ಏಕಾದಸಮೋ ಪರಿಚ್ಛೇದೋ

೧೧. ರಾಸಿಸರೂಪಕಥಾ

೩೮೪. ಸಬ್ಬಂ ಸಭಾವಸಾಮಞ್ಞ-ವಿಸೇಸೇನ ಯಥಾರಹಂ;

ಗತರಾಸಿವಸೇನಾಥ, ಅಟ್ಠಾರಸವಿಧಂ ಕಥಂ.

೩೮೫. ಫಸ್ಸಪಞ್ಚಕರಾಸೀ ಚ, ಝಾನಿನ್ದ್ರಿಯಮಥಾಪರೇ;

ಮಗ್ಗಬಲಹೇತುಕಮ್ಮ-ಪಥಲೋಕಿಯರಾಸಯೋ.

೩೮೬. ನಿರವಜ್ಜಾ ಛ ಪಸ್ಸದ್ಧಿ-ಆದಿಕಾ ಚ ಸತೀಮತಾ;

ಯುಗನನ್ಧಾ ಚ ಸಮಥಾ, ತಥಾ ಯೇವಾಪನಾತಿ ಚ.

೩೮೭. ಫಸ್ಸೋ ಚ ವೇದನಾ ಸಞ್ಞಾ, ಚೇತನಾ ಚಿತ್ತಮೇವ ಚ;

ಫಸ್ಸಪಞ್ಚಕರಾಸೀತಿ, ಪಞ್ಚ ಧಮ್ಮಾ ಪಕಾಸಿತಾ.

೩೮೮. ವಿತಕ್ಕೋ ಚ ವಿಚಾರೋ ಚ, ಪೀತಿ ಚೇಕಗ್ಗತಾ ತಥಾ;

ಸುಖಂ ದುಕ್ಖಮುಪೇಕ್ಖಾತಿ, ಸತ್ತ ಝಾನಙ್ಗನಾಮಕಾ.

೩೮೯. ಸದ್ಧಿನ್ದ್ರಿಯಞ್ಚ ವೀರಿಯಂ, ಸತಿ ಚೇವ ಸಮಾಧಿ ಚ;

ಪಞ್ಞಾ ಚತುಬ್ಬಿಧಾ ವುತ್ತಾ, ಮನೋ ಪಞ್ಚಾಪಿ ವೇದನಾ.

೩೯೦. ಜೀವಿತಿನ್ದ್ರಿಯಮೇಕನ್ತಿ, ಚಕ್ಖಾದೀನಿ ಚ ಸತ್ತಧಾ;

ಬಾವೀಸತಿನ್ದ್ರಿಯಾ ನಾಮ, ಧಮ್ಮಾ ಸೋಳಸ ದೇಸಿತಾ.

೩೯೧. ಆದಿಮಗ್ಗೇ ಅನಞ್ಞಾತ-ಞ್ಞಸ್ಸಾಮೀತಿನ್ದ್ರಿಯಂ ಭವೇ;

ಮಜ್ಝೇ ಅಞ್ಞಿನ್ದ್ರಿಯಂ ಅನ್ತೇ, ಅಞ್ಞಾತಾವಿನ್ದ್ರಿಯನ್ತಿ ಚ.

೩೯೨. ಪಞ್ಞಾನುತ್ತರಚಿತ್ತೇಸು, ಹೋನ್ತಿ ತೀಣಿನ್ದ್ರಿಯಾನಿಪಿ;

ತಿಹೇತುಕೇಸು ಸೇಸೇಸು, ಏಕಂ ಪಞ್ಞಿನ್ದ್ರಿಯಂ ಮತಂ.

೩೯೩. ಸುಖಂ ದುಕ್ಖಿನ್ದ್ರಿಯಞ್ಚೇವ, ಸೋಮನಸ್ಸಿನ್ದ್ರಿಯಂ ತಥಾ;

ದೋಮನಸ್ಸಮುಪೇಕ್ಖಾತಿ, ಪಞ್ಚಧಾ ವೇದನಾ ಕಥಾ.

೩೯೪. ರೂಪಾರೂಪವಸಾ ದ್ವೇಧಾ, ಜೀವಿತಿನ್ದ್ರಿಯಮೇಕಕಂ;

ಚಕ್ಖುಸೋತಘಾನಜಿವ್ಹಾಕಾಯಿತ್ಥಿಪುರಿಸಿನ್ದ್ರಿಯಾ.

೩೯೫. ತತ್ಥ ಜೀವಿತರೂಪಞ್ಚ, ಅಟ್ಠೇತ್ಥ ನ ತು ಗಯ್ಹರೇ;

ತಸ್ಮಾ ನಾಮಿನ್ದ್ರಿಯಾನೇವ, ದಸಪಞ್ಚ ವಿನಿದ್ದಿಸೇ.

೩೯೬. ಸಮ್ಮಾದಿಟ್ಠಿ ಚ ಸಙ್ಕಪ್ಪೋ, ವಾಯಾಮೋ ವಿರತಿತ್ತಯಂ;

ಸಮ್ಮಾಸತಿ ಸಮಾಧಿ ಚ, ಮಿಚ್ಛಾದಿಟ್ಠಿ ಚ ಧಮ್ಮತೋ.

೩೯೭. ಮಗ್ಗಙ್ಗಾನಿ ನವೇತಾನಿ, ದ್ವಾದಸಾಪಿ ಯತೋ ದ್ವಿಧಾ;

ಸಮ್ಮಾಮಿಚ್ಛಾತಿ ಸಙ್ಕಪ್ಪೋ, ವಾಯಾಮೋ ಚ ಸಮಾಧಿ ಚ.

೩೯೮. ಲೋಕಪಾಲದುಕಞ್ಚೇವ, ಹಿರೋತ್ತಪ್ಪಮಥಾಪರಂ;

ಅಹಿರೀಕಮನೋತ್ತಪ್ಪಂ, ದುಕಂ ಲೋಕವಿನಾಸಕಂ.

೩೯೯. ಪಞ್ಚ ಸದ್ಧಾದಯೋ ಚೇತಿ, ಬಲಧಮ್ಮಾ ನವೇರಿತಾ;

ಕಣ್ಹಸುಕ್ಕವಸೇನಾಪಿ, ಪಟಿಪಕ್ಖೇ ಅಕಮ್ಪಿಯಾ.

೪೦೦. ಛ ಹೇತೂ ಹೇತುರಾಸಿಮ್ಹಿ,

ಲೋಭಾಲೋಭಾದಿಕಾ ತಿಕಾ;

ಮೋಮೂಹೇ ಕಙ್ಖಿತುದ್ಧಚ್ಚಾ,

ತತ್ಥ ವುತ್ತಾತಿ ಅಟ್ಠಧಾ.

೪೦೧. ಮಿಚ್ಛಾದಿಟ್ಠಿ ಅಭಿಜ್ಝಾ ಚ, ಬ್ಯಾಪಾದೋ ವಿರತಿತ್ತಯಂ;

ಸಮ್ಮಾದಿಟ್ಠಿನಭಿಜ್ಝಾ ಚ, ಅಬ್ಯಾಪಾದೋ ಚ ಚೇತನಾ.

೪೦೨. ದಸ ಕಮ್ಮಪಥಾನೇತ್ಥ, ವುತ್ತಾ ವಿರತಿಚೇತನಾ;

ಲೋಕಪಾಲವಿನಾಸಾತಿ, ವುತ್ತಾ ಲೋಕದುಕಾ ದ್ವಿಧಾ.

೪೦೩. ಪಸ್ಸದ್ಧಿಆದಿಯುಗಳಾ, ನಿರವಜ್ಜಾ ಛ ರಾಸಯೋ;

ಸತಿ ಚ ಸಮ್ಪಜಞ್ಞಞ್ಚ, ಉಪಕಾರದುಕಂ ಭವೇ.

೪೦೪. ಯುಗನನ್ಧದುಕಂ ನಾಮ, ಸಮಥೋ ಚ ವಿಪಸ್ಸನಾ;

ಪಗ್ಗಹೋ ಚ ಅವಿಕ್ಖೇಪೋ, ಸಮಥದ್ದುಕಮೀರಿತಂ.

೪೦೫. ಯೇ ಸರೂಪೇನ ನಿದ್ದಿಟ್ಠಾ, ಚಿತ್ತುಪ್ಪಾದೇಸು ತಾದಿನಾ;

ತೇ ಠಪೇತ್ವಾವಸೇಸಾ ತು, ಯೇವಾಪನಕನಾಮಕಾ.

೪೦೬. ಛನ್ದೋ ಚ ಅಧಿಮೋಕ್ಖೋ ಚ, ತತ್ರಮಜ್ಝತ್ತತಾ ತಥಾ;

ಉದ್ಧಚ್ಚಂ ಮನಸಿಕಾರೋ, ಪಞ್ಚಾಪಣ್ಣಕನಾಮಕಾ.

೪೦೭. ಮಾನೋ ಚ ಥಿನಮಿದ್ಧಞ್ಚ, ಇಸ್ಸಾ ಮಚ್ಛರಿಯಂ ತಥಾ;

ಕುಕ್ಕುಚ್ಚಮಪ್ಪಮಞ್ಞಾ ಚ, ತಿಸ್ಸೋ ವಿರತಿಯೋಪಿ ಚ.

೪೦೮. ಏತೇ ಅನಿಯತಾ ನಾಮ, ಏಕಾದಸ ಯಥಾರಹಂ;

ತತೋ ಚ ಸೇಸಾ ಸಬ್ಬೇಪಿ, ನಿಯತಾತಿ ಪಕಿತ್ತಿತಾ.

೪೦೯. ಕೇಚಿ ರಾಸಿಂ ನ ಭಜನ್ತಿ, ಕೇಚಿ ಚಾನಿಯತಾ ಯತೋ;

ತಸ್ಮಾ ಯೇವಾಪನಾತೇವ, ಧಮ್ಮಾ ಸೋಳಸ ದೇಸಿತಾ.

೪೧೦. ಸತ್ತತಿಂಸಾವಸೇಸಾ ತು, ತತ್ಥ ತತ್ಥ ಯಥಾರಹಂ;

ಸರೂಪೇನೇವ ನಿದ್ದಿಟ್ಠಾ, ಚಿತ್ತುಪ್ಪಾದೇಸು ಸಬ್ಬಥಾ.

೪೧೧. ದೇಸಿತಾನುತ್ತರುದ್ಧಚ್ಚೇ, ನಾಮತೋ ವಿರತುದ್ಧವಾ;

ತಥಾನುತ್ತರಚಿತ್ತೇಸು, ನಿಯತಂ ವಿರತಿತ್ತಯಂ.

೪೧೨. ಚಿತ್ತಂ ವಿತಕ್ಕೋ ಸದ್ಧಾ ಚ,

ಹಿರೋತ್ತಪ್ಪಬಲದ್ವಯಂ;

ಅಲೋಭೋ ಚ ಅದೋಸೋ ಚ,

ಲೋಭೋ ದೋಸೋ ಚ ದಿಟ್ಠಿ ಚ.

೪೧೩. ಅಹಿರೀಕಮನೋತ್ತಪ್ಪಂ,

ಉದ್ಧಚ್ಚಂ ವಿರತಿತ್ತಯಂ;

ಸೋಳಸೇತೇ ಯಥಾಯೋಗಂ,

ದ್ವೀಸು ಠಾನೇಸು ದೇಸಿತಾ.

೪೧೪. ವೇದನಾ ತೀಸು ವೀರಿಯಂ, ಸತಿ ಚ ಚತುರಾಸಿಕಾ;

ಸಮಾಧಿ ಛಸು ಪಞ್ಞಾ ಚ, ಸತ್ತಟ್ಠಾನೇಸು ದೀಪಿತಾ.

೪೧೫. ಏಕವೀಸ ಪನಿಚ್ಚೇತೇ, ಸವಿಭತ್ತಿಕನಾಮಕಾ;

ಸೇಸಾ ದ್ವತ್ತಿಂಸತಿ ಧಮ್ಮಾ, ಸಬ್ಬೇಪಿ ಅವಿಭತ್ತಿಕಾತಿ.

ಇತಿ ಚೇತಸಿಕವಿಭಾಗೇ ರಾಸಿಸರೂಪಕಥಾ ನಿಟ್ಠಿತಾ.

ಏಕಾದಸಮೋ ಪರಿಚ್ಛೇದೋ.