ನವಮೋ ಪರಿಚ್ಛೇದೋ

೯. ಚೇತಸಿಕಸಙ್ಗಹಕಥಾ

೩೧೫. ಸತ್ತ ಸಾಧಾರಣಾ ಚೇವ, ಛ ಧಮ್ಮಾ ಚ ಪಕಿಣ್ಣಕಾ;

ಸದ್ಧಾದಿ ಪಞ್ಚವೀಸೇತಿ, ಅಟ್ಠತಿಂಸ ಸಮಿಸ್ಸಿತಾ.

೩೧೬. ಕಾಮಾವಚರಪುಞ್ಞೇಸು, ಲಬ್ಭನ್ತಿ ಪಠಮದ್ವಯೇ;

ಸತ್ತತಿಂಸೇವ ದುತಿಯೇ, ಪಞ್ಞಾಮತ್ತವಿವಜ್ಜಿತಾ.

೩೧೭. ತತಿಯೇ ಚ ಯಥಾವುತ್ತಾ, ಪೀತಿಮತ್ತವಿವಜ್ಜಿತಾ;

ಛತ್ತಿಂಸೇವ ಚತುತ್ಥಮ್ಹಿ, ಪಞ್ಞಾಪೀತಿದ್ವಯಂ ವಿನಾ.

೩೧೮. ಮಹಾಕ್ರಿಯಾಸು ಯುಜ್ಜನ್ತಿ, ಹಿತ್ವಾ ವಿರತಿಯೋ ತಥಾ;

ಪಞ್ಚತಿಂಸ ಚತುತ್ತಿಂಸದ್ವಯಂ ತೇತ್ತಿಂಸಕಂ ಕಮಾ.

೩೧೯. ಠಪೇತ್ವಾ ಅಪ್ಪಮಞ್ಞಾ ಚ, ಮಹಾಪಾಕೇಸು ಯೋಜಿತಾ;

ತೇತ್ತಿಂಸಾ ಚೇವ ದ್ವತ್ತಿಂಸದ್ವಯೇಕತ್ತಿಂಸಕಂ ಕಮಾ.

೩೨೦. ಅಪ್ಪಮಞ್ಞಾ ಗಹೇತ್ವಾನ, ಹಿತ್ವಾ ವಿರತಿಯೋ ತಥಾ;

ಪಞ್ಚತಿಂಸೇವ ಪಠಮೇ, ರೂಪಾವಚರಮಾನಸೇ.

೩೨೧. ವಿತಕ್ಕಂ ದುತಿಯೇ ಹಿತ್ವಾ, ವಿಚಾರಞ್ಚ ತತೋ ಪರಂ;

ಚತುತ್ಥೇ ಪನ ಪೀತಿಞ್ಚ, ಅಪ್ಪಮಞ್ಞಞ್ಚ ಪಞ್ಚಮೇ.

೩೨೨. ಯಥಾವುತ್ತಪಕಾರಾವ, ಚತುತ್ತಿಂಸ ಯಥಾಕ್ಕಮಂ;

ತೇತ್ತಿಂಸ ಚೇವ ದ್ವತ್ತಿಂಸ, ಸಮತಿಂಸಞ್ಚ ಲಬ್ಭರೇ.

೩೨೩. ಪಞ್ಚಮೇನ ಸಮಾನಾ ಚ, ಠಪೇತ್ವಾರುಪ್ಪಮಾನಸಾ;

ಭೂಮಾರಮ್ಮಣಭೇದಞ್ಚ, ಅಙ್ಗಾನಞ್ಚ ಪಣೀತತಂ.

೩೨೪. ಅಪ್ಪಮಞ್ಞಾ ಠಪೇತ್ವಾನ, ಗಹೇತ್ವಾ ವಿರತಿತ್ತಯಂ;

ಛತ್ತಿಂಸಾನುತ್ತರೇ ಹೋನ್ತಿ, ಪಠಮಜ್ಝಾನಮಾನಸೇ.

೩೨೫. ವಿತಕ್ಕಂ ದುತಿಯೇ ಹಿತ್ವಾ, ವಿಚಾರಞ್ಚ ತತೋ ಪರಂ;

ಪೀತಿಂ ಹಿತ್ವಾ ಚತುತ್ಥೇ ಚ, ಪಞ್ಚಮೇಪಿ ಚ ಸಬ್ಬಥಾ.

೩೨೬. ಯಥಾವುತ್ತಪ್ಪಕಾರಾವ, ಪಞ್ಚತಿಂಸ ಯಥಾಕ್ಕಮಂ;

ಚತುತ್ತಿಂಸಞ್ಚ ತೇತ್ತಿಂಸ, ತಥಾ ತೇತ್ತಿಂಸ ಚಾಪರೇ.

೩೨೭. ಏವಂ ಬಾವೀಸಧಾ ಭೇದೋ, ಅನವಜ್ಜೇಸು ಸಙ್ಗಹೋ;

ಏಕೂನಸಟ್ಠಿಚಿತ್ತೇಸು, ಅಟ್ಠತಿಂಸಾನಮೀರಿತೋ.

೩೨೮. ವಿರತೀ ಅಪ್ಪಮಞ್ಞಾ ಚ, ಗಹೇತ್ವಾ ಪನ ಸಬ್ಬಸೋ;

ಏಕಮೇಕಂ ಗಹೇತ್ವಾ ಚ, ಪಚ್ಚಕ್ಖಾಯ ಚ ಸಬ್ಬಥಾ.

೩೨೯. ಕಾಮೇಸು ಸತ್ತಧಾ ಪುಞ್ಞೇ, ಚತುಧಾ ಚ ಕ್ರಿಯೇ ತಥಾ;

ರೂಪಜ್ಝಾನಚತುಕ್ಕೇ ಚ, ಕತ್ತಬ್ಬೋಯಮ್ಪಿ ಸಙ್ಗಹೋ.

೩೩೦. ಇಮಿನಾ ಪನುಪಾಯೇನ, ಸಮಸತ್ತತಿ ಭೇದತೋ;

ಅನವಜ್ಜೇಸು ವಿಞ್ಞೇಯ್ಯೋ, ಚಿತ್ತುಪ್ಪಾದೇಸು ಸಙ್ಗಹೋ.

೩೩೧. ಇತಿ ಸಬ್ಬಪ್ಪಕಾರೇನ, ಅನವಜ್ಜವಿನಿಚ್ಛಯಂ;

ಞತ್ವಾ ಯೋಜೇಯ್ಯ ಮೇಧಾವೀ, ಸಾವಜ್ಜೇಸು ಚ ಸಙ್ಗಹಂ.

೩೩೨. ಸತ್ತ ಸಾಧಾರಣಾ ಚೇವ, ಛ ಧಮ್ಮಾ ಚ ಪಕಿಣ್ಣಕಾ;

ಚತ್ತಾರೋ ಪಾಪಸಾಮಞ್ಞಾ, ಧಮ್ಮಾ ಸತ್ತರಸೇವಿಮೇ.

೩೩೩. ಏಕೂನವೀಸಾಸಙ್ಖಾರೇ, ಪಠಮೇ ಲೋಭದಿಟ್ಠಿಯಾ;

ದುತಿಯೇ ಲೋಭಮಾನೇನ, ಯಥಾವುತ್ತಾ ಚ ತತ್ತಕಾ.

೩೩೪. ಅಟ್ಠಾರಸ ವಿನಾ ಪೀತಿಂ, ತತಿಯೇ ಲೋಭದಿಟ್ಠಿಯಾ;

ಚತುತ್ಥೇಪಿ ವಿನಾ ಪೀತಿಂ, ಲೋಭಮಾನೇನ ತತ್ತಕಾ.

೩೩೫. ಪಟಿಘೇ ಚ ವಿನಾ ಪೀತಿಂ, ಅಸಙ್ಖಾರೇ ತಥೇವ ತೇ;

ಲಬ್ಭನ್ತಿ ದೋಸಕುಕ್ಕುಚ್ಚ-ಮಚ್ಛರಿಯಾಹಿ ವೀಸತಿ.

೩೩೬. ಅಸಙ್ಖಾರೇಸು ವುತ್ತಾ ಚ, ಸಸಙ್ಖಾರೇಸು ಪಞ್ಚಧಾ;

ಥಿನಮಿದ್ಧೇನೇಕವೀಸ, ವೀಸ ದ್ವೇವೀಸತಿಕ್ಕಮಾ.

೩೩೭. ಛನ್ದಂ ಪೀತಿಞ್ಚ ಉದ್ಧಚ್ಚೇ, ಹಿತ್ವಾ ಪಞ್ಚದಸೇವ ತೇ;

ಹಿತ್ವಾ ವಿಮೋಕ್ಖಂ ಕಙ್ಖಞ್ಚ, ಗಹೇತ್ವಾ ಕಙ್ಖಿತೇ ತಥಾ.

೩೩೮. ಸತ್ತವೀಸತಿಧಮ್ಮಾನಂ, ಇತಿ ದ್ವಾದಸ ಸಙ್ಗಹಾ;

ದ್ವಾದಸಾಪುಞ್ಞಚಿತ್ತೇಸು, ವಿಞ್ಞಾತಬ್ಬಾ ವಿಭಾವಿನಾ.

೩೩೯. ಹಿತ್ವಾ ಛಾನಿಯತೇ ಧಮ್ಮೇ, ಗಹೇತ್ವಾ ಚ ಯಥಾರಹಂ;

ಚತುತ್ತಿಂಸಾಪಿ ವಿಞ್ಞೇಯ್ಯಾ, ಸಙ್ಗಹಾ ತತ್ಥ ವಿಞ್ಞುನಾ.

೩೪೦. ದ್ವಾದಸಾಕುಸಲೇಸ್ವೇವ, ಞತ್ವಾ ಸಙ್ಗಹಮುತ್ತರಂ;

ಞೇಯ್ಯಾಹೇತುಕಚಿತ್ತೇಸು, ಸಙ್ಗಹಂ ಕಮತೋ ಕಥಂ?

೩೪೧. ಸತ್ತ ಸಾಧಾರಣಾ ಛನ್ದವಜ್ಜಿತಾ ಚ ಪಕಿಣ್ಣಕಾ;

ಹಸಿತುಪ್ಪಾದಚಿತ್ತಮ್ಹಿ, ದ್ವಾದಸೇವ ಪಕಾಸಿತಾ.

೩೪೨. ವೋಟ್ಠಬ್ಬೇ ಚ ವಿನಾ ಪೀತಿಂ, ವೀರಿಯಂ ಸುಖತೀರಣೇ;

ಏಕಾದಸ ಯಥಾವುತ್ತಾ, ಧಮ್ಮಾ ದ್ವೀಸುಪಿ ದೇಸಿತಾ.

೩೪೩. ಮನೋಧಾತುತ್ತಿಕೇ ಚೇವ, ಉಪೇಕ್ಖಾತೀರಣದ್ವಯೇ;

ದಸ ಹೋನ್ತಿ ಯಥಾವುತ್ತಾ, ಹಿತ್ವಾ ವೀರಿಯಪೀತಿಯೋ.

೩೪೪. ಸತ್ತ ಸಾಧಾರಣಾ ಏವ, ಪಞ್ಚವಿಞ್ಞಾಣಸಮ್ಭವಾ;

ಇಚ್ಚಾಹೇತುಕಚಿತ್ತೇಸು, ಪಞ್ಚಧಾ ಸಙ್ಗಹೋ ಠಿತೋ.

೩೪೫. ಇತಿ ಚೇತಸಿಕೇ ಧಮ್ಮೇ, ಚಿತ್ತೇಸು ಗಣಿತೇ ಪುನ;

ಚಿತ್ತೇನ ಸಹ ಸಙ್ಗಯ್ಹ, ಗಣೇಯ್ಯಾಪಿ ಚ ಪಣ್ಡಿತೋ.

೩೪೬. ಅಟ್ಠತಿಂಸಾತಿ ಯೇ ವುತ್ತಾ, ಚಿತ್ತೇನ ಸಹ ತೇ ಪುನ;

ಏಕೂನಚತ್ತಾಲೀಸೇತಿ, ಸಬ್ಬತ್ಥೇಕಾಧಿಕಂ ನಯೇ.

೩೪೭. ಬಾವೀಸೇವಂ ದಸ ದ್ವೇ ಚ, ಪಞ್ಚ ಚೇತಿ ಯಥಾರಹಂ;

ಸಙ್ಗಹಾ ಸಮ್ಪಯುತ್ತಾನಂ, ತಾಲೀಸೇಕೂನಕಾ ಕಥಾ.

೩೪೮. ವಿತಕ್ಕೋ ಚ ವಿಚಾರೋ ಚ, ಪೀತಿ ಪಞ್ಞಾ ತಥಾ ಪನ;

ಅಪ್ಪಮಞ್ಞಾ ವಿರತೀತಿ, ನವ ಧಮ್ಮಾ ಯಥಾರಹಂ.

೩೪೯. ಗಹೇತಬ್ಬಾಪನೇತಬ್ಬಾ, ಭವನ್ತಿ ಅನವಜ್ಜಕೇ;

ಪರಿವತ್ತೇತಿ ಸಬ್ಬತ್ಥ, ವೇದನಾ ತು ಯಥಾರಹಂ.

೩೫೦. ಛನ್ದಾಧಿಮೋಕ್ಖವೀರಿಯಾ, ಸದ್ಧಾದೇಕೂನವೀಸತಿ;

ಫಸ್ಸಾದಯೋ ಛಳೇವಾತಿ, ನ ಚಲನ್ತಟ್ಠವೀಸತಿ.

೩೫೧. ತೇರಸೇವ ತು ಸಾವಜ್ಜೇ, ಛಳೇವಾಹೇತುಮಾನಸೇ;

ನ ಚಲನ್ತಿ ದಸ ಅಞ್ಞೇ, ಚುದ್ದಸಾ ಛ ಚ ಸಮ್ಭವಾತಿ.

ಇತಿ ಚೇತಸಿಕವಿಭಾಗೇ ಚೇತಸಿಕಸಙ್ಗಹಕಥಾ ನಿಟ್ಠಿತಾ.

ನವಮೋ ಪರಿಚ್ಛೇದೋ.