯಾ ಸಿಯಾ;

ಉಭಿನ್ನಂ ವಾ ಖಯಾ ಚಾಥ, ಉಪಚ್ಛೇದಕಕಮ್ಮುನಾ.

೮೮೮. ಚತುಧಾಪಿ ಮರನ್ತಸ್ಸ, ತಸ್ಸೇವಂ ತು ಯಥಾರಹಂ;

ಸತ್ತರಸಚಿತ್ತಕ್ಖಣಮತ್ತಸೇಸಮ್ಹಿ ಜೀವಿತೇ.

೮೮೯. ಉಪರಿಚ್ಚುತಿಚಿತ್ತಸ್ಸ, ಸತ್ತರಸಮಚೇತಸೋ;

ಠಿತಿಕಾಲಮುಪಾದಾಯ, ನ ತು ಜಾಯತಿ ಕಮ್ಮಜಂ.

೮೯೦. ತಸ್ಸುಪ್ಪಾದಕ್ಖಣೇ ಜಾತಂ,

ರೂಪಞ್ಚ ಚುತಿಯಾ ಸಹ;

ಭಿಜ್ಜತೀತಿ ಮತೋ ನಾಮ,

ತತೋ ಹೋತಿ ಸ ಪುಗ್ಗಲೋ.

೮೯೧. ಚಿತ್ತಜಾಹಾರಜಞ್ಚಾಪಿ, ನ ಜಾಯತಿ ತತೋ ಪರಂ;

ಉತುಸಮ್ಭವರೂಪಂ ತು, ಅವಸಿಸ್ಸತಿ ವಾ ನ ವಾ.

೮೯೨. ತತೋ ವುತ್ತನಯೇನೇವ, ಮತಸತ್ತೋ ಯಥಾರಹಂ;

ಮಿಸ್ಸಾಮಿಸ್ಸಾಹಿ ಸನ್ಧೀಹಿ, ಪುನದೇವೋಪಪಜ್ಜತಿ.

೮೯೩. ತತೋ ವುತ್ತನಯೇನೇವ, ಏಕೂನತಿಂಸ ಕಮ್ಮಜಾ;

ತೇಸಮುಟ್ಠಾನಿಕಾ ಪಞ್ಚ, ಚತುತ್ತಿಂಸ ಸಮಿಸ್ಸಿತಾ.

೮೯೪. ಕಲಾಪಾ ರಾಸಯೋ ಹೋನ್ತಿ, ಸತ್ತವೀಸತಿಭೂಮಿಸು;

ಇತಿ ಸಬ್ಬಪಕಾರೇನ, ರೂಪಧಮ್ಮಾ ಪಕಾಸಿತಾತಿ.

ಇತಿ ರೂಪವಿಭಾಗೇ ಪಕಿಣ್ಣಕಕಥಾ ನಿಟ್ಠಿತಾ.

ದ್ವಾವೀಸತಿಮೋ ಪರಿಚ್ಛೇದೋ.

ನಿಟ್ಠಿತೋ ಚ ಸಬ್ಬಥಾಪಿ ರೂಪವಿಭಾಗೋ.