ದಸಮೋ ಪರಿಚ್ಛೇದೋ

೧೦. ಪಭೇದಕಥಾ

೩೫೨. ಏಕುಪ್ಪಾದಾ ನಿರೋಧಾ ಚ, ಏಕಾಲಮ್ಬಣವತ್ಥುಕಾ;

ಸಹಗತಾ ಸಹಜಾತಾ, ಸಂಸಟ್ಠಾ ಸಹವುತ್ತಿನೋ.

೩೫೩. ತೇಪಞ್ಞಾಸ ಪನಿಚ್ಚೇತೇ, ಸಮ್ಪಯುತ್ತಾ ಯಥಾರಹಂ;

ಚಿತ್ತಚೇತಸಿಕಾ ಧಮ್ಮಾ, ಅಟ್ಠಾರಸವಿಧಾಪಿ ಚ.

೩೫೪. ಏಕಧಾ ಛಬ್ಬಿಧಾ ಚೇವ, ಚತುಧಾ ಸತ್ತಧಾ ಠಿತಾ;

ಚಿತ್ತುಪ್ಪಾದಪಭೇದೇನ, ಭಿನ್ದಿತಬ್ಬಾ ವಿಭಾವಿನಾ.

೩೫೫. ಅಟ್ಠ ಧಮ್ಮಾವಿನಿಬ್ಭೋಗಾ, ಭಿನ್ನಾಸೀತಿ ನವುತ್ತರಾ;

ಸತ್ತಸತಂ ದಸ ದ್ವೇ ಚ, ಸಬ್ಬೇ ಹೋನ್ತಿ ಸಮಿಸ್ಸಿತಾ.

೩೫೬. ಸನ್ತೀರಣಮನೋಧಾತು, ಸಿತವೋಟ್ಠಬ್ಬನಾ ತಥಾ;

ಅಪುಞ್ಞಾ ಕಾಮಪುಞ್ಞಾ ಚ, ಮಹಾಪಾಕಾ ಮಹಾಕ್ರಿಯಾ.

೩೫೭. ಪಠಮಜ್ಝಾನಧಮ್ಮಾ ಚ, ಲೋಕುತ್ತರಮಹಗ್ಗತಾ;

ಪಞ್ಚಪಞ್ಞಾಸ ಸಬ್ಬೇಪಿ, ವಿತಕ್ಕಾ ಹೋನ್ತಿ ಭೇದಿತಾ.

೩೫೮. ವಿಚಾರಾಪಿ ಚ ತೇಯೇವ, ದುತಿಯಜ್ಝಾನನಾಮಕಾ;

ಏಕಾದಸಾಪರೇ ಚೇತಿ, ಛಸಟ್ಠಿ ಪರಿದೀಪಿತಾ.

೩೫೯. ಅಪುಞ್ಞಾ ಕಾಮಪುಞ್ಞಾ ಚ, ಮಹಾಪಾಕಾ ಮಹಾಕ್ರಿಯಾ;

ಚತುಕ್ಕಾ ಚೇವ ಚತ್ತಾರೋ, ಸಿತಞ್ಚ ಸುಖತೀರಣಂ.

೩೬೦. ಪಠಮಾದಿತಿಕಜ್ಝಾನಾ, ಲೋಕುತ್ತರಮಹಗ್ಗತಾ;

ಇಚ್ಚೇವಮೇಕಪಞ್ಞಾಸ, ಪೀತಿಯೋ ಹೋನ್ತಿ ಸಬ್ಬಥಾ.

೩೬೧. ಸಿತವೋಟ್ಠಬ್ಬನಾ ದ್ವೇ ಚ, ಸಾವಜ್ಜಾ ಚಾನವಜ್ಜಕಾ;

ಭಿನ್ನಮೇವಂ ತು ವೀರಿಯಂ, ತೇಸತ್ತತಿವಿಧಂ ಭವೇ.

೩೬೨. ಸಾವಜ್ಜಾ ಚಾನವಜ್ಜಾ ಚ, ಮೋಮೂಹದ್ವಯವಜ್ಜಿತಾ;

ಛನ್ದಾ ಭವನ್ತಿ ಸಬ್ಬೇಪಿ, ಸಟ್ಠಿಭೇದಾ ನವುತ್ತರಾ.

೩೬೩. ಸನ್ತೀರಣಮನೋಧಾತು, ಸಿತವೋಟ್ಠಬ್ಬನಾ ತಥಾ;

ಸಾವಜ್ಜಾ ಚಾನವಜ್ಜಾ ಚ, ವಿಚಿಕಿಚ್ಛಾವಿವಜ್ಜಿತಾ.

೩೬೪. ಅಧಿಮೋಕ್ಖಾ ಪನಿಚ್ಚೇವಂ, ಅಟ್ಠಸತ್ತತಿ ಭೇದಿತಾ;

ತಿಸತಂ ನವುತಿ ದ್ವೇ ಚ, ಭಿನ್ನಾ ಹೋನ್ತಿ ಪಕಿಣ್ಣಕಾ.

೩೬೫. ಏಕೂನಸಟ್ಠಿ ವಾ ಹೋನ್ತಿ, ಸದ್ಧಾದೇಕೂನವೀಸತಿ;

ಸಹಸ್ಸಞ್ಚ ಸತಞ್ಚೇಕಂ, ಏಕವೀಸಞ್ಚ ಸಬ್ಬಥಾ.

೩೬೬. ಞಾಣೇನ ಸಮ್ಪಯುತ್ತಾ ಚ, ಕಾಮೇ ದ್ವಾದಸಧಾಪರೇ;

ಪಞ್ಚತಿಂಸಾತಿ ಪಞ್ಞಾಪಿ, ಸತ್ತತಾಲೀಸಧಾ ಕಥಾ.

೩೬೭. ರೂಪಜ್ಝಾನಚತುಕ್ಕಾ ಚ, ಕಾಮಪುಞ್ಞಾ ಮಹಾಕ್ರಿಯಾ;

ಅಟ್ಠವೀಸಪ್ಪಮಞ್ಞೇವಂ, ಛಪ್ಪಞ್ಞಾಸ ಭವನ್ತಿ ಚ.

೩೬೮. ಅನುತ್ತರಾ ಕಾಮಪುಞ್ಞಾ, ತಿಸ್ಸೋ ವಿರತಿಯೋ ಪನ;

ಹೋನ್ತಿ ಸೋಳಸಧಾ ಭಿನ್ನಾ, ಅಟ್ಠತಾಲೀಸ ಪಿಣ್ಡಿತಾ.

೩೬೯. ಪಞ್ಚವೀಸಾನವಜ್ಜೇವಂ, ಸಮ್ಪಯುತ್ತಾ ಚತುಬ್ಬಿಧಾ;

ಸಹಸ್ಸದ್ವಿಸತಞ್ಚೇವ, ದ್ವಿ ಚ ಸತ್ತತಿ ಭೇದತೋ.

೩೭೦. ಚತ್ತಾರೋ ಪಾಪಸಾಮಞ್ಞಾ, ಭಿನ್ನಾ ದ್ವಾದಸಧಾ ಪನ;

ಅಟ್ಠತಾಲೀಸಧಾ ಹೋನ್ತಿ, ತೇ ಸಬ್ಬೇ ಪರಿಪಿಣ್ಡಿತಾ.

೩೭೧. ಲೋಭೋ ಪನಟ್ಠಧಾ ಭಿನ್ನೋ, ಥಿನಮಿದ್ಧಞ್ಚ ಪಞ್ಚಧಾ;

ಚತುಧಾ ದಿಟ್ಠಿಮಾನೋ ಚ, ಚತುಧಾ ದಿಟ್ಠಿಯೋ ವಿಸುಂ.

೩೭೨. ದ್ವಿಧಾ ದೋಸಾದಿಚತ್ತಾರೋ, ವಿಚಿಕಿಚ್ಛೇಕಧಾತಿ ಚ;

ಸಾವಜ್ಜಾ ಸತ್ತಧಾ ವುತ್ತಾ, ಭಿನ್ನಾಸೀತಿ ತಿಕುತ್ತರಾ.

೩೭೩. ಇಚ್ಚಟ್ಠಾರಸಧಾ ವುತ್ತಾ, ತೇಪಞ್ಞಾಸಾಪಿ ಭೇದತೋ;

ದ್ವಿಸಹಸ್ಸಞ್ಚ ತು ಸತಂ, ಭವನ್ತೇಕೂನಸಟ್ಠಿ ಚ.

೩೭೪. ವಿತಕ್ಕವಿಚಾರಪೀತಿಸುಖೋಪೇಕ್ಖಾಸು ಪಞ್ಚಸು;

ಭಿನ್ದಿತ್ವಾ ಝಾನಭೇದೇನ, ಗಹೇತಬ್ಬಾ ಅನುತ್ತರಾ.

೩೭೫. ಅಞ್ಞತ್ರ ಪನ ಸಬ್ಬತ್ಥ, ನತ್ಥಿ ಭೇದಪ್ಪಯೋಜನಂ;

ಅಟ್ಠೇವ ಕಸ್ಮಾ ಗಯ್ಹನ್ತಿ, ಅಭೇದೇನಾತಿ ಲಕ್ಖಯೇ.

೩೭೬. ಪಠಮಾದಿಚತುಜ್ಝಾನಾ, ಲೋಕುತ್ತರಮಹಗ್ಗತಾ;

ಇಚ್ಚೇಕಮೇಕದಸಧಾ, ಚತುತಾಲೀಸ ಪಿಣ್ಡಿತಾ.

೩೭೭. ತೇವೀಸ ಪಞ್ಚಮಾ ಚೇತಿ, ಸತ್ತಸಟ್ಠಿ ಸಮಿಸ್ಸಿತಾ;

ಅಪ್ಪನಾ ತತ್ಥ ಸಬ್ಬಾಪಿ, ಅಟ್ಠಪಞ್ಞಾಸ ದೀಪಿತಾ.

೩೭೮. ಪಞ್ಚತಿಂಸೇವ ಸಙ್ಖೇಪಾ, ಲೋಕುತ್ತರಮಹಗ್ಗತಾ;

ಅಪ್ಪನಾ ತತ್ಥ ಸಬ್ಬಾಪಿ, ಛಬ್ಬೀಸತಿ ಪಕಾಸಿತಾ.

೩೭೯. ಇದ್ಧಿವಿಧಂ ದಿಬ್ಬಸೋತಂ, ಚೇತೋಪರಿಯನಾಮಕಾ;

ಪುಬ್ಬೇನಿವಾಸಾನುಸ್ಸತಿ, ದಿಬ್ಬಚಕ್ಖೂತಿ ಪಞ್ಚಧಾ.

೩೮೦. ಅಭಿಞ್ಞಾಞಾಣಮೀರೇನ್ತಿ, ರೂಪಾವಚರಪಞ್ಚಮಾ;

ಕುಸಲಞ್ಚ ಕ್ರಿಯಾ ಚೇತಿ, ಭೇದಿತಂ ದುವಿಧಮ್ಪಿ ಚ.

೩೮೧. ತಂ ದ್ವಯಮ್ಪಿ ಸಮ್ಮಿಸ್ಸೇತ್ವಾ, ಪಞ್ಚಾಭಿಞ್ಞಾ ಚ ಲೋಕಿಯಾ;

ಆಸವಕ್ಖಯಞಾಣಞ್ಚ, ಛಳಭಿಞ್ಞಾ ಪವುಚ್ಚರೇ.

೩೮೨. ಲೋಕಿಯಾ ಚ ದಸಾಭಿಞ್ಞಾ, ಭಿನ್ದಿತ್ವಾ ಕುಸಲಕ್ರಿಯಾ;

ಸತ್ತಸತ್ತತಿ ಝಾನಾನಿ, ಅಟ್ಠಸಟ್ಠಿ ಪನಪ್ಪನಾ.

೩೮೩. ಸತ್ತಸತ್ತತಿ ಚಿತ್ತಾನಿ, ಚತುಪಞ್ಞಾಸ ಸಬ್ಬಥಾ;

ಪಚಿತಾನಿ ಚ ಚಿತ್ತಾನಿ, ಏಕತಿಂಸಸತಂ ಸಿಯುನ್ತಿ.

ಇತಿ ಚೇತಸಿಕವಿಭಾಗೇ ಪಭೇದಕಥಾ ನಿಟ್ಠಿತಾ.

ದಸಮೋ ಪರಿಚ್ಛೇದೋ.